Yeˬlaˬmiˇ 22 - Akha

Yuˇdaˆ sahˬ paˬ deuˬ gʼaˇ duˬ Sahˬpaˬ Miˬyehˇ-euˬ dawˬ

^1-2 Daˬbiˇ-euˬ dzoeˬ dzaˬ nuiˇ mahˬ-ahˇ nuiˇ-eu Yuˇdaˆ sahˬ paˬ-euˬ nymˇ-ahˇ, Sahˬpaˬ Miˬyehˇ ngaˬ-ahˇ kʼehˇ gʼeh-awˇ, kʼoeˇ gaˇ jawˇ-eu sahˬ paˬ-ahˇ maˬ ehˇ, sahˬ paˬ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ maˬ ehˇ, Sahˬpaˬ Miˬyehˇ-euˬ dawˬ heu loꞈ-ehˇ tsaꞈ gaˬ leˇ-awˬ lehˇ ehˇ-eu meh.

³ “Yaw tsaˬ yaw dawˇ jeˬ mˇ-awˬ lehˇ, Sahˬpaˬ Miˬyehˇ pyeuꞈ-eu ngaˇ naw maꞈ-ahˇ dawˬ biꞈ-eu ma. Aˬ cawˬ neh mehˇ shuiˇ bi shuiˇ dzaˬ-euˬ tsawˇ haˬ deuˬ-ahˇ, mehˇ shuiˇ shuiˇ dzaˬ-eu tsawˇ haˬ deuˬ-euˬ aˬ laꞈ laꞈ kʼoeˇ neh ka kʼoꞈ doˆ nehˬ-awˬ. Boeˇ miˬ siˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ-ahˇ taˬ kʼehˬ taˬ kʼaˆ nehˬ. Maˬ lehˬ maˬ ca-eu tsawˇ haˬ deuˬ-ahˇ muiˬ-eu shawˇ-eu jawˇ duˬ heu tsahˇ laꞈ kʼoeˇ taˬ sehꞈ.

⁴ Ngaˬ neh dawˬ kʼaˇ biꞈ nehˬ-euˬ loꞈ-ehˇ naw maꞈ aˬ diˇ aˬ maˇ mˇ naˇ, mehˬ hu paw dehꞈ daˆ leꞈ ngeh, Daˬbiˇ-euˬ zaˬ deuˬ uˆ deuˬ dzoeˬ dzaˬ oꞈ tehꞈ-a. Aˬ yawꞈ maꞈ-euˬ gaˇ mˇ-eu yaw huiˬ yaw mahˇ deuˬ hawˇ-eu aˬ yawꞈ maꞈ-euˬ miˇ kʼahˬ zaˬ deuˬ nehˬ-ehˇ, mahˬ laˆ lawˬ hawˇ-eu mahˬ dziˬ dziˬ-ehˇ sahˬ paˬ-euˬ hawˇ nymˇ lahˇ kʼehˬ heu deuˬ-ahˇ yaˇ gaˇ gaˇ-awˇ ya dehꞈ tehꞈ-a.

⁵ Ehˇ kʼawꞈ, ngaˬ neh dawˬ biꞈ-euˬ gaˇ naw maꞈ maˬ naˇ haˬ ni dehꞈ naˇ, sahˬ paˬ-euˬ hawˇ nymˇ heu ya cawˆ-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ kamˬ-eu ma.

⁶ “Yuˇdaˆ sahˬ paˬ-euˬ hawˇ nymˇ heu-aˬ, ngaˬ-euˬ gʼaˇ duˬ Giˇlaˆ miˇ kʼahˬ hawˇ-eu Leˬbaˬnoˬ gawˬ jawˬ deuˬ loꞈ-ehˇ haw muiˬ-eu kʼawꞈ, tsawˇ haˬ tiˬ gʼaˬ-iˬ maˬ jawˇ-eu bawˇ tsahˬ bawˇ dahˇ loꞈ-ehˇ, coꞈ gaˆ ni ngaˇ bi pyeuꞈ-iˇ ma.

⁷ Sahˬ paˬ jawˇ-eu hawˇ nymˇ kʼoeˇ-ahˇ bi laˆ cawˆ-eu gʼaˇ duˬ, ngaˇ tsawˇ haˬ pyehˬ gʼeh leꞈ ma. Aˬ yawꞈ maꞈ deuˆ haˬ baꞈ leꞈ-awˇ, haw muiˬ dui dui-eu shuˬ liˇ kʼawˇ zeuˇ deuˬ-ahˇ deuˆ tsehˆ-awˇ, miˬ dzaˬ-ahˇ baꞈ puiˆ tehꞈ-a.

⁸ “Aˬ cawˬ miˇ kʼahˬ-ahˇ jawˇ-eu tsawˇ haˬ deuˬ iˇ tsehˆ laˇ tsehˆ ngeh, aˬ jeˬ miˇ neh Sahˬpaˬ Miˬyehˇ pyeuꞈ-eu ngaˇ, huiˬ dui dui-eu meuˬ heu meuˬ-ahˇ teu naˆ naˆ-ehˇ jahˇ nehˬ-euˬ nga lehˇ, tiˬ gʼaˬ tiˇ gʼaˬ naˇ haˬ tehꞈ-a.

⁹ Kʼoeˇ ngeh, naw maꞈ-euˬ Miˬyehˇ pyeuꞈ-eu ngaˬ nehˬ-ehˇ dzaˬ taˬ-euˬ dawˬ ma saˇ jaˇ-ahˇ naw maꞈ byehˇ dzeh-awˇ, miˬ yehˇ nui deuˬ-ahˇ uˬ duˬ tahˬ-awˇ, miˬ yehˇ kʼoeˇ deuˬ-euˬ nui kʼahˇ mˇ-euˬ miˇ neh, kʼoeˇ loꞈ-ehˇ bi jahˇ nehˬ-euˬ nga lehˇ aˬ yawꞈ maꞈ ehˇ tehꞈ-a.”

Yoˇaˬhaˆ gʼaˇ duˬ Miˬyehˇ-euˬ dawˬ

¹⁰ Yuˇdaˆ tsawˇ haˬ deuˬ-oˇ, sahˬ paˬ Yawˇshiˆ gʼaˇ duˬ taˬ ngoeˇ. Aˬ yawꞈ shiˇ-euˬ miˇ neh tsawˇ ngoeˇ taˬ ngoeˇ. Ehˇ kʼawꞈ, aˬ yawꞈ aˬ li Yoˇaˬhaˆ-euˬ gʼaˇ duˬ tsawˇ ngoeˇ ngoeˇ dui dui-awˬ. Aˬ cawˬ aˬ yawꞈ-ahˇ nyehꞈ byoˆ-awˇ, tiˬ jawˇ-iˬ maˬ paˇ ya gʼoꞈ doˆ laˇ-ehˇ, aˬ yawꞈ dehꞈ le-euˬ miˇ kʼahˬ-ahˇ, tiˬ jawˇ-iˬ maˬ paˇ ya mawˇ meh.

¹¹ Aˬ da gʼaˬ-euˬ dah zaˇ Yuˇdaˆ miˇ kʼahˬ-euˬ sahˬ paˬ geuꞈ-euˬ Yawˇshiˆ-euˬ aˬ li Yoˇaˬhaˆ-euˬ gaˇ kawˆ, Sahˬpaˬ Miˬyehˇ heu loꞈ-ehˇ ehˇ-eu meh. “Jawˇ duˬ heu tsahˇ-ahˇ neh aˬ yawꞈ iˇ byoˆ gʼeh-awˇ, tiˬ jawˇ-iˬ maˬ paˇ ya gʼoꞈ doˆ laˇ meh.

¹² Aˬ cawˬ neh aˬ yawꞈ-ahˇ nyehꞈ gʼeh-euˬ miˇ kʼahˬ laꞈ kʼoeˇ aˬ yawꞈ ziˇ ya dehꞈ jiˇ-awˇ, miˇ kʼahˬ heu kʼahˬ-ahˇ aˬ yawꞈ tiˬ jawˇ-iˬ maˬ paˇ ya mawˇ meh.”

Yeˬhawˇyaˬkmˬ gʼaˇ duˬ Miˬyehˇ-euˬ dawˬ

¹³ Maˬ tsaˬ maˬ dawˇ-eu laꞈ kʼoeˇ nymˇ tsoˆ-awˇ, maˬ sui maˬ dawˇ-eu laꞈ kʼoeˇ nymˇ paˇ tsoˆ jeˇ-eu, yawˬ ha miˇ kʼahˬ zaˬ-ahˇ yawˬ ngehꞈ-ehˇ kʼehˇ dzaˬ-awˇ, gʼaˬ gaˇ aˇ poeˬ maˬ biꞈ nehˬ-eu tsawˇ haˬ, shaˬ zahˬ ya mˇ dui dui tehꞈ-a.

¹⁴ “Kʼoeˇ taˆ tiˆ jeˇ lo ni gʼeh-eu, nymˇ nymˇ ma tiˬ nymˇ tsoˆ doˆ ma” ehˇ-awˇ, laˇ gʼoˆ zaˬ gʼawˬ mya ni jahˇ ahˇ-awˇ, shuˬ liˇ teˇ byaꞈ kaˇ pyawˇ taw-awˇ, jaˆ gʼaˬ neˇ lehꞈ muiˬ taˬ-euˬ tsawˇ haˬ, shaˬ zahˬ ya mˇ dui dui tehꞈ-a.

¹⁵ Poeˬ-euˬ shuˬ liˇ daˇ kawˬ shaˇ-awˇ, aˬ cawˬ naˆ maˬ tseˇ muiˬ-eu nymˇ tsoˆ doˆ nya naˇ, maˬ gaˇ-eu sahˬ paˬ pyeuꞈ ta loˇ. Nawˬ da yaw dehꞈ dehꞈ-euˬ tiˬ jeˬ-iˬ ehˇ kʼaˇ maˬ za-a. Yaw tsaˬ yaw dawˇ dawˇ-ehˇ dehꞈ-euˬ miˇ neh, aˬ yawꞈ neh kʼaˇ mˇ kʼaˇ shaˇ yaꞈ-euˬ jeˬ, yawˬ jeˬ na luꞈ guiˬ lahˬ baw luꞈ-eu meh.

¹⁶ Shaˬ zaˬ zahˬ zaˬ-ahˇ dawˇ coe ni yaˇ kʼaˬ daˇ-euˬ miˇ neh, aˬ yawꞈ gʼaˇ duˬ aˬ myah luꞈ nui saˇ oꞈ-eu meh. Sahˬpaˬ Miˬyehˇ-ahˇ siˬ nya-eu lehˇ ehˇ-eu-aˬ, kʼoeˇ loꞈ-ehˇ dehꞈ gaˇ ehˇ-eu meh.

¹⁷ Ehˇ kʼawꞈ, nawˇ yaw dehꞈ dehꞈ-eu-aˬ, yawˬ ha gʼaˇ duˬ tehꞈ-ehˇ toˆ-eu miˇ neh, maˬ lehˬ maˬ ca-eu tsawˇ haˬ-ahˇ sehꞈ-awˇ, nawˬ-euˬ miˇ kʼahˬ zaˬ-ahˇ kʼehˬ-eu nga lehˇ, Sahˬpaˬ Miˬyehˇ ehˇ luꞈ-eu meh.

¹⁸ Kʼoeˇ miˇ neh, Yawˇshiˆ-euˬ aˬ li Yuˇdaˆ sahˬ paˬ Yeˬhawˇyaˬciˬ-euˬ gaˇ kawˆ-ahˇ taꞈ leˇ-awˇ, Sahˬpaˬ Miˬyehˇ heu loꞈ-ehˇ ehˇ-eu meh. “Aˬ yawꞈ shiˇ-eu aˇ nah keuˆ ngeh, ngaˬ-euˬ cawˬ gʼawˬ shaˬ-ehˇ miˇ-a ehˇ-awˇ, tsawˇ ngoeˇ ngoeˇ-eu gʼaˬ maˬ jawˇ-ehˇ, ngaˬ-euˬ sahˬ paˬ-oˇ lehˇ kuˇ-awˇ, ngoeˇ-eu tsawˇ haˬ tiˬ gʼaˬ-iˬ maˬ jawˇ-aˇ.

¹⁹ Mahˬ tahˬ laˆ shiˇ ngeh gʼeu dzeh-eu loꞈ-ehˇ, Yeˬluˇsaˬlehˬ meuˬ-euˬ lahˇ kʼehˬ laꞈ nyiˇ, aˬ yawꞈ-ahˇ gʼeu dzeh ha tehꞈ-a.”

Yeˬluˇsaˬlehˬ meuˬ guiˬ lahˬ maˬ huiˬ-a

²⁰ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, Leˬbaˬnoˬ gawˬ jawˬ-ahˇ le-awˇ guˇ-awˬ. Baˬshaˬ miˇ kʼahˬ-ahˇ le-awˇ ngoeˇ leˇ-awˬ. Mawˇbaˆ gawˬ jawˬ doe ni le-awˇ guˇ-awˬ. Aˬ jeˬ miˇ neh ehˇ naˇ, naw maꞈ-ahˇ nui ma gm-euˬ deuˬ, aˬ cawˬ neh deuˆ gʼaˬ jiˇ-euˬ meh.

²¹ Naw maꞈ dehꞈ dzaˬ luꞈ ngeh Sahˬpaˬ Miˬyehˇ dawˬ ngehˬ cawˬ gaˇ, naw maꞈ naˬ bawˇ maˬ ciˬ kʼmˇ-aˬ. Naw maꞈ dehꞈ dzeuˇ laꞈ-euˬ aˇ yamˬ heu myah laꞈ kʼoeˇ, Sahˬpaˬ Miˬyehˇ ehˇ dawˬ maˬ naˇ haˬ-aˬ.

²² Naw maꞈ-euˬ aˬ yuiꞈ aˬ tsu deuˬ, jaˬ lehˇ neh bi baw byoˆ jiˇ-awˇ, naw maꞈ-ahˇ nui ma gm-euˬ deuˬ, guiˇ deuˆ gaˇ bi nyehꞈ mi tehꞈ-a. Naw maꞈ neh mˇ-euˬ yaw haiˬ jeˬ baˬ da, naw maꞈ-euˬ meuˬ daˬ ga-awˇ ya shaꞈ dawˇ tehꞈ-a.

²³ Leˬbaˬnoˬ gawˬ jawˬ-ahˇ shaˇ leˇ-euˬ, shuˬ liˇ neh tsoˆ-euˬ nymˇ laꞈ kʼoeˇ, naw maꞈ saˇ lehˆ ni dehꞈ luꞈ meh. Ehˇ kʼawꞈ, zaˬ baw aˬ ma-euˬ shaˬ zahˬ-ahˇ duˇ-eu, shaˬ zahˬ naw maꞈ-ahˇ zaw laˇ ngeh, naw maꞈ aˇ naˆ ni ya shaˬ nmˇ.

Yeˬhawˇyaˬciˬ-ahˇ Sahˬpaˬ Miˬyehˇ yaˇ kʼaˬ daˇ-euˬ

²⁴ Yuˇdaˆ sahˬ paˬ Yeˬhawˇyaˬkmˬ-euˬ aˬ li sahˬ paˬ Yeˬhawˇyaˬciˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Nawˇ-aˬ, ngaˬ-euˬ aˇ maˇ laꞈ-ahˇ behˬ luꞈ-eu ngaˬ-euˬ jmˬ ahˇ-eu laꞈ behˬ pyeuꞈ-eu kʼawꞈ, nawˬ-ahˇ ngaˇ gʼeu lehˆ doˆ ma.

²⁵ Nawˇ guˆ-eu nawˬ-ahˇ sehꞈ-eu lehˇ jawˬ luꞈ-eu tsawˇ haˬ deuˬ-euˬ aˬ laꞈ laꞈ kʼoeˇ, nawˬ-ahˇ ngaˇ a nehˬ ma. Baˬbuˇloˬ sahˬ paˬ Neˬbuˬkaˬneˬzaˬ hawˇ-eu aˬ yawꞈ-euˬ yehˇ deuˬ-euˬ aˬ laꞈ laꞈ kʼoeˇ a nehˬ ma.

²⁶ Nawˬ ma naw nyaꞈ-ahˇ aˬ cawˬ miˇ kʼahˬ-ahˇ bi nyehꞈ byoˆ gʼeh ni ngaˇ jahˇ ma. Naw nyaꞈ ma zaˬ dehꞈ le-euˬ jawˇ duˬ maˬ ngeuˇ-eu miˇ kʼahˬ-ahˇ ya jawˇ leˇ-awˇ, kʼoeˇ gaˇ ya shiˇ tehꞈ-a.

²⁷ Miˇ kʼahˬ heu kʼahˬ-ahˇ naw nyaꞈ ma zaˬ mawˇ mawꞈ dui dui tehꞈ-a. Ehˇ kʼawꞈ, tiˬ jawˇ-iˬ maˬ paˇ ya gʼoꞈ haw le meh.”

²⁸ Aˬ cawˬ maˬ haw nahˇ-eu paˆ-iˇ taˬ-euˬ mui deuˇ oeˬ lahˬ, aˬ cawˬ maˬ geuꞈ nahˇ-eu mˇ myawˬ, Yeˬhawˇyaˬciˬ ehˇ-eu heu gʼaˬ meh loˇ. Aˬ jeˬ miˇ neh aˬ yawꞈ-euˬ zaˬ deuˬ-ahˇ, aˬ yawꞈ maˬ siˬ-eu miˇ kʼahˬ-ahˇ biˬ ahˇ nehˬ taˬ.

²⁹ Oˇ miˇ kʼahˬ, oˇ miˇ kʼahˬ, oˇ miˇ kʼahˬ, Sahˬpaˬ Miˬyehˇ-euˬ dawˬ-ahˇ naˇ haˬ sheˇ.

³⁰ “Tsawˇ haˬ heu gʼaˬ zaˬ maˬ jawˇ le nya-ehˇ, maˬ dehꞈ tuˇ laˇ nya-eu tsawˇ haˬ meh lehˇ boꞈ ahˇ taˬ-awˬ. Daˬbiˇ-euˬ dzoeˬ dzaˬ oꞈ-awˇ neh, Yuˇdaˆ miˇ kʼahˬ-ahˇ uˆ lahˇ-eu gʼaˇ duˬ, aˬ yawꞈ zaˬ maˬ jawˇ le-aˇ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”