Yeˬlaˬmiˇ 44 - Akha

Iˇjiˇtuˆ miˇ kʼahˬ laꞈ kʼoeˇ jawˇ-eu Iˇsaˬleˬlaˆ tsawˇ haˬ deuˬ gʼaˇ duˬ Sahˬpaˬ Miˬyehˇ-euˬ dawˬ

¹ Iˇjiˇtuˆ miˇ kʼahˬ laꞈ kʼoeˇ jaˆ-eu Miˇgaˬdawˇlaˆ meuˬ, Taˬpaˬneˬ meuˬ, Mehˇpiˇ meuˬ hawˇ-eu, Iˇjiˇtuˆ miˇ kʼahˬ laꞈ oˆ dzaˬ-ahˇ kʼaˇ jawˇ-eu Iˇsaˬleˬlaˆ tsawˇ haˬ dawˬ tawˆ luꞈ-ahˇ taꞈ leˇ-awˇ, Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

² Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ kʼaˇ jaˆ-eu meuˬ dawˬ tawˆ luꞈ kʼoeˇ taˆ, ngaˬ neh bi keuˆ le-euˬ luˬ-iˇ seˇ-iˇ-eu jeˬ-ahˇ naw maꞈ ya mawˇ gʼaˬ-euˬ meh. Nymˬ-mˇ keuˆ ni meuˬ kʼoeˇ deuˬ yaw cawˆ-ehˇ jaˆ-awˇ, tsawˇ haˬ tiˬ gʼaˬ-iˬ maˬ jawˇ-a.

³ Aˬ jeˬ miˇ neh ehˇ naˇ, kʼoeˇ gaˇ jawˇ-euˬ tsawˇ haˬ deuˬ yaw haiˬ jeˬ mˇ-awˇ, ngaˬ-ahˇ nui ma bi pehˇ laꞈ-euˬ meh. Aˬ yawꞈ maꞈ maˬ ehˇ, naw maꞈ maˬ ehˇ, naw maꞈ-euˬ aˬ poeˬ aˬ bawˇ deuˬ maˬ ehˇ, tiˬ jawˇ-iˬ uˬ duˬ maˬ tahˬ haw-euˬ miˬ yehˇ nui deuˬ-ahˇ, aˬ yawꞈ maꞈ uˬ duˬ tahˬ-awˇ lawˇ nehˬ shehˇ nehˬ-euˬ meh.

⁴ Miˬyehˇ gʼaˇ duˬ ngehˬ dah-euˬ ngaˬ-euˬ zaˬ kʼaˆ deuˬ-ahˇ, naw maꞈ jawˇ gaˇ maˬ tsehˆ leˇ ni ngaˇ pyehˬ gʼeh leꞈ-awˇ, ngaˇ bye dui dui-eu yaw jawꞈ jeˬ taˬ paˇ mˇ lehˇ bi ehˇ gaˬ le-euˬ ma.

⁵ Ehˇ kʼawꞈ, naw maꞈ maˬ naˇ haˬ geuꞈ-ehˇ, yaw haiˬ jeˬ mˇ-eu maˬ naˬ leˇ-eu uˬ taꞈ, miˬ yehˇ nui deuˬ-ahˇ lawˇ-eu shehˇ-eu maˬ byehˇ-a.

⁶ Kʼoeˇ miˇ neh, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu, Yeˬluˇsaˬlehˬ meuˬ-euˬ gaˇ ma doe ni, ngaˇ nui ma pehˇ dui dui-eu jeˬ tahˬ kʼaˇ daˆ nehˬ-awˇ, miˬ dzaˬ bi doˆ laˇ-euˬ ma. Meuˬ kʼoeˇ deuˬ cawˆ-iˇ jiˇ-awˇ, iˬ nah kʼaˇ ya mawˇ-eu loꞈ-ehˇ, guˆ laˇ paˬ-ehˇ pyeuꞈ-iˇ-euˬ meh.

⁷ “Teu miˇ neh, Iˇsaˬleˬlaˆ-euˬ Miˬyehˇ pyeuꞈ-eu ngaˇ Baoˬ huiˬ-eu Sahˬpaˬ Miˬyehˇ-aˬ, aˬ jeˬ miˇ neh naw maꞈ yawˬ ha-ahˇ bi deuˬ laˇ-eu yaw haiˬ jeˬ mˇ te lehˇ naˇ haˬ-eu ma. Kʼaˬ dzeˇ zaˬ deuˬ, zaˬ miˬ zaˬ deuˬ hawˇ-eu, zaˬ yaw nyiˇ deuˬ-ahˇ keuˆ ni, naw maꞈ-euˬ tsawˇ haˬ tiˬ gʼaˬ-iˬ maˬ dzeˇ-ehˇ pyeuꞈ-iˇ ngeh keuˆ ni, dawˬ tawˆ luꞈ kʼoeˇ taˆ luˬ-iˇ seˇ-iˇ-eu jeˬ bi keuˆ le mawꞈ te loˇ.

⁸ Naw maꞈ jawˇ uˇ le-euˬ Iˇjiˇtuˆ miˇ kʼahˬ heu kʼahˬ-ahˇ tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-awˇ, miˬ yehˇ nui deuˬ-ahˇ lawˇ-eu shehˇ-eu laꞈ kʼoeˇ, aˬ jeˬ miˇ neh ngaˇ nui ma pehˇ ni naw maꞈ mˇ te. Miˇ kʼahˬ tsawˇ jeuˬ dawˬ tawˆ luꞈ naw maꞈ-ahˇ ja doeˇ-awˇ, naw maꞈ-euˬ tsawˇ myahˇ kuˇ kuˇ-ehˇ yaˬ kʼehˇ bi yaˬ gaˇ keuˆ ni, naw maꞈ yawˬ haˇ yawˬ ha laˆ cawˆ-eu lehˇ mˇ-eu gʼeh te loˇ.

⁹ Naw maꞈ-euˬ aˬ poeˬ aˬ bawˇ deuˬ, Yuˇdaˆ sahˬ paˬ deuˬ hawˇ-eu aˬ yawꞈ maꞈ-euˬ miˬ zaˬ deuˬ, naw maꞈ hawˇ-eu naw maꞈ-euˬ miˬ zaˬ deuˬ neh, Yuˇdaˆ meuˬ deuˬ hawˇ-eu Yeˬluˇsaˬlehˬ meuˬ-euˬ gaˇ ma doe ni yaw haiˬ jeˬ mˇ byah yaꞈ-euˬ gaˇ naw maꞈ ngehˇ shaw teˬ loˇ.

¹⁰ Iˬ nah keuˆ ni naw maꞈ nui nahˬ nui yu maˬ ahˇ-a siˬ. Naw maꞈ ngaˬ-ahˇ maˬ taˬ huiˬ-ehˇ, naw maꞈ-euˬ aˬ poeˬ aˬ bawˇ deuˬ hawˇ-eu naw maꞈ-ahˇ ngaˬ neh biꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ maˬ caw teh-a.

¹¹ “Kʼoeˇ miˇ neh, Iˇsaˬleˬlaˆ-euˬ Miˬyehˇ pyeuꞈ-eu ngaˇ Baoˬ huiˬ-eu Sahˬpaˬ Miˬyehˇ, naw maꞈ kʼoeˇ taˆ luˬ-iˇ seˇ-iˇ-eu jeˬ bi keuˆ le-eu laꞈ kʼoeˇ, Yuˇdaˆ miˇ kʼahˬ kʼahˬ lah ni-ahˇ laˆ cawˆ ma.

¹² Baˬbuˇloˬ miˇ kʼahˬ-ahˇ maˬ bi nyehꞈ daˆ gʼeh ni dzeˇ yaꞈ-euˬ, Iˇjiˇtuˆ miˇ kʼahˬ-ahˇ jawˇ-iˇ ma lehˇ noeˬ tsehˆ taˬ-euˬ Yuˇdaˆ tsawˇ haˬ kʼoeˇ deuˬ dawˬ tawˆ luꞈ, ya luˬ ya seˇ-iˇ jiˇ tehꞈ-a. Aˬ yawꞈ maꞈ huiˬ zaˬ nyiˇ zaˬ dawˬ tawˆ luꞈ, Iˇjiˇtuˆ miˇ kʼahˬ laꞈ kʼoeˇ, guiˇ deuˆ-eu baˬ da neh maˬ ngeuˇ naˇ, mehꞈ-eu shuꞈ-eu baˬ da neh ya shiˇ jiˇ tehꞈ-a. Aˬ yawꞈ maꞈ kʼoeˇ taˆ guˆ dui dui laˇ paˬ-ehˇ gʼeh-eu jeˬ keuˆ le tehꞈ-a. Aˬ cawˬ tsawˇ jeuˬ aˬ yawꞈ maꞈ-ahˇ ja bu ja doeˇ-awˇ, aˬ yawꞈ maꞈ-euˬ tsawˇ myahˇ-ahˇ gʼoe gʼoe-ehˇ yaˬ kʼehˇ yaˬ tehꞈ-a.

¹³ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ ngaˬ neh kʼehˬ nehˬ gʼaˬ-euˬ loꞈ-ehˇ, Iˇjiˇtuˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-ahˇ kʼawꞈ, guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ laꞈ kʼoeˇ ngaˇ kʼehˬ nehˬ ma.

¹⁴ Baˬbuˇloˬ miˇ kʼahˬ-ahˇ maˬ bi nyehꞈ daˆ gʼeh ni Yuˇdaˆ miˇ kʼahˬ laꞈ kʼoeˇ dzeˇ yaꞈ-awˇ, Iˇjiˇtuˆ miˇ kʼahˬ-ahˇ kʼaˇ jawˇ-iˇ-euˬ tsawˇ haˬ dawˬ tawˆ luꞈ, tiˬ gʼaˬ-iˬ maˬ bi dzeuˇ-iˇ. Maˬ gʼaˬ maˬ na-ehˇ cehˆ dzeuˇ-euˬ tsawˇ haˬ heu myaˆ gʼaˬ maˬ ngeuˇ naˇ, tsawˇ haˬ tiˬ gʼaˬ-iˬ aˬ yawꞈ maꞈ gʼoꞈ jawˇ laˇ mawꞈ dui dui-eu Yuˇdaˆ miˇ kʼahˬ laꞈ kʼoeˇ maˬ paˇ ya gʼoꞈ jawˇ laˇ-aˇ.”

¹⁵ Kʼoeˇ naˇ, yawˬ ha-euˬ miˬ zaˬ deuˬ miˬ yehˇ nui deuˬ-ahˇ lawˇ-eu shehˇ-eu jeˬ mˇ-euˬ gaˇ kawˆ kʼaˇ siˬ nya-eu kʼaˬ dzeˇ zaˬ deuˬ maˬ ehˇ, kʼoeˇ gaˇ kʼaˇ yawꞈ luꞈ-eu zaˬ miˬ zaˬ deuˬ maˬ ehˇ, Iˇjiˇtuˆ miˇ kʼahˬ laꞈ oˆ dzaˬ-ahˇ jawˇ-eu Iˇsaˬleˬlaˆ tsawˇ haˬ deuˬ ahˇ leˇ-ehˇ, tsawˇ haˬ aˇ maꞈ maꞈ ma kʼoeˇ maꞈ ngaˬ-ahˇ heu loꞈ-ehˇ ehˇ-eu meh.

¹⁶ “Sahˬpaˬ Miˬyehˇ-euˬ tsawˇ myahˇ uˬ moˆ nawˬ neh nga maꞈ-ahˇ ehˇ nehˬ laꞈ-euˬ jeˬ-ahˇ, nga maꞈ maˬ naˇ haˬ.

¹⁷ Nga maꞈ neh mˇ ma lehˇ kʼaˇ ehˇ taˬ-euˬ yawˬ jeˬ na luꞈ mˇ jiˇ ma. Nga maꞈ-euˬ aˬ poeˬ aˬ bawˇ deuˬ, nga maꞈ-euˬ sahˬ paˬ hawˇ-eu aˬ yuiꞈ aˬ tsu deuˬ neh, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu , Yeˬluˇsaˬlehˬ meuˬ-euˬ gaˇ ma doe ni jahˇ-euˬ loꞈ-ehˇ, mˬ taˆ miˬ yehˇ ma-ahˇ nga maꞈ lawˇ nehˬ shehˇ nehˬ-awˇ, aˬ gaꞈ dzaˇ uiˇ shehˆ-awˇ lawˇ-eu jeˬ lawˇ ma. Kʼoeˇ ngeh, nga maꞈ maˬ dzaˬ maˬ dawˇ jiˇ coeˇ ni baw le za le-euˬ uˬ taꞈ, shaˬ-eu zahˬ-eu jeˬ maˬ ya tahˬ puˬ haw-aˬ.

¹⁸ Ehˇ kʼawꞈ, mˬ taˆ miˬ yehˇ ma-ahˇ lawˇ-eu shehˇ-eu jeˬ hawˇ-eu, aˬ gaꞈ dzaˇ uiˇ shehˆ-awˇ lawˇ-eu jeˬ maˬ paˇ lawˇ ni byehˇ ngeh tiˬ nah neh, nga maꞈ tiˬ jeˬ-iˬ maˬ jaˆ-ehˇ pyeuꞈ-iˇ-awˇ, guiˇ deuˆ-eu jeˬ hawˇ-eu mehꞈ-eu shuꞈ-eu jeˬ baˬ da neh, nga maꞈ-euˬ tsawˇ haˬ deuˬ ya shiˇ-euˬ ma.”

¹⁹ Kʼoeˇ naˇ, zaˬ miˬ zaˬ deuˬ heu loꞈ-ehˇ paˇ ehˇ-eu meh. “Mˬ taˆ miˬ yehˇ ma-ahˇ duˇ leˇ-eu kaˬ muˇ deuˬ nga maꞈ jahˇ-awˇ, lawˇ-eu shehˇ-eu jeˬ hawˇ-eu aˬ gaꞈ dzaˇ uiˇ shehˆ-awˇ lawˇ-eu jeˬ aˬ yawꞈ-ahˇ lawˇ nehˬ ngeh, nga maꞈ kʼoeˇ loꞈ-ehˇ mˇ gaˇ nga maꞈ-euˬ kʼaˬ dzeˇ zaˬ deuˬ nui kʼahˇ shiˇ-euˬ meh.”

²⁰ Kʼoeˇ naˇ, ngaˬ-ahˇ kʼoeˇ loꞈ-ehˇ ehˇ laˇ-eu kʼaˬ dzeˇ zaˬ hawˇ-eu zaˬ miˬ zaˬ kʼoeˇ deuˬ dawˬ tawˆ luꞈ-ahˇ, ngaˇ heu loꞈ-ehˇ ehˇ nehˬ-eu ma.

²¹ “Naw maꞈ hawˇ-eu naw maꞈ-euˬ aˬ poeˬ aˬ bawˇ deuˬ neh maˬ ehˇ, naw maꞈ-euˬ sahˬ paˬ hawˇ-eu aˬ yuiꞈ aˬ tsu deuˬ neh maˬ ehˇ, miˇ kʼahˬ zaˬ deuˬ neh maˬ ehˇ, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu, Yeˬluˇsaˬlehˬ meuˬ-euˬ gaˇ ma doe ni lawˇ-euˬ shehˇ-euˬ jeˬ-ahˇ, Sahˬpaˬ Miˬyehˇ maˬ siˬ nya-aˇ lehˇ noeˬ te loˇ. Maˬ ngeuˇ naˇ, ngehˇ byoˆ nehˬ laꞈ tehꞈ-a lehˇ noeˬ te loˇ.

²² Iˬ nah naw maꞈ-euˬ miˇ kʼahˬ cawˆ-iˇ-awˇ, tsawˇ haˬ tiˬ gʼaˬ-iˬ maˬ jawˇ-ehˇ, guˆ dui dui laˇ paˬ-ehˇ pyeuꞈ-iˇ taˬ-euˬ miˇ neh, aˬ cawˬ yaˬ kʼehˇ yaˬ ngeh tsawˇ myahˇ kuˇ duˬ pyeuꞈ-iˇ-euˬ maˬ ngeuˇ-a loˇ. Naw maꞈ neh mˇ-euˬ yaw haiˬ jeˬ hawˇ-eu maˬ muiˬ maˬ jaˬ-eu jeˬ-ahˇ, Sahˬpaˬ Miˬyehˇ maˬ oˇ coeˇ laˇ-euˬ miˇ neh, kʼoeˇ loꞈ-ehˇ bi keuˆ le-euˬ maˬ ngeuˇ nga loˇ.

²³ Heu poˆ jawˇ naw maꞈ kʼoeˇ taˆ bi keuˆ le-euˬ luˬ-iˇ seˇ-iˇ-eu jeˬ-aˬ, miˬ yehˇ nui deuˬ-ahˇ naw maꞈ lawˇ-eu shehˇ-eu jeˬ mˇ-awˇ, Sahˬpaˬ Miˬyehˇ neh biꞈ taˬ-euˬ dawˬ-ahˇ maˬ naˇ haˬ ni, aˬ yawꞈ-ahˇ mˇ lehˬ-euˬ miˇ neh meh.”

²⁴ Kʼaˬ dzeˇ zaˬ hawˇ-eu zaˬ miˬ zaˬ dawˬ tawˆ luꞈ-ahˇ ngaˇ heu loꞈ-ehˇ ehˇ nehˬ-euˬ ma. “Yuˇdaˆ miˇ kʼahˬ-ahˇ neh, Iˇjiˇtuˆ miˇ kʼahˬ laꞈ kʼoeˇ kʼaˇ jawˇ le-euˬ tsawˇ haˬ dawˬ tawˆ luꞈ Sahˬpaˬ Miˬyehˇ-euˬ dawˬ-ahˇ naˇ haˬ sheˇ.

²⁵ Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. ‘Naw maꞈ hawˇ-eu naw maꞈ-euˬ miˬ zaˬ deuˬ, mˬ taˆ miˬyehˇ ma-ahˇ lawˇ-eu shehˇ-eu jeˬ mˇ-awˇ, aˬ gaꞈ dzaˇ uiˇ shehˆ-awˇ lawˇ-eu jeˬ lawˇ nehˬ ma lehˇ saˇ jaˇ dzaˬ-euˬ loꞈ-ehˇ, aˬ laꞈ kʼawꞈ mˇ keuˆ-euˬ meh. Muiˬ ngaˇ. Naw maꞈ neh saˇ jaˇ kʼaˇ dzaˬ taˬ-euˬ loꞈ-ehˇ mˇ byah mˇ byah-ehˇ dehꞈ-awˬ.

²⁶ Ehˇ kʼawꞈ, nymˬ-mˇ poˆ jawˇ-aˬ, Sahˬpaˬ Miˬyehˇ pyeuꞈ-eu ngaˬ neh, baoˬ huiˬ-eu ngaˬ-euˬ tsawˇ myahˇ-ahˇ gʼoe-awˇ Iˇjiˇtuˆ miˇ kʼahˬ laꞈ kʼoeˇ jawˇ luꞈ-eu naw maꞈ Iˇsaˬleˬlaˆ tsawˇ haˬ dawˬ tawˆ luꞈ-ahˇ saˇ jaˇ biꞈ gaˇ naˇ haˬ-awˬ. Naw maꞈ ngaˬ-euˬ tsawˇ myahˇ-ahˇ gʼoe gʼoe-ehˇ, dehꞈ luꞈ-eu Sahˬpaˬ Miˬyehˇ mehˬ shi kamˬ-eu ma lehˇ tiˬ jawˇ-iˬ maˬ paˇ bi ehˇ ma.

²⁷ Naw maꞈ maˬ baw maˬ za le-eu uˬ taꞈ, ya luˬ ya seˇ-iˇ gaˇ ngaˇ haw ma. Naw maꞈ tiˬ gʼaˬ-iˬ maˬ dzeuˇ-iˇ nya ni, guiˇ deuˆ-eu baˬ da neh maˬ ngeuˇ naˇ, naˇ-eu gawˇ-eu baˬ da neh ya shiˇ jiˇ tehꞈ-a.

²⁸ Ehˇ kʼawꞈ, heu myaˆ gʼaˬ uˬ kʼawˇ buˬ-iˇ-awˇ, Iˇjiˇtuˆ miˇ kʼahˬ-ahˇ neh Yuˇdaˆ miˇ kʼahˬ-ahˇ gʼoꞈ doˆ laˇ tehꞈ-a. Kʼoeˇ ngeh jawˇ, kʼaˇ dzeuˇ-iˇ-euˬ tsawˇ haˬ kʼoeˇ deuˬ, ngaˬ-euˬ dawˬ tsaˬ nga loˇ, aˬ yawꞈ maꞈ-euˬ dawˬ tsaˬ nga loˇ lehˇ, ya siˬ duˬ tehꞈ-a.

²⁹ Jawˇ duˬ heu tsahˇ-ahˇ naw maꞈ-ahˇ ngaˇ kʼehˬ nehˬ ma lehˇ ehˇ-euˬ dawˬ hawˇ-eu, naw maꞈ kʼoeˇ taˆ luˬ-iˇ seˇ-iˇ-eu jeˬ bi keuˆ le ma lehˇ, Sahˬpaˬ Miˬyehˇ pyeuꞈ-eu ngaˬ neh saˇ jaˇ dzaˬ taˬ-euˬ dawˬ deuˬ aˬ diˇ aˬ maˇ ngeuˇ-eu gaˇ kawˆ, naw maꞈ-ahˇ bi siˬ bi mawˇ duˬ ma.

³⁰ Yuˇdaˆ sahˬ paˬ Zeˬdaˬkiˇ-ahˇ, aˬ yawꞈ-ahˇ muiˇ-awˇ sehꞈ mawꞈ-eu Baˬbuˇloˬ sahˬ paˬ Neˬbuˬkaˬneˬzaˬ-euˬ laꞈ-ahˇ ngaˬ neh a nehˬ-euˬ loꞈ-ehˇ, Iˇjiˇtuˆ sahˬ paˬ Hawˇpaˬyaˬ-ahˇ kʼawꞈ, aˬ yawꞈ-ahˇ muiˇ-awˇ sehꞈ mawꞈ-eu deuˬ-euˬ aˬ laꞈ laꞈ kʼoeˇ ngaˇ a ahˇ nehˬ ma’ lehˇ ehˇ-eu meh.”