Yeˬlaˬmiˇ 34 - Akha

Zeˬdaˬkiˇ gʼaˇ duˬ Sahˬpaˬ Miˬyehˇ-euˬ dawˬ

¹ Baˬbuˇloˬ sahˬ paˬ Neˬbuˬkaˬneˬzaˬ hawˇ-eu aˬ yawꞈ-euˬ guiˇ maꞈ deuˬ nehˬ-ehˇ, aˬ yawꞈ uˆ lahˇ-eu uˬ moˆ kʼaˇ jawˇ-eu miˇ kʼahˬ hawˇ-eu tsawˇ jeuˬ deuˬ-euˬ guiˇ maꞈ dawˬ tawˆ luꞈ gm leˇ-awˇ, Yeˬluˇsaˬlehˬ meuˬ hawˇ-eu dawˬ peh jaˆ-eu meuˬ deuˬ-ahˇ guiˇ deuˆ luꞈ ngeh, Sahˬpaˬ Miˬyehˇ ngaˬ-ahˇ dawˬ ngehˬ cawˬ le-euˬ meh.

² Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Yuˇdaˆ sahˬ paˬ Zeˬdaˬkiˇ jawˇ gaˇ iˇ-awˇ, heu loꞈ-ehˇ ehˇ nehˬ-iˇ-awˬ. Sahˬpaˬ Miˬyehˇ pyeuꞈ-eu ngaˇ-aˬ, Yeˬluˇsaˬlehˬ meuˬ heu-ahˇ Baˬbuˇloˬ sahˬ paˬ-euˬ aˬ laꞈ laꞈ kʼoeˇ a nehˬ-awˇ, miˬ dzaˬ bi dzah puiˆ dzeh ma.

³ Nawˬ-euˬ gʼawˇ mawˇ maˬ cehˆ dzeuˇ nya-aˇ. Nawˬ-ahˇ aˬ cawˬ nyehꞈ mi-awˇ, aˬ yawꞈ-euˬ aˬ laꞈ laꞈ kʼoeˇ a nehˬ tehꞈ-a. Nawˇ aˬ yawꞈ-ahˇ myaˆ pyawˬ ya ciˬ daˬ-awˇ, dawˬ ya ngehˬ cawˬ tehꞈ-a. Kʼoeˇ naˇ, Baˬbuˇloˬ miˇ kʼahˬ-ahˇ nawˇ ya iˇ gʼeh tehꞈ-a.

⁴ Zeˬdaˬkiˇ-oˇ, nawˬ-euˬ gaˇ kawˆ ngaˇ ehˇ gaˇ naˇ haˬ sheˇ. Guiˇ deuˆ-eu laꞈ kʼoeˇ nawˇ maˬ ya shiˇ-aˇ.

⁵ Nawˇ ciˬ cuˇ ni ziˇ ya dehꞈ jiˇ-awˇ, nawˬ-euˬ mehˬ hu sahˬ paˬ geuꞈ dzeuˇ yaꞈ-euˬ nawˬ-euˬ aˬ poeˬ aˬ bawˇ deuˬ-ahˇ baꞈ pahˬ ngeh tsiˇ yaw saw jeˬ doꞈ nehˬ-euˬ loꞈ-ehˇ, nawˬ-ahˇ baꞈ pahˬ ngeh kʼawꞈ, tsiˇ yaw saw jeˬ doꞈ nehˬ laꞈ tehꞈ-a. Nga maꞈ-euˬ sahˬ paˬ ziˇ jiˇ-euˬ ngaˇ lehˇ aˬ cawˬ nawˬ-euˬ gʼaˇ duˬ tsawˇ ngoeˇ ngoeˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁶ Dawˬ heu deuˬ, Yeˬluˇsaˬlehˬ meuˬ-ahˇ Zeˬdaˬkiˇ jawˇ gaˇ ngaˇ dzawˇ nehˬ leˇ-euˬ ma.

⁷ Kʼoeˇ ngeh, Baˬbuˇloˬ sahˬ paˬ-euˬ guiˇ maꞈ deuˬ meuˬ kʼoeˇ meuˬ-ahˇ guiˇ deuˆ luꞈ-eu meh. Yuˇdaˆ meuˬ nui deuˬ laꞈ kʼoeˇ, aˬ cawˬ neh maˬ bi deuˆ gʼaˬ dah-ehˇ ziꞈ dah ni dzeˇ luꞈ-eu meuˬ-aˬ, Laˬkiˇshaˆ meuˬ hawˇ-eu Aˬzeˬkaˬ meuˬ kʼoeˇ nyiˬ meuˬ tehꞈ meh. Kʼoeˇ nyiˬ meuˬ-ahˇ kʼawꞈ, guiˇ maꞈ kʼoeˇ deuˬ guiˇ deuˆ luꞈ-eu meh.

Zaˬ kʼaˆ deuˬ kʼoeˇ taˆ jaˬ myawꞈ myawꞈ-eu

⁸ Zaˬ kʼaˆ dawˬ tawˆ luꞈ-ahˇ pyehˬ nehˬ-eu gʼaˇ duˬ, Yeˬluˇsaˬlehˬ meuˬ-ahˇ kʼaˇ jawˇ-eu tsawˇ haˬ dawˬ tawˆ luꞈ nehˬ-ehˇ sahˬ paˬ Zeˬdaˬkiˇ saˇ jaˇ dzaˬ gʼaˬ miˇ tsa, Sahˬpaˬ Miˬyehˇ ngaˬ-ahˇ dawˬ ngehˬ cawˬ le-euˬ meh.

⁹ Tsawˇ haˬ yawˬ gʼaˬ na luꞈ, yawˬ ha-euˬ tsawˇ jeuˬ pyeuꞈ-eu Heˬbyehˇ tsawˇ haˬ kʼaˬ dzeˇ zaˬ hawˇ-eu zaˬ miˬ zaˬ zaˬ kʼaˆ dawˬ tawˆ luꞈ-ahˇ, zaˬ kʼaˆ maˬ bi geuꞈ ni pyehˬ nehˬ jiˇ-eu gʼaˇ duˬ, saˇ jaˇ dzaˬ-euˬ meh.

¹⁰ Saˇ jaˇ kʼaˇ dzaˬ taꞈ-euˬ yaw huiˬ yaw mahˇ deuˬ hawˇ-eu miˇ kʼahˬ zaˬ dawˬ tawˆ luꞈ, yawˬ ha-euˬ zaˬ kʼaˆ deuˬ-ahˇ pyehˬ nehˬ jiˇ-awˇ, zaˬ kʼaˆ maˬ paˇ bi geuꞈ poˆ-eu gʼaˇ duˬ nui ma tsaˬ-euˬ meh.

¹¹ Ehˇ kʼawꞈ, aˇ nah aˬ yawꞈ maꞈ paˇ noeˬ poˆ-awˇ, pyehˬ nehˬ gʼaˬ-euˬ zaˬ kʼaˆ kʼoeˇ deuˬ-ahˇ paˇ sheuˬ kʼoꞈ-awˇ, zaˬ kʼaˆ paˇ bi geuꞈ poˆ-euˬ meh.

¹² Kʼoeˇ ngeh, Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

¹³ Tsawˇ haˬ kʼoeˇ deuˬ-ahˇ heu loꞈ-ehˇ ehˇ nehˬ-awˬ lehˇ, Iˇsaˬleˬlaˆ-euˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Naw maꞈ-euˬ aˬ poeˬ aˬ bawˇ deuˬ Iˇjiˇtuˆ miˇ kʼahˬ laꞈ kʼoeˇ aˬ cawˬ zaˬ kʼaˆ geuꞈ luꞈ gaˇ ngaˇ ka kʼoꞈ doˆ nehˬ-awˇ bi buˬ-iˇ ngeh, aˬ yawꞈ maꞈ nehˬ-ehˇ ngaˇ saˇ jaˇ dzaˬ-awˇ heu loꞈ-ehˇ ehˇ nehˬ taˬ-euˬ jaˆ-eu ma.

¹⁴ Shiꞈ kʼoꞈ tiˬ poˆ, zaˬ kʼaˆ koꞈ kʼoꞈ geuꞈ keuˆ laꞈ-euˬ Heˬbyehˇ tsawˇ haˬ yawˬ gʼaˬ na luꞈ-ahˇ, zaˬ kʼaˆ maˬ paˇ bi geuꞈ ni ya pyehˬ nehˬ meh lehˇ ehˇ taˬ-euˬ ma. Ehˇ kʼawꞈ, naw maꞈ-euˬ aˬ poeˬ aˬ bawˇ deuˬ ngaˬ neh ehˇ taˬ-euˬ dawˬ-ahˇ maˬ naˇ haˬ geuꞈ-a.

¹⁵ Dzeuˇ laˇ-euˬ heu myaˆ nah laꞈ kʼoeˇ, naw maꞈ nui ma noeˬ paˇ-awˇ, ngaˇ nui ma tsaˬ-eu jeˬ mˇ-euˬ meh. Yawˬ ha-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ zaˬ kʼaˆ deuˬ-ahˇ pyehˬ nehˬ ma lehˇ naw maꞈ nui ma tsaˬ-awˇ, ngaˬ-ahˇ uˬ duˬ tahˬ-eu Uˬ duˬ tahˬ nymˇ nymˇ ma laꞈ kʼoeˇ, ngaˬ-euˬ mehˬ shi naw maꞈ saˇ jaˇ dzaˬ-euˬ meh.

¹⁶ Ehˇ kʼawꞈ, naw maꞈ nui ma poˆ laˇ paˇ laˇ-awˇ, ngaˬ-ahˇ yaw zeu maˬ baw-a. Nyiˬ paw luꞈ nui ma tsaˬ-awˇ pyehˬ nehˬ gʼaˬ dzeuˇ-euˬ zaˬ kʼaˆ kʼoeˇ deuˬ-ahˇ naw maꞈ paˇ sheuˬ kʼoꞈ-awˇ, zaˬ kʼaˆ paˇ bi geuꞈ poˆ-euˬ meh.

¹⁷ Kʼoeˇ miˇ neh, naw maꞈ ngaˬ-euˬ ehˇ dawˬ maˬ naˇ haˬ nga lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma. Naw maꞈ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ naw maꞈ maˬ pyehˬ nehˬ-a. Muiˬ tehꞈ-a. Ngaˇ naw maꞈ-ahˇ pyehˬ-awˇ, naw maꞈ-euˬ nui noeˬ bi dehꞈ ma. Ngaˇ naw maꞈ-ahˇ pyehˬ nehˬ-awˇ, guiˇ deuˆ-eu jeˬ, naˇ-eu gawˇ-eu jeˬ hawˇ-eu, mehꞈ-eu shuꞈ-eu jeˬ laꞈ kʼoeˇ bi shiˇ jiˇ ma. Ngaˬ neh naw maꞈ-ahˇ jahˇ nehˬ-euˬ jeˬ-ahˇ tsawˇ jeuˬ yawˬ jeuˬ na luꞈ tsawˬ guˆ-iˇ ngeh keuˆ ni ngaˇ mˇ ma.

^18-19 Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ yaw huiˬ yaw mahˇ geuꞈ-eu deuˬ, sahˬ paˬ-euˬ hawˇ nymˇ laꞈ kʼoeˇ gaˇ mˇ-eu yaw huiˬ yaw mahˇ deuˬ, piˇ ma deuˬ hawˇ-eu, miˇ kʼahˬ-euˬ aˬ yuiꞈ aˬ tsu dawˬ tawˆ luꞈ, aˬ yawꞈ maꞈ neh nyiˬ tsehˆ-ehˇ deuˆ tm-euˬ mawˇ neˇ mawˇ gaw-euˬ gʼawˇ pah cah tsehˆ-awˇ, ngaˬ-ahˇ saˇ jaˇ dzaˬ-euˬ meh. Ehˇ kʼawꞈ, aˬ yawꞈ maꞈ saˇ jaˇ puiˬ-awˇ, saˇ jaˇ dzaˬ taˬ-euˬ loꞈ-ehˇ maˬ dehꞈ-a. Kʼoeˇ miˇ neh, aˬ yawꞈ maꞈ neh mawˇ neˇ mawˇ gaw kʼoeˇ mawˇ-ahˇ kʼaˇ jahˇ nehˬ-euˬ loꞈ-ehˇ, aˬ yawꞈ maꞈ-ahˇ ngaˇ jahˇ nehˬ ma.

²⁰ Aˬ yawꞈ maꞈ-ahˇ sehꞈ mawꞈ-euˬ muiˇ-eu deuˬ-euˬ aˬ laꞈ laꞈ kʼoeˇ, aˬ yawꞈ maꞈ-ahˇ ngaˇ a nehˬ-awˇ aˬ yawꞈ maꞈ-euˬ gʼawˇ mawˇ-ahˇ, bawˇ tsahˬ jeˬ zaˬ hawˇ-eu aˇ jiˇ deuˬ neh bi dzaˬ jiˇ ma.

²¹ Yuˇdaˆ sahˬ paˬ Zeˬdaˬkiˇ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ, aˬ yawꞈ maꞈ-ahˇ sehꞈ mawꞈ-euˬ muiˇ-eu deuˬ-euˬ aˬ laꞈ laꞈ kʼoeˇ ngaˇ a nehˬ ma. Naw maꞈ-ahˇ guiˇ maˬ deuˆ ni naˬ leˇ-awˇ jawˇ-eu Baˬbuˇloˬ guiˇ maꞈ-euˬ aˬ laꞈ laꞈ kʼoeˇ, aˬ yawꞈ maꞈ-ahˇ ngaˇ a nehˬ ma.

²² Ngaˇ dawˬ biꞈ nehˬ ngeh, meuˬ heu meuˬ-ahˇ aˬ yawꞈ maꞈ guiˇ paˇ deuˆ poˆ le-awˇ, miˬ dzaˬ dzah puiˆ dzeh tehꞈ-a. Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ, tsawˇ haˬ tiˬ gʼaˬ-iˬ maˬ jawˇ-eu kʼaˇ shuiꞈ deh ga loꞈ-ehˇ bi pyeuꞈ-iˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”