Yeˬlaˬmiˇ 32 - Akha

Yeˬlaˬmiˇ miˇ tsaˬ tiˬ tsahˇ zeuˇ-euˬ

¹ Yuˇdaˆ miˇ kʼahˬ-ahˇ Zeˬdaˬkiˇ uˆ lahˇ luꞈ-eu tseˇ kʼoꞈ tiˬ kʼoꞈ laꞈ kʼoeˇ, Sahˬpaˬ Miˬyehˇ ngaˬ-ahˇ dawˬ ngehˬ cawˬ le-euˬ meh. Kʼoeˇ ngeh, Baˬbuˇloˬ miˇ kʼahˬ-ahˇ sahˬ paˬ Neˬbuˬkaˬneˬzaˬ uˆ lahˇ luꞈ-eu tseˇ yehꞈ kʼoꞈ byah laˇ-euˬ meh.

² Aˇ yamˬ kʼoeˇ yamˬ laꞈ kʼoeˇ, Baˬbuˇloˬ sahˬ paˬ-euˬ guiˇ maꞈ deuˬ Yeˬluˇsaˬlehˬ meuˬ-ahˇ guiˇ deuˆ luꞈ-awˇ, sahˬ paˬ-euˬ hawˇ nymˇ-ahˇ jaˆ-eu paꞈ kuˆ laꞈ kʼoeˇ ngaˇ uˇ luꞈ-eu ma.

³ Sahˬpaˬ Miˬyehˇ neh ehˇ-euˬ dawˬ deuˬ-ahˇ ngaˇ dzawˇ gaˬ-euˬ miˇ neh, sahˬ paˬ Zeˬdaˬkiˇ ngaˬ-ahˇ paꞈ kuˆ laꞈ kʼoeˇ nyehꞈ ahˇ-euˬ meh. Sahˬpaˬ Miˬyehˇ neh ehˇ-euˬ dawˬ-aˬ, heu loꞈ-ehˇ meh. “Meuˬ heu meuˬ-ahˇ Baˬbuˇloˬ sahˬ paˬ neh bi deuˆ gʼaˬ-eu lehˇ ngaˇ gʼeh-eu ma.

⁴ Sahˬ paˬ Zeˬdaˬkiˇ-aˬ, Baˬbuˇloˬ tsawˇ haˬ deuˬ-euˬ aˬ laꞈ laꞈ kʼoeˇ maˬ cehˆ dzeuˇ nya-aˇ. Aˬ yawꞈ-ahˇ Baˬbuˇloˬ sahˬ paˬ jawˇ gaˇ bi nyehꞈ keuˆ gʼeh-awˇ, Baˬbuˇloˬ sahˬ paˬ-ahˇ myaˆ pyawˬ ya ciˬ daˬ leˇ-awˇ, dawˬ ya ngehˬ cawˬ tehꞈ-a.

⁵ Zeˬdaˬkiˇ-ahˇ Baˬbuˇloˬ miˇ kʼahˬ-ahˇ bi nyehꞈ daˆ gʼeh-awˇ, aˬ yawꞈ-euˬ gaˇ kawˆ ngaˇ maˬ shaˇ noeˬ kʼoeˇ keuˆ ni kʼoeˇ gaˇ ya jawˇ tehꞈ-a. Baˬbuˇloˬ tsawˇ haˬ deuˬ-ahˇ aˬ yawꞈ guiˇ deuˆ kʼawꞈ, maˬ deuˆ gʼaˬ nya-aˇ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁶ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

⁷ “Ngaˬ-euˬ aˬ zawˇ Shaˬlmˬ-euˬ aˬ li Haˬnaˬmeˬlaˇ ngaˇ jawˇ gaˇ laˇ-awˇ, ngaˇ-aˬ, aˬ yawꞈ-ahˇ mehˇ nmˇ peh dzehˬ-eu gʼaˬ pyeuꞈ-eu miˇ neh, aˬ yawꞈ-euˬ deh yaˇ zeuˇ geuꞈ kʼmˬ-eu loꞈ-ehˇ, Beˬyaˬmiˬ miˇ kʼahˬ Aˬnaˬtawˇ meuˬ-ahˇ jaˆ-eu aˬ yawꞈ-euˬ deh yaˇ zeuˇ nehˬ laꞈ lehˇ ehˇ le tehꞈ-a lehˇ ehˇ-eu meh.

⁸ Kʼoeˇ naˇ, Sahˬpaˬ Miˬyehˇ neh kʼaˇ ehˇ taˬ-euˬ loꞈ-ehˇ ngaˇ jawˇ-eu paꞈ kuˆ-ahˇ Haˬnaˬmeˬlaˇ oe-awˇ, aˬ yawꞈ-euˬ deh yaˇ zeuˇ nehˬ laꞈ lehˇ ehˇ le-euˬ meh. Kʼoeˇ miˇ neh, Sahˬpaˬ Miˬyehˇ ngaˬ-ahˇ aˬ diˇ aˬ maˇ dawˬ ngehˬ cawˬ le-euˬ nga lehˇ ngaˇ siˬ duˬ -euˬ ma.

⁹ Haˬnaˬmeˬlaˇ-euˬ deh yaˇ kʼoeˇ kawˬ ngaˇ zeuˇ-awˇ, pyuˇ maˇ byaˆ tseˇ shiꞈ byaˆ gui nehˬ-euˬ ma.

¹⁰ deh yaˇ zeuˇ laꞈ mˇ-euˬ gaˇ kawˆ ngaˇ laꞈ ma dehˬ-awˇ jmˬ diˬ gʼaˬ ngeh, tsawˇ kaˬ deuˬ-euˬ mehˬ shi, jeˬ gaꞈ jeˬ ka mˇ-eu kaˇ-ahˇ tsaˬ ni pyuˇ gui nehˬ-euˬ ma.

¹¹ Kʼoeˇ naˇ, zeuˇ laꞈ mˇ-euˬ gaˇ kawˆ jahˇ tsehˆ gʼaˬ-awˇ jmˬ diˬ taˬ-euˬ seuˬ gʼaˬ kʼoeˇ taꞈ hawˇ-eu, jmˬ maˬ diˬ-euˬ seuˬ gʼaˬ kʼoeˇ nyiˬ taꞈ luꞈ-ahˇ,

¹² Haˬnaˬmeˬlaˇ hawˇ-eu zeuˇ laꞈ mˇ gaˇ laꞈ ma dehˬ-euˬ tsawˇ kaˬ deuˬ-euˬ mehˬ shi, sahˬ paˬ-euˬ hawˇ nymˇ lahˇ laꞈ kʼoeˇ kʼaˇ nuiˇ luꞈ-eu tsawˇ haˬ deuˬ-euˬ mehˬ shi, Neˬliˇyaˆ-euˬ aˬ li Baˬluˆ-euˬ laꞈ-ahˇ a nehˬ-euˬ ma.

¹³ Baˬluˆ-aˬ, Maˬseˬyaˇ-euˬ oeˬ paˬ meh. Tsawˇ haˬ kʼoeˇ myaˆ ni gʼeh-eu mehˬ shi, Baˬluˆ-ahˇ ngaˇ heu loꞈ-ehˇ, ehˇ nehˬ-euˬ ma.

¹⁴ ‘Zeuˇ laꞈ mˇ-euˬ gaˇ kawˆ saˇ kiˇ pyeuꞈ-eu jmˬ diˬ taˬ-euˬ hawˇ-eu maˬ diˬ taˬ-euˬ seuˬ gʼaˬ heu nyiˬ taꞈ luꞈ-ahˇ nawˇ yuˇ-awˇ, aˬ kaˇ kaˇ ziˇ keuˆ ni maˬ cawˆ-iˇ-ehˇ jaˆ nya ni, ciˬ cuˇ laꞈ kʼoeˇ dawˆ ahˇ-awˇ jeˬ hmˬ taˬ-eu gʼaˇ duˬ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ dawˬ biꞈ taˬ-euˬ meh.

¹⁵ Miˇ kʼahˬ heu kʼahˬ laꞈ kʼoeˇ, nymˇ, deh yaˇ hawˇ-eu aˬ gaꞈ yaˇ kmˇ deuˬ paˇ ya zeuˇ geuꞈ-eu aˇ nah keuˆ le tehꞈ-a’ lehˇ, Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ ehˇ taˬ-euˬ meh.”

Yeˬlaˬmiˇ gʼuiˬ lahˬ shaˇ-euˬ

¹⁶ Deh yaˇ zeuˇ laꞈ mˇ-euˬ gaˇ kawˆ jahˇ tsehˆ-euˬ seuˬ gʼaˬ kʼoeˇ Baˬluˆ-ahˇ ngaˇ biꞈ gʼaˬ ngeh, heu loꞈ-ehˇ guiˬ lahˬ shaˇ-euˬ ma.

¹⁷ “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, huiˬ dui dui-eu nawˬ-euˬ baoˬ-ahˇ gʼoe-eu laꞈ kʼoeˇ nawˇ aˬ laꞈ cawˬ ja-awˇ, mˬ hawˇ-eu miˇ-ahˇ beh taˬ-euˬ meh. Nawˇ maˬ mˇ nya-eu tiˬ jeˬ-iˬ maˬ jaˆ-a.

¹⁸ Tsawˇ haˬ aˇ heˇ aˇ muiˇ gʼaˬ kʼoeˇ taˆ, nawˬ-euˬ gʼoeˇ-eu gaˬ-eu jeˬ maˬ tsehˆ leˇ ni nawˇ bi mawˇ-euˬ meh. Ehˇ kʼawꞈ, aˬ ma aˬ da deuˬ neh mˇ-euˬ iˬ baˇ baˬ da neh, zaˬ ziˇ-ahˇ keuˆ ni nawˇ kʼehˬ nehˬ kʼaˆ nehˬ-euˬ meh. Nawˇ-aˬ, baoˬ huiˬ dui dui-eu Miˬyehˇ meh. Nawˇ-aˬ, baoˬ huiˬ-eu Sahˬpaˬ Miˬyehˇ meh.

¹⁹ Nawˬ-euˬ nui noeˬ nui duˇ zahˬ dui dui leˇ paˬ-ehˇ gʼeh-awˇ, nawˬ neh mˇ-euˬ gaˇ deuˬ huiˬ dui dui-eu meh. Tsawˇ haˬ zaˬ kʼaˇ mˇ kʼaˇ shaˇ-eu jeˬ-ahˇ nawˇ mawˇ nya-awˇ, aˬ yawꞈ maꞈ neh kʼaˇ mˇ-euˬ loꞈ-ehˇ nawˇ guiˬ lahˬ biꞈ-eu meh.

²⁰ Aˇ hu ba Iˇjiˇtuˆ miˇ kʼahˬ laꞈ kʼoeˇ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ nawˇ mˇ-euˬ loꞈ-ehˇ, nymˬ-mˇ kʼawꞈ, Iˇsaˬleˬlaˆ miˇ kʼahˬ hawˇ-eu miˇ kʼahˬ nui deuˬ laꞈ kʼoeˇ nawˇ kʼoeˇ loꞈ-ehˇ mˇ luꞈ-eu miˇ neh, mˬ dzeˇ miˇ dzeˇ keuˆ ni nawˬ-ahˇ siˬ nya luꞈ meh.

²¹ Zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ mˇ-eu laꞈ kʼoeˇ, nga maꞈ-ahˇ muiˇ-eu deuˬ-ahˇ nawˇ laˆ guˆ nehˬ-awˇ, nawˬ-euˬ baoˬ-ahˇ gʼoe-eu laꞈ kʼoeˇ, nawˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ, Iˇjiˇtuˆ miˇ kʼahˬ laꞈ kʼoeˇ neh nawˇ sheuˬ doˆ nehˬ-euˬ meh.

²² Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ nawˬ neh saˇ jaˇ dzaˬ taˬ-euˬ jaˆ-eu loꞈ-ehˇ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ heu kʼahˬ, aˬ yawꞈ maꞈ-ahˇ nawˇ biꞈ-euˬ meh.

²³ Ehˇ kʼawꞈ, miˇ kʼahˬ heu kʼahˬ aˬ yawꞈ maꞈ za-awˇ jawˇ luꞈ ngeh, nawˬ-euˬ dawˬ-ahˇ aˬ yawꞈ maꞈ maˬ naˇ haˬ geuꞈ-ehˇ, nawˬ neh mehˬ nehˬ tsoˆ nehˬ-euˬ loꞈ-ehˇ maˬ dehꞈ ni, nawˬ neh bi mˇ-euˬ jeˬ-ahˇ aˬ yawꞈ maꞈ maˬ mˇ-a. Kʼoeˇ miˇ neh heu loꞈ-ehˇ gʼeh-eu luˬ-iˇ seˇ-iˇ-eu jeˬ, aˬ yawꞈ maꞈ kʼoeˇ taˆ nawˇ bi keuˆ le-euˬ meh.

²⁴ “Yeˬluˇsaˬlehˬ meuˬ-ahˇ deuˆ gʼaˬ-eu gʼaˇ duˬ Baˬbuˇloˬ tsawˇ haˬ deuˬ meuˬ jawˬ jawˬ-ehˇ miˇ tsaˬ ciˬ goˇ-awˇ guiˇ deuˆ luꞈ meh. Guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ baˬ da neh, meuˬ heu meuˬ aˬ yawꞈ maꞈ-euˬ laꞈ-ahˇ ya ahˇ leˇ-eu yaw duˬ baw-eu meh. Nawˬ neh kʼaˇ ehˇ taˬ-euˬ jeˬ keuˆ le taˬ-euˬ gaˇ nawˇ mawˇ luꞈ meh.

²⁵ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, Baˬbuˇloˬ tsawˇ haˬ deuˬ meuˬ heu meuˬ-ahˇ deuˆ gʼaˬ-eu keuˆ laˇ taˬ-euˬ kʼawꞈ, tsawˇ kaˬ heu deuˬ-euˬ mehˬ shi deh yaˇ zeuˇ-eu gʼaˇ duˬ nawˇ ngaˬ-ahˇ dawˬ biꞈ laꞈ-euˬ meh.”

²⁶ Kʼoeˇ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²⁷ “Ngaˇ-aˬ, miˇ tsaˬ zaˬ dawˬ tawˆ luꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma. Ngaˇ maˬ mˇ nya-eu tiˬ jeˬ-iˬ maˬ jaˆ.

²⁸ Yeˬluˇsaˬlehˬ meuˬ heu, Baˬbuˇloˬ sahˬ paˬ Neˬbuˬkaˬneˬzaˬ hawˇ-eu aˬ yawꞈ-euˬ guiˇ maꞈ deuˬ-ahˇ ngaˇ a nehˬ-awˇ, bi deuˆ gʼaˬ ma.

²⁹ Baˬbuˇloˬ tsawˇ haˬ kʼoeˇ deuˬ meuˬ laꞈ kʼoeˇ uˇ laˇ-awˇ, nymˇ mˬ kʼoeˇ taˆ Baˬlaˇ miˬ yehˇ-ahˇ yaw saw jeˬ doꞈ damˬ-awˇ, miˬ yehˇ nui deuˬ-ahˇ aˬ gaꞈ dzaˇ uiˇ lawˇ nehˬ-eu laꞈ kʼoeˇ, ngaˇ nui ma pehˇ ni mˇ-euˬ nymˇ kʼoeˇ deuˬ nehˬ-ehˇ tiˬ kawˆ loꞈ-ehˇ, meuˬ kʼoeˇ meuˬ-ahˇ aˬ yawꞈ maꞈ miˬ dzaˬ dzah puiˆ dzeh tehꞈ-a.

³⁰ Iˇsaˬleˬlaˆ tsawˇ haˬ deuˬ hawˇ-eu Yuˇdaˆ tsawˇ haˬ deuˬ-aˬ, nyiˇ ngeh neh ngaˇ nui ma maˬ saˇ-eu jeˬ tehꞈ-ehˇ mˇ-euˬ meh.

³¹ Meuˬ heu meuˬ teˬ dahˬ beh ngeh neh, meuˬ laꞈ kʼoeˇ jawˇ-eu tsawˇ haˬ deuˬ ngaˇ nui ma bi pehˇ-eu jeˬ tehꞈ-ehˇ mˇ-euˬ miˇ neh, meuˬ heu meuˬ-ahˇ laˆ cawˆ nehˬ-eu gʼaˇ duˬ, ngaˇ noeˬ tsehˆ taˬ-euˬ ma.

³² Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ neh, aˬ yawꞈ maꞈ-euˬ sahˬ paˬ deuˬ, aˬ yuiꞈ aˬ tsu deuˬ, piˇ ma deuˬ hawˇ-eu, miˬ yehˇ gʼaˇ duˬ ngehˬ dah-eu deuˬ nehˬ-ehˇ tiˬ kawˆ loꞈ-ehˇ kʼaˇ mˇ-euˬ yaw haiˬ jeˬ baˬ da neh, meuˬ heu meuˬ-ahˇ ngaˇ laˆ cawˆ-eu ma.

³³ Aˬ yawꞈ maꞈ ngaˬ-ahˇ naˇ kʼah ciˬ pyawˇ-awˇ, ngaˬ neh tiˬ poˆ saˇ-iˬ tiˬ poˆ mehˬ nehˬ tsoˆ nehˬ-euˬ dawˬ-ahˇ naˬ bawˇ maˬ ciˬ kʼmˇ-a.

³⁴ Ngaˬ-ahˇ uˬ duˬ tahˬ-eu gʼaˇ duˬ tsoˆ taˬ-euˬ Uˬ duˬ tahˬ nymˇ nymˇ ma laꞈ kʼoeˇ, nui daˆ daˆ laˇ paˬ-ehˇ gʼeh-eu aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ baꞈ ahˇ taˬ-awˇ, Uˬ duˬ tahˬ nymˇ nymˇ ma-ahˇ laˆ jawꞈ gaˇ keuˆ ni aˬ yawꞈ maꞈ jahˇ keuˆ-euˬ meh.

³⁵ Moˇlehˆ miˬ yehˇ-ahˇ aˬ yawꞈ maꞈ-euˬ aˬ buˇ aˬ li deuˬ lawˇ nehˬ-eu gʼaˇ duˬ, Hiˬnoˬ deh kʼawꞈ-ahˇ Baˬlaˇ miˬ yehˇ gʼaˇ duˬ lawˇ duˬ tiˬ tsahˇ aˬ yawꞈ maꞈ tsoˆ-euˬ meh. Kʼoeˇ loꞈ-ehˇ jahˇ-eu gʼaˇ duˬ aˬ yawꞈ maꞈ-ahˇ ngaˇ maˬ mehˬ maˬ tsoˆ-euˬ uˬ taꞈ, aˬ yawꞈ maꞈ kʼoeˇ loꞈ-ehˇ jahˇ-awˇ Yuˇdaˆ tsawˇ haˬ deuˬ iˬ baˇ mˇ ni sheuˬ bahˬ nehˬ tehꞈ-a lehˇ, nui ma laꞈ kʼoeˇ tehꞈ-ehˇ kʼawꞈ ngaˇ maˬ noeˬ haw-aˬ.”

Noeˬ tmˬ kʼaˇ za-eu saˇ jaˇ

³⁶ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Yeˬlaˬmiˇ-oˇ, guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ baˬ da neh, Yeˬluˇsaˬlehˬ meuˬ heu Baˬbuˇloˬ sahˬ paˬ-euˬ laꞈ-ahˇ ahˇ leˇ-eu ngaˇ lehˇ, meuˬ laꞈ kʼoeˇ jawˇ-eu tsawˇ haˬ deuˬ ehˇ luꞈ meh. Ngaˇ ehˇ gaˇ tiˬ poˆ paˇ naˇ haˬ siˬ.

³⁷ Ngaˇ nui ma pehˇ-eu laꞈ kʼoeˇ aˬ cawˬ miˇ kʼahˬ doe ni bi jawˇ byaˆ taˬ-euˬ ngaˬ-euˬ tsawˇ haˬ heu deuˬ-ahˇ paˇ sheuˬ uiˬ-awˇ, jawˇ duˬ heu tsahˇ-ahˇ paˇ sheuˬ kʼoꞈ keuˆ nehˬ-awˇ, nui saˇ oꞈ-eu laꞈ kʼoeˇ bi dehꞈ ma.

³⁸ Kʼoeˇ ngeh jawˇ, aˬ yawꞈ maꞈ ngaˬ-euˬ tsawˇ haˬ pyeuꞈ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ ma.

³⁹ Aˬ yawꞈ maꞈ nui noeˬ tiˬ jeˬ tehꞈ-ehˇ bi ahˇ ma. Aˬ yawꞈ maꞈ hawˇ-eu aˬ yawꞈ maꞈ-euˬ zaˬ deuˬ uˆ deuˬ muiˬ ni, aˬ myah luꞈ ngaˬ-ahˇ yaw zeu baw-eu nui noeˬ tiˬ jeˬ tehꞈ-ehˇ aˬ yawꞈ maꞈ-euˬ nui ma laꞈ kʼoeˇ bi ahˇ ma.

⁴⁰ Mˬ maˬ maˬ byaˆ zaˇ ziˇ ziꞈ-eu saˇ jaˇ, aˬ yawꞈ maꞈ nehˬ-ehˇ ngaˇ dzaˬ ma. Aˬ yawꞈ maꞈ-ahˇ ngaˇ yaw muiˬ jeˬ maˬ tsehˆ leˇ ni mˇ nehˬ ma. Aˬ yawꞈ maꞈ ngaˬ-ahˇ maˬ paˇ byehˇ dzeh peuˬ-eu gʼaˇ duˬ, aˬ yawꞈ maꞈ-euˬ nui ma gʼawˇ mawˇ dawˬ tawˆ luꞈ ngaˬ-ahˇ guˆ ni ngaˇ jahˇ ma.

⁴¹ Aˬ yawꞈ maꞈ-ahˇ yaw muiˬ jeˬ mˇ nehˬ-eu gʼaˇ duˬ ngaˇ laˬ kʼaˬ cehˇ-awˇ, miˇ kʼahˬ heu kʼahˬ laꞈ kʼoeˇ ziꞈ dah ni bi dehꞈ ma.

⁴² “Tsawˇ haˬ heu deuˬ kʼoeˇ taˆ guˆ-eu gaˆ-eu jeˬ heu, ngaˬ neh bi keuˆ le-euˬ loꞈ-ehˇ, ngaˬ neh saˇ jaˇ kʼaˇ dzaˬ taˬ-euˬ yaw muiˬ jeˬ dawˬ tawˆ luꞈ, aˬ yawꞈ maꞈ-ahˇ ngaˇ biꞈ ma.

⁴³ Miˇ kʼahˬ heu kʼahˬ-aˬ, tsawˇ haˬ zaˬ hawˇ-eu jeˬ zaˬ deuˬ maˬ jawˇ nya-eu kʼaˇ shuiꞈ deh yaˇ loꞈ-ehˇ pyeuꞈ-iˇ-awˇ, Baˬbuˇloˬ tsawˇ haˬ deuˬ-euˬ laꞈ-ahˇ ahˇ leˇ tehꞈ-a lehˇ, tsawˇ haˬ heu deuˬ ehˇ luꞈ meh. Ehˇ kʼawꞈ, miˇ kʼahˬ heu kʼahˬ laꞈ kʼoeˇ deh yaˇ ahˬ taꞈ zeuˇ taˬ-eu aˇ nah paˇ keuˆ le tehꞈ-a.

⁴⁴ Miˇ kʼahˬ zaˬ deuˬ deh yaˇ zeuˇ-awˇ, tsawˇ kaˬ deuˬ-euˬ mehˬ shi laꞈ ma dehˬ dehˬ-ehˇ jmˬ diˬ tehꞈ-a. Beˬyaˬmiˬ miˇ kʼahˬ laꞈ kʼoeˇ maˬ ehˇ, Yeˬluˇsaˬlehˬ meuˬ-euˬ tahˬ gʼoꞈ tahˬ jawˇ jaˆ-eu pu deuˬ laꞈ kʼoeˇ maˬ ehˇ, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ laꞈ kʼoeˇ maˬ ehˇ, gawˬ jawˬ dawˬ dahˬ-ahˇ maˬ ehˇ, Yuˇdaˆ miˇ kʼahˬ laꞈ oˆ dzaˬ-ahˇ maˬ ehˇ, kʼoeˇ loꞈ-ehˇ deh yaˇ zeuˇ tehꞈ-a. Ngaˬ-euˬ tsawˇ haˬ deuˬ-ahˇ, aˬ yawꞈ maꞈ-euˬ miˇ kʼahˬ laꞈ kʼoeˇ paˇ bi gʼoꞈ jawˇ laˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”