Yeˬlaˬmiˇ 25 - Akha

Laꞈ taˆ paw neh oe-eu muiˇ-eu deuˬ

¹ Yeˬhawˇyaˬkmˬ-euˬ aˬ li Yawˇshiˆ Yuˇdaˆ miˇ kʼahˬ-ahˇ uˆ lahˇ luꞈ-eu oeˬ kʼoꞈ tiˬ kʼoꞈ-ahˇ, Yuˇdaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ-ahˇ taꞈ leˇ-eu dawˬ, Sahˬpaˬ Miˬyehˇ ngaˬ-ahˇ biꞈ leꞈ-euˬ meh. (Kʼoeˇ-aˬ, Neˬbuˬkaˬneˬzaˬ Baˬbuˇloˬ miˇ kʼahˬ-ahˇ uˆ lahˇ-euˬ yaw beh kʼoꞈ meh.)

² Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ-ahˇ, ngaˇ heu loꞈ-ehˇ ehˇ nehˬ-euˬ ma.

³ “Aˬmo-euˬ aˬ li Yawˇshiˆ sahˬ paˬ geuꞈ-eu tseˇ smˇ kʼoꞈ tiˬ kʼoꞈ pyeuꞈ-eu, dzeuˇ laˇ-euˬ nyiˬ tseˇ smˇ kʼoꞈ-ahˇ neh iˬ nah keuˆ ni, Sahˬpaˬ Miˬyehˇ ngaˬ-ahˇ dawˬ ngehˬ cawˬ luꞈ-awˇ, aˬ yawꞈ neh kʼaˇ ehˇ-euˬ jeˬ, naw maꞈ-ahˇ ngaˇ maˬ byehˇ ni ehˇ nehˬ luꞈ-eu ma. Ehˇ kʼawꞈ, naw maꞈ naˬ bawˇ gaˬ leˇ gaˇ maˬ duˇ-a.

⁴ Sahˬpaˬ Miˬyehˇ-aˬ, aˬ yawꞈ-euˬ zaˬ kʼaˆ pyeuꞈ-eu Miˬyehˇ gʼaˇ duˬ ngehˬ dah-euˬ deuˬ-ahˇ, naw maꞈ jawˇ gaˇ maˬ tsehˆ leˇ ni pyehˬ gʼeh leꞈ kʼawꞈ, naw maꞈ naˬ bawˇ maˬ ciˬ kʼmˇ-a.

⁵ Naw maꞈ hawˇ-eu naw maꞈ-euˬ aˬ poeˬ aˬ bawˇ deuˬ-ahˇ Sahˬpaˬ Miˬyehˇ neh biꞈ tsehˆ tsehˆ taˬ-euˬ miˇ kʼahˬ heu kʼahˬ laꞈ kʼoeˇ naw maꞈ ya jawˇ daˆ leꞈ ni, maˬ tsaˬ maˬ dawˇ-eu naw maꞈ-euˬ dehꞈ jeˬ dehꞈ kawˆ hawˇ-eu, naw maꞈ mˇ luꞈ shaˇ luꞈ-eu yaw haiˬ jeˬ-ahˇ byehˇ dzeh-awˬ lehˇ, Miˬyehˇ gʼaˇ duˬ ngehˬ dah-euˬ kʼoeˇ deuˬ, naw maꞈ-ahˇ ehˇ nehˬ-euˬ meh.

⁶ Miˬ yehˇ nui deuˬ-ahˇ naw maꞈ uˬ duˬ maˬ tahˬ-ehˇ, yawˬ ha neh tehˆ-euˬ tahˬ pahˬ aˬ ma mawˇ kawˇ-ahˇ uˬ duˬ tahˬ-eu laꞈ kʼoeˇ, Sahˬpaˬ Miˬyehˇ nui ma pehˇ ni taˬ mˇ lehˇ, aˬ yawꞈ maꞈ naw maꞈ-ahˇ ehˇ nehˬ-euˬ meh. Sahˬpaˬ Miˬyehˇ-euˬ ehˇ dawˬ-ahˇ naw maꞈ naˇ haˬ geuꞈ-euˬ law nmˇ-aˬ, naw maꞈ-ahˇ aˬ yawꞈ maˬ kʼehˬ maˬ kʼaˆ-aˇ.

⁷ Ehˇ kʼawꞈ, Sahˬpaˬ Miˬyehˇ-euˬ ehˇ dawˬ-ahˇ naw maꞈ maˬ naˇ haˬ geuꞈ-a lehˇ, Sahˬpaˬ Miˬyehˇ ehˇ-eu meh. Naw maꞈ-euˬ tahˬ pahˬ aˬ ma mawˇ kawˇ deuˬ baˬ da neh, Sahˬpaˬ Miˬyehˇ nui ma pehˇ ni naw maꞈ mˇ-awˇ, aˬ yawꞈ-euˬ kʼehˬ-eu kʼaˆ-eu jeˬ naw maꞈ kʼoeˇ taˆ keuˆ le ni, naw maꞈ yawˬ haˇ yawˬ ha jahˇ-euˬ meh.

⁸ “Naw maꞈ aˬ yawꞈ-euˬ ehˇ dawˬ maˬ naˇ haˬ-eu miˇ neh, Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh.

⁹ Laꞈ taˆ paw miˇ kʼahˬ-ahˇ jawˇ-eu tsawˇ haˬ dawˬ tawˆ luꞈ hawˇ-eu, Baˬbuˇloˬ sahˬ paˬ pyeuꞈ-eu ngaˬ-euˬ zaˬ kʼaˆ Neˬbuˬkaˬneˬzaˬ-ahˇ ngaˇ kuˇ uiˬ ma. Yuˇdaˆ miˇ kʼahˬ hawˇ-eu kʼoeˇ gaˇ kʼaˇ jawˇ-eu tsawˇ haˬ dawˬ tawˆ luꞈ-ahˇ maˬ ehˇ, dawˬ peh jawˇ-eu tsawˇ jeuˬ deuˬ-ahˇ maˬ ehˇ, guiˇ bi deuˆ-eu gʼaˇ duˬ tsawˇ haˬ kʼoeˇ deuˬ-ahˇ ngaˇ pyehˬ gʼeh leꞈ ma. Miˇ kʼahˬ heu kʼahˬ hawˇ-eu dawˬ peh jaˆ-eu miˇ kʼahˬ deuˬ-ahˇ ngaˇ laˆ cawˆ-awˇ, tsawˬ guˆ-iˇ paˬ-ehˇ bi jaˆ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹⁰ Aˬ yawꞈ maꞈ laˬ kʼaˬ cehˇ-awˇ guˇ-eu teˇ saˇ hawˇ-eu, oeˇ mˇ baˇ-awˇ byawˬ gʼa-eu teˇ saˇ deuˬ-ahˇ ciˬ cuˇ ni bi pyeuꞈ-iˇ ma. Tsiˇ kʼmˬ doꞈ-eu tsiˇ maˬ jaˆ-ehˇ pyeuꞈ-iˇ-awˇ, hawˬ dzaˬ-eu cehˇ maˬ ahˇ-ehˇ bi shaˬ ma.

¹¹ Miˇ kʼahˬ heu kʼahˬ kʼahˬ lah ni cawˆ-iˇ jiˇ-awˇ, tsawˬ guˆ-iˇ paˬ-ehˇ jaˆ tehꞈ-a. Dawˬ peh jaˆ-eu miˇ kʼahˬ deuˬ, Baˬbuˇloˬ sahˬ paˬ-euˬ zaˬ kʼaˆ shiꞈ tseˇ kʼoꞈ ya geuꞈ tehꞈ-a.

¹² Kʼoeˇ jiˇ naˇ, Baˬbuˇloˬ miˇ kʼahˬ hawˇ-eu Baˬbuˇloˬ sahˬ paˬ-ahˇ, iˬ baˇ mˇ-euˬ aˇ poeˬ ngaˇ paˇ kʼehˬ poˆ nehˬ ma. Miˇ kʼahˬ kʼoeˇ kʼahˬ-ahˇ ngaˇ laˆ cawˆ nehˬ-awˇ, mˬ maˬ maˬ byaˆ zaˇ ziˇ yaw cawˆ-ehˇ bi jaˆ ma.

¹³ Yeˬlaˬmiˇ-ahˇ gʼoe-awˇ ngaˬ neh ehˇ taˬ-euˬ jeˬ pyeuꞈ-eu, sahˬ boꞈ heu dmˬ laꞈ kʼoeˇ kʼaˇ boꞈ ahˇ taˬ-euˬ shaˬ-eu zahˬ-euˬ guˆ-eu gaˆ-eu jeˬ dawˬ tawˆ luꞈ, Baˬbuˇloˬ miˇ kʼahˬ kʼoeˇ taˆ ngaˇ bi keuˆ le-eu laꞈ kʼoeˇ, kʼehˬ nehˬ kʼaˆ nehˬ ma.

¹⁴ Baˬbuˇloˬ tsawˇ jeuˬ neh kʼaˇ mˇ-euˬ jeˬ aˇ poeˬ, dziˇ dzoˆ bi tsoeˬ poˆ ma. Tsawˇ jeuˬ gʼawˬ mya jeuˬ hawˇ-eu, tsawˇ myahˇ doˆ-eu sahˬ paˬ gʼawˬ mya gʼaˬ-euˬ laꞈ oˆ, aˬ yawꞈ maꞈ-ahˇ zaˬ kʼaˆ bi geuꞈ ma.”

Miˇ kʼahˬ tsawˇ jeuˬ deuˬ-ahˇ Miˬyehˇ yaˇ kʼaˬ daˇ-eu

¹⁵ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Ngaˇ nui ma pehˇ-eu jeˬ tiˬ byah ni dahˬ-eu aˬ gaꞈ dzaˇ uiˇ kʼmˬ maˬ heu kʼmˬ-ahˇ haw sheˇ. Ngaˇ nawˬ-ahˇ kʼaˇ kʼehˇ gʼeh-euˬ tsawˇ jeuˬ dawˬ tawˆ luꞈ jawˇ gaˇ kʼmˬ maˬ heu ciˬ gʼeh-awˇ bi dawˇ-awˬ.

¹⁶ Aˬ yawꞈ maꞈ kʼmˬ maˬ heu kʼmˬ ciˬ dawˇ ngeh, yehꞈ leˇ-awˇ coˬ coˬ-ehˇ cah-eu laꞈ kʼoeˇ, nui ma-ahˇ maˬ noeˬ ni pyeuꞈ-iˇ tehꞈ-a. Aˬ jeˬ miˇ neh ehˇ naˇ, aˬ yawꞈ maꞈ kʼoeˇ taˆ, guiˇ deuˆ-eu jeˬ ngaˇ bi keuˆ le luꞈ-eu ma.”

¹⁷ Kʼoeˇ naˇ, Sahˬpaˬ Miˬyehˇ ciˬ luꞈ-eu kʼmˬ maˬ kʼoeˇ kʼmˬ ngaˇ ciˬ-awˇ, Sahˬpaˬ Miˬyehˇ neh ngaˬ-ahˇ kʼehˇ gʼeh-euˬ tsawˇ jeuˬ dawˬ tawˆ luꞈ jawˇ gaˇ iˇ-awˇ, ciˬ nehˬ-awˇ bi dawˇ-euˬ ma.

¹⁸ Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ dawˬ tawˆ luꞈ, aˬ yawꞈ maꞈ-euˬ sahˬ paˬ hawˇ-eu sahˬ paˬ sahˬ ma kʼaˇ geuꞈ luꞈ-eu deuˬ dawˬ tawˆ luꞈ nehˬ-ehˇ tiˬ kawˆ loꞈ-ehˇ, kʼmˬ maˬ kʼoeˇ kʼmˬ ya ciˬ dawˇ-euˬ meh. Meuˬ kʼoeˇ deuˬ dawˬ tawˆ luꞈ, kʼaˇ shuiꞈ deh yaˇ bawˇ tsahˬ bawˇ dahˇ loꞈ-ehˇ pyeuꞈ-iˇ-awˇ, tsawˬ guˆ-iˇ paˬ-ehˇ jaˆ ni maˬ ehˇ, nymˬ-mˇ aˬ yawꞈ maꞈ yaˬ kʼehˇ yaˬ ngeh ehˇ-eu loꞈ-ehˇ, aˬ cawˬ yaˬ kʼehˇ yaˬ ngeh, aˬ yawꞈ maꞈ-euˬ tsawˇ myahˇ zmˬ-awˇ yaˬ kʼehˇ yaˬ ni maˬ ehˇ, aˬ yawꞈ maꞈ kʼmˬ maˬ kʼoeˇ kʼmˬ ya ciˬ dawˇ-euˬ jeˬ pyeuꞈ-eu meh.

¹⁹ Kʼmˬ maˬ kʼoeˇ kʼmˬ kʼaˇ ya ciˬ dawˇ-euˬ tsawˇ haˬ deuˬ-aˬ, Iˇjiˇtuˆ sahˬ paˬ hawˇ-eu aˬ yawꞈ-euˬ zaˬ kʼaˆ deuˬ, aˬ yawꞈ-euˬ laꞈ oˆ gaˇ mˇ-eu sahˬ paˬ sahˬ ma deuˬ, aˬ yawꞈ-euˬ miˇ kʼahˬ zaˬ dawˬ tawˆ luꞈ hawˇ-eu,

²⁰ aˬ yawꞈ maꞈ nehˬ-ehˇ kʼaˇ jawˇ-euˬ aˬ cawˬ tsawˇ jeuˬ deuˬ, Uˇzaˆ miˇ kʼahˬ laꞈ kʼoeˇ kʼaˇ jawˇ-eu sahˬ paˬ deuˬ, Piˇliˇtiˆ miˇ kʼahˬ laꞈ kʼoeˇ jaˆ-eu Aˬshaˇgaˬloˇ meuˬ, Gaˬzaˬ meuˬ, Eˇkaˬloˬ meuˬ heu deuˬ-euˬ sahˬ paˬ deuˬ hawˇ-eu, Aˬshaˬdoˇ meuˬ-ahˇ kʼaˇ dzeˇ-eu tsawˇ haˬ deuˬ,

²¹ Eˬdoˬ miˇ kʼahˬ, Mawˇbaˆ miˇ kʼahˬ hawˇ-eu, Aˬmoˬ-euˬ zaˬ deuˬ uˆ deuˬ,

²² Duˇlu miˇ kʼahˬ hawˇ-eu Siˇdoˬ miˇ kʼahˬ-euˬ sahˬ paˬ dawˬ tawˆ luꞈ hawˇ-eu, gʼahˇ ceh-euˬ iˬ ma laˆ shaˆ lawˇ deh caw caw-ehˇ jaˆ-eu miˇ kʼahˬ deuˬ-euˬ sahˬ paˬ deuˬ,

²³ Deˬdaˬ meuˬ, Teˬmaˇ meuˬ, Buˇzaˆ meuˬ, hawˇ-eu, uˬ duˬ tsehˇ kahˇ yaw nymˇ nymˇ-ehˇ tehˬ-eu tsawˇ jeuˬ deuˬ,

²⁴ Aˬleˬbyaˇ miˇ kʼahˬ-euˬ sahˬ paˬ dawˬ tawˆ luꞈ hawˇ-eu, kʼaˇ shuiꞈ deh yaˇ miˇ kʼahˬ-ahˇ jawˇ keuˬ jawˇ so luꞈ-eu tsawˇ jeuˬ deuˬ-euˬ sahˬ paˬ dawˬ tawˆ luꞈ,

²⁵ Zmˇliˬ sahˬ paˬ dawˬ tawˆ luꞈ, Eˇlamˬ sahˬ paˬ dawˬ tawˆ luꞈ hawˇ-eu, Meˬdiˇ sahˬ paˬ dawˬ tawˆ luꞈ,

²⁶ laꞈ taˆ paw pyawˬ-ahˇ dawˬ peh gaˇ mahˇ kʼaˇ jawˇ-eu sahˬ paˬ tiˬ gʼaˬ saˇ-i tiˬ gʼaˬ hawˇ-eu, miˇ tsaˬ heu kʼoeˇ taˆ kʼaˇ jaˆ-eu miˇ kʼahˬ dawˬ tawˆ luꞈ, kʼmˬ maˬ kʼoeˇ kʼmˬ ya ciˬ dawˇ tehꞈ-a. Aˬ cawˬ jeˬ nah ya ciˬ dawˇ saˬ saˬ-eu gʼaˬ-aˬ, Baˬbuˇloˬ sahˬ paˬ meh.

²⁷ Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Tsawˇ haˬ kʼoeˇ deuˬ-ahˇ heu loꞈ-ehˇ ehˇ nehˬ-awˬ. Aˬ yawꞈ maꞈ kʼmˬ maˬ kʼoeˇ ciˬ dawˇ-awˇ, dawˇ yehꞈ-eu miˇ neh uˬ pehꞈ pehꞈ-eu uˬ taꞈ, coˬ-iˇ-awˇ maˬ tuˇ laˇ nya-ehˇ pyeuꞈ-iˇ ngeh keuˆ ni ya dawˇ meh lehˇ, Iˇsaˬleˬlaˆ-euˬ Miˬyehˇ baoˬ huiˬ-eu Sahˬpaˬ Miˬyehˇ pyeuꞈ-eu ngaˇ, aˬ yawꞈ maꞈ-ahˇ dawˬ biꞈ-eu ma. Aˬ jeˬ miˇ neh ehˇ naˇ, aˬ yawꞈ maꞈ kʼoeˇ taˆ guiˇ deuˆ-eu jeˬ bi keuˆ le luꞈ-eu ma.

²⁸ Nawˇ ciˬ luꞈ-eu kʼmˬ maˬ kʼoeˇ aˬ yawꞈ maꞈ maˬ dawˇ lehˇ ehˇ naˇ, ‘Naw maꞈ maˬ dawˇ-ehˇ maˬ gʼeh nya-a’ lehˇ Baoˬ huiˬ-eu Sahˬpaˬ Miˬyehˇ ehˇ-eu meh lehˇ, aˬ yawꞈ maꞈ-ahˇ ehˇ nehˬ-awˬ.

²⁹ Laˆ luˬ laˆ seˇ-eu jeˬ, ngaˬ-euˬ meuˬ laꞈ kʼoeˇ ngaˇ mˇ dahˬ beh ma. Aˬ yawꞈ maꞈ kʼoeˇ taˆ kʼehˬ-eu kʼaˆ-eu jeˬ maˬ keuˆ le ni ya dzeuˇ-iˇ tehꞈ-a lehˇ aˬ yawꞈ maꞈ noeˬ ta loˇ. Maˬ ngeuˇ-a. Aˬ yawꞈ maꞈ kʼehˬ-eu kʼaˆ-eu jeˬ-ahˇ ya daˬ-eu yaw duˬ baw meh. Aˬ jeˬ miˇ neh ehˇ naˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ kʼoeˇ taˆ, guiˇ deuˆ-eu jeˬ bi keuˆ le-eu lehˇ gʼeh-eu ma lehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

³⁰ “Yeˬlaˬmiˇ nawˇ-aˬ, ngaˬ neh kʼaˇ ehˇ taˬ-eu jeˬ ya dzawˇ gaˬ meh. Tsawˇ haˬ kʼoeˇ deuˬ-ahˇ nawˇ heu loꞈ-ehˇ ya ehˇ nehˬ meh. ‘Sahˬpaˬ Miˬyehˇ mˬ taˆ jawˇ-awˇ lmˬ ngeh, mˬ taˆ yaw goˇ tsahˇ-ahˇ mˬ jeˬ tsawˬ tehˆ mahˇ laˇ tehꞈ-a. Aˬ yawꞈ-euˬ tsawˇ haˬ heu deuˬ-ahˇ aˬ yawꞈ lmˬ-awˇ, aˬ gaꞈ dzaˇ uiˇ nawˬ-eu tsawˇ haˬ loꞈ-ehˇ guˇ gaˇ, miˇ tsaˬ zaˬ dawˬ tawˆ luꞈ ya gaˬ tehꞈ-a.

³¹ Teˇ saˇ kʼoeˇ mˬ dzeˇ miˇ dzeˇ-ahˇ tahˬ-iˇ tehꞈ-a. Aˬ jeˬ miˇ neh ehˇ naˇ, miˇ kʼahˬ tsawˇ jeuˬ deuˬ-ahˇ, Sahˬpaˬ Miˬyehˇ yaˇ kʼaˬ ja le tehꞈ-a. Tsawˇ haˬ dawˬ tawˆ luꞈ-ahˇ aˬ yawꞈ yaˇ kʼaˬ daˇ-awˇ, maˬ tsaˬ maˬ dawˇ-eu deuˬ bi shiˇ ma’ lehˇ, Sahˬpaˬ Miˬyehˇ ehˇ taˬ-euˬ meh.

³² Baoˬ huiˬ-eu Sahˬpaˬ Miˬyehˇ ehˇ gaˇ naˇ haˬ sheˇ. Haw yawˬ. Miˇ kʼahˬ tiˬ kʼahˬ saˇ-iˬ tiˬ kʼahˬ-ahˇ, guˆ-eu gaˆ-eu jeˬ keuˆ le luꞈ-eu meh. Huiˬ dui dui-eu mˬ jeˬ jaˬ lehˇ, mˬ dzeˇ miˇ dzeˇ paw neh laˇ luꞈ-eu meh.

³³ Aˇ yamˬ kʼoeˇ keuˆ le ngeh, Sahˬpaˬ Miˬyehˇ neh sehꞈ dzeh taˬ-euˬ tsawˇ haˬ deuˬ, miˇ tsaˬ tahˬ kʼawˇ kʼoeˇ dzeˇ heu dzeˇ doˆ ni, tiˬ byah ni ga tehꞈ-a. Aˬ yawꞈ maꞈ-ahˇ tsawˇ ngoeˇ ngoeˇ-awˇ baꞈ pahˬ nehˬ-eu gʼaˬ maˬ jawˇ-ehˇ, mawˇ neˇ keˬ loꞈ-ehˇ ga tehꞈ-a.

³⁴ Yawˇ yawˇ maꞈ-ahˇ haw-eu yawˇ bo-eu deuˬ loꞈ-ehˇ, ngaˬ-euˬ tsawˇ haˬ-ahˇ sheuˬ gʼeh luꞈ-eu aˬ yuiꞈ aˬ tsu deuˬ, kʼaˬ lehˇ tsahˬ-ahˇ mahˬ poˆ poˆ-awˇ tsawˇ ngoeˇ ngoeˇ-awˬ. Naw maꞈ-ahˇ aˬ cawˬ sehꞈ-eu aˇ yamˬ keuˆ le-awˇ, miˇ tsaˬ oeˬ lahˬ ga meuˇ-iˇ-eu loꞈ-ehˇ, naw maꞈ luˬ-iˇ seˇ-iˇ tehꞈ-a.

³⁵ Naw maꞈ ngaˬ-euˬ tsawˇ haˬ-ahˇ sheuˬ gʼeh luꞈ-eu deuˬ, buˬ-iˇ law-iˇ-eu gaˇ ma maˬ dahˇ-a.

³⁶ Nui saˇ oꞈ-eu miˇ kʼahˬ-ahˇ, Sahˬpaˬ Miˬyehˇ laˆ cawˆ nehˬ-euˬ miˇ neh, miˇ kʼahˬ zaˬ kʼoeˇ taˆ aˬ yuiꞈ aˬ tsu geuꞈ-euˬ deuˬ, shaˬ zahˬ naꞈ-awˇ tsawˇ ngoeˇ ngoeˇ luꞈ gaˇ naˇ haˬ sheˇ.

³⁷ Sahˬpaˬ Miˬyehˇ nui ma pehˇ dui dui-eu miˇ neh, nui saˇ oꞈ-eu miˇ kʼahˬ cawˆ-iˇ tehꞈ-a.

³⁸ Lo kʼahˬ byehˇ-awˇ cah-eu aˇ laˬ jaˬ shiˇ loꞈ-ehˇ, Sahˬpaˬ Miˬyehˇ aˬ yawꞈ-euˬ tsawˇ haˬ-ahˇ, byehˇ dzeh-awˇ cah-euˬ meh. Sahˬpaˬ Miˬyehˇ-euˬ nui ma pehˇ-eu jeˬ hawˇ-eu, guiˇ deuˆ-eu mi zaˬ mi cehˇ baˬ da neh, aˬ yawꞈ maꞈ-euˬ muiˬ-eu miˇ kʼahˬ, kʼaˇ shuiꞈ deh ga pyeuꞈ tsehˆ-euˬ meh.”