Yeˬlaˬmiˇ 28 - Akha

Yeˬlaˬmiˇ hawˇ-eu Haˬnaˬniˇyaˆ

¹ Zeˬdaˬkiˇ sahˬ paˬ geuꞈ luꞈ-eu oeˬ kʼoꞈ aˬ yawꞈ kʼoꞈ, ba la yaw beh siˬ-ahˇ, Giˇbyoˬ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu gʼaˬ pyeuꞈ-eu, Aˬzuˆ-euˬ aˬ li Haˬnaˬniˇyaˆ-aˬ, Uˬ duˬ tahˬ nymˇ nymˇ ma laꞈ kʼoeˇ ngaˬ-ahˇ dawˬ ngehˬ cawˬ laˇ-euˬ meh. Piˇ ma deuˬ hawˇ-eu tsawˇ haˬ gʼawˬ mya ni jawˇ-eu mehˬ shi aˬ yawꞈ ngaˬ-ahˇ heu loꞈ-ehˇ ehˇ-eu meh.

² Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ, aˬ yawꞈ ehˇ-eu meh. “Baˬbuˇloˬ sahˬ paˬ-euˬ baoˬ-ahˇ ngaˇ ngawˬ kʼehꞈ gʼaˬ-euˬ ma.

³ Sahˬ paˬ Neˬbuˬkaˬneˬzaˬ neh Baˬbuˇloˬ miˇ kʼahˬ-ahˇ kʼaˇ yuˇ gʼeh-euˬ, Uˬ duˬ tahˬ nymˇ nymˇ ma laꞈ kʼoeˇ jaˆ-euˬ pyuˇ shuiˇ myawˬ gahˬ deuˬ-ahˇ, nyiˬ kʼoꞈ laꞈ kʼoeˇ ngaˇ paˇ yuˇ kʼoꞈ keuˆ leꞈ jiˇ ma.

⁴ Yeˬhawˇyaˬkmˬ-euˬ aˬ li Yuˇdaˆ sahˬ paˬ Yeˬhawˇyaˬciˬ hawˇ-eu aˬ yawꞈ nehˬ-ehˇ Baˬbuˇloˬ miˇ kʼahˬ-ahˇ bi nyehꞈ daˆ leꞈ-euˬ Yuˇdaˆ miˇ kʼahˬ zaˬ deuˬ dawˬ tawˆ luꞈ-ahˇ kʼawꞈ, ngaˇ sheuˬ kʼoꞈ leꞈ ma. Ngeuˇ ma. Baˬbuˇloˬ sahˬ paˬ-euˬ baoˬ-ahˇ ngaˇ ngawˬ kʼehꞈ nehˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁵ Kʼoeˇ naˇ, piˇ ma deuˬ hawˇ-eu Uˬ duˬ tahˬ nymˇ nymˇ ma laꞈ kʼoeˇ kʼaˇ yawꞈ luꞈ-eu tsawˇ haˬ deuˬ mehˬ shi, Haˬnaˬniˇyaˆ-ahˇ ngaˇ heu loꞈ-ehˇ ehˇ nehˬ-euˬ ma.

⁶ “Yaw zawˇ-ehˇ zahˬ leˇ paˬ-ehˇ gʼeh nya. Sahˬpaˬ Miˬyehˇ kʼoeˇ loꞈ-ehˇ mˇ luꞈ-uˇ lehˇ ngaˇ noeˬ tmˬ-eu ma. Nawˬ neh kʼaˇ ehˇ-euˬ loꞈ-ehˇ pyeuꞈ laˇ ni aˬ yawꞈ jahˇ-eu laꞈ kʼoeˇ, Baˬbuˇloˬ miˇ kʼahˬ-ahˇ pi daˆ gʼeh-euˬ Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ shuiˇ myawˬ gahˬ deuˬ paˇ pi kʼoꞈ keuˆ leꞈ jiˇ-awˇ, bi nyehꞈ daˆ gʼeh-euˬ tsawˇ haˬ deuˬ kʼawꞈ, gʼoꞈ keuˆ le jiˇ luꞈ-uˇ.

⁷ Ehˇ kʼawꞈ, nawˇ hawˇ-eu tsawˇ haˬ heu deuˬ-euˬ mehˬ shi, ngaˇ ehˇ-eu dawˬ-ahˇ tiˬ poˆ naˇ haˬ sheˇ.

⁸ Nawˬ-euˬ aˇ yamˬ hawˇ-eu ngaˬ-euˬ aˇ yamˬ maˬ keuˆ le mi naˆ-ehˇ, aˇ hu ba neh Miˬyehˇ gʼaˇ duˬ ngehˬ dah-euˬ tsawˇ haˬ deuˬ heu loꞈ-ehˇ ehˇ taˬ-euˬ jaˆ-eu meh. Tsawˇ jeuˬ gʼawˬ mya jeuˬ hawˇ-eu baoˬ huiˬ-eu miˇ kʼahˬ deuˬ kʼoeˇ taˆ, guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu naˇ-eu gawˇ-eu jeˬ keuˆ le tehꞈ-a lehˇ, aˬ yawꞈ maꞈ ngehˬ dah yaꞈ-euˬ meh.

⁹ Ehˇ kʼawꞈ, nui saˇ oꞈ-eu jeˬ keuˆ le tehꞈ-a lehˇ Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ, aˬ diˇ aˬ maˇ Sahˬpaˬ Miˬyehˇ neh pyehˬ gʼeh leꞈ-euˬ Miˬyehˇ gʼaˇ duˬ ngehˬ dah-eu tsawˇ haˬ ngeuˇ-eu maˬ ngeuˇ-eu-aˬ, aˬ yawꞈ neh ngehˬ dah-euˬ loꞈ-ehˇ pyeuꞈ laˇ gʼaˬ miˇ tsa maˬ ngeuˇ naˇ maˬ ehˇ nya-aˇ.”

¹⁰ Kʼoeˇ ngeh, ngaˬ-euˬ kawˬ lahˇ-ahˇ tawˬ luꞈ-eu kʼaˆ daˬ-ahˇ, Haˬnaˬniˇyaˆ neh yuˇ ka-awˇ, ngawˬ kʼehꞈ ngawˬ kʼoeˆ-euˬ meh.

¹¹ Kʼoeˇ naˇ, tsawˇ haˬ dawˬ tawˆ luꞈ mehˬ shi, “Tsawˇ jeuˬ dawˬ tawˆ luꞈ kʼoeˇ taˆ sahˬ paˬ Neˬbuˬkaˬneˬzaˬ neh baꞈ daˆ-awˇ bi tawˬ-euˬ kʼaˆ daˬ-ahˇ, heu loꞈ-ehˇ ngawˬ kʼehꞈ nehˬ ma lehˇ, Sahˬpaˬ Miˬyehˇ ehˇ-eu meh. Nyiˬ kʼoꞈ laꞈ kʼoeˇ, aˬ yawꞈ heu loꞈ-ehˇ jahˇ tehꞈ-a” lehˇ ehˇ-eu meh. Kʼoeˇ naˇ, ngaˇ doˆ-iˇ-euˬ ma.

¹² Haˬnaˬniˇyaˆ neh ngaˬ-euˬ kawˬ lahˇ-ahˇ tawˬ luꞈ-eu kʼaˆ daˬ ngawˬ kʼehꞈ-euˬ ui cuiˆ myahˇ laˇ gʼaˬ ngeh, Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

¹³ Haˬnaˬniˇyaˆ-ahˇ heu loꞈ-ehˇ ehˇ nehˬ iˇ-awˬ lehˇ, aˬ yawꞈ ngaˬ-ahˇ kʼehˇ-eu meh. “Daˇ kawˬ neh jahˇ-euˬ kʼaˆ daˬ-ahˇ nawˇ ngawˬ kʼehꞈ nya kʼawꞈ, shmˇ kʼaˆ daˬ paˇ jahˇ poˆ ma lehˇ Sahˬpaˬ Miˬyehˇ ehˇ-eu meh.

¹⁴ Tsawˇ jeuˬ heu deuˬ dawˬ tawˆ luꞈ kʼoeˇ taˆ, shmˇ kʼaˆ daˬ baꞈ daˆ nehˬ-awˇ, Baˬbuˇloˬ sahˬ paˬ Neˬbuˬkaˬneˬzaˬ-euˬ zaˬ kʼaˆ bi geuꞈ ma lehˇ, Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ ehˇ-eu meh. Jeˬ zaˬ yaw haiˬ deuˬ-ahˇ keuˆ ni, Neˬbuˬkaˬneˬzaˬ-euˬ zaˬ kʼaˆ geuꞈ ni ngaˇ jahˇ ma lehˇ, Sahˬpaˬ Miˬyehˇ ehˇ taˬ-euˬ meh.”

¹⁵ Kʼoeˇ naˇ, Haˬnaˬniˇyaˆ-ahˇ ngaˇ heu loꞈ-ehˇ paˇ ehˇ nehˬ-euˬ ma. “Haˬnaˬniˇyaˆ-oˇ, naˇ haˬ sheˇ. Sahˬpaˬ Miˬyehˇ neh nawˬ-ahˇ kʼehˇ gʼeh leꞈ-euˬ maˬ ngeuˇ gaˇ, nawˬ neh jaˬ myawꞈ myawꞈ-euˬ dawˬ-ahˇ tsawˇ haˬ heu deuˬ jah laˇ ni nawˇ jahˇ luꞈ-eu meh.

¹⁶ Kʼoeˇ miˇ neh, nawˬ-ahˇ yuˇ dzeh ma lehˇ, Sahˬpaˬ Miˬyehˇ-euˬ mawˇ do ehˇ luꞈ meh. Tsawˇ haˬ heu deuˬ Sahˬpaˬ Miˬyehˇ-ahˇ puiˬ ni nawˇ jahˇ-euˬ miˇ neh, kʼoꞈ maˬ doˆ le mi naˆ-ehˇ nawˇ ya shiˇ tehꞈ-a.”

¹⁷ Kʼoeˇ ngeh kʼoꞈ ba la shiꞈ siˬ tiˬ siˬ-ahˇ, Haˬnaˬniˇyaˆ shiˇ-euˬ meh.