Yeˬlaˬmiˇ 3 - Akha

Saˇ jaˇ maˬ ziꞈ-eu Iˇsaˬleˬlaˆ

¹ Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ haˬ tiˬ gʼaˬ miˬ zaˬ kʼoꞈ-awˇ, aˬ cawˬ-ahˇ paˇ mˇ dzaˬ-iˇ gʼaˬ-euˬ gaˇ, sheuˬ kʼoꞈ geuꞈ nya ta loˇ. Kʼoeˇ loꞈ-ehˇ jahˇ-eu jeˬ miˇ tsaˬ tahˬ kʼawˇ-ahˇ bahˬ-eu meh. Ehˇ kʼawꞈ Iˇsaˬleˬlaˆ nawˇ-aˬ, miˇ kʼahˬ doe ni meh maˬ laˇ geuꞈ doe-awˇ, ngaˇ jawˇ gaˇ paˇ gʼoꞈ poˆ laˇ mawꞈ-eu meh.

² Gawˬ duˇ aˬ yawꞈ duˇ yawꞈ-ahˇ haw gʼeh sheˇ. Nawˬ neh kʼaˬ miˬ maˬ sheu doe-euˬ aˬ gaˇ jaˆ ta. Aˬlaˆ tsawˇ haˬ bawˇ tsahˬ-ahˇ tahˇ joe deh-eu loꞈ luꞈ-eu loꞈ-ehˇ, nawˬ nehˬ-ehˇ kʼaˬ miˬ sheu taꞈ-euˬ tsawˇ haˬ deuˬ-ahˇ, gaˇ ma gaˇ dzeˇ doe ni nawˇ loꞈ-eu meh. Nawˇ meh maˬ laˇ geuꞈ-awˇ dehꞈ doeˇ-eu baˬ da neh, miˇ tsaˬ tahˬ kʼawˇ jawꞈ dui dui-iˇ-euˬ meh.

³ Kʼoeˇ baˬ da neh uˬ yehˇ maˬ yehˇ le-ehˇ, iˇ cuꞈ iˇ beuˆ maˬ doˆ le ni tsiˇ leˇ-euˬ meh. Ehˇ kʼawꞈ, nawˇ meh maˬ laˇ-euˬ jawˬ gʼehˇ maˬ byehˇ-ehˇ, shaꞈ dawˇ-eu maˬ baw-a.

⁴ “Ehˇ kʼawꞈ, nawˇ nymˬ-mˇ ngaˬ-ahˇ heu loꞈ-ehˇ ehˇ-eu meh. ‘Nawˇ ngaˬ-euˬ aˬ da pyeuꞈ luꞈ-awˇ, nyiˇ ngeh neh ngaˬ-ahˇ gaˬ-euˬ meh.

⁵ Nawˇ nui ma pehˇ gʼaˬ-eu baw-awˇ, nui pehˇ shuꞈ-iˇ-eu baw tehꞈ-a.’ Iˇsaˬleˬlaˆ-oˇ, nawˇ kʼoeˇ loꞈ-ehˇ ehˇ kʼawꞈ, yaw haiˬ jeˬ-ahˇ nui kʼahˇ tiˬ shiˇ nawˇ mˇ-eu meh.”

Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ iˬ baˇ ya noeˬ poˆ meh

⁶ Yawˇshiˆ sahˬ paˬ geuꞈ-awˇ uˆ lahˇ luꞈ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Saˇ jaˇ maˬ ziꞈ-eu zaˬ miˬ zaˬ pyeuꞈ-eu Iˇsaˬleˬlaˆ aˬ joˆ-ehˇ dehꞈ luꞈ-eu nawˇ mawˇ maˬ loˇ. Aˬ yawꞈ ngaˬ-ahˇ byehˇ dzeh yaꞈ-awˇ, gawˬ duˇ yaw goˇ kʼaˇ jaˆ gaˇ hawˇ-eu aˇ bawˇ naˇ shmˇ kʼaˇ muiˬ gaˇ, meh maˬ laˇ geuꞈ doe-euˬ meh.

⁷ Aˬ yawꞈ kʼoeˇ loꞈ-ehˇ mˇ dehˆ shaˇ dehˆ gʼaˬ naˇ, ngaˇ jawˇ gaˇ gʼoꞈ kʼoꞈ laˇ-eu yaw duˬ baw tehꞈ-a lehˇ noeˬ-euˬ ma. Ehˇ kʼawꞈ aˬ yawꞈ maˬ gʼoꞈ laˇ-a. Aˬ yawꞈ maˬ gʼoꞈ laˇ gaˇ, saˇ jaˇ maˬ ziꞈ-eu aˬ yawꞈ-euˬ aˬ nyiˇ gʼaˬ pyeuꞈ-eu Yuˇdaˆ kʼawꞈ ya mawˇ-euˬ meh.

⁸ Iˇsaˬleˬlaˆ ngaˬ-ahˇ byehˇ dzeh yaꞈ-awˇ, meh maˬ laˇ geuꞈ iˇ-euˬ baˬ da neh, aˬ yawꞈ-ahˇ ngaˇ kʼoꞈ-awˇ teh dzeh nehˬ-euˬ gaˇ, Yuˇdaˆ mawˇ duˬ taˬ-euˬ meh. Ehˇ kʼawꞈ, Iˇsaˬleˬlaˆ-euˬ aˬ nyiˇ gʼaˬ pyeuꞈ-eu saˇ jaˇ maˬ ziꞈ-eu Yuˇdaˆ-aˬ, guˆ-eu nui ma maˬ ahˇ-ehˇ, aˬ yawꞈ gʼaˬ kʼawꞈ meh maˬ laˇ paˇ geuꞈ-euˬ meh.

⁹ Aˬ yawꞈ shaꞈ dawˇ-eu nui ma tiˬ pawꞈ-iˬ maˬ ahˇ ni, kʼaˬ lo hawˇ-eu daˇ kawˬ-ahˇ uˬ duˬ tahˬ-eu laꞈ kʼoeˇ, aˬ cawˬ nehˬ-ehˇ dehꞈ bahˬ-euˬ meh.

¹⁰ Kʼoeˇ loꞈ-ehˇ dehꞈ cawˆ gʼaˬ miˇ tsa, Iˇsaˬleˬlaˆ-euˬ saˇ jaˇ maˬ ziꞈ-eu aˬ nyiˇ pyeuꞈ-eu Yuˇdaˆ-aˬ, ngaˇ jawˇ gaˇ gʼoꞈ kʼoꞈ laˇ-eu jahˇ geuꞈ-euˬ meh. Ehˇ kʼawꞈ nui ma laꞈ kʼoeˇ keuˆ ni gʼoꞈ laˇ-euˬ jeˬ maˬ ngeuˇ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹¹ Iˇsaˬleˬlaˆ aˬ yawꞈ-ahˇ byehˇ dzeh-euˬ kʼawꞈ, saˇ jaˇ maˬ ziꞈ-eu Yuˇdaˆ naˆ maˬ tseˇ maˬ gaˇ meh lehˇ, Sahˬpaˬ Miˬyehˇ ngaˬ-ahˇ ehˇ-eu meh.

¹² Iˇsaˬleˬlaˆ-ahˇ heu loꞈ-ehˇ ehˇ nehˬ leˇ-awˬ lehˇ aˬ yawꞈ ngaˬ-ahˇ ehˇ-eu meh. “Saˇ jaˇ maˬ ziꞈ-eu Iˇsaˬleˬlaˆ-oˇ, ngaˇ jawˇ gaˇ gʼoꞈ laˇ-awˬ. Ngaˇ gʼawˬ shaˬ gaˬ nya-awˇ nui ma maˬ pehˇ. Mˬ maˬ maˬ byaˆ zaˇ ziˇ nawˬ-ahˇ nui ma maˬ paˇ pehˇ ma.

¹³ Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nawˇ puiˬ-euˬ miˇ neh, nawˇ iˬ baˇ ahˇ-eu ma lehˇ ehˇ doˆ naˇ gʼaˬ ma. Aˇ bawˇ naˇ shmˇ kʼaˇ muiˬ-eu tsahˇ uˬ moˆ, boeˇ miˬ siˬ kʼaˬ-euˬ Miˬyehˇ deuˬ-ahˇ nawˇ gaˬ-awˇ, ngaˬ-euˬ zahˇ dawˬ kʼoꞈ dawˬ-ahˇ nawˇ maˬ naˇ haˬ geuꞈ-euˬ gaˇ kawˆ, dawˇ coe ni ehˇ doˆ jiˇ-awˬ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁴ “Saˇ jaˇ maˬ ziꞈ-eu tsawˇ haˬ deuˬ-oˇ, gʼoꞈ laˇ-awˬ. Naw maꞈ ngaˬ-euˬ tsawˇ haˬ pyeuꞈ-eu ma. Meuˬ tiˬ meuˬ laꞈ kʼoeˇ naw maꞈ tsawˇ haˬ tiˬ gʼaˬ hawˇ-eu, aˇ jeuˬ tiˬ jeuˬ laꞈ kʼoeˇ nyiˬ gʼaˬ kuˇ doˆ-awˇ, Ziˇoˬ gawˬ jawˬ kʼoeˇ taˆ sheuˬ kʼoꞈ laꞈ ma.

¹⁵ Ngaˬ-euˬ ehˇ dawˬ naˇ haˬ-awˇ uˆ lahˇ-eu aˬ yuiꞈ aˬ tsu deuˬ, naw maꞈ-ahˇ ngaˇ biꞈ ma. Zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu jeˬ tiˬ byah ni ahˇ-eu laꞈ kʼoeˇ, naw maꞈ kʼoeˇ taˆ aˬ yawꞈ maꞈ uˆ lahˇ tehꞈ-a.

¹⁶ Kʼoeˇ naˇ, miˇ kʼahˬ kʼoeˇ kʼahˬ laꞈ kʼoeˇ naw maꞈ-euˬ tsawˇ haˬ myaˬ laˇ behˇ laˇ ngeh, ngaˬ-euˬ Dawˬ ma saˇ jaˇ Bahˬ keuˆ gaˇ kawˆ aˬ yawꞈ maꞈ maˬ paˇ ja ni pyeuꞈ-iˇ tehꞈ-a. Bahˬ keuˆ kʼoeˇ-euˬ gaˇ kawˆ aˬ yawꞈ maꞈ maˬ paˇ shaˇ noeˬ ni ngehˇ jiˇ tehꞈ-a. Bahˬ keuˆ kʼoeˇ-ahˇ aˬ yawꞈ maꞈ maˬ paˇ loˬ-ehˇ, bahˬ keuˆ yaw shuiꞈ kʼawꞈ maˬ jahˇ paˇ ni jawˇ tehꞈ-a.

¹⁷ Aˇ yamˬ kʼoeˇ yamˬ keuˆ laˇ ngeh, Yeˬluˇsaˬlehˬ meuˬ-ahˇ ‘Sahˬpaˬ Miˬyehˇ -euˬ nuiˇ mahˬ’ lehˇ kuˇ-awˇ, tsawˇ jeuˬ dawˬ tawˆ luꞈ kʼoeˇ gaˇ uiˬ laˇ-awˇ ngaˬ-ahˇ uˬ duˬ tahˬ tehꞈ-a. Aˬ yawꞈ maꞈ-euˬ haiˬ-eu gʼahˇ-eu nui ma neh kʼehˇ-euˬ jeˬ-ahˇ, aˬ yawꞈ maꞈ maˬ mˇ ni byehˇ tehꞈ-a.

¹⁸ Iˇsaˬleˬlaˆ hawˇ-eu Yuˇdaˆ tiˬ gaˇ gm leˇ-awˇ, laꞈ taˆ paw jaˆ-eu miˇ kʼahˬ -ahˇ aˬ cawˬ neh bi nyehꞈ byoˆ gʼeh-euˬ gaˇ neh gʼoꞈ ka le-awˇ, naw maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ tsehˆ taˬ-euˬ miˇ kʼahˬ-ahˇ ya gʼoꞈ jawˇ le tehꞈ-a.”

Miˬyehˇ-euˬ tsawˇ haˬ aˬ cawˬ-euˬ miˬ yehˇ-ahˇ uˬ duˬ tahˬ-euˬ

¹⁹ Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ-oˇ, nawˬ-ahˇ ngaˬ-euˬ aˬ li bi geuꞈ mawꞈ-awˇ, miˇ tsaˬ kʼoeˇ taˆ aˬ cawˬ naˆ maˬ tseˇ muiˬ dzehˬ-eu, nui saˇ za-eu miˇ kʼahˬ nawˬ-ahˇ biꞈ mawꞈ-eu ma. Nawˇ ngaˬ-ahˇ aˬ da kuˇ-awˇ, maˬ gʼawˬ-iˇ ni bi dehꞈ mawꞈ nya.

²⁰ Ehˇ kʼawꞈ, saˇ jaˇ maˬ ziꞈ-eu miˬ zaˬ tiˬ gʼaˬ loꞈ-ehˇ, nawˇ ngaˬ-ahˇ saˇ jaˇ puiˬ-euˬ meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

²¹ Gawˬ duˇ uˬ du teˇ saˇ gaˬ laˇ-eu meh. Iˇsaˬleˬlaˆ tsawˇ haˬ deuˬ ngoeˇ-awˇ shaˇ-eu teˇ saˇ meh. Aˬ jeˬ miˇ neh ehˇ naˇ aˬ yawꞈ maꞈ dehꞈ lehˬ-awˇ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ngehˇ-euˬ meh.

²² Sahˬpaˬ Miˬyehˇ-ahˇ kʼaˇ byehˇ dzeh yaꞈ-euˬ tsawˇ haˬ dawˬ tawˆ luꞈ gʼoꞈ laˇ-awˇ, naw maꞈ-euˬ naˇ gawˇ aˬ yawꞈ laˆ saˆ-awˇ, saˇ jaˇ ziꞈ-eu tsawˇ haˬ paˇ bi pyeuꞈ laˇ tehꞈ-a. Naw maꞈ heu loꞈ-ehˇ ehˇ-eu meh. “Sahˬpaˬ Miˬyehˇ-aˬ, nga maꞈ-euˬ Miˬyehˇ pyeuꞈ-eu miˇ neh, aˬ yawꞈ jawˇ gaˇ nga maꞈ gʼoꞈ laˇ-eu ma.

²³ Gawˬ duˇ uˬ du kʼaˇ ngeuˇ gaˇ lawˇ ciꞈ zaˬ deuˬ uˬ duˬ tahˬ-eu jeˬ, nga maꞈ gʼaˇ duˬ tiˬ jeˬ-iˬ gaˇ dahˇ maˬ tsoeˬ nya. Iˇsaˬleˬlaˆ-ahˇ caw ba-euˬ jeˬ-aˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ jawˇ gaˇ neh doˆ le-eu tehꞈ meh.

²⁴ Ehˇ kʼawꞈ, shaꞈ dawˇ-eu jeˬ-euˬ miˬ yehˇ pyeuꞈ-euˬ Baˬlaˇ miˬ yehˇ-ahˇ uˬ duˬ tahˬ-euˬ baˬ da neh, yawˇ hawˇ-eu mawˇ neˇ deuˬ maˬ ehˇ, aˬ buˇ aˬ li deuˬ maˬ ehˇ, aˇ hu ba aˬ poeˬ aˬ bawˇ-euˬ ziˇ-ahˇ neh kʼaˇ mˇ jaˆ yaꞈ-euˬ jeˬ maˬ ehˇ, dawˬ tawˆ luꞈ laˆ smˬ jiˇ-euˬ ma.

²⁵ Shaꞈ dawˇ-eu laꞈ kʼoeˇ yuꞈ ja-awˇ, daˬ ga-eu jeˬ neh bi sheu kaˬ paˬ-ehˇ gʼeh miˇ-a. Nga maꞈ hawˇ-eu nga maꞈ-euˬ aˬ poeˬ aˬ bawˇ deuˬ, nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ myah luꞈ puiˬ-awˇ, aˬ yawꞈ-euˬ zahˇ dawˬ kʼoꞈ dawˬ-ahˇ tiˬ jawˇ-iˬ maˬ naˇ haˬ geuꞈ ni dehꞈ-euˬ ma.”