Yeˬlaˬmiˇ 30 - Akha

Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ saˇ jaˇ biꞈ-eu

¹ Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

² Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Ngaˬ neh nawˬ-ahˇ kʼaˇ ehˇ nehˬ-euˬ jeˬ, sahˬ boꞈ laꞈ kʼoeˇ boꞈ ahˇ taˬ-awˬ.

³ Aˬ jeˬ miˇ neh ehˇ naˇ, ngaˬ-euˬ tsawˇ haˬ pyeuꞈ-eu Iˇsaˬleˬlaˆ tsawˇ haˬ hawˇ-eu Yuˇdaˆ tsawˇ haˬ deuˬ-ahˇ, ngaˇ paˇ sheuˬ kʼoꞈ laꞈ-eu aˇ yamˬ keuˆ le luꞈ meh. Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ taˬ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˇ paˇ sheuˬ kʼoꞈ laꞈ-awˇ, miˇ kʼahˬ kʼoeˇ kʼahˬ aˬ yawꞈ maꞈ paˇ ya geuꞈ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁴ Iˇsaˬleˬlaˆ tsawˇ haˬ hawˇ-eu Yuˇdaˆ tsawˇ haˬ deuˬ-ahˇ Sahˬpaˬ Miˬyehˇ ehˇ-eu,

⁵ “Guˆ-awˇ guˇ-eu teˇ saˇ ngaˇ gaˬ-eu ma. Nui saˇ oꞈ-awˇ guˇ luꞈ-eu maˬ ngeuˇ-ehˇ, guˆ-eu baˬ da neh guˇ-eu teˇ saˇ meh.

⁶ Yaw muiˬ paˬ-ehˇ shaˇ noeˬ duˬ sheˇ. Kʼaˬ dzeˇ zaˬ zaˬ baw nya ta loˇ. Toˆ-ehˇ maˇ-iˬ, aˬ jeˬ miˇ neh kʼaˬ dzeˇ zaˬ deuˬ, zaˬ miˬ zaˬ zaˬ baw ngeh loꞈ-ehˇ, uꞈ maˆ-ahˇ dehˬ tehˬ-awˇ jawˇ ta. Aˬ jeˬ miˇ neh yawˬ gʼaˬ na luꞈ pyuˇ pya ni pyeuꞈ luꞈ ta.

⁷ Guˆ laˇ paˬ-ehˇ gʼeh-eu aˇ nah keuˆ le luꞈ meh. Ngaˬ-euˬ tsawˇ haˬ shaˬ zahˬ naꞈ dui dui-eu, aˇ nah kʼoeˇ-ahˇ duˇ-eu yawˬ nah yawˬ maˬ jaˆ-a. Ehˇ kʼawꞈ, aˬ yawꞈ maꞈ ya buˬ-iˇ tehꞈ-a.”

⁸ Baoˬ huiˬ-eu Sahˬpaˬ Miˬyehˇ ehˇ-eu, “Aˇ nah kʼoeˇ nah keuˆ le ngeh, aˬ yawꞈ maꞈ-euˬ kawˬ lahˇ-ahˇ daˬ luꞈ-eu laꞈ gʼahˬ ngaˇ lehˆ nehˬ-awˇ, aˬ yawꞈ maꞈ-euˬ aˬ kuiˇ-ahˇ daˬ luꞈ-eu shmˇ caˆ ngaˇ puiˇ nehˬ ma. Aˬ yawꞈ maꞈ-ahˇ aˬ cawˬ tsawˇ jeuˬ-euˬ zaˬ kʼaˆ maˬ paˇ bi geuꞈ ma.

⁹ Aˬ yawꞈ maꞈ-euˬ Miˬyehˇ Sahˬpaˬ Miˬyehˇ pyeuꞈ-eu ngaˬ-euˬ nui kʼahˇ aˬ yawꞈ maꞈ mˇ-awˇ, Daˬbiˇ-euˬ zaˬ deuˬ uˆ deuˬ laꞈ kʼoeˇ, aˬ yawꞈ maꞈ gʼaˇ duˬ ngaˬ neh tseˇ doˆ nehˬ-euˬ sahˬ paˬ tiˬ gʼaˬ uˬ moˆ, aˬ yawꞈ maꞈ dehꞈ tehꞈ-a.

¹⁰ “Ngaˬ-euˬ tsawˇ haˬ deuˬ-oˇ, taˬ guˆ. Iˇsaˬleˬlaˆ tsawˇ haˬ deuˬ-oˇ, nui ma taˬ baˬ. Naw maꞈ-ahˇ nyehꞈ daˆ gʼeh-awˇ bi jawˇ-euˬ, gaˇ mahˇ kaˬ gaˇ jaˆ-eu miˇ kʼahˬ kʼoeˇ kʼahˬ laꞈ kʼoeˇ, naw maꞈ-ahˇ ngaˇ ka kʼoꞈ doˆ ma. Naw maꞈ iˇ kahˇ gʼoꞈ keuˆ laˇ-awˇ, nui saˇ oꞈ-eu laꞈ kʼoeˇ ya dehꞈ tehꞈ-a. naw maꞈ kʼahˬ lahˇ kʼaˇ maˬ za-ehˇ, noeˬ guˆ kʼaˇ maˬ za ni ya dehꞈ tehꞈ-a.

¹¹ Naw maꞈ jawˇ gaˇ ngaˇ oe-awˇ ka kʼoꞈ ma. Naw maꞈ-ahˇ ngaˇ teh byaˆ taˬ-euˬ miˇ kʼahˬ kʼoeˇ deuˬ laꞈ kʼoeˇ, aˬ cawˬ tsawˇ jeuˬ dawˬ tawˆ luꞈ-ahˇ ngaˇ laˆ cawˆ kʼawꞈ, naw maꞈ-ahˇ ngaˇ maˬ laˆ cawˆ nehˬ. Naw maꞈ-ahˇ ngaˇ maˬ kʼehˬ ni-aˬ maˬ bi dzeuˇ-iˇ. Ehˇ kʼawꞈ naw maꞈ-ahˇ ngaˇ kʼehˬ ngeh, aˬ za za-ehˇ kʼehˬ nehˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹² Sahˬpaˬ Miˬyehˇ aˬ yawꞈ-euˬ tsawˇ haˬ-ahˇ ehˇ-eu, “Naw maꞈ-euˬ maˇ naˇ maˬ laˆ byoˆ nya-ehˇ, naw maꞈ-euˬ maˇ kʼehˬ maˬ yaˇ taˬ nya-a.

¹³ Naw maꞈ-ahˇ bo saˆ-eu gʼaˬ maˬ jawˇ-ehˇ, maˇ naˇ-ahˇ lehꞈ-eu jaˆ gʼaˬ maˬ jaˆ-eu miˇ neh, taˬ leˇ-eu gaˇ ma maˬ dahˇ-a.

¹⁴ Yaw beh naw maꞈ-ahˇ gaˬ-euˬ tsawˇ haˬ deuˬ, naw maꞈ-ahˇ ngehˇ tsehˆ jiˇ-awˇ, naw maꞈ gaˇ kawˆ maˬ shaˇ noeˬ-a. Naw maꞈ iˬ baˇ myaˬ dui dui-awˇ, lehˬ-eu ca-eu aˇ dzehˬ dzeuˇ-eu miˇ neh, naw maꞈ-ahˇ ngaˇ muiˇ-eu laꞈ kʼoeˇ, yaw kʼaˆ-ehˇ kʼehˬ-euˬ ma.

¹⁵ Naw maꞈ maˇ kʼehˬ maˇ naˇ gaˇ kawˆ taˬ toˇ. Taˬ leˇ nya-eu gaˇ ma maˬ paˇ dahˇ meh. Naw maꞈ iˬ baˇ myaˬ dui dui-awˇ, lehˬ-eu ca-eu aˇ dzehˬ dzeuˇ-eu miˇ neh, naw maꞈ-ahˇ ngaˇ heu loꞈ-ehˇ kʼehˬ-eu ma.

¹⁶ Ehˇ kʼawꞈ, naw maꞈ-ahˇ kawꞈ dzaˬ-euˬ tsawˇ haˬ kʼoeˇ deuˬ, aˬ cawˬ neh kawꞈ dzaˬ gaˇ paˇ ya daˬ-awˇ, naw maꞈ-ahˇ muiˇ-eu tsawˇ haˬ dawˬ tawˆ luꞈ, aˬ cawˬ miˇ kʼahˬ-ahˇ bi nyehꞈ gʼeh tehꞈ-a. Naw maꞈ-ahˇ kʼaˇ kʼaˆ dzaˬ-euˬ tsawˇ haˬ, aˬ cawˬ neh kʼaˆ dzaˬ gaˇ ya daˬ-awˇ, naw maꞈ-euˬ mˇ myawˬ-ahˇ ceh geuꞈ-euˬ deuˬ, aˬ cawˬ neh mˇ myawˬ bi ceh geuꞈ tehꞈ-a.

¹⁷ Ziˇoˬ gawˬ jawˬ-aˬ, biˬ dzeh-euˬ myawˬ kuˬ-ahˇ duˇ-awˇ, myaˆ haw cawˬ nehˬ-eu gʼaˬ maˬ jawˇ-a lehˇ, naw maꞈ-ahˇ muiˇ-eu tsawˇ haˬ deuˬ ehˇ kʼawꞈ, naw maꞈ-ahˇ ngaˇ paˇ bi dehꞈ dzaˬ laˇ-awˇ, naw maꞈ-euˬ naˇ gawˇ laˆ taˬ nehˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁸ Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-euˬ tsawˇ haˬ deuˬ yawˬ ha miˇ kʼahˬ-ahˇ paˇ bi gʼoꞈ jawˇ leˇ-awˇ, nymˇ jiˇ yawˬ jiˇ na luꞈ kʼoeˇ taˆ, ngaˇ gʼawˬ shaˬ gaˬ nehˬ ma. Yeˬluˇsaˬlehˬ meuˬ paˇ bi gawˬ muiˬ-awˇ, sahˬ paˬ jawˇ-eu hawˇ nymˇ paˇ bi tsoˆ ziꞈ ma.

¹⁹ Kʼoeˇ gaˇ jawˇ-eu tsawˇ haˬ deuˬ ja ceuˬ-eu caˇ dawˬ caˇ-awˇ, laˬ kʼaˬ cehˇ cehˇ-ehˇ guˇ tehꞈ-a. Ngaˬ-euˬ guiˬ lahˬ baˬ da aˬ yawꞈ maꞈ jeuˬ le o le-awˇ, aˬ yawꞈ maꞈ-ahˇ aˬ cawˬ taˬ huiˬ taˬ mahˇ tehꞈ-a.

²⁰ Aˇ hu aˬ yawꞈ maꞈ-euˬ tsawˇ jeuˬ za taˬ-euˬ baoˬ, aˬ yawꞈ maꞈ-ahˇ ngaˇ paˇ biꞈ-eu laꞈ kʼoeˇ ziꞈ dah ni paˇ bi pyeuꞈ laˇ-awˇ, aˬ yawꞈ maꞈ-ahˇ kʼehˬ-eu deuˬ-ahˇ, ngaˇ paˇ kʼehˬ poˆ nehˬ ma.

²¹ Aˬ yawꞈ maꞈ-ahˇ yawˬ ha-euˬ tsawˇ jeuˬ neh bi sheuˬ gʼeh-awˇ, yawˬ ha-euˬ tsawˇ haˬ neh bi uˆ lahˇ ma. Aˬ yawꞈ-ahˇ ngaˇ kuˇ-eu miˇ neh, ngaˬ-euˬ dawˬ peh aˬ yawꞈ jiˆ laˇ tehꞈ-a. Ngaˬ neh maˬ kuˇ-euˬ tsawˇ haˬ zaˬ, dawˬ peh jiˆ laˇ peuˬ meh loˇ lehˇ, ngaˇ Sahˬpaˬ Miˬyehˇ ehˇ-eu ma.

²² Yawꞈ maꞈ ngaˬ-euˬ tsawˇ haˬ pyeuꞈ-awˇ, ngaˇ yawꞈ maꞈ-euˬ Miˬyehˇ pyeuꞈ ma.”

²³ Haw yawˬ. Sahˬpaˬ Miˬyehˇ nui ma pehˇ-eu mˬ jeˬ jaˬ lehˇ, miˬ dzaˬ loꞈ-ehˇ luˬ doˆ laˇ-awˇ, haiˬ-eu tsawˇ haˬ deuˬ-euˬ uˬ duˬ uˬ taˆ, jaˬ lehˇ lehˇ zeuˆ loꞈ-ehˇ keuˆ le tehꞈ-a.

²⁴ Sahˬpaˬ Miˬyehˇ-euˬ nui ma pehˇ-eu jeˬ, guˆ dui dui laˇ paˬ-ehˇ gʼeh-awˇ, nui kʼahˇ maˬ mˇ li kʼoeˇ keuˆ ni, nui pehˇ shuꞈ-iˇ-eu maˬ baw-a. Mehˬ hu paw dehꞈ gʼeh-eu aˇ yamˬ laꞈ kʼoeˇ, aˬ yawꞈ-euˬ tsawˇ haˬ deuˬ gaˇ kawˆ heu ya siˬ duˬ tehꞈ-a.