Yeˬlaˬmiˇ 27 - Akha

Yeˬlaˬmiˇ mawˇ neˇ kʼaˆ daˬ tawˬ-eu

¹ Yawˇshiˆ-euˬ aˬ li Zeˬdaˬkiˇ Yuˇdaˆ sahˬ paˬ geuꞈ-euˬ gʼawˬ myahˇ maˬ gʼeh-ehˇ, Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

² “Yahˬ caˆ hawˇ-eu daˇ kawˬ neh mawˇ neˇ kʼaˆ daˬ jahˇ-awˇ, nawˬ-euˬ kawˬ lahˇ-ahˇ tawˬ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh.

³ Kʼoeˇ naˇ, “Eˬdoˬ sahˬ paˬ Mawˇbaˆ sahˬ paˬ, Aˬmoˬ sahˬ paˬ, Duˇlu sahˬ paˬ hawˇ-eu , Siˇdoˬ sahˬ paˬ kʼoeˇ deuˬ-ahˇ, aˬ yawꞈ maꞈ neh Yeˬluˇsaˬlehˬ meuˬ-ahˇ Zeˬdaˬkiˇ jawˇ gaˇ pyehˬ gʼeh laꞈ-euˬ tsawˇ haˬ deuˬ-ahˇ gʼoe-awˇ, dawˬ tsaꞈ tsaꞈ ahˇ nehˬ-awˬ” lehˇ, aˬ yawꞈ ngaˬ-ahˇ ehˇ-eu meh.

⁴ Sahˬpaˬ Miˬyehˇ-euˬ dawˬ heu deuˬ, aˬ yawꞈ maꞈ-euˬ sahˬ paˬ deuˬ-ahˇ bi dzawˇ nehˬ-iˇ-awˬ lehˇ, Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ ngaˬ-ahˇ dawˬ biꞈ laꞈ-euˬ meh.

⁵ “Huiˬ dui dui-eu ngaˬ-euˬ baoˬ hawˇ-eu gʼaˬ-ahˇ gʼoe-awˇ, miˇ tsaˬ tahˬ kʼawˇ maˬ ehˇ, kʼoeˇ-euˬ kʼoeˇ taˆ jawˇ-eu tsawˇ haˬ zaˬ hawˇ-eu jeˬ zaˬ deuˬ maˬ ehˇ, ngaˇ beh-awˇ, ngaˇ nui ma kʼaˇ tsaˬ-eu gʼaˬ-ahˇ miˇ tsaˬ heu ngaˇ biꞈ-eu ma.

⁶ Miˇ kʼahˬ heu deuˬ dawˬ tawˆ luꞈ Baˬbuˇloˬ sahˬ paˬ pyeuꞈ-eu ngaˬ-euˬ zaˬ kʼaˆ Neˬbuˬkaˬneˬzaˬ uˆ lahˇ-eu uˬ moˆ ya jawˇ ni jahˇ-euˬ gʼaˬ ngaˇ pyeuꞈ-awˇ, jeˬ zaˬ deuˬ kʼawꞈ aˬ yawꞈ-euˬ zaˬ kʼaˆ geuꞈ ni ngaˇ jahˇ-euˬ ma.

⁷ Tsawˇ jeuˬ dawˬ tawˆ luꞈ aˬ yawꞈ-euˬ zaˬ kʼaˆ ya geuꞈ tehꞈ-a. Aˬ yawꞈ-euˬ miˇ kʼahˬ maˬ cawˆ-iˇ kʼoeˇ keuˆ ni , aˬ yawꞈ-euˬ zaˬ ziˇ hawˇ-eu oeˬ paˬ oeˬ ma ziˇ-ahˇ keuˆ ni, aˬ yawꞈ maꞈ zaˬ kʼaˆ ya geuꞈ tehꞈ-a. Kʼoeˇ naˇ, aˬ yawꞈ-euˬ miˇ kʼahˬ-aˬ, baoˬ huiˬ-eu tsawˇ jeuˬ deuˬ hawˇ-eu, huiˬ-eu sahˬ paˬ deuˬ-euˬ zaˬ kʼaˆ paˇ ya geuꞈ poˆ tehꞈ-a.

⁸ “Ehˇ kʼawꞈ, tsawˇ jeuˬ tiˬ jeuˬ na maˬ ehˇ, miˇ kʼahˬ tiˬ kʼahˬ na maˬ ehˇ, aˬ yawꞈ uˆ lahˇ-eu uˬ moˆ maˬ jawˇ naˇ, Neˬbuˬkaˬneˬzaˬ neh maˬ bi laˆ byoˆ leꞈ kʼoeˇ keuˆ ni, guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ-ahˇ gʼoe-awˇ, ngaˇ kʼehˬ nehˬ kʼaˆ nehˬ ma.

⁹ Kʼoeˇ miˇ neh, Baˬbuˇloˬ sahˬ paˬ uˆ lahˇ-eu uˬ moˆ taˬ jawˇ lehˇ, naw maꞈ-ahˇ kʼaˇ ehˇ laˇ-eu, Miˬyehˇ gʼaˇ duˬ ngehˬ dah-eu deuˬ, nyiˇ paˬ shaˆ ma deuˬ, mah loˬ ja maw nya-eu deuˬ hawˇ-eu, yuꞈ maˆ maˆ mawˇ nya-eu deuˬ-euˬ dawˬ-ahˇ, naw maꞈ taˬ naˇ haˬ.

¹⁰ Aˬ yawꞈ maꞈ naw maꞈ-ahˇ mehˇ shuiˇ shuiˇ-awˇ, naw maꞈ-euˬ miˇ kʼahˬ-ahˇ neh gaˇ mahˇ kaˬ gaˇ naw maꞈ-ahˇ bi nyehꞈ byoˆ gʼeh-eu lehˇ tsawˇ gahˇ gahˇ-eu meh. Ngaˇ naw maꞈ-ahˇ teh doˆ-awˇ, naw maꞈ ya luˬ ya seˇ-iˇ tehꞈ-a.

¹¹ Ehˇ kʼawꞈ, Baˬbuˇloˬ sahˬ paˬ uˆ lahˇ-eu uˬ moˆ kʼaˇ jawˇ-eu tsawˇ jeuˬ aˬ geu jeuˬ maˬ kaˬ, yawˬ ha-euˬ miˇ kʼahˬ laꞈ kʼoeˇ jawˇ-awˇ ya mˇ dzaˬ ya kʼawꞈ dawˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹² Yuˇdaˆ sahˬ paˬ Zeˬdaˬkiˇ-ahˇ kʼawꞈ, ngaˇ heu loꞈ-ehˇ ehˇ nehˬ-euˬ ma. “Baˬbuˇloˬ sahˬ paˬ uˆ lahˇ-eu uˬ moˆ jawˇ-awˬ. Aˬ yawꞈ hawˇ-eu aˬ yawꞈ-euˬ tsawˇ jeuˬ-ahˇ mˇ cu naˇ, nawˇ ziˇ baw tehꞈ-a.

¹³ Guiˇ deuˆ-eu laꞈ kʼoeˇ maˬ ehˇ, mehꞈ-eu shuꞈ-eu laꞈ kʼoeˇ maˬ ehˇ, naˇ-eu gawˇ-eu laꞈ kʼoeˇ maˬ ehˇ, aˬ jeˬ miˇ neh nawˇ hawˇ-eu nawˬ-euˬ tsawˇ haˬ deuˬ-ahˇ bi shiˇ mawꞈ-eu nya. Baˬbuˇloˬ sahˬ paˬ uˆ lahˇ-eu uˬ moˆ maˬ jawˇ-eu tsawˇ jeuˬ kʼoeˇ taˆ, kʼoeˇ loꞈ-ehˇ keuˆ le tehꞈ-a lehˇ, Sahˬpaˬ Miˬyehˇ ehˇ taˬ-euˬ meh.

¹⁴ Baˬbuˇloˬ sahˬ paˬ-euˬ laˬ oꞈ taˬ awꞈ lehˇ ehˇ-eu Miˬyehˇ gʼaˇ duˬ ngehˬ dah-eu deuˬ-euˬ dawˬ-ahˇ taˬ naˇ haˬ. Aˬ yawꞈ maꞈ nawˬ-ahˇ mehˇ shuiˇ shuiˇ luꞈ-eu meh.

¹⁵ Aˬ yawꞈ maꞈ-ahˇ Sahˬpaˬ Miˬyehˇ neh kʼehˇ gʼeh leꞈ-euˬ maˬ ngeuˇ gaˇ, aˬ yawꞈ-euˬ tsawˇ myahˇ-ahˇ gʼoe-awˇ naw maꞈ-ahˇ jaˬ myawꞈ myawꞈ luꞈ-eu meh lehˇ Sahˬpaˬ Miˬyehˇ ehˇ-eu meh. Kʼoeˇ miˇ neh, naw maꞈ-ahˇ aˬ yawꞈ teh doˆ-awˇ, naw maꞈ hawˇ-eu naw maꞈ-ahˇ jaˬ myawꞈ myawꞈ luꞈ-eu Miˬyehˇ gʼaˇ duˬ ngehˬ dah-eu kʼoeˇ deuˬ, aˬ cawˬ sehꞈ gaˇ ya daˬ tehꞈ-a.”

¹⁶ Kʼoeˇ naˇ, piˇ ma deuˬ hawˇ-eu miˇ kʼahˬ zaˬ deuˬ-ahˇ, Sahˬpaˬ Miˬyehˇ heu loꞈ-ehˇ ehˇ-eu meh lehˇ ngaˇ ehˇ nehˬ-euˬ ma. “Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ shuiˇ myawˬ gahˬ kʼoeˇ deuˬ, gʼawˬ myahˇ maˬ gʼeh-ehˇ Baˬbuˇloˬ miˇ kʼahˬ-ahˇ neh paˇ hehˇ kʼoꞈ keuˆ leꞈ tehꞈ-a lehˇ ehˇ luꞈ-eu, Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ ehˇ gaˇ taˬ naˇ haˬ. Aˬ yawꞈ maꞈ naw maꞈ-ahˇ jaˬ myawꞈ myawꞈ luꞈ-eu meh.

¹⁷ Aˬ yawꞈ maꞈ-euˬ ehˇ dawˬ-ahˇ naˇ haˬ-awˇ, Baˬbuˇloˬ sahˬ paˬ-euˬ laꞈ oˆ jawˇ naˇ, naw maꞈ yaw dehꞈ ya dehꞈ tehꞈ-a. Aˬ jeˬ miˇ neh meuˬ heu meuˬ-ahˇ yaw cawˆ jeˬ baꞈ bymˇ taˬ-euˬ jawˇ duˬ loꞈ-ehˇ bi pyeuꞈ-iˇ mawꞈ-eu nya.

¹⁸ Aˬ yawꞈ maꞈ Miˬyehˇ gʼaˇ duˬ ngehˬ dah-eu tsawˇ haˬ aˬ diˇ aˬ maˇ pyeuꞈ-awˇ, ngaˬ-euˬ dawˬ aˬ yawꞈ maꞈ za taˬ-euˬ ngeuˇ naˇ, Uˬ duˬ tahˬ nymˇ nymˇ ma laꞈ kʼoeˇ dzeˇ luꞈ-eu pyuˇ shuiˇ myawˬ gahˬ deuˬ hawˇ-eu, sahˬ paˬ-eu nymˇ-ahˇ jaˆ-eu pyuˇ shuiˇ myawˬ gahˬ deuˬ-ahˇ, Baˬbuˇloˬ miˇ kʼahˬ-ahˇ maˬ bi yuˇ gʼeh-eu gʼaˇ duˬ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˬ-ahˇ aˬ yawꞈ maꞈ bi shaˇ haw laˇ sheˇ.”

^19-20 (Yeˬhawˇyaˬkmˬ-euˬ aˬ li Yuˇdaˆ sahˬ paˬ Yeˬhawˇyaˬciˬ-ahˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ aˬ yuiꞈ aˬ tsu geuꞈ luꞈ-eu tsawˇ haˬ deuˬ nehˬ-ehˇ tiˬ kawˆ loꞈ-ehˇ, Baˬbuˇloˬ miˇ kʼahˬ-ahˇ sahˬ paˬ Neˬbuˬkaˬneˬzaˬ neh bi nyehꞈ daˆ leꞈ ngeh, kʼawˇ zeuˇ deuˬ maˬ ehˇ, guiˬ shuiˇ lah maˬ ehˇ, laˆ lawˬ deuˬ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ shuiˇ myawˬ gahˬ tiˬ paˆ na deuˬ maˬ ehˇ, sahˬ paˬ Neˬbuˬkaˬneˬzaˬ neh Baˬbuˇloˬ miˇ kʼahˬ-ahˇ maˬ yuˇ gʼeh ni bi jaˆ yaꞈ-euˬ meh.

²¹ “Uˬ duˬ tahˬ nymˇ nymˇ ma laꞈ kʼoeˇ hawˇ-eu, Yeˬluˇsaˬlehˬ meuˬ laꞈ kʼoeˇ jaˆ-eu sahˬ paˬ-euˬ nymˇ laꞈ kʼoeˇ jaˆ yaꞈ-euˬ pyuˇ shuiˇ myawˬ gahˬ deuˬ-ahˇ taꞈ leˇ-awˇ, Iˇsaˬleˬlaˆ-euˬ Miˬyehˇ Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ehˇ gaˇ naˇ haˬ-awˬ.

²² Pyuˇ shuiˇ myawˬ gahˬ kʼoeˇ deuˬ Baˬbuˇloˬ miˇ kʼahˬ-ahˇ bi yuˇ daˆ leꞈ-awˇ, ngaˇ myaˆ maˬ haw cawˬ kʼoeˇ keuˆ ni, kʼoeˇ gaˇ jaˆ tehꞈ-a. Kʼoeˇ naˇ, pyuˇ shuiˇ myawˬ gahˬ kʼoeˇ deuˬ-ahˇ ngaˇ yuˇ kʼoꞈ leꞈ-awˇ, jawˇ duˬ heu tsahˇ-ahˇ paˇ bi jaˆ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”