Yeˬlaˬmiˇ 36 - Akha

Uˬ duˬ tahˬ nymˇ nymˇ ma laꞈ kʼoeˇ Baˬluˆ sahˬ boꞈ paˇ yoˆ gui-euˬ

¹ Yawˇshiˆ-euˬ aˬ li Yeˬhawˇyaˬkmˬ Yuˇdaˆ miˇ kʼahˬ-ahˇ sahˬ paˬ geuꞈ-awˇ uˆ lahˇ-euˬ oeˬ kʼoꞈ tiˬ kʼoꞈ-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Shaˬ kʼoˆ paˇ yoˆ tiˬ yoˆ yuˇ-awˇ, Iˇsaˬleˬlaˆ miˇ kʼahˬ, Yuˇdaˆ miˇ kʼahˬ hawˇ-eu, miˇ kʼahˬ nui deuˬ dawˬ tawˆ luꞈ gaˇ kawˆ, ngaˬ neh nawˬ-ahˇ kʼaˇ ehˇ nehˬ-euˬ jeˬ boꞈ ahˇ taˬ-awˬ. Yawˇshiˆ sahˬ paˬ geuꞈ ngeh neh dahˬ beh-awˇ, iˬ nah keuˆ ni ngaˬ neh kʼaˇ ehˇ taˬ-euˬ jeˬ dawˬ tawˆ luꞈ boꞈ ahˇ taˬ-awˬ.

³ Ngaˬ neh lehˬ hmˬ taˬ-euˬ luˬ-iˇ seˇ-iˇ-eu jeˬ dawˬ tawˆ luꞈ gaˇ kawˆ Yuˇdaˆ tsawˇ haˬ deuˬ ya gaˬ ngeh, aˬ yawꞈ maꞈ yaw haiˬ jeˬ maˬ mˇ ni byehˇ -eu baw le. Kʼoeˇ loꞈ-ehˇ byehˇ naˇ, aˬ yawꞈ maꞈ-euˬ yaw lehˬ hawˇ-eu iˬ baˇ-ahˇ ngaˇ pyehˬ nehˬ ma.”

⁴ Kʼoeˇ naˇ, Neˬliˇyaˆ-euˬ aˬ li Baˬluˆ-ahˇ ngaˇ kuˇ-awˇ, Sahˬpaˬ Miˬyehˇ neh ngaˬ-ahˇ kʼaˇ ehˇ nehˬ laꞈ-euˬ jeˬ dawˬ tawˆ luꞈ gui ka ka nehˬ-awˇ, shaˬ kʼoˆ paˇ yoˆ laꞈ kʼoeˇ bi boꞈ ahˇ jiˇ-euˬ ma.

⁵ Kʼoeˇ naˇ, Baˬluˆ-ahˇ ngaˇ heu loꞈ-ehˇ mehˬ nehˬ tsoˆ nehˬ-euˬ ma. “Uˬ duˬ tahˬ nymˇ mymˇ ma laꞈ kʼoeˇ ngaˬ-euˬ gʼawˇ mawˇ maˬ ya uˇ leˇ-a lehˇ laˆ tsoeˬ taˬ-euˬ meh.

⁶ Ehˇ kʼawꞈ, miˇ kʼahˬ zaˬ deuˬ maˬ dzaˬ maˬ dawˇ ni lah-eu aˇ nah paˇ keuˆ laˇ ngeh, nawˬ-ahˇ kʼoeˇ gaˇ bi uˇ leˇ-awˇ, ngaˬ neh nawˬ-ahˇ gui ka ka nehˬ-awˇ bi boꞈ-euˬ, Sahˬpaˬ Miˬyehˇ neh ehˇ taˬ-euˬ dawˬ kʼoeˇ deuˬ dawˬ tawˆ luꞈ-ahˇ, yawˬ gʼaˬ na luꞈ ya gaˬ ni, sahˬ boꞈ paˇ yoˆ kʼoeˇ bi gui nehˬ leˇ mawꞈ-eu ma. Yawˬ ha kʼaˇ jawˇ-eu meuˬ-ahˇ neh laˇ uiˬ taˬ-euˬ Yuˇdaˆ tsawˇ haˬ deuˬ ahˇ leˇ-ehˇ, tsawˇ haˬ yawˬ gʼaˬ na luꞈ gaˬ nya-eu tsahˇ-ahˇ jawˇ-awˇ, yaw kʼaˆ kʼaˆ-ehˇ guˇ-awˇ gui mehˬ nehˬ-awˬ.

⁷ Guˆ laˇ paˬ-ehˇ gʼeh-eu Sahˬpaˬ Miˬyehˇ-euˬ nui ma pehˇ-eu jeˬ ehˇ taˬ-euˬ miˇ neh, aˬ yawꞈ maꞈ Sahˬpaˬ Miˬyehˇ-ahˇ guiˬ lahˬ shaˇ-awˇ, yaw haiˬ jeˬ maˬ paˇ mˇ ni byehˇ-eu baw le” lehˇ mehˬ nehˬ-euˬ ma.

⁸ Kʼoeˇ ngeh, Baˬluˆ-aˬ, ngaˬ neh kʼaˇ ehˇ nehˬ-euˬ loꞈ-ehˇ, Uˬ duˬ tahˬ nymˇ nymˇ ma laꞈ kʼoeˇ Sahˬpaˬ Miˬyehˇ-euˬ dawˬ kʼoeˇ deuˬ gui gaˬ nehˬ-euˬ meh.

⁹ Yeˬhawˇyaˬkmˬ Yuˇdaˆ sahˬ paˬ geuꞈ-euˬ ngaˬ kʼoꞈ tiˬ kʼoꞈ ba la gʼoeˬ siˬ tiˬ siˬ-ahˇ, Sahˬpaˬ Miˬyehˇ nui ma bi saˇ-eu gʼaˇ duˬ miˇ kʼahˬ zaˬ deuˬ maˬ dzaˬ maˬ dawˇ ni lah-euˬ meh. Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ neh laˇ-euˬ tsawˇ haˬ deuˬ hawˇ-eu, Yeˬluˇsaˬlehˬ meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, maˬ dzaˬ maˬ dawˇ ni lah-euˬ meh.

¹⁰ Kʼoeˇ naˇ, tsawˇ haˬ dawˬ tawˆ luꞈ naˇ haˬ luꞈ ngeh, ngaˬ neh gui ka ka nehˬ-euˬ dawˬ deuˬ boꞈ ahˇ jiˇ taˬ-euˬ sahˬ boꞈ paˇ yoˆ kʼoeˇ yoˆ, Baˬluˆ gui mehˬ nehˬ-euˬ meh. Shaˇpaˬ-euˬ aˬ li pyeuꞈ-eu Uˬ duˬ tahˬ nymˇ nymˇ ma -euˬ saˇ naˇ gaˇ tuˆ tehˬ luꞈ-eu Geˬmaˬliˇyaˆ-euˬ aˇ lawˆ laꞈ kʼoeˇ uˇ-awˇ, aˬ yawꞈ gui mehˬ-euˬ meh. Aˇ lawˆ kʼoeˇ lawˆ-aˬ, Uˬ duˬ tahˬ nymˇ nymˇ ma-euˬ poˆ kaˬ laꞈ taˆ kaˬ-ahˇ, Gʼoˆ kʼehˬ yaw shuiꞈ lehˇ kuˇ-eu kʼoeˇ kʼehˬ dawˬ peh jaˆ-eu meh.

Yaw huiˬ yaw mahˇ deuˬ-ahˇ sahˬ boꞈ paˇ yoˆ gui mehˬ-euˬ

¹¹ Sahˬpaˬ Miˬyehˇ neh ehˇ taˬ-euˬ dawˬ boꞈ taˬ-euˬ sahˬ boꞈ paˇ yoˆ-ahˇ, Shaˇpaˬ-euˬ aˬ li Geˬmaˬliˇyaˆ-euˬ aˬ li Miˇkaˬyaˇ ya gaˬ-euˬ meh.

¹² Kʼoeˇ naˇ, sahˬ paˬ-euˬ hawˇ nymˇ-ahˇ, saˇ naˇ gaˇ tuˆ tehˬ-eu aˬ yuiꞈ geuꞈ-eu gʼaˬ-euˬ lawˆ-ahˇ aˬ yawꞈ le-euˬ meh. Hawˇ nymˇ saˇ naˇ laꞈ kʼoeˇ gaˇ tuˆ tehˬ-eu aˬ yuiꞈ geuꞈ luꞈ-eu Eˇliˇshaˬmaˇ, Sheˬmaˇyaˬ-euˬ aˬ li Daˬlaˇyaˬ, Aˬkaˬbawˇ-euˬ aˬ li Eˇlaˬnaˬdaˬ, Shaˇpaˬ-euˬ aˬ li Geˬmaˬliˇyaˆ, Haˬnaˬniˇyaˆ-euˬ aˬ li Zeˬdaˬkiˇ hawˇ-eu, yaw huiˬ yaw mahˇ kʼaˇ geuꞈ luꞈ-eu deuˬ dawˬ tawˆ luꞈ, kʼoeˇ gaˇ jawˇ jiˇ-eu meh.

¹³ Baˬluˆ neh kʼaˇ gui mehˬ nehˬ-euˬ jeˬ, aˬ yawꞈ neh kʼaˇ ya gaˬ-euˬ loꞈ-ehˇ, aˬ yawꞈ maꞈ-ahˇ Miˇkaˬyaˇ dzawˇ nehˬ-euˬ meh.

¹⁴ Kʼoeˇ naˇ, yaw huiˬ yaw mahˇ kʼoeˇ deuˬ Yeˬhuˇdi-ahˇ Baˬluˆ jawˇ gaˇ pyehˬ gʼeh-awˇ, aˬ yawꞈ gui mehˬ luꞈ-eu sahˬ boꞈ paˇ yoˆ kʼoeˇ yuˇ laꞈ-awˬ lehˇ bi ehˇ gaˬ-iˇ-euˬ meh. (Yeˬhuˇdi-euˬ aˬ da-aˬ, Neˬdaˬniˇ meh. Neˬdaˬniˇ-euˬ aˬ da-aˬ, Sheˬleˬmiˇ meh. Sheˬleˬmiˇ-euˬ aˬ da-aˬ, Kuˇshi meh.) Kʼoeˇ naˇ, Baˬluˆ sahˬ boꞈ paˇ yoˆ kʼoeˇ yuˇ-awˇ, aˬ yawꞈ maꞈ jawˇ gaˇ laˇ-euˬ meh.

¹⁵ “Nuiˇ-awˇ, sahˬ boꞈ paˇ yoˆ teu nga maꞈ-ahˇ gui mehˬ nehˬ laꞈ-awˬ” lehˇ aˬ yawꞈ maꞈ ehˇ ngeh, Baˬluˆ gui mehˬ nehˬ-euˬ meh.

¹⁶ Aˬ yawꞈ gui mehˬ gʼaˬ ngeh, aˬ yawꞈ maꞈ tiˬ gʼaˬ tiˇ gʼaˬ haw cawˬ haw cawˬ-ehˇ tsoˆ leˇ-awˇ, “Gaˇ kawˆ heu sahˬ paˬ-ahˇ ya bi ehˇ gaˬ leˇ-eu ngaˇ” lehˇ, Baˬluˆ-ahˇ ehˇ nehˬ-euˬ meh.

¹⁷ “Gaˇ kawˆ heu deuˬ dawˬ tawˆ luꞈ-ahˇ nawˇ aˬ joˆ-ehˇ boꞈ doˆ teˬ lehˇ ehˇ sheˇ. Yeˬlaˬmiˇ neh nawˬ-ahˇ gui ka ka nehˬ leꞈ taˬ loˇ” lehˇ, aˬ yawꞈ maꞈ aˬ yawꞈ-ahˇ naˇ haˬ-euˬ meh.

¹⁸ Baˬluˆ gʼeh, “Dawˬ aˬ yawꞈ dawˬ yawꞈ Yeˬlaˬmiˇ neh gui ka ka nehˬ laꞈ-euˬ loꞈ-ehˇ, sahˬ boꞈ paˇ yoˆ heu yoˆ laꞈ kʼoeˇ, sahˬ sahˬ uiˇ neh ngaˇ boꞈ-euˬ ma” lehˇ ehˇ kʼoꞈ nehˬ-euˬ meh.

¹⁹ Kʼoeˇ ngeh, “Yeˬlaˬmiˇ naw nyaꞈ cehˆ zaꞈ-iˇ-awˇ, naw nyaꞈ aˬ geu gaˇ jawˇ-eu tsawˇ haˬ tiˬ gʼaˬ-iˬ taˬ bi siˬ” lehˇ, yaw huiˬ yaw mahˇ kʼoeˇ deuˬ Baˬluˆ-ahˇ ehˇ nehˬ-euˬ meh.

Sahˬ boꞈ paˇ yoˆ kʼoeˇ yoˆ sahˬ paˬ neh miˬ dzaˬ keuˬ dzeh-euˬ

²⁰ Yaw huiˬ yaw mahˇ kʼoeˇ deuˬ sahˬ boꞈ paˇ yoˆ kʼoeˇ hmˬ-ahˇ, sahˬ paˬ-euˬ hawˇ nymˇ laꞈ kʼoeˇ saˇ naˇ gaˇ mˇ-eu aˬ yuiꞈ geuꞈ-eu Eˇliˇshaˬmaˇ-euˬ lawˆ-ahˇ bi jaˆ-awˇ, sahˬ paˬ-euˬ saˇ naˇ-ahˇ le-awˇ, yawˬ jeˬ na luꞈ sahˬ paˬ-ahˇ dzawˇ gaˬ nehˬ leˇ-euˬ meh.

²¹ Kʼoeˇ naˇ, sahˬ paˬ neh Yeˬhuˇdi-ahˇ pyehˬ gʼeh-awˇ, sahˬ boꞈ paˇ yoˆ kʼoeˇ yoˆ bi yuˇ laˬ-iˇ-euˬ meh. Eˇliˇshaˬmaˇ-euˬ lawˆ-ahˇ jaˆ-eu sahˬ boꞈ paˇ yoˆ kʼoeˇ yoˆ aˬ yawꞈ laˬ-iˇ-awˇ, sahˬ paˬ hawˇ-eu sahˬ paˬ-euˬ jawˬ jawˬ-ehˇ yawꞈ luꞈ-eu yaw huiˬ yaw mahˇ deuˬ-ahˇ gui mehˬ nehˬ-euˬ meh.

²² Aˇ yamˬ kʼoeˇ yamˬ-aˬ, tsahˬ gaˆ yamˬ pyeuꞈ-eu miˇ neh, sahˬ paˬ-aˬ, tsahˬ gaˆ yamˬ-ahˇ jawˇ-eu gʼaˇ duˬ tsoˆ taˬ-euˬ hawˇ nymˇ laꞈ kʼoeˇ, miˬ dzaˬ tsawˬ bu-ahˇ yaw gaˆ lmˇ luꞈ-eu meh.

²³ Yeˬhuˇdi sahˬ boꞈ smˬ bymˇ oeˬ bymˇ kʼaˇ gui gʼaˬ ngeh, gui gʼaˬ-eu deuˬ-ahˇ mi cehˇ jiˇ baˆ neh sahˬ paˬ yehˬ tsehˆ doˆ-awˇ, miˬ dzaˬ-ahˇ dawˆ puiˆ-euˬ meh. Sahˬ boꞈ paˇ yoˆ yoˆ lah-ehˇ puiˆ dzaˬ jiˇ ngeh keuˆ ni, tiˬ poˆ saˇ-i tiˬ poˆ aˬ yawꞈ kʼoeˇ loꞈ-ehˇ jahˇ-euˬ meh.

²⁴ Sahˬ boꞈ paˇ yoˆ kʼoeˇ yoˆ gui mehˬ nehˬ gaˇ ya gaˬ-euˬ kʼawꞈ, sahˬ paˬ hawˇ-eu aˬ yawꞈ-euˬ yaw huiˬ yaw mahˇ kʼoeˇ deuˬ, tiˬ gʼaˬ-iˬ guˆ gaˇ maˬ duˇ-a.

²⁵ Eˇlaˬnaˬdaˬ, Daˬlaˇyaˬ hawˇ-eu Geˬmaˬliˇyaˆ aˬ ha smˇ gʼaˬ neh, sahˬ boꞈ paˇ yoˆ kʼoeˇ miˬ dzaˬ-ahˇ taˬ dawˆ puiˆ nehˬ laꞈ lehˇ shaˇ kʼawꞈ, sahˬ paˬ maˬ naˇ haˬ-a.

²⁶ Kʼoeˇ naˇ, ngaˇ hawˇ-eu ngaˬ neh ehˇ-euˬ dawˬ boꞈ doˆ-euˬ gʼaˬ pyeuꞈ-eu Baˬluˆ nga nyaꞈ-ahˇ bi nyehꞈ-eu gʼaˇ duˬ, sahˬ paˬ zaˬ yo Yeˬlaˬmeˬlaˇ, Aˬzaˬleˬlaˇ-euˬ aˬ li Seˬlehˇyaˬ hawˇ-eu Aˬbaˬdeˬlaˇ-euˬ aˬ li Sheˬleˬmiˇ aˬ ha smˇ gʼaˬ-ahˇ, sahˬ paˬ dawˬ biꞈ-euˬ meh. Ehˇ kʼawꞈ, Sahˬpaˬ Miˬyehˇ neh ngaˬ-ahˇ sheuˬ zaꞈ nehˬ laꞈ-euˬ meh.

Yeˬlaˬmiˇ neh sahˬ boꞈ paˇ yoˆ yawˬ yoˆ yawˬ paˇ boꞈ-euˬ

²⁷ Ngaˬ neh Baˬluˆ-ahˇ gui ka ka nehˬ-awˇ, bi boꞈ-euˬ sahˬ boꞈ paˇ yoˆ kʼoeˇ yoˆ-ahˇ sahˬ paˬ Yeˬhawˇyaˬkmˬ miˬ dzaˬ-ahˇ dawˆ puiˆ gʼaˬ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²⁸ “Shaˬ kʼoˆ paˇ yoˆ yawˬ yoˆ yawˬ yuˇ-awˇ, yaw beh poˆ kʼaˇ boꞈ-euˬ yawˬ jeˬ na luꞈ boꞈ ahˇ jiˇ-awˬ.

²⁹ Yuˇdaˆ sahˬ paˬ Yeˬhawˇyaˬkmˬ-ahˇ kʼawꞈ heu loꞈ-ehˇ ehˇ nehˬ-awˬ. “Sahˬ boꞈ paˇ yoˆ kʼoeˇ yoˆ-ahˇ nawˇ miˬ dzaˬ-ahˇ dawˆ puiˆ-awˇ, ‘Baˬbuˇloˬ sahˬ paˬ miˇ kʼahˬ heu kʼahˬ-ahˇ laˆ cawˆ le-awˇ, tsawˇ haˬ hawˇ-eu jeˬ zaˬ-ahˇ sehꞈ tehꞈ-a’ lehˇ aˬ jeˬ miˇ neh boꞈ te lehˇ, Yeˬlaˬmiˇ-ahˇ nawˇ naˇ haˬ-euˬ meh.

³⁰ Kʼoeˇ miˇ neh, sahˬ paˬ Yeˬhawˇyaˬkmˬ-oˇ, Sahˬpaˬ Miˬyehˇ pyeuꞈ-eu ngaˇ nymˬ-mˇ heu loꞈ-ehˇ ehˇ-eu ma. Nawˬ-euˬ zaˬ nawˬ-euˬ uˆ deuˬ laꞈ kʼoeˇ, Daˬbiˇ-euˬ miˇ kʼahˬ heu kʼoeˇ taˆ uˆ lahˇ-eu tiˬ gʼaˬ-iˬ maˬ paˇ bi doˆ laˇ ma. Nah gʼahˇ paw nahˇ tsaˇ kʼaˆ-awˇ uˬ ciꞈ paw ceuˬ ga gaˇ, nawˬ-ahˇ yaw shiˇ-ehˇ baꞈ dzeh-awˇ bi ga tehꞈ-a.

³¹ Naw maꞈ neh mˇ-euˬ iˬ baˇ baˬ da neh, nawˬ-ahˇ maˬ ehˇ, nawˬ-euˬ zaˬ deuˬ uˆ deuˬ-ahˇ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, ngaˇ kʼehˬ nehˬ kʼaˆ nehˬ ma. Nawˇ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ maˬ ehˇ, Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ maˬ ehˇ, ngaˬ neh mehˬ nehˬ-euˬ jeˬ-ahˇ maˬ naˇ haˬ geuꞈ-euˬ miˇ neh, ngaˬ neh ehˇ taˬ-euˬ loꞈ-ehˇ, naw maꞈ dawˬ tawˆ luꞈ kʼoeˇ taˆ luˬ-iˇ seˇ-iˇ-eu jeˬ bi keuˆ le ma lehˇ ehˇ nehˬ-awˬ” lehˇ ehˇ-eu meh.

³² Kʼoeˇ naˇ, ngaˬ neh ehˇ-euˬ dawˬ boꞈ doˆ-eu gʼaˬ pyeuꞈ-eu Baˬluˆ-ahˇ shaˬ kʼoˆ paˇ yoˆ tiˬ yoˆ ngaˇ paˇ biꞈ nehˬ-awˇ, ngaˬ neh gui ka kʼaˇ ka nehˬ-euˬ loꞈ-ehˇ aˬ yawꞈ boꞈ ahˇ-euˬ meh. Yaw beh sahˬ paˬ Yeˬhawˇyaˬkmˬ neh miˬ dzaˬ-ahˇ dawˆ puiˆ-euˬ shaˬ kʼoˆ paˇ yoˆ-ahˇ ahˇ-eu dawˬ kʼoeˇ deuˬ dawˬ tawˆ luꞈ boꞈ ahˇ-euˬ uˬ taꞈ, kʼoeˇ gaˇ duˇ-eu dawˬ yaw shuiꞈ deuˬ kʼawꞈ, ngaˬ neh gui ka ka nehˬ-awˇ paˇ bi boꞈ lahˬ-euˬ ma.