Yeˬlaˬmiˇ 23 - Akha

Mehˬ hu paw noeˬ tmˬ duˬ

¹ Sahˬpaˬ Miˬyehˇ-euˬ tsawˇ jeuˬ-ahˇ laˆ cawˆ-awˇ, miˇ kʼahˬ doe ni teh byaˆ nehˬ-euˬ aˬ yuiꞈ aˬ tsu deuˬ-aˬ, shaˬ zahˬ naꞈ dui dui tehꞈ-a.

² Aˬ yawꞈ-euˬ tsawˇ haˬ deuˬ-ahˇ bi haw bi pyaˆ-euˬ aˬ yuiꞈ aˬ tsu deuˬ-ahˇ taꞈ leˇ-awˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ ngaˬ-euˬ tsawˇ jeuˬ-ahˇ maˬ haw maˬ pyaˆ ni, aˬ yawꞈ maꞈ-ahˇ teh byaˆ nehˬ-euˬ meh. Naw maꞈ neh mˇ-euˬ yaw haiˬ jeˬ gʼaˇ duˬ nymˬ-mˇ naw maꞈ-ahˇ ngaˇ kʼehˬ nehˬ kʼaˆ nehˬ ma.

³ Dzeˇ luꞈ-eu ngaˬ-euˬ tsawˇ haˬ deuˬ-ahˇ, ngaˬ neh aˬ yawꞈ maꞈ-ahˇ teh byaˆ taˬ-euˬ miˇ kʼahˬ deuˬ laꞈ kʼoeˇ neh paˇ sheuˬ kʼoꞈ doˆ laꞈ-awˇ, aˬ yawꞈ maꞈ-euˬ miˇ kʼahˬ-ahˇ paˇ bi gʼoꞈ jawˇ laˇ ma.

⁴ Aˬ yawꞈ maꞈ-ahˇ bi sheuˬ gʼeh-eu aˬ yuiꞈ aˬ tsu deuˬ ngaˇ tseˇ doˆ ma. Ngaˬ-euˬ tsawˇ haˬ deuˬ guˆ-eu gaˆ-eu jeˬ-ahˇ maˬ paˇ ya tahˬ puˬ-ehˇ aˬ yawꞈ maꞈ-ahˇ ngaˇ maˬ paˇ kʼehˬ nehˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁵ Sahˬpaˬ Miˬyehˇ ehˇ-eu, “Daˬbiˇ-euˬ zaˬ deuˬ uˆ deuˬ laꞈ kʼoeˇ yaw tsaˬ yaw dawˇ tiˬ gʼaˬ-ahˇ ngaˇ tseˇ doˆ-awˇ, sahˬ paˬ bi geuꞈ-eu aˇ nah aˇ yamˬ keuˆ laˇ luꞈ meh. Sahˬ paˬ kʼoeˇ gʼaˬ miˇ kʼahˬ-ahˇ uˆ lahˇ-eu zaˬ siˬ tsawˇ gahˇ byah-awˇ, miˇ kʼahˬ heu kʼahˬ kʼahˬ lah ni kʼoeˇ taˆ, yaw tsaˬ yaw dawˇ laꞈ kʼoeˇ uˆ lahˇ tehꞈ-a.

⁶ Aˬ yawꞈ sahˬ paˬ pyeuꞈ laˇ ngeh, Yuˇdaˆ tsawˇ haˬ deuˬ guˆ kʼaˇ maˬ za-ehˇ, Iˇsaˬleˬlaˆ tsawˇ haˬ deuˬ kʼawꞈ nui saˇ oꞈ tehꞈ-a. Aˬ yawꞈ-ahˇ, ‘Nga maꞈ-ahˇ ka kʼoꞈ-eu Sahˬpaˬ Miˬyehˇ’ lehˇ kuˇ tehꞈ-a.”

⁷ Sahˬpaˬ Miˬyehˇ ehˇ-eu, “Tsawˇ haˬ zaˬ deuˬ ngaˬ-euˬ tsawˇ myahˇ-ahˇ gʼoe-awˇ tiˬ jeˬ paˬ gaˇ kawˆ kamˬ ngeh, Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ dehꞈ luꞈ-eu Miˬyehˇ-euˬ tsawˇ myahˇ uˬ moˆ kamˬ-eu ma lehˇ maˬ paˇ ehˇ ni,

⁸ Iˇsaˬleˬlaˆ tsawˇ haˬ deuˬ-ahˇ laꞈ taˆ paw-euˬ miˇ kʼahˬ hawˇ-eu aˬ yawꞈ neh kʼaˇ teh byaˆ-euˬ miˇ kʼahˬ deuˬ laꞈ kʼoeˇ neh sheuˬ kʼoꞈ doˆ nehˬ-euˬ, dehꞈ luꞈ-eu Miˬyehˇ-euˬ tsawˇ myahˇ uˬ moˆ kamˬ-eu ma lehˇ ya ehˇ paˇ-eu aˇ nah aˇ yamˬ keuˆ le tehꞈ-a. Kʼoeˇ naˇ, aˬ yawꞈ maꞈ yawˬ ha-euˬ miˇ kʼahˬ-ahˇ ya jawˇ tehꞈ-a.”

Miˬyehˇ gʼaˇ duˬ ngehˬ dah-eu jaˬ myawꞈ myawꞈ-eu deuˬ

⁹ Sahˬpaˬ Miˬyehˇ baˬ da, aˬ yawꞈ-euˬ muiˬ-eu shawˇ-eu dawˬ baˬ da, ngaˇ nui ma tsawˬ paˆ-awˇ, yaw dzuˬ dzuˬ dui dui nya. Jiˇ baˬ yehꞈ-eu tsawˇ haˬ loꞈ-ehˇ duˇ-awˇ, jiˇ baˬ aˇ dzehˬ dawˇ dzeuˇ-euˬ gaˇ duˇ nya.

¹⁰ Sahˬpaˬ Miˬyehˇ-ahˇ saˇ jaˇ maˬ ziꞈ-eu tsawˇ haˬ, miˇ kʼahˬ heu kʼahˬ laꞈ kʼoeˇ byah-awˇ, haiˬ-eu jeˬ-ahˇ poˆ-awˇ dehꞈ-eu laꞈ kʼoeˇ, aˬ yawꞈ maꞈ-euˬ baoˬ-ahˇ yehˬ bawˬ-ehˇ zmˬ-eu meh. Sahˬpaˬ Miˬyehˇ yaˬ kʼehˇ yaˬ-euˬ miˇ neh,. miˇ tsaˬ tahˬ kʼawˇ tsawˇ ngoeˇ ngoeˇ-awˇ, jeˬ zaˬ gaˆ kʼahˬ nyoeˬ-iˇ koˆ-iˇ-eu meh.

¹¹ Sahˬpaˬ Miˬyehˇ ehˇ-eu, “Miˬyehˇ gʼaˇ duˬ ngehˬ dah-eu deuˬ hawˇ-eu, piˇ ma deuˬ Miˬyehˇ maˬ baw-ehˇ, Uˬ duˬ tahˬ nymˇ nymˇ ma laꞈ kʼoeˇ yaw haiˬ jeˬ mˇ luꞈ-eu, ngaˇ nyehꞈ duˬ taˬ-euˬ ma.

¹² Aˬ yawꞈ maꞈ-euˬ gaˇ ma yaw juˇ juˇ-awˇ, zahˇ tsui ni gʼeh-eu meh. Aˬ yawꞈ maꞈ-ahˇ sahˬ tiꞈ tiꞈ-awˇ bi coˬ-iˇ ma. Aˬ yawꞈ maꞈ-ahˇ ngaˇ shaˬ zahˬ bi naꞈ ma. Aˬ yawꞈ maꞈ-ahˇ kʼehˬ-eu aˇ nah peh le meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹³ Saˬmaˬliˆ miˇ kʼahˬ-ahˇ Miˬyehˇ gʼaˇ duˬ ngehˬ dah-eu deuˬ, iˬ baˇ ahˇ-eu ngaˇ mawˇ duˬ taˬ-euˬ ma. Baˬlaˇ miˬ yehˇ tsawˇ myahˇ uˬ moˆ aˬ yawꞈ maꞈ dawˬ ngehˬ-awˇ, ngaˬ-euˬ tsawˇ haˬ deuˬ-ahˇ gaˇ ma sheuˬ bahˬ-euˬ meh.

¹⁴ Ehˇ kʼawꞈ Yeˬluˇsaˬlehˬ meuˬ-ahˇ ngaˬ-euˬ gʼaˇ duˬ ngehˬ dah-eu deuˬ, kʼoeˇ naˆ maˬ tseˇ doeˇ gaˇ ngaˇ mawˇ-euˬ ma. Aˬ cawˬ-euˬ miˬ zaˬ-ahˇ aˬ yawꞈ maꞈ bahˬ gʼa muˆ gʼa-awˇ, jaˬ myawꞈ mehˇ shuiˇ dawˬ ngehˬ-eu meh. Tsawˇ haˬ yawˬ gʼaˬ na luꞈ yaw haiˬ jeˬ maˬ byehˇ ni mˇ-eu gʼaˇ duˬ, yaw lehˬ mˇ gaˇ aˬ yawꞈ maꞈ gʼaˬ baꞈ baꞈ-eu meh. Aˬ yawꞈ maꞈ dawˬ tawˆ luꞈ ngaˬ-euˬ mehˬ shi, Sawˇdoˬ hawˇ-eu Gawˇmawˇlaˆ meuˬ loꞈ-ehˇ, doeˇ dui dui-eu tsawˇ haˬ deuˬ pyeuꞈ-eu meh.”

¹⁵ Kʼoeˇ miˇ neh Yeˬluˇsaˬlehˬ-ahˇ jawˇ-eu Miˬyehˇ gʼaˇ duˬ ngehˬ dah-eu tsawˇ haˬ deuˬ gaˇ kawˆ, Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Aˬ yawꞈ maꞈ-ahˇ ngaˇ doꞈ yawˇ bi dzaˬ-awˇ, doꞈ dawˆ-euˬ iˇ cuꞈ bi dawˇ ma. Aˬ jeˬ miˇ neh ehˇ naˇ, miˇ kʼahˬ heu kʼahˬ doe ni, Miˬyehˇ nui ma maˬ tsaˬ-eu jeˬ, aˬ yawꞈ maꞈ mˇ byah taˬ-euˬ meh.”

¹⁶ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ, Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ ehˇ gaˇ taˬ naˇ haˬ. Aˬ yawꞈ maꞈ naw maꞈ-ahˇ, maˬ tsaˬ maˬ dawˇ-eu noeˬ tmˬ duˬ biꞈ byah nehˬ laꞈ-euˬ meh. Ngaˬ neh bi ehˇ-euˬ dawˬ naw maꞈ-ahˇ maˬ ehˇ nehˬ ni, aˬ yawꞈ maꞈ neh kʼaˇ noeˬ doˆ-euˬ jeˬ tehꞈ-ehˇ ehˇ nehˬ-euˬ meh.

¹⁷ Ngaˬ-euˬ ehˇ dawˬ maˬ naˇ haˬ-eu tsawˇ haˬ deuˬ-ahˇ, nui saˇ oꞈ tehꞈ-a lehˇ aˬ yawꞈ maꞈ gʼaˬ biꞈ-awˇ, nui ma gʼahˇ dui dui-eu tsawˇ haˬ yawˬ gʼaˬ na luꞈ-ahˇ, shaˬ zahˬ maˬ puˬ le-aˇ lehˇ aˬ yawꞈ maꞈ gʼaˬ baꞈ baꞈ-eu meh.”

¹⁸ Ngaˇ heu loꞈ-ehˇ ehˇ-eu ma. “Miˬyehˇ gʼaˇ duˬ ngehˬ dah luꞈ-eu heu deuˬ, Sahˬpaˬ Miˬyehˇ nui noeˬ aˬ geu gʼaˬ siˬ nya ta. Aˬ yawꞈ neh bi ngehˬ dah-euˬ dawˬ, aˬ yawꞈ maꞈ maˬ ya gaˬ haw-ehˇ, gʼoˆ shaw nya-eu tiˬ gʼaˬ-iˬ maˬ ahˇ-a. Sahˬpaˬ Miˬyehˇ neh ngehˬ-euˬ dawˬ deuˬ-ahˇ, yaw muiˬ-ehˇ naˇ haˬ-eu tiˬ gʼaˬ-iˬ maˬ jawˇ-a.

¹⁹ Aˬ yawꞈ nui ma pehˇ-eu jeˬ-aˬ, haiˬ-eu tsawˇ haˬ deuˬ-euˬ uˬ duˬ-ahˇ ciˬ tahˬ-eu, mˬ jeˬ jaˬ lehˇ-ahˇ duˇ-eu meh.

²⁰ Aˬ yawꞈ nui noeˬ maˬ mˇ li kʼoeˇ keuˆ ni, Sahˬpaˬ Miˬyehˇ nui pehˇ maˬ shuꞈ-iˇ-aˇ.”

²¹ Sahˬpaˬ Miˬyehˇ ehˇ-eu, “Miˬyehˇ gʼaˇ duˬ ngehˬ dah-eu heu deuˬ-aˬ, ngaˬ neh maˬ kʼehˇ gʼeh kʼawꞈ aˬ yawꞈ maꞈ iˇ-eu meh. Aˬ yawꞈ maꞈ-ahˇ ngaˬ-euˬ dah zaˇ maˬ bi ngehˬ dah-euˬ kʼawꞈ, ngaˬ-euˬ tsawˇ myahˇ pi-awˇ dawˬ ngehˬ-eu meh.

²² Ngaˬ-euˬ nui noeˬ aˬ yawꞈ maꞈ siˬ nya law nmˇ-aˬ, ngaˬ-euˬ tsawˇ haˬ deuˬ-ahˇ ngaˬ-euˬ dawˬ ngehˬ dah-awˇ, aˬ yawꞈ maꞈ-euˬ haiˬ-eu dehꞈ jeˬ dehꞈ kawˆ hawˇ-eu, aˬ yawꞈ maꞈ mˇ luꞈ-eu yaw lehˬ jeˬ-ahˇ, byehˇ dzeh ni mehˬ paˇ nya tehꞈ-a.

²³ “Ngaˇ-aˬ, yawˬ gaˇ na luꞈ jawˇ luꞈ-eu Miˬyehˇ pyeuꞈ-eu ma.

²⁴ Tiˬ tsahˇ tehꞈ-ehˇ jawˇ-eu Miˬyehˇ maˬ ngeuˇ. Tsawˇ haˬ tiˬ gʼaˬ-iˬ ngaˇ maˬ mawˇ gaˇ maˬ cehˆ zaꞈ nya-a. Mˬ hawˇ-eu miˇ tsaˬ yawˬ gaˇ na luꞈ doe ni, ngaˇ jawˇ luꞈ-eu gaˇ kawˆ naw maꞈ maˬ siˬ nya te loˇ.

²⁵ Yuꞈ maˆ maˆ-eu laꞈ kʼoeˇ aˬ yawꞈ maꞈ-ahˇ ngaˇ dawˬ biꞈ le-euˬ meh lehˇ ehˇ-awˇ, ngaˬ-euˬ tsawˇ myahˇ pi-awˇ jaˬ myawꞈ myawꞈ-eu Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ neh kʼaˇ ngehˬ-euˬ dawˬ deuˬ, ngaˇ siˬ nya jiˇ ma.

²⁶ Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ, aˬ yawꞈ maꞈ neh noeˬ doˆ-euˬ jaˬ myawꞈ mehˇ shuiˇ-ahˇ gʼoe-awˇ ngaˬ-euˬ tsawˇ haˬ deuˬ-ahˇ aˬ myah keuˆ ni gaˇ ma sheuˬ bahˬ-eu gʼeh ta.

²⁷ Aˬ yawꞈ maꞈ-euˬ aˬ poeˬ aˬ bawˇ deuˬ ngaˬ-ahˇ ngehˇ-awˇ, Baˬlaˇ miˬ yehˇ jawˇ paw ciˬ pyawˇ-euˬ loꞈ-ehˇ pyeuꞈ laˇ ni, aˬ yawꞈ maꞈ neh yuꞈ maˆ maˆ-euˬ gaˇ kawˆ ja mehˬ-awˇ, ngaˬ-euˬ tsawˇ haˬ deuˬ ngaˬ-ahˇ byehˇ dzeh ni jahˇ ma lehˇ aˬ yawꞈ maꞈ noeˬ-eu meh.

²⁸ Yuꞈ maˆ maˆ-awˇ Miˬyehˇ gʼaˇ duˬ ngehˬ dah-eu deuˬ-aˬ, yuꞈ maˆ gaˇ kawˆ ja luꞈ-uˇ. Ehˇ kʼawꞈ, ngaˬ-euˬ dawˬ za taˬ-eu Miˬyehˇ gʼaˇ duˬ ngehˬ dah-eu deuˬ-aˬ, saˇ jaˇ ziꞈ-eu laꞈ kʼoeˇ ngaˬ-euˬ gʼaˇ duˬ ngehˬ dah luꞈ-uˇ. Gʼo yoeˬ-aˬ, cehˇ cehˇ nmˇ-ahˇ ciˬ cehˆ haw naˇ, aˬ jeˬ gaˇ dahˇ paˇ tsoeˬ nmˇ.

²⁹ Ngaˬ-euˬ dawˬ-aˬ, miˬ dzaˬ-ahˇ duˇ-awˇ, kʼaˬ lo-ahˇ deh meuˇ nya-eu diˬ puˬ puˬ ma-ahˇ duˇ-eu meh.

³⁰ Tiˬ gʼaˬ-euˬ dawˬ tiˬ gʼaˬ yuˇ-awˇ, ngaˬ-euˬ dawˬ meh lehˇ ehˇ ehˇ-ehˇ cah-eu Miˬyehˇ gʼaˇ duˬ ngehˬ dah-eu kʼoeˇ deuˬ-ahˇ ngaˇ muiˇ-eu ma.

³¹ Yawˬ ha-ahˇ kʼaˇ loˆ laˇ-euˬ jeˬ ngehˬ-awˇ, ngaˬ-euˬ dawˬ ngehˬ dah-eu ma lehˇ ehˇ-eu, Miˬyehˇ gʼaˇ duˬ ngehˬ dah-eu deuˬ-ahˇ kʼawꞈ ngaˇ muiˇ-eu ma.

³² Naˇ haˬ-awˬ. Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Jaˬ myawꞈ mehˇ shuiˇ tiˬ byah ni ahˇ-eu, yawˬ ha neh yuꞈ maˆ maˆ mawˇ-euˬ gaˇ kawˆ ja-eu Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ-ahˇ ngaˇ muiˇ-eu ma. Aˬ yawꞈ maꞈ yuꞈ maˆ maˆ mawˇ-euˬ gaˇ kawˆ ja-awˇ, jaˬ myawꞈ mehˇ shuiˇ shuiˇ-awˇ, kʼahˬ sehˇ jehˆ-eu laꞈ kʼoeˇ ngaˬ-euˬ tsawˇ haˬ deuˬ-ahˇ gaˇ ma sheuˬ bahˬ-eu meh. Aˬ yawꞈ maꞈ-ahˇ ngaˇ dawˬ biꞈ-awˇ kʼehˇ gʼeh leꞈ-euˬ maˬ ngeuˇ. Aˬ yawꞈ maꞈ-aˬ, ngaˬ-euˬ tsawˇ haˬ deuˬ gʼaˇ duˬ tiˬ pawꞈ-iˬ gaˇ dahˇ maˬ tsoeˬ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Sahˬpaˬ Miˬyehˇ-euˬ kʼaˆ behˆ

³³ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Yeˬlaˬmiˇ-oˇ, ngaˬ-euˬ tsawˇ haˬ tiˬ gʼaˬ na maˬ ehˇ, Miˬyehˇ gʼaˇ duˬ ngehˬ dah-eu tiˬ gʼaˬ na maˬ ehˇ, piˇ ma tiˬ gʼaˬ na maˬ ehˇ, ‘Sahˬpaˬ Miˬyehˇ-euˬ dawˬ aˬ jeˬ-a’ lehˇ nawˬ-ahˇ naˇ haˬ laˇ naˇ, ‘Naw maꞈ-aˬ, Sahˬpaˬ Miˬyehˇ gʼaˇ duˬ kʼaˆ behˆ pyeuꞈ-awˇ, naw maꞈ-ahˇ aˬ yawꞈ pi dzeh tehꞈ-a’ lehˇ ehˇ kʼoꞈ nehˬ-awˬ.

³⁴ Ngaˬ-euˬ tsawˇ haˬ tiˬ gʼaˬ na maˬ ehˇ, Miˬyehˇ gʼaˇ duˬ ngehˬ dah-eu tiˬ gʼaˬ na maˬ ehˇ, piˇ ma tiˬ gʼaˬ na maˬ ehˇ, Sahˬpaˬ Miˬyehˇ-euˬ kʼaˆ behˆ lehˇ ehˇ-eu dawˬ ngehˬ naˇ, aˬ yawꞈ hawˇ-eu aˬ yawꞈ-euˬ miˬ sawˇ zaˬ deuˬ-ahˇ ngaˇ kʼehˬ nehˬ kʼaˆ nehˬ ma.

³⁵ Kʼoeˇ loꞈ-ehˇ maˬ ehˇ ni, yawˬ ha-euˬ aˬ yuiꞈ aˬ nyiˇ hawˇ-eu yawˬ ha-euˬ cawˬ yaw kaˬ, ‘Sahˬpaˬ Miˬyehˇ aˬ joˆ-ehˇ ehˇ kʼoꞈ nehˬ laꞈ ta’ lehˇ hawˇ-eu, ‘Sahˬpaˬ Miˬyehˇ aˬ joˆ-ehˇ ehˇ taˬ ta’ lehˇ ja cawˬ-eu tsaˬ tehꞈ-a.

³⁶ Kʼoeˇ miˇ neh, ‘Sahˬpaˬ Miˬyehˇ-euˬ kʼaˆ behˆ’ lehˇ ehˇ-eu dawˬ aˬ yawꞈ maꞈ ngehˬ-eu maˬ tsaˬ-a. Aˬ jeˬ miˇ neh ehˇ naˇ, tsawˇ haˬ tiˬ gʼaˬ na kʼoeˇ loꞈ-ehˇ ngehˬ naˇ, ngaˬ-euˬ dawˬ aˬ yawꞈ gʼaˇ duˬ maˇ maˇ ni kʼaˆ behˆ bi pyeuꞈ ma. Tsawˇ haˬ heu deuˬ-aˬ, aˬ yawꞈ maꞈ-euˬ Miˬyehˇ dehꞈ luꞈ-eu Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ-euˬ dawˬ-ahˇ laˆ jawꞈ-euˬ meh.

³⁷ Yeˬlaˬmiˇ-oˇ, Miˬyehˇ gʼaˇ duˬ ngehˬ dah-eu tsawˇ haˬ deuˬ-ahˇ, ‘Sahˬpaˬ Miˬyehˇ naw maꞈ-ahˇ aˬ joˆ-ehˇ ehˇ kʼoꞈ nehˬ laꞈ taˬ’ lehˇ hawˇ-eu, ‘Sahˬpaˬ Miˬyehˇ aˬ jeˬ ehˇ ta’ lehˇ naˇ haˬ-awˬ.

³⁸ Aˬ yawꞈ maꞈ ngaˬ neh biꞈ taˬ-euˬ dawˬ-ahˇ maˬ naˇ haˬ geuꞈ-ehˇ, Sahˬpaˬ Miˬyehˇ-euˬ kʼaˆ behˆ lehˇ ehˇ-eu dawˬ ngehˬ laˇ naˇ, aˬ yawꞈ maꞈ-ahˇ heu loꞈ-ehˇ ehˇ nehˬ-awˬ.

³⁹ Aˬ yawꞈ maꞈ-ahˇ maˬ ehˇ, aˬ yawꞈ maꞈ hawˇ-eu aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ taˬ-euˬ meuˬ-ahˇ maˬ ehˇ, ngaˇ tsuˆ-awˇ, ngaˬ-ahˇ maˬ mawˇ laˇ gaˇ biˬ byoˆ nehˬ-eu uˬ taꞈ,

⁴⁰ tiˬ jawˇ-iˬ maˬ ngehˇ leˇ coeˇ-eu mˬ maˬ maˬ byaˆ zaˇ ziˇ daˬ ga-awˇ ya shaꞈ dawˇ-eu jeˬ, aˬ yawꞈ maꞈ kʼoeˇ taˆ ngaˇ bi keuˆ le ma lehˇ ehˇ nehˬ-awˬ.”