Yeˬlaˬmiˇ 26 - Akha

Yeˬlaˬmiˇ-ahˇ sehꞈ-eu lehˇ gʼeh-eu

¹ Yawˇshiˆ-euˬ aˬ li Yeˬhawˇyaˬkmˬ Yuˇdaˆ sahˬ paˬ pyeuꞈ laˇ-euˬ gʼawˬ myahˇ maˬ gʼeh-ehˇ, Sahˬpaˬ Miˬyehˇ-euˬ dawˬ, ngaˇ jawˇ gaˇ heu loꞈ-ehˇ keuˆ le-euˬ meh.

² Sahˬpaˬ Miˬyehˇ ngaˬ-ahˇ ehˇ-eu, “Uˬ duˬ tahˬ nymˇ nymˇ ma-euˬ pu ka yawꞈ-awˇ, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ neh laˇ-awˇ, kʼoeˇ gaˇ uˬ duˬ kʼaˇ tahˬ laˇ-euˬ tsawˇ haˬ dawˬ tawˆ luꞈ-ahˇ, ngaˬ neh nawˬ-ahˇ biꞈ taˬ-euˬ dawˬ deuˬ tiˬ dawˬ-iˬ maˬ dzeˇ ni dzawˇ mehˬ nehˬ-awˬ.

³ Tsawˇ haˬ kʼoeˇ deuˬ ngaˬ-euˬ dawˬ-ahˇ naˇ haˬ geuꞈ-awˇ, aˬ yawꞈ maꞈ-euˬ haiˬ-eu dehꞈ jeˬ dehꞈ kawˆ-ahˇ byehˇ dzeh-eu baw le. Aˬ yawꞈ maꞈ kʼoeˇ loꞈ-ehˇ dehꞈ paˇ naˇ, aˬ yawꞈ maꞈ neh mˇ-euˬ yaw haiˬ jeˬ baˬ da neh, aˬ yawꞈ maꞈ kʼoeˇ taˆ bi keuˆ le-eu lehˇ ngaˬ neh lehˬ hmˬ taˬ-eu luˬ-iˇ seˇ-iˇ-eu jeˬ, maˬ paˇ bi keuˆ le ni byehˇ ma.”

^4-5 “Tsawˇ haˬ kʼoeˇ deuˬ-ahˇ heu loꞈ-ehˇ ehˇ nehˬ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh. “Sahˬpaˬ Miˬyehˇ pyeuꞈ-eu ngaˇ, naw maꞈ-ahˇ heu loꞈ-ehˇ ehˇ taˬ-euˬ jaˆ-eu ma. Ngaˬ neh naw maꞈ-ahˇ mehˬ nehˬ tsoˆ nehˬ taˬ-euˬ jeˬ mehˬ nah caw teh-awˇ, naw maꞈ jawˇ gaˇ maˬ tsehˆ leˇ ni pyehˬ gʼeh leꞈ-euˬ, Miˬyehˇ gʼaˇ duˬ ngehˬ dah-eu deuˬ-euˬ dawˬ-ahˇ yaw zeu baw-eu laꞈ kʼoeˇ, ngaˬ-euˬ ehˇ dawˬ-ahˇ naw maꞈ ya naˇ haˬ geuꞈ meh lehˇ ehˇ taˬ-euˬ jaˆ-eu ma. Ehˇ kʼawꞈ, aˬ yawꞈ maꞈ neh ngehˬ-euˬ dawˬ-ahˇ naw maꞈ tiˬ jawˇ-iˬ maˬ naˇ haˬ-a.

⁶ Naw maꞈ kʼoeˇ loꞈ-ehˇ maˬ naˇ haˬ ni jawˇ te lehˇ ngeuˇ naˇ, Shiˇloˬ meuˬ-ahˇ jahˇ nehˬ-euˬ loꞈ-ehˇ, Uˬ duˬ tahˬ nymˇ nymˇ ma heu nymˇ-ahˇ ngaˇ jahˇ nehˬ-awˇ, miˇ tsaˬ tsawˇ jeuˬ dawˬ tawˆ luꞈ yaˬ kʼehˇ kʼaˇ yaˬ ngeh, meuˬ heu meuˬ-euˬ tsawˇ myahˇ-ahˇ dawˬ daˬ daˬ-awˇ yaˬ gaˇ keuˆ tehꞈ-a.”

⁷ Uˬ duˬ tahˬ nymˇ nymˇ ma laꞈ kʼoeˇ ngaˇ kʼoeˇ loꞈ-ehˇ dzawˇ mehˬ gaˇ, piˇ ma deuˬ, Miˬyehˇ gʼaˇ duˬ ngehˬ dah-eu deuˬ hawˇ-eu, tsawˇ haˬ kʼoeˇ deuˬ dawˬ tawˆ luꞈ ya gaˬ-euˬ meh.

⁸ Sahˬpaˬ Miˬyehˇ neh ngaˬ-ahˇ kʼaˇ bi ngehˬ kʼaˇ bi tmˇ laꞈ-euˬ jeˬ-ahˇ, ngaˇ ngehˬ gʼaˬ tmˇ gʼaˬ-eu nehˬ-ehˇ, aˬ yawꞈ maꞈ ngaˬ-ahˇ nyehꞈ-awˇ, heu loꞈ-ehˇ guˇ-eu meh.

⁹ “Nawˇ-aˬ, ya bi diˬ sehꞈ gaˇ keuˆ-eu ngaˇ. Uˬ duˬ tahˬ nymˇ nymˇ ma heu Shiˇloˬ meuˬ loꞈ-ehˇ ya pyeuꞈ-iˇ-awˇ, meuˬ heu meuˬ tsawˇ haˬ tiˬ gʼaˬ-iˬ maˬ jawˇ-ehˇ pyeuꞈ-iˇ gaˇ keuˆ ni bi laˆ cawˆ tehꞈ-a lehˇ, Sahˬpaˬ Miˬyehˇ -euˬ tsawˇ myahˇ uˬ moˆ aˬ jeˬ miˇ neh nawˇ dawˬ ngehˬ te” lehˇ guˇ-eu meh. Kʼoeˇ naˇ, tsawˇ haˬ dawˬ tawˆ luꞈ, ngaˬ-euˬ dawˬ peh ga uiˬ laˇ-euˬ meh.

¹⁰ Yuˇdaˆ miˇ kʼahˬ kʼoeˇ taˆ sahˬ paˬ sahˬ ma geuꞈ luꞈ-eu deuˬ gaˇ kawˆ kʼoeˇ ya gaˬ ngeh, sahˬ paˬ-euˬ nymˇ-ahˇ neh aˬ yawꞈ maꞈ yaw kawˇ-ehˇ doˆ le-awˇ, lahˇ kʼehˬ yaw shuiꞈ-ahˇ jaˆ-eu aˬ yawꞈ maꞈ-euˬ nuiˇ duˬ-ahˇ nuiˇ le-euˬ meh.

¹¹ Kʼoeˇ naˇ, sahˬ paˬ sahˬ ma kʼoeˇ deuˬ hawˇ-eu miˇ kʼahˬ zaˬ deuˬ-ahˇ, piˇ ma deuˬ hawˇ-eu Miˬyehˇ gʼaˇ duˬ ngehˬ dah-eu deuˬ heu loꞈ-ehˇ ehˇ nehˬ-euˬ meh. “Tsawˇ haˬ heu gʼaˬ-ahˇ sehꞈ-awˬ lehˇ yaˇ kʼaˬ daˇ-eu tsaˬ meh. Aˬ jeˬ miˇ neh ehˇ naˇ, naw maꞈ-euˬ naˬ bawˇ-ahˇ ya gaˬ duˬ taˬ-euˬ loꞈ-ehˇ, meuˬ heu meuˬ ya cawˆ-iˇ meh lehˇ aˬ yawꞈ dawˬ ngehˬ-eu meh.”

¹² Kʼoeˇ ngeh, ngaˇ heu loꞈ-ehˇ ehˇ-euˬ ma. “Naw maꞈ ya gaˬ-euˬ loꞈ-ehˇ, Uˬ duˬ tahˬ nymˇ nymˇ ma heu nymˇ hawˇ-eu meuˬ heu meuˬ gaˇ kawˆ ngaˬ neh kʼaˇ ehˇ-euˬ yawˬ jeˬ na luꞈ, Sahˬpaˬ Miˬyehˇ ngaˬ-ahˇ kʼehˇ gʼeh leꞈ-awˇ, bi ehˇ le-euˬ jeˬ pyeuꞈ-eu meh.

¹³ Naw maꞈ-euˬ dehꞈ jeˬ dehꞈ kawˆ hawˇ-eu, naw maꞈ mˇ luꞈ shaˇ luꞈ-eu jeˬ noeˬ paˇ jiˇ-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ ya naˇ haˬ geuꞈ meh. Naw maꞈ kʼoeˇ loꞈ-ehˇ jahˇ naˇ, aˬ yawꞈ nui ma noeˬ paˇ-awˇ, naw maꞈ kʼoeˇ taˆ bi keuˆ le ma lehˇ aˬ yawꞈ neh ehˇ taˬ-euˬ jeˬ, maˬ bi keuˆ le ni byehˇ tehꞈ-a.

¹⁴ Ngaˇ tehꞈ law nmˇ-aˬ, naw maꞈ-euˬ aˬ laꞈ laꞈ kʼoeˇ jaˆ-eu ngaˇ. Naw maꞈ kʼaˇ jahˇ mawꞈ-eu jeˬ ngaˬ-ahˇ jahˇ nya tehꞈ-a.

¹⁵ Ehˇ kʼawꞈ, heu loꞈ-ehˇ siˬ duˬ taˬ paˬ-ehˇ gʼeh tehꞈ-a. Naw maꞈ ngaˬ-ahˇ sehꞈ naˇ, maˬ lehˬ maˬ ca-eu tsawˇ haˬ-ahˇ sehꞈ-euˬ iˬ baˇ naw maꞈ ya pi tehꞈ-a. Aˬ jeˬ miˇ neh ehˇ naˇ, ngaˬ-ahˇ kʼehˇ gʼeh leꞈ-awˇ, naw maꞈ-ahˇ bi mehˬ bi tsoˆ le-euˬ gʼaˬ-aˬ, Sahˬpaˬ Miˬyehˇ meh.”

¹⁶ Kʼoeˇ naˇ, sahˬ paˬ sahˬ ma deuˬ hawˇ-eu miˇ kʼahˬ zaˬ deuˬ neh, piˇ ma deuˬ hawˇ-eu Miˬyehˇ gʼaˇ duˬ ngehˬ dah-eu deuˬ-ahˇ, “Tsawˇ haˬ heu gʼaˬ-aˬ, aˬ dui -euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ uˬ moˆ, aˬ dui-ahˇ dawˬ ngehˬ cawˬ le-euˬ miˇ neh, aˬ yawꞈ-ahˇ sehꞈ-eu maˬ tsaˬ-a” lehˇ ehˇ nehˬ-euˬ meh.

¹⁷ Kʼoeˇ naˇ, sahˬ paˬ sahˬ ma tiˬ paˆ na deuˬ tuˇ laˇ-awˇ, kʼoeˇ gaˇ uiˬ laˇ taˬ-euˬ tsawˇ haˬ deuˬ-ahˇ heu loꞈ-ehˇ ehˇ nehˬ-eu meh.

¹⁸ “Heˬsaˬgiˇ Yuˇdaˆ sahˬ paˬ geuꞈ ngeh, Miˇkaˬ lehˇ myahˇ-euˬ Mawˇleˇshehˆ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu kʼoeˇ gʼaˬ, Yuˇdaˆ miˇ kʼahˬ zaˬ dawˬ tawˆ luꞈ-ahˇ, Sahˬpaˬ Miˬyehˇ neh ehˇ-euˬ dawˬ heu loꞈ-ehˇ dzawˇ nehˬ-euˬ meh. Ziˇoˬ gawˬ jawˬ-ahˇ deh yaˇ loꞈ-ehˇ bi tsehˬ-awˇ, Yeˬluˇsaˬlehˬ meuˬ yaw cawˆ jeˬ pu cu pu lu lu-awˇ, Uˬ duˬ tahˬ nymˇ nymˇ ma jaˆ-euˬ gawˬ duˇ kʼoeˇ aˇ bawˇ sahˬ kʼaˆ pyeuꞈ-iˇ tehꞈ-a. lehˇ dzawˇ nehˬ-euˬ meh.

¹⁹ Sahˬ paˬ Heˬsaˬgiˇ hawˇ-eu Yuˇdaˆ miˇ kʼahˬ zaˬ deuˬ Miˇkaˬ-ahˇ maˬ sehꞈ-euˬ uˬ taꞈ, Heˬsaˬgiˇ Sahˬpaˬ Miˬyehˇ-ahˇ guˆ-awˇ, aˬ yawꞈ nui kʼahˇ shiˇ-eu jeˬ-ahˇ leh jeh-awˇ mˇ-euˬ meh. Kʼoeˇngeh, Sahˬpaˬ Miˬyehˇ nui ma paˇ laˇ-awˇ, aˬ yawꞈ maꞈ kʼoeˇ taˆ bi keuˆ le ma lehˇ ehˇ taˬ-euˬ luˬ-iˇ seˇ-iˇ-eu jeˬ, maˬ bi keuˆ le ni bi dzeuˇ-iˇ-euˬ meh. Nymˬ-mˇ poˆ jawˇ, aˬ dui-aˬ, yawˬ ha kʼoeˇ taˆ guˆ dui dui laˇ paˬ-ehˇ gʼeh-eu luˬ-iˇ seˇ-iˇ-eu jeˬ yaw kawˇ-ehˇ keuˆ le ni mˇ luꞈ gaˇ duˇ-eu meh” lehˇ ehˇ nehˬ-euˬ meh.

²⁰ (Yeˬlaˬmiˇ loꞈ-ehˇ, meuˬ heu meuˬ hawˇ-eu miˇ kʼahˬ heu kʼahˬ gaˇ kawˆ ngehˬ-eu tsawˇ haˬ tiˬ gʼaˬ jawˇ-eu meh. Kʼoeˇ-aˬ, Giˇliˇyaˆyeˬlmˬ meuˬ-ahˇ jawˇ-eu Sheˬmaˇyaˬ-euˬ aˬ li Uˇliˇyaˆ meh.

²¹ Uˇliˇyaˆ kʼoeˇ loꞈ-ehˇ ngehˬ luꞈ-eu gaˇ kawˆ, sahˬ paˬ Yeˬhawˇyaˬkmˬ hawˇ-eu, aˬ yawꞈ-euˬ yehˇ deuˬ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ ya gaˬ ngeh, Uˇliˇyaˆ-ahˇ sehꞈ-eu lehˇ sahˬ paˬ Yeˬhawˇyaˬkmˬ poˆ-euˬ meh. Gaˇ kawˆ kʼoeˇ Uˇliˇyaˆ ya gaˬ-awˇ, guˆ-eu laꞈ kʼoeˇ Iˇjiˇtuˆ miˇ kʼahˬ-ahˇ cehˆ-awˇ, cehˆ dzeuˇ-euˬ meh.

²² Ehˇ kʼawꞈ sahˬ paˬ Yeˬhawˇyaˬkmˬ-aˬ, Aˬkaˬbawˇ-euˬ aˬ li Eˇlaˬnaˬdaˬ nehˬ-ehˇ tsawˇ haˬ tiˬ deuˬ pyehˬ gʼeh-awˇ, Iˇjiˇtuˆ miˇ kʼahˬ-ahˇ Uˇliˇyaˆ-ahˇ bi nyehꞈ kʼoꞈ laˬ-iˇ-euˬ meh.

²³ Aˬ yawꞈ maꞈ aˬ yawꞈ-ahˇ sahˬ paˬ Yeˬhawˇyaˬkmˬ jawˇ gaˇ nyehꞈ kʼoꞈ laꞈ-awˇ, Yeˬhawˇyaˬkmˬ neh aˬ yawꞈ-ahˇ sehꞈ-awˇ, miˇ kʼahˬ zaˬ-euˬ lmˬ bymˇ-ahˇ baꞈ dzeh nehˬ-euˬ meh.)

²⁴ Ehˇ kʼawꞈ, Shaˇpaˬ-euˬ aˬ li Aˬhiˇkamˬ ngaˬ-ahˇ caw ba-eu miˇ neh, miˇ kʼahˬ zaˬ-euˬ laꞈ-ahˇ maˬ ahˇ leˇ-ehˇ, bi sehꞈ gaˇ maˬ keuˆ-aˬ.