Yeˬlaˬmiˇ 37 - Akha

Guiˬ lahˬ shaˇ nehˬ laꞈ lehˇ Yeˬlaˬmiˇ-ahˇ Zeˬdaˬkiˇ shaˇ-eu

¹ Baˬbuˇloˬ sahˬ paˬ Neˬbuˬkaˬneˬzaˬ neh, Yeˬhawˇyaˬkmˬ-euˬ aˬ li Yeˬhawˇyaˬciˬ-euˬ jawˇ duˬ-ahˇ, Yawˇshiˆ-euˬ aˬ li Zeˬdaˬkiˇ-ahˇ Yuˇdaˆ sahˬ paˬ bi geuꞈ-euˬ meh.

² Ehˇ kʼawꞈ, Sahˬpaˬ Miˬyehˇ neh ngaˬ-ahˇ biꞈ laꞈ-eu dawˬ-ahˇ, Zeˬdaˬkiˇ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ maˬ ehˇ, aˬ yawꞈ-euˬ miˇ kʼahˬ zaˬ deuˬ maˬ ehˇ, maˬ naˇ haˬ-a.

³ Sahˬ paˬ Zeˬdaˬkiˇ-aˬ, Sheˬleˬmiˇ-euˬ aˬ li Yeˬhuˇkaˬlaˆ hawˇ-eu Mawˇseˬyaˇ-euˬ aˬ li piˇ ma Zaˬpaˬniˇ-ahˇ ngaˇ jawˇ gaˇ pyehˬ gʼeh leꞈ-awˇ, ‘Aˬ dui-euˬ miˇ kʼahˬ gʼaˇ duˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ nehˬ laꞈ’ lehˇ bi ehˇ le-euˬ meh.

⁴ Kʼoeˇ ngeh keuˆ ni ngaˬ-ahˇ paꞈ kuˆ laꞈ kʼoeˇ maˬ bi nyehꞈ ahˇ-ehˇ, miˇ kʼahˬ zaˬ deuˬ kʼaˇ jawˇ gaˇ cah cah-ehˇ jawˇ-euˬ ma.

⁵ Baˬbuˇloˬ guiˇ maꞈ deuˬ Yeˬluˇsaˬlehˬ meuˬ-ahˇ loꞈ jawˬ taˬ-euˬ meh. Ehˇ kʼawꞈ, Iˇjiˇtuˆ guiˇ maꞈ deuˬ miˇ kaˬ tsehˆ doˆ-awˇ laˇ luꞈ-eu gaˇ kawˆ ya gaˬ ngeh, aˬ yawꞈ maꞈ naˇ kʼah paw jiˆ gʼoꞈ leˇ-euˬ meh.

⁶ Kʼoeˇ ngeh, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

⁷ “Zeˬdaˬkiˇ-ahˇ heu loꞈ-ehˇ ehˇ nehˬ-awˬ. Iˇjiˇtuˆ guiˇ maꞈ deuˬ nawˬ-ahˇ caw ba laˇ-eu lehˇ laˇ luꞈ meh. Ehˇ kʼawꞈ, aˬ yawꞈ maꞈ gʼawˬ myahˇ ni maˬ jawˇ-ehˇ gʼoꞈ-iˇ tehꞈ-a.

⁸ Kʼoeˇ naˇ, Baˬbuˇloˬ tsawˇ haˬ deuˬ paˇ gʼoꞈ poˆ le-awˇ, meuˬ-ahˇ guiˇ deuˆ gʼaˬ-awˇ, miˬ dzaˬ keuˬ dzeh tehꞈ-a.

⁹ Baˬbuˇloˬ tsawˇ haˬ deuˬ maˬ paˇ gʼoꞈ poˆ le-aˇ lehˇ nawˇ noeˬ naˇ, lehˬ dui dui-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma. Baˬbuˇloˬ tsawˇ haˬ deuˬ aˬ diˇ gʼoꞈ poˆ le meh.

¹⁰ Baˬbuˇloˬ guiˇ maꞈ deuˬ-ahˇ nawˇ deuˆ gʼaˬ-awˇ, bi deuˆ naˇ-euˬ tsawˇ haˬ deuˬ tehꞈ-ehˇ dzeuˇ-iˇ-awˇ sehˬ gʼawˆ laꞈ kʼoeˇ ga-eu kʼawꞈ, tsawˇ haˬ kʼoeˇ deuˬ paˇ tuˇ laˇ-awˇ, meuˬ heu meuˬ meuˬ lah-ehˇ kʼawˇ zeuˇ maˬ mawˇ laˇ-ehˇ pyeuꞈ-iˇ ni keuˬ puiˆ byoˆ leꞈ tehꞈ-a lehˇ ehˇ nehˬ-awˬ.”

Yeˬlaˬmiˇ-ahˇ paꞈ kuˆ-ahˇ dawˆ-euˬ

¹¹ Iˇjiˇtuˆ guiˇ maꞈ deuˬ laˇ peh luꞈ-eu miˇ neh, Baˬbuˇloˬ guiˇ maꞈ deuˬ Yeˬluˇsaˬlehˬ meuˬ-ahˇ neh jiˆ gʼoꞈ kʼoꞈ leˇ-euˬ meh.

¹² Kʼoeˇ ngeh, nga pehˬ-euˬ nymˇ jiˇ laꞈ kʼoeˇ ngaˬ-ahˇ oꞈ-eu jeˬ biˇ deuˬ yuˇ geuꞈ leˇ-eu gʼaˇ duˬ, Yeˬluˇsaˬlehˬ meuˬ-ahˇ neh, Beˬyaˬmiˬ miˇ kʼahˬ-ahˇ ngaˇ gʼoꞈ leˇ-euˬ ma.

¹³ Ehˇ kʼawꞈ, Beˬyaˬmiˬ lahˇ kʼehˬ-ahˇ ngaˇ le keuˆ ngeh, lahˇ kʼehˬ-ahˇ loꞈ piˇ-eu yehˇ pyeuꞈ-eu Iˇliˇjaˬ lehˇ kuˇ-eu gʼaˬ, “Nawˇ Baˬbuˇloˬ tsawˇ haˬ jawˇ paw cehˆ uˇ leˇ-eu lehˇ gʼeh-eu nga” lehˇ ngaˬ-ahˇ ehˇ-eu meh. Iˇliˇjaˬ-euˬ aˬ da-aˬ, Sheˬleˬmiˇ meh. Aˬ yawꞈ-euˬ aˬ bawˇ-aˬ, Haˬnaˬniˇyaˆ meh.

¹⁴ Ngaˇ gʼeh, “Maˬ ngeuˇ-eˬ. Baˬbuˇloˬ tsawˇ haˬ deuˬ jawˇ paw cehˆ uˇ-iˇ-eu lehˇ gʼeh-eu maˬ ngeuˇ” lehˇ ehˇ kʼoꞈ nehˬ-euˬ ma. Ehˇ kʼawꞈ, Iˇliˇjaˬ maˬ naˇ haˬ-ehˇ, ngaˬ-ahˇ nyehꞈ-awˇ, yaw huiˬ yaw mahˇ deuˬ jawˇ gaˇ tsahˇ gʼeh-euˬ meh.

¹⁵ Aˬ yawꞈ maꞈ ngaˬ-ahˇ nui ma pehˇ dui dui-eu miˇ neh, ngaˬ-ahˇ diˬ-awˇ, Yawˇnaˆshaˬ-euˬ nymˇ-ahˇ nyehꞈ lahˇ taˬ-awˬ lehˇ dawˬ biꞈ-euˬ meh. Yawˇnaˆshaˬ-aˬ, saˇ naˇ gaˇ mˇ-eu paw aˬ yuiꞈ geuꞈ-awˇ, aˬ yawꞈ-euˬ nymˇ-ahˇ paꞈ kuˆ loꞈ-ehˇ laˆ pyeuꞈ taˬ-euˬ meh.

¹⁶ Miˇ tsaˬ dawˬ dah jaˆ-eu paꞈ kuˆ laꞈ kʼoeˇ ngaˬ-ahˇ nyehꞈ ahˇ-awˇ, gʼawˬ myahˇ ni bi jawˇ nehˬ laꞈ-euˬ meh.

¹⁷ Aˇ nah, sahˬ paˬ Zeˬdaˬkiˇ neh ngaˬ-ahˇ bi sheuˬ laˬ laˇ-awˇ, aˬ yawꞈ-euˬ hawˇ nymˇ laꞈ kʼoeˇ nga nyaꞈ yaw kaˬ tehꞈ-ehˇ, “Sahˬpaˬ Miˬyehˇ neh dawˬ biꞈ taˬ-euˬ jaˆ meh loˇ” lehˇ aˬ yawꞈ ngaˬ-ahˇ naˇ haˬ ngeh, “Jaˆ meh. Nawˬ-ahˇ aˬ cawˬ nyehꞈ-awˇ Baˬbuˇloˬ sahˬ paˬ-euˬ aˬ laꞈ laꞈ kʼoeˇ a nehˬ tehꞈ-a” lehˇ ehˇ kʼoꞈ nehˬ-euˬ ma.

¹⁸ Kʼoeˇ naˇ ngaˇ heu loꞈ-ehˇ ehˇ nehˬ-euˬ ma. “Naw maꞈ ngaˬ-ahˇ paꞈ kuˆ-ahˇ dawˆ paˬ-ehˇ, nawˇ hawˇ-eu nawˬ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, tsawˇ haˬ heu deuˬ-ahˇ maˬ ehˇ, ngaˬ neh mˇ lehˬ taˬ-euˬ aˬ jeˬ jaˆ ta.

¹⁹ Nawˬ-ahˇ maˬ ehˇ, nawˬ-euˬ miˇ kʼahˬ-ahˇ maˬ ehˇ, Baˬbuˇloˬ sahˬ paˬ guiˇ maˬ deuˆ le-aˇ lehˇ ehˇ-eu, Miˬyehˇ gʼaˇ duˬ ngehˬ dah-eu nawˬ-euˬ tsawˇ haˬ kʼoeˇ deuˬ aˬ jeˬ pyeuꞈ jiˇ-euˬ ta.

²⁰ Sahˬ paˬ-oˇ, ngaˇ ehˇ gaˇ naˇ haˬ-awˇ, ngaˬ neh kʼaˇ ehˇ-euˬ loꞈ-ehˇ mˇ-awˬ lehˇ, nymˬ-mˇ nawˬ-ahˇ ngaˇ shaˇ-eu ma. Tiˬ jeˬ gʼeh-awˇ neh-iˬ, Yawˇnaˆshaˬ-euˬ nymˇ-ahˇ jaˆ-eu paꞈ kuˆ laꞈ kʼoeˇ ngaˬ-ahˇ taˬ paˇ nyehꞈ-ahˇ poˆ nehˬ laꞈ. Kʼoeˇ gaˇ nyehꞈ ahˇ poˆ nehˬ laꞈ naˇ, maˇ maˇ ni shiˇ-eu miˇ-a” lehˇ ehˇ nehˬ-euˬ ma.

²¹ Kʼoeˇ ngeh jawˇ, sahˬ paˬ hawˇ nymˇ-ahˇ jaˆ-eu paꞈ kuˆ laꞈ kʼoeˇ ngaˬ-ahˇ nyehꞈ ahˇ-awˇ mawˬ tawꞈ tawꞈ tehˬ taꞈ-eu gʼaˇ duˬ, sahˬ paˬ Zeˬdaˬkiˇ dawˬ biꞈ-euˬ meh. Ngaˇ kʼoeˇ gaˇ uˇ-awˇ, meuˬ laꞈ kʼoeˇ kaˬ muˇ maˬ jaˆ-ehˇ pyeuꞈ-iˇ ngeh keuˆ ni, kaˬ muˇ jahˇ-eu tsawˇ haˬ deuˬ ngaˬ-ahˇ tiˬ nah-euˬ kaˬ muˇ tiˬ siˬ bi dzaˬ laꞈ-euˬ meh.