Yeˬlaˬmiˇ 29 - Akha

Baˬbuˇloˬ miˇ kʼahˬ-ahˇ bi nyehꞈ gʼeh-euˬ deuˬ-ahˇ Yeˬlaˬmiˇ neh boꞈ nehˬ-euˬ sahˬ boꞈ

¹ Piˇ ma deuˬ, Miˬyehˇ gʼaˇ duˬ ngehˬ dah-eu deuˬ, miˇ kʼahˬ zaˬ kʼoeˇ taˆ aˬ yuiꞈ aˬ tsu geuꞈ-euˬ deuˬ hawˇ-eu, Yeˬluˇsaˬlehˬ meuˬ-ahˇ neh Baˬbuˇloˬ miˇ kʼahˬ-ahˇ Neˬbuˬkaˬneˬzaˬ neh kʼaˇ bi nyehꞈ daˆ gʼeh-euˬ tsawˇ haˬ dawˬ tawˆ luꞈ-ahˇ, ngaˇ sahˬ boꞈ tiˬ taꞈ boꞈ ahˇ gʼeh-euˬ ma.

² Sahˬ paˬ Yeˬhawˇyaˬciˬ maˬ ehˇ, aˬ yawꞈ-euˬ aˬ ma maˬ ehˇ, sahˬ paˬ-euˬ hawˇ nymˇ laꞈ kʼoeˇ gaˇ mˇ-eu yaw huiˬ yaw mahˇ deuˬ maˬ ehˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ sahˬ paˬ sahˬ ma geuꞈ-eu deuˬ maˬ ehˇ, Baˬbuˇloˬ miˇ kʼahˬ-ahˇ bi nyehꞈ daˆ leꞈ gʼaˬ jiˇ miˇ tsa, sahˬ boꞈ heu taꞈ ngaˇ boꞈ ahˇ gʼeh-euˬ ma.

³ Yuˇdaˆ sahˬ paˬ Zeˬdaˬkiˇ neh, Baˬbuˇloˬ sahˬ paˬ Neˬbuˬkaˬneˬzaˬ jawˇ gaˇ pyehˬ gʼeh-euˬ Shaˇpaˬ-euˬ aˬ li Eˇlaˬsaˬ hawˇ-eu Hiˇlaˬkiˇ-euˬ aˬ li Geˬmaˬliˇyaˆ aˬ nyaꞈ-ahˇ, sahˬ boꞈ kʼoeˇ taꞈ ngaˇ dawˆ ahˇ gʼeh-euˬ ma. Sahˬ boꞈ kʼoeˇ taꞈ laꞈ kʼoeˇ boꞈ taˬ-euˬ gaˇ kawˆ-aˬ, heu loꞈ-ehˇ ma.

⁴ “Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ-aˬ, aˬ yawꞈ neh Neˬbuˬkaˬneˬzaˬ-ahˇ kʼehˇ-awˇ, Yeˬluˇsaˬlehˬ meuˬ-ahˇ neh Baˬbuˇloˬ miˇ kʼahˬ-ahˇ kʼaˇ bi nyehꞈ daˆ gʼeh-euˬ tsawˇ haˬ dawˬ tawˆ luꞈ-ahˇ, heu loꞈ-ehˇ ehˇ-eu meh.

⁵ ‘Nymˇ tsoˆ-awˇ jawˇ duˬ dah-awˬ. Myawˬ dahˬ yaˇ dahˬ beh-awˇ mˇ dzaˬ kʼawꞈ dawˇ-awˬ.

⁶ Sheuˬ dahˬ dzaˬ taꞈ-awˇ, zaˬ oeˬ bi sahˇ le-awˬ. Naw maꞈ-euˬ zaˬ deuˬ kʼawꞈ, bi sheuˬ dahˬ dzaˬ taꞈ-awˇ, bi jeuˬ bi o le-awˬ. Naw maꞈ tsawˇ haˬ maˬ ya bi cuiˆ-iˇ ni, ya bi myaˬ laˇ meh.

⁷ Ngaˬ neh naw maꞈ-ahˇ bi nyehꞈ gʼeh-awˇ, naw maꞈ-ahˇ bi jawˇ-euˬ meuˬ kʼoeˇ deuˬ muiˬ laˇ jaˬ laˇ ni leh jeh-awˬ. Aˬ yawꞈ maꞈ gʼaˇ duˬ ngaˬ-ahˇ guiˬ lahˬ shaˇ-awˬ. Aˬ jeˬ miˇ neh ehˇ naˇ, aˬ yawꞈ maꞈ baw le za le naˇ, naw maꞈ kʼawꞈ baw le za le tehꞈ-a.

⁸ Naw maꞈ nehˬ-ehˇ jawˇ luꞈ-eu Miˬyehˇ gʼaˇ duˬ ngehˬ dah-eu deuˬ hawˇ-eu, mehˬ hu paw pyeuꞈ laˇ-eu gaˇ kawˆ ehˇ duˬ nya ma lehˇ kʼaˇ ehˇ-eu tsawˇ haˬ deuˬ neh, naw maꞈ-ahˇ mehˇ shuiˇ maˬ ya bi shuiˇ tawˆ ni yahˇ-awˬ lehˇ, Iˇsaˬleˬlaˆ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ, naw maꞈ-ahˇ dawˬ biꞈ-eu ma. Aˬ yawꞈ maꞈ yuꞈ maˆ maˆ mawˇ-euˬ gaˇ kawˆ ja gaˇ, naw maꞈ tiˬ pawꞈ-iˬ taˬ naˇ haˬ.

⁹ Aˬ yawꞈ maꞈ-aˬ, ngaˬ-euˬ tsawˇ myahˇ uˬ moˆ naw maꞈ-ahˇ jaˬ myawꞈ myawꞈ luꞈ-eu meh. Aˬ yawꞈ maꞈ-ahˇ ngaˬ neh kʼehˇ gʼeh leꞈ-euˬ maˬ ngeuˇ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.’

¹⁰ “Sahˬpaˬ Miˬyehˇ ehˇ-eu, ‘Baˬbuˇloˬ miˇ kʼahˬ-ahˇ biꞈ taˬ-euˬ aˇ yamˬ shiꞈ tseˇ kʼoꞈ byah laˇ ngeh, naw maꞈ-ahˇ ngaˇ gʼawˬ shaˬ gaˬ-awˇ, naw maꞈ-ahˇ iˇ kahˇ sheuˬ kʼoꞈ keuˆ nehˬ ma lehˇ ehˇ-euˬ ngaˬ-euˬ saˇ jaˇ-ahˇ ngaˇ ziꞈ ma.

¹¹ Ngaˬ neh naw maꞈ gʼaˇ duˬ gaˇ kawˆ kawˆ taˬ-euˬ jeˬ-ahˇ, ngaˇ tehꞈ-ehˇ siˬ nya-eu ma. Naw maꞈ-ahˇ maˬ bi shaˬ maˬ bi zahˬ ni, bi dehꞈ dzaˬ laˇ-eu gʼaˇ duˬ maˬ ehˇ, naw maꞈ noeˬ tmˬ kʼaˇ za-eu aˇ nah aˇ yamˬ bi keuˆ le-eu gʼaˇ duˬ maˬ ehˇ, ngaˬ neh gaˇ kawˆ kawˆ taˬ-euˬ ngaˇ tiˬ gʼaˬ tehꞈ-ehˇ siˬ nya -eu ma.

¹² Kʼoeˇ ngeh, naw maꞈ ngaˬ-ahˇ kuˇ tehꞈ-a. Naw maꞈ ngaˇ jawˇ gaˇ guiˬ lahˬ shaˇ laˇ ngeh, naw maꞈ-euˬ shaˇ dawˬ-ahˇ ngaˇ naˇ haˬ nehˬ tehꞈ-a.

¹³ Naw maꞈ ngaˬ-ahˇ poˆ-awˇ, poˆ mawˇ tehꞈ-a. Aˬ jeˬ miˇ neh ehˇ naˇ, naw maꞈ-euˬ nui ma gʼawˇ mawˇ dawˬ tawˆ luꞈ ngaˬ-ahˇ poˆ tehꞈ-a.

¹⁴ Naw maꞈ ngaˬ-ahˇ poˆ mawˇ-awˇ, naw maꞈ-euˬ miˇ kʼahˬ laꞈ kʼoeˇ, naw maꞈ-ahˇ sheuˬ kʼoꞈ gʼeh nehˬ ma lehˇ ngaˇ ehˇ-eu ma. Naw maꞈ miˇ kʼahˬ aˬ geu kʼahˬ laꞈ kʼoeˇ jawˇ luꞈ-eu maˬ kaˬ, ngaˬ neh teh byaˆ nehˬ-euˬ jawˇ duˬ aˬ geu tsahˇ-ahˇ jawˇ luꞈ-eu maˬ kaˬ, ngaˬ neh naw maꞈ-ahˇ teh doˆ-awˇ maˬ bi nyehꞈ byoˆ gʼeh mi naˆ-ehˇ naw maꞈ jawˇ-euˬ naw maꞈ-euˬ miˇ kʼahˬ kʼoeˇ kʼahˬ laꞈ kʼoeˇ, naw maꞈ-ahˇ ngaˇ sheuˬ kʼoꞈ keuˆ nehˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.’

¹⁵ “Baˬbuˇloˬ miˇ kʼahˬ laꞈ kʼoeˇ, Miˬyehˇ gʼaˇ duˬ ngehˬ dah-eu tsawˇ haˬ deuˬ, Sahˬpaˬ Miˬyehˇ neh naw maꞈ-ahˇ biꞈ nehˬ laꞈ-euˬ meh lehˇ naw maꞈ ehˇ-eu meh.

¹⁶ Daˬbiˇ neh uˆ lahˇ yaꞈ-euˬ miˇ kʼahˬ-ahˇ uˆ lahˇ luꞈ-eu sahˬ paˬ gaˇ kawˆ hawˇ-eu, naw maꞈ nehˬ-ehˇ aˬ cawˬ miˇ kʼahˬ-ahˇ maˬ bi nyehꞈ byoˆ gʼeh-ehˇ, meuˬ kʼoeˇ meuˬ laꞈ kʼoeˇ kʼaˇ jawˇ yaꞈ-euˬ naw maꞈ-euˬ aˬ yuiꞈ aˬ nyiˇ deuˬ gaˇ kawˆ, Sahˬpaˬ Miˬyehˇ ehˇ gaˇ naˇ haˬ sheˇ.

¹⁷ Baoˬ huiˬ-eu Sahˬpaˬ Miˬyehˇ ehˇ-eu, ‘Guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ, aˬ yawꞈ maꞈ kʼoeˇ taˆ ngaˇ bi keuˆ le-awˇ, maˬ dzaˬ nya ni buꞈ-iˇ taˬ-euˬ siˬ guˬ aˇ siˬ loꞈ-ehˇ, aˬ yawꞈ maꞈ-ahˇ ngaˇ bi pyeuꞈ-iˇ ma.

¹⁸ Guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ aˬ yawꞈ maꞈ-ahˇ ngaˇ ciˬ tehˬ nehˬ-awˇ miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ, kʼoeˇ gaˇ ya mawˇ ngeh guˆ dui dui-iˇ tehꞈ-a. Aˬ yawꞈ maꞈ-ahˇ ngaˬ neh teh byaˆ-awˇ kʼaˇ bi jawˇ-euˬ jawˇ duˬ-ahˇ, aˬ yawꞈ maꞈ kʼoeˇ taˆ keuˆ le-euˬ jeˬ-ahˇ ya mawˇ ngeh, aˬ cawˬ laˇ baˇ-iˇ tehꞈ-a. Aˬ cawˬ aˬ yawꞈ maꞈ-ahˇ ja bu ja doeˇ-awˇ, yaˬ kʼehˇ yaˬ ngeh aˬ yawꞈ maꞈ-euˬ tsawˇ myahˇ kuˇ-awˇ yaˬ tehꞈ-a.

¹⁹ Miˬyehˇ gʼaˇ duˬ ngehˬ dah-eu ngaˬ-euˬ zaˬ kʼaˆ deuˬ-ahˇ kʼehˇ-awˇ, aˬ yawꞈ maꞈ-ahˇ ngaˬ-euˬ dawˬ maˬ tsehˆ leˇ ni bi tsaꞈ gaˬ-euˬ kʼawꞈ, aˬ yawꞈ maꞈ maˬ naˇ haˬ geuꞈ-euˬ miˇ neh, aˬ yawꞈ maꞈ kʼoeˇ taˆ kʼoeˇ loꞈ-ehˇ keuˆ le tehꞈ-a.

²⁰ Ngaˬ neh Baˬbuˇloˬ miˇ kʼahˬ-ahˇ bi nyehꞈ gʼeh-euˬ naw maꞈ dawˬ tawˆ luꞈ, Sahˬpaˬ Miˬyehˇ pyeuꞈ-eu ngaˇ ehˇ gaˇ, yaw muiˬ paˬ-ehˇ naˇ haˬ geuꞈ-awˬ.’

²¹ “Sahˬpaˬ Miˬyehˇ-euˬ tsawˇ myahˇ-ahˇ gʼoe-awˇ, naw maꞈ-ahˇ jaˬ myawꞈ myawꞈ luꞈ-eu Gawˬlaˇyaˬ-euˬ aˬ li Aˬkaˆ hawˇ-eu, Mawˇseˬyaˇ-euˬ aˬ li Zeˬdaˬkiˇ aˬ ha nyaꞈ-euˬ gaˇ kawˆ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh. Aˬ yawꞈ maꞈ-ahˇ Baˬbuˇloˬ sahˬ paˬ Neˬbuˬkaˬneˬzaˬ-euˬ aˬ laꞈ laꞈ kʼoeˇ a nehˬ-awˇ, sahˬ paˬ kʼoeˇ gʼaˬ neh naw maꞈ-euˬ mehˬ shi bi sehꞈ tehꞈ-a lehˇ aˬ yawꞈ ehˇ-eu meh.

²² Yeˬluˇsaˬlehˬ meuˬ-ahˇ neh Baˬbuˇloˬ miˇ kʼahˬ-ahˇ bi nyehꞈ daˆ gʼeh -euˬ tsawˇ haˬ deuˬ, aˬ cawˬ-ahˇ yaˬ kʼehˇ yaˬ ngeh, Baˬbuˇloˬ sahˬ paˬ neh yaw dehꞈ-ehˇ bi tehˬ ba-euˬ Zeˬdaˬkiˇ hawˇ-eu Aˬkaˆ aˬ nyaꞈ loꞈ-ehˇ, Sahˬpaˬ Miˬyehˇ nawˬ-ahˇ jahˇ nehˬ luꞈ-uˇ lehˇ ehˇ-awˇ yaˬ tehꞈ-a.

²³ Aˬ yawꞈ maꞈ aˬ cawˬ-euˬ miˬ zaˬ-ahˇ bahˬ-awˇ, Sahˬpaˬ Miˬyehˇ-euˬ tsawˇ myahˇ uˬ moˆ jaˬ myawꞈ myawꞈ-euˬ miˇ neh, aˬ yawꞈ nyaꞈ-euˬ guiˬ lahˬ kʼoeˇ naˆ ni doeˇ tehꞈ-a. Kʼoeˇ loꞈ-ehˇ mˇ gaˇ Sahˬpaˬ Miˬyehˇ nui ma maˬ tsaˬ-ehˇ, aˬ yawꞈ nyaꞈ neh kʼaˇ mˇ-euˬ jeˬ-ahˇ, Sahˬpaˬ Miˬyehˇ siˬ jiˇ mawˇ jiˇ-eu meh lehˇ, Sahˬpaˬ Miˬyehˇ ehˇ-eu meh.”

Sheˬmaˇyaˬ neh boꞈ-euˬ sahˬ boꞈ

^24-25 Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ-aˬ, Neˬheˬlamˬ meuˬ-ahˇ jawˇ-eu Sheˬmaˇyaˬ jawˇ gaˇ ngaˬ-ahˇ kʼehˇ gʼeh-awˇ dawˬ tsaꞈ bi tsaꞈ-iˇ nehˬ laꞈ-euˬ meh. Sheˬmaˇyaˬ-aˬ yawˬ ha-euˬ tsawˇ myahˇ uˬ moˆ sahˬ boꞈ tiˬ taꞈ boꞈ-awˇ, Yeˬluˇsaˬlehˬ meuˬ laꞈ kʼoeˇ kʼaˇ jawˇ-eu tsawˇ haˬ deuˬ-ahˇ maˬ ehˇ, Mawˇseˬyaˇ-euˬ aˬ li piˇ ma Zeˬpaˬniˇ-ahˇ maˬ ehˇ, piˇ ma dawˬ tawˆ luꞈ-ahˇ maˬ ehˇ, biꞈ gʼeh dzeuˇ-euˬ meh. Sahˬ boꞈ kʼoeˇ taꞈ laꞈ kʼoeˇ, Sheˬmaˇyaˬ neh Zeˬpaˬniˇ-ahˇ heu loꞈ-ehˇ boꞈ nehˬ taˬ-euˬ meh.

²⁶ “Yeˬhawˇyaˬdaˬ-euˬ dah zaˇ Sahˬpaˬ Miˬyehˇ nawˬ-ahˇ piˇ ma ka nehˬ gʼaˬ-euˬ miˇ neh, nymˬ-mˇ Uˬ duˬ tahˬ nymˇ nymˇ ma laꞈ kʼoeˇ aˬ cawˬ naˆ maˬ tseˇ huiˬ dzehˬ-eu gʼaˬ nawˇ meh. Kʼoeˇ miˇ neh, Miˬyehˇ gʼaˇ duˬ ngehˬ dah-eu tsawˇ haˬ jahˇ geuꞈ-eu tsawˇ uˬ yawˬ gʼaˬ na luꞈ-ahˇ, aˬ kuiˇ-ahˇ shmˇ caˆ paꞈ-awˇ kawˬ lahˇ-ahˇ shmˇ laꞈ gʼahˬ nyehꞈ tawꞈ nehˬ-eu-aˬ, nawˬ-euˬ gaˇ meh.

²⁷ Miˇ kʼahˬ zaˬ deuˬ-ahˇ Miˬyehˇ gʼaˇ duˬ ngehˬ dah luꞈ-eu Aˬnaˬtawˇ meuˬ-ahˇ jawˇ-eu Yeˬlaˬmiˇ kʼoeˇ gʼaˬ-ahˇ, aˬ jeˬ miˇ neh nawˇ kʼoeˇ loꞈ-ehˇ maˬ jahˇ nehˬ te.

²⁸ Aˬ yawꞈ-ahˇ nawˇ kʼoeˇ loꞈ-ehˇ jahˇ nehˬ paˬ-ehˇ gʼeh-eu meh. Aˬ jeˬ miˇ neh ehˇ naˇ, Baˬbuˇloˬ miˇ kʼahˬ-ahˇ bi nyehꞈ daˆ leꞈ-euˬ tsawˇ haˬ deuˬ-ahˇ, kʼoeˇ gaˇ gʼawˬ myahˇ ni ya jawˇ tehꞈ-a lehˇ aˬ yawꞈ ehˇ nehˬ-awˇ, nymˇ tsoˆ-awˇ jawˇ duˬ dah-eu uˬ taꞈ, myawˬ dahˬ yaˇ dahˬ beh-awˇ mˇ dzaˬ kʼawꞈ dawˇ-awˬ lehˇ ehˇ nehˬ-euˬ meh.”

²⁹ Piˇ ma Zeˬpaˬniˇ ngaˬ-ahˇ sahˬ boꞈ kʼoeˇ taꞈ gui mehˬ nehˬ laꞈ-euˬ meh.

³⁰ Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

³¹ Baˬbuˇloˬ miˇ kʼahˬ-ahˇ bi nyehꞈ daˆ gʼeh-euˬ tsawˇ haˬ dawˬ tawˆ luꞈ-ahˇ, dawˬ heu tsaꞈ-ahˇ gʼeh-awˬ lehˇ aˬ yawꞈ ngaˬ-ahˇ ehˇ-eu meh. “Neˬheˬlamˬ meuˬ-ahˇ jawˇ-eu Sheˬmaˇyaˬ gaˇ kawˆ, Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh. Sheˬmaˇyaˬ-ahˇ ngaˬ neh maˬ kʼehˇ gʼeh leꞈ-euˬ gaˇ, Miˬyehˇ gʼaˇ duˬ ngehˬ dah le-awˇ, aˬ yawꞈ jaˬ myawꞈ myawꞈ-euˬ dawˬ-ahˇ naw maꞈ jah leˇ ni leh jeh luꞈ-eu meh.

³² Kʼoeˇ miˇ neh, Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Neˬheˬlamˬ meuˬ-ahˇ jawˇ-eu Sheˬmaˇyaˬ hawˇ-eu aˬ yawꞈ-euˬ zaˬ deuˬ uˆ deuˬ-ahˇ ngaˇ aˬ diˇ aˬ maˇ kʼehˬ nehˬ kʼaˆ nehˬ ma. Naw maꞈ laꞈ kʼoeˇ aˬ yawꞈ-euˬ zaˬ deuˬ uˆ deuˬ aˇ yoeˬ maˬ ceuˬ yaꞈ-ehˇ, ngaˬ-euˬ tsawˇ jeuˬ-ahˇ ngaˇ muiˬ-eu guiˬ lahˬ biꞈ nehˬ gaˇ aˬ yawꞈ maˬ ya haw mawˇ yaꞈ-aˇ. Aˬ jeˬ miˇ neh ehˇ naˇ, aˬ yawꞈ maꞈ ngaˬ-ahˇ puiˬ ni aˬ yawꞈ ngehˬ-euˬ tmˇ-euˬ meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”