Yeˬlaˬmiˇ 21 - Akha

Yeˬluˇsaˬlehˬ meuˬ ya cawˆ-iˇ tehꞈ-a

¹ Yuˇdaˆ sahˬ paˬ Zeˬdaˬkiˇ-aˬ, Maˬlaˬkiˇyaˆ-euˬ aˬ li Paˬshuˇlaˆ hawˇ-eu Mawˇseˬyaˇ-euˬ aˬ li piˇ ma Zeˬpaˬniˇ-ahˇ ngaˇ jawˇ gaˇ kʼehˇ gʼeh leꞈ-awˇ, heu loꞈ-ehˇ bi ehˇ le-euˬ meh.

² “Baˬbuˇloˬ sahˬ paˬ Neˬbuˬkaˬneˬzaˬ nga maꞈ-ahˇ guiˇ deuˆ le-euˬ miˇ neh, nga maꞈ-euˬ gʼaˇ duˬ Sahˬpaˬ Miˬyehˇ-ahˇ tiˬ poˆ ngehˬ cawˬ nehˬ laꞈ-awˬ. Sahˬpaˬ Miˬyehˇ kʼaˆ jeˬ-ehˇ gʼeh-eu jeˬ jahˇ-awˇ, Neˬbuˬkaˬneˬzaˬ-ahˇ teh gʼoꞈ nehˬ laꞈ-eu baw le.”

³ Kʼoeˇ naˇ, Sahˬpaˬ Miˬyehˇ neh ngaˬ-ahˇ ehˇ nehˬ laꞈ-euˬ dawˬ deuˬ, ngaˇ jawˇ gaˇ kʼehˇ gʼeh leꞈ-euˬ tsawˇ haˬ kʼoeˇ nyiˬ gʼaˬ-ahˇ ngaˇ ehˇ nehˬ-euˬ ma.

⁴ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ, Zeˬdaˬkiˇ-ahˇ bi tsaꞈ kʼoꞈ leˇ-euˬ ma. “Zeˬdaˬkiˇ-oˇ, Baˬbuˇloˬ sahˬ paˬ hawˇ-eu aˬ yawꞈ-euˬ guiˇ maꞈ nehˬ-ehˇ guiˇ deuˆ luꞈ-eu nawˬ-euˬ guiˇ maꞈ-ahˇ ngaˇ bi smˬ-iˇ ma. Nawˬ-euˬ yehˇ deuˬ-euˬ guiˇ deuˆ-eu keu ka deuˬ-ahˇ, meuˬ-euˬ gʼahˇ ceh ngaˇ gʼoˆ bymˇ ma.

⁵ Ngaˬ-eu gʼaˬ dawˬ tawˆ luꞈ, ngaˇ nui ma pehˇ-eu jeˬ dawˬ tawˆ luꞈ hawˇ-eu, ngaˇ nui ma naˇ luꞈ-eu jeˬ dawˬ tawˆ luꞈ yuˇ doˆ-awˇ, naw maꞈ-ahˇ ngaˇ guiˇ deuˆ ma.

⁶ Meuˬ heu meuˬ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ ngaˇ sehꞈ ma. Tsawˇ haˬ maˬ ehˇ, jeˬ zaˬ maˬ ehˇ, guˆ dui dui laˇ paˬ-ehˇ gʼeh-eu naˇ gawˇ baˬ da neh ya shiˇ tehꞈ-a.

⁷ Ehˇ kʼawꞈ, nawˇ hawˇ-eu nawˬ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ gawˇ, heu deuˬ-ahˇ kʼaˇ dzeuˇ-iˇ-euˬ tsawˇ haˬ deuˬ-ahˇ maˬ ehˇ, sahˬ paˬ Neˬbuˬkaˬneˬzaˬ hawˇ-eu naw maꞈ-ahˇ sehꞈ mawꞈ-euˬ muiˇ-eu deuˬ neh bi nyehꞈ jiˇ ma. Neˬbuˬkaˬneˬzaˬ naw maꞈ-ahˇ sehꞈ tehꞈ-a. Naw maꞈ-ahˇ aˬ yawꞈ gʼawˬ shaˬ maˬ gaˬ ni, tiˬ gʼaˬ-iˬ maˬ bi dzeuˇ-iˇ ni sehꞈ jiˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁸ Kʼoeˇ naˇ, miˇ kʼahˬ zaˬ deuˬ-ahˇ heu loꞈ-ehˇ ehˇ nehˬ-awˬ lehˇ, Sahˬpaˬ Miˬyehˇ ngaˬ-ahˇ kʼehˇ-eu meh. “Naˇ haˬ-awˬ. Sahˬpaˬ Miˬyehˇ pyeuꞈ-eu ngaˇ-aˬ, naw maꞈ-ahˇ shiˇ-eu gaˇ ma hawˇ-eu dehꞈ-eu gaˇ ma bi tseˇ geuꞈ-eu ma.

⁹ Meuˬ heu meuˬ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ, guiˇ deuˆ-eu laꞈ kʼoeˇ maˬ ehˇ, mehꞈ-eu shuꞈ-eu baˬ da neh maˬ ehˇ, naˇ-eu gawˇ-eu baˬ da neh maˬ ehˇ, ya shiˇ tehꞈ-a. Ehˇ kʼawꞈ, meuˬ-euˬ laꞈ nyiˇ doˆ-iˇ-awˇ, meuˬ heu meuˬ-ahˇ guiˇ deuˆ le-euˬ Baˬbuˇloˬ tsawˇ haˬ deuˬ jawˇ gaˇ cehˆ uˇ leˇ-eu tsawˇ haˬ-aˬ, uˬ kʼawˇ buˬ-iˇ tehꞈ-a.

¹⁰ Meuˬ heu meuˬ-ahˇ maˬ laˆ cawˆ-ehˇ maˬ taˬ lehˇ, ngaˇ noeˬ tsehˆ taˬ-euˬ ma. Meuˬ heu meuˬ Baˬbuˇloˬ sahˬ paˬ-euˬ laꞈ-ahˇ ahˇ leˇ-awˇ, miˇ tsa tuˆ ni bi keuˬ puiˆ byoˆ leꞈ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yuˇdaˆ sahˬ paˬ-euˬ nymˇ-ahˇ yaˇ kʼaˬ daˇ nehˬ-eu

¹¹ Kʼoeˇ uˬ taꞈ, Yuˇdaˆ sahˬ paˬ-euˬ nymˇ-ahˇ heu loꞈ-ehˇ ehˇ nehˬ-awˬ lehˇ, Sahˬpaˬ Miˬyehˇ ngaˬ-ahˇ ehˇ-eu meh. “Sahˬpaˬ Miˬyehˇ ehˇ gaˇ naˇ haˬ-awˬ.

¹² Daˬbiˇ-euˬ nymˇ-oˇ, Sahˬpaˬ Miˬyehˇ heu loꞈ-ehˇ ehˇ-eu meh. “Yawˬ shawˬ na luꞈ yaw dawˇ dawˇ-ehˇ yaˇ kʼaˬ daˇ-awˬ. Aˬ cawˬ smˇ kʼaˆ bi kʼaˆ dzaˬ-euˬ deuˬ-ahˇ, smˇ kʼaˆ deuˬ-euˬ laꞈ-ahˇ neh ka kʼoꞈ doˆ nehˬ-awˬ. Naw maꞈ kʼoeˇ loꞈ-ehˇ maˬ jahˇ naˇ, naw maꞈ mˇ-euˬ yaw haiˬ jeˬ baˬ da neh, ngaˬ-euˬ nui pehˇ miˬ dzaˬ doꞈ doˆ laˇ-awˇ, tsawˇ haˬ zaˬ maˬ laˆ miˆ nya-eu miˬ dzaˬ doꞈ laˇ tehꞈ-a.

¹³ Deh ga gʼahˇ ceh jaˆ-eu lo guˇ loꞈ-ehˇ, Yeˬluˇsaˬlehˬ meuˬ nawˇ deh kʼawꞈ kʼoeˇ taˆ, yaw goˇ-ahˇ nuiˇ luꞈ meh. Ehˇ kʼawꞈ, nawˬ-ahˇ ngaˇ guiˇ deuˆ ma. Nawˇ jawˇ gaˇ guiˇ maˬ deuˆ uˇ keuˆ laꞈ nya-aˇ lehˇ, nawˇ nui ma huiˬ-awˇ lmˬ luꞈ meh.

¹⁴ Ehˇ kʼawꞈ, nawˬ neh mˇ-euˬ jeˬ-ahˇ geuˇ ni, nawˬ-ahˇ ngaˇ kʼehˬ nehˬ ma. Nawˬ-euˬ sahˬ paˬ jawˇ-eu nymˇ-ahˇ ngaˇ miˬ dzaˬ keuˬ puiˆ-awˇ, dzawˬ gui dzawˬ nya yawˬ jeˬ na luꞈ bi puiˆ dzaˬ jiˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”