Yeˬlaˬmiˇ 35 - Akha

Yeˬlaˬmiˇ hawˇ-eu Leˬkaˆ tsawˇ haˬ deuˬ

¹ Yawˇshiˆ-euˬ aˬ li Yeˬhawˇyaˬkmˬ Yuˇdaˆ miˇ kʼahˬ-ahˇ sahˬ paˬ geuꞈ-awˇ uˆ lahˇ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Leˬkaˆ tsawˇ jeuˬ jawˇ gaˇ iˇ-awˇ dawˬ ngehˬ cawˬ-iˇ-awˬ. Kʼoeˇ naˇ, Uˬ duˬ tahˬ nymˇ nymˇ ma-ahˇ jaˆ-eu kuˆ lawˆ tiˬ lawˆ laꞈ kʼoeˇ aˬ yawꞈ maꞈ-ahˇ sheuˬ ahˇ-awˇ, aˬ gaꞈ dzaˇ uiˇ bi dawˇ-awˬ.”

³ Kʼoeˇ naˇ, Yeˬlaˬmiˇ lehˇ myahˇ-euˬ tsawˇ haˬ yawˬ gʼaˬ yawˬ-euˬ aˬ li Yaˬzaˬniˇ, Yaˬzaˬniˇ-euˬ mehˇ nmˇ deuˬ hawˇ-eu, aˬ yawꞈ maꞈ-euˬ aˬ li deuˬ jawˇ gaˇ ngaˇ iˇ-euˬ ma. Leˬkaˆ tsawˇ jeuˬ dawˬ tawˆ luꞈ kʼoeˇ myaˆ ni tehꞈ meh. (Yaˬzaˬniˇ-euˬ aˬ da Yeˬlaˬmiˇ-aˬ, Haˬbaˬziˇniˆ-euˬ aˬ li meh.)

⁴ Aˬ yawꞈ maꞈ-ahˇ Uˬ duˬ tahˬ nymˇ nymˇ ma laꞈ kʼoeˇ ngaˇ sheuˬ kʼoꞈ laꞈ-awˇ, Iˇgaˬdaˬliˇ-euˬ aˬ li pyeuꞈ-eu Miˬyehˇ gʼaˇ duˬ ngehˬ dah-eu Haˬnaˬ-euˬ gʼaˬ kʼehˇ deuˬ-euˬ aˇ lawˆ-ahˇ sheuˬ gʼeh-euˬ ma. Aˇ lawˆ kʼoeˇ lawˆ-aˬ, Uˬ duˬ tahˬ nymˇ nymˇ ma laꞈ kʼoeˇ yaw huiˬ yaw mahˇ tiˬ gʼaˬ geuꞈ luꞈ-eu Shaˬlmˬ-euˬ aˬ li Mawˇseˬyaˇ-euˬ aˇ lawˆ hawˇ-eu, yaw huiˬ yaw mahˇ nui deuˬ-euˬ aˇ lawˆ deuˬ-euˬ kʼoeˇ taˆ jaˆ-eu meh.

⁵ Kʼoeˇ naˇ, Leˬkaˆ tsawˇ haˬ kʼoeˇ deuˬ mehˬ shi, aˬ gaꞈ dzaˇ uiˇ kʼaˇ byah taˬ-euˬ naˬ bo hawˇ-eu kʼmˬ maˬ deuˬ ngaˇ ciˬ taˬ nehˬ-awˇ, “Aˬ gaꞈ dzaˇ uiˇ dawˇ-awˬ” lehˇ ehˇ nehˬ-euˬ ma.

⁶ Ehˇ kʼawꞈ, aˬ yawꞈ maꞈ heu loꞈ-ehˇ ehˇ-eu meh. “Nga maꞈ aˬ gaꞈ dzaˇ uiˇ maˬ dawˇ. Nga maꞈ hawˇ-eu nga maꞈ-euˬ zaˬ deuˬ uˆ deuˬ tiˬ gʼaˬ-iˬ aˬ gaꞈ dzaˇ uiˇ maˬ ya dawˇ-a lehˇ, Leˬkaˆ-euˬ aˬ li nga maꞈ-euˬ aˬ poeˬ Yawˇnaˬdehˇ ehˇ taˬ-euˬ meh.

⁷ Nymˇ maˬ tsoˆ, deh yaˇ maˬ mˇ ni ya jawˇ-awˇ, aˬ gaꞈ yaˇ kmˇ mˇ-eu maˬ ehˇ, zeuˇ-eu maˬ ehˇ, maˬ ya jahˇ-a lehˇ, nga maꞈ-ahˇ aˬ yawꞈ ehˇ taˬ-euˬ meh. Boeˇ miˬ siˬ kʼaˬ loꞈ-ehˇ nga maꞈ ya jawˇ luꞈ-eu miˇ kʼahˬ heu kʼahˬ laꞈ kʼoeˇ, gʼawˬ myahˇ ni ya jawˇ daˆ leꞈ-eu gʼaˇ duˬ, aˬ myah luꞈ sehˬ gʼawˆ tehꞈ-ehˇ gʼawˆ-awˇ ya jawˇ meh lehˇ, aˬ yawꞈ dawˬ biꞈ taˬ-euˬ meh.

⁸ Yawˇnaˬdehˇ neh mehˬ yaꞈ tsoˆ yaꞈ-euˬ loꞈ-ehˇ nga maꞈ dehꞈ-euˬ ma. Nga maꞈ maˬ ehˇ, nga maꞈ-euˬ miˬ zaˬ deuˬ hawˇ-eu aˬ buˇ aˬ li deuˬ maˬ ehˇ, tiˬ gʼaˬ-iˬ aˬ gaꞈ dzaˇ uiˇ maˬ dawˇ.

⁹ Nymˇ maˬ tsoˆ ni jawˇ-eu uˬ taꞈ, aˬ gaꞈ yaˇ kmˇ hawˇ-eu deh yaˇ maˬ mˇ-ehˇ, dzaˬ la gʼo cehˇ-ahˇ keuˆ ni maˬ ka dzaˬ ni dehꞈ-euˬ ma.

¹⁰ Nga maꞈ-euˬ aˬ poeˬ Yawˇnaˬdehˇ neh dawˬ kʼaˇ biꞈ taˬ-euˬ jeˬ-ahˇ tiˬ byah ni caw teh-eu laꞈ kʼoeˇ, sehˬ gʼawˆ tehꞈ-ehˇ gʼawˆ gʼawˆ-ehˇ jawˇ laꞈ-euˬ ma.

¹¹ Ehˇ kʼawꞈ, Baˬbuˇloˬ sahˬ paˬ Neˬbuˬkaˬneˬzaˬ miˇ kʼahˬ heu kʼahˬ-ahˇ guiˇ deuˆ ahˇ leꞈ ngeh jawˇ, Baˬbuˇloˬ guiˇ maꞈ hawˇ-eu Suˇliˆ guiˇ maꞈ deuˬ-euˬ laꞈ-ahˇ dzeuˇ-iˇ nya ni, Yeˬluˇsaˬlehˬ meuˬ-ahˇ cehˆ jawˇ laˇ-awˇ jawˇ luꞈ-eu ma.”

¹² Kʼoeˇ ngeh, Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

¹³ Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ heu loꞈ-ehˇ ehˇ nehˬ-iˇ-awˬ lehˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ ehˇ-eu meh. “Aˬ jeˬ miˇ neh naw maꞈ ngaˬ-euˬ dawˬ-ahˇ maˬ naˇ haˬ-ehˇ, ngaˬ neh mehˬ nehˬ tsoˆ nehˬ taˬ-euˬ loꞈ-ehˇ maˬ dehꞈ te lehˇ, Sahˬpaˬ Miˬyehˇ pyeuꞈ-eu ngaˇ naw maꞈ-ahˇ naˇ haˬ-euˬ ma.

¹⁴ Yawˇnaˬdehˇ-euˬ zaˬ deuˬ uˆ deuˬ-aˬ, aˬ yawꞈ maꞈ-euˬ aˬ poeˬ Yawˇnaˬdehˇ neh dawˬ biꞈ taˬ-euˬ gaˇ naˇ haˬ geuꞈ-eu laꞈ kʼoeˇ, iˬ nah keuˆ ni aˬ gaꞈ dzaˇ uiˇ maˬ dawˇ ni jawˇ-eu meh. Naw maꞈ-ahˇ ngaˇ teu naˆ naˆ-ehˇ mehˬ nehˬ luꞈ kʼawꞈ, naw maꞈ maˬ naˇ haˬ geuꞈ-a.

¹⁵ Miˬyehˇ gʼaˇ duˬ ngehˬ dah-eu deuˬ pyeuꞈ-eu ngaˬ-euˬ zaˬ kʼaˆ deuˬ-ahˇ naw maꞈ jawˇ gaˇ maˬ tsehˆ leˇ ni ngaˇ pyehˬ gʼeh leꞈ-awˇ, yaw haiˬ jeˬ mˇ-eu byehˇ-awˇ, yaw tsaˬ yaw dawˇ jeˬ mˇ-awˬ lehˇ bi ehˇ le-euˬ ma. Naw maꞈ-euˬ aˬ poeˬ aˬ bawˇ deuˬ hawˇ-eu naw maꞈ-ahˇ ngaˬ neh biꞈ taˬ-euˬ miˇ kʼahˬ heu kʼahˬ laꞈ kʼoeˇ naw maꞈ dehꞈ daˆ jawˇ daˆ leꞈ nya ni, miˬ yehˇ nui deuˬ-ahˇ uˬ duˬ taˬ tahˬ lehˇ, Miˬyehˇ gʼaˇ duˬ ngehˬ dah-eu kʼoeˇ deuˬ naw maꞈ-ahˇ yaw kʼaˆ kʼaˆ-ehˇ mehˬ nehˬ gʼaˬ-euˬ meh. Ehˇ kʼawꞈ, ngaˬ-euˬ dawˬ naw maꞈ-euˬ naˬ bawˇ-ahˇ maˬ ahˇ leˇ-a.

¹⁶ Yawˇnaˬdehˇ-euˬ zaˬ deuˬ uˆ deuˬ-aˬ, aˬ yawꞈ maꞈ-euˬ aˬ poeˬ Yawˇnaˬdehˇ-euˬ dawˬ-ahˇ naˇ haˬ-awˇ dehꞈ kʼawꞈ, naw maꞈ-aˬ, ngaˬ-euˬ ehˇ dawˬ-ahˇ maˬ naˇ haˬ geuꞈ-a.

¹⁷ Kʼoeˇ miˇ neh, Iˇsaˬleˬlaˆ-euˬ Miˬyehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˬ neh, naw maꞈ kʼoeˇ taˆ bi keuˆ le ma lehˇ saˇ jaˇ dzaˬ taˬ-euˬ luˬ-iˇ seˇ-iˇ-eu jeˬ, nymˬ-mˇ bi keuˆ le ma. Ngaˇ naw maꞈ-ahˇ dawˬ ngehˬ cawˬ ngeh naw maꞈ maˬ naˇ haˬ-ehˇ, ngaˇ kuˇ ngeh naw maꞈ oˬ maˬ toˬ-eu miˇ neh, ngaˇ kʼoeˇ loꞈ-ehˇ jahˇ ma.”

¹⁸ Kʼoeˇ naˇ, Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ, Leˬkaˆ tsawˇ haˬ deuˬ-ahˇ ngaˇ ehˇ nehˬ-euˬ ma. “Naw maꞈ-euˬ aˬ poeˬ Yawˇnaˬdehˇ neh biꞈ taˬ yaꞈ-euˬ dawˬ-ahˇ naw maꞈ naˇ haˬ-awˇ dehꞈ-euˬ meh. Aˬ yawꞈ neh kʼaˇ mehˬ kʼaˇ tsoˆ taˬ-euˬ jeˬ-ahˇ naw maꞈ caw teh-awˇ, aˬ yawꞈ neh dawˬ kʼaˇ biꞈ taˬ-euˬ yawˬ jeˬ na luꞈ naw maꞈ mˇ-euˬ meh.

¹⁹ Kʼoeˇ miˇ neh, Leˬkaˆ-euˬ aˬ li Yawˇnaˬdehˇ-euˬ zaˬ deuˬ uˆ deuˬ laꞈ kʼoeˇ, ngaˬ-euˬ gaˇ mˇ-eu tsawˇ haˬ tiˬ gʼaˬ tiˬ ziˇ saˇ-i tiˬ ziˇ maˬ tsehˆ leˇ ni doˆ laˇ tehꞈ-a lehˇ, Iˇsaˬleˬlaˆ-euˬ Miˬyehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma” lehˇ ehˇ-eu meh.