Yeˬlaˬmiˇ 20 - Akha

Yeˬlaˬmiˇ Paˬshuˇlaˆ nehˬ-ehˇ ja dzaˬ-euˬ

¹ Uˬ duˬ tahˬ nymˇ nymˇ ma-ahˇ aˬ yuiꞈ geuꞈ-awˇ haw luꞈ-eu gʼaˬ pyeuꞈ-eu, Iˇmeˬlaˇ-euˬ aˬ li piˇ ma Paˬshuˇlaˆ gʼaˬ ngaˇ kʼoeˇ loꞈ-ehˇ ehˇ gaˇ ya gaˬ ngeh,

² ngaˬ-ahˇ diˬ-awˇ, Uˬ duˬ tahˬ nymˇ nymˇ ma-euˬ lahˇ-ahˇ jaˆ-eu Beˬyaˬmiˬ lahˇ kʼehˬ laꞈ taˆ kʼehˬ dawˬ peh shmˇ caˆ paꞈ-awˇ bi jawˇ-eu gʼaˇ duˬ aˬ yawꞈ dawˬ biꞈ-euˬ meh.

³ Yawˬ shawˬ yawˬ Paˬshuˇlaˆ ngaˬ-ahˇ pyehˬ nehˬ laꞈ ngeh, aˬ yawꞈ-ahˇ ngaˇ heu loꞈ-ehˇ ehˇ nehˬ-euˬ ma. “Sahˬpaˬ Miˬyehˇ nawˬ-ahˇ Paˬshuˇlaˆ lehˇ myahˇ nehˬ-euˬ maˬ ngeuˇ-a. Aˬ yawꞈ nawˬ-ahˇ ‘Maˬ gawˇ laˆ miˇ shaˬ biˇ baˆ’ lehˇ myahˇ-euˬ meh.

⁴ Sahˬpaˬ Miˬyehˇ heu loꞈ-ehˇ ehˇ taˬ-euˬ meh. ‘Ngaˇ nawˬ-ahˇ, yawˬ haˇ yawˬ ha ya guˆ-eu tsawˇ haˬ hawˇ-eu, nawˬ-euˬ cawˬ deuˬ ya guˆ-eu tsawˇ haˬ bi pyeuꞈ laˇ ma. Aˬ yawꞈ maꞈ dawˬ tawˆ luꞈ muiˇ-eu deuˬ-euˬ mi cehˇ kʼehˬ-ahˇ shiˇ jiˇ gaˇ nawˇ ya mawˇ tehꞈ-a. Yuˇdaˆ tsawˇ haˬ dawˬ tawˆ luꞈ-ahˇ, Baˬbuˇloˬ sahˬ paˬ-euˬ baoˬ uˬ moˆ ngaˇ bi dehꞈ ma. Tiˬ paˆ na deuˬ-ahˇ aˬ yawꞈ maꞈ-euˬ miˇ kʼahˬ-ahˇ paꞈ kʼoꞈ gʼeh-awˇ, tiˬ paˆ na deuˬ-ahˇ sehꞈ dzeh yaꞈ tehꞈ-a.

⁵ Meuˬ heu meuˬ laꞈ kʼoeˇ kʼaˇ jaˆ-eu aˬ yawꞈ maꞈ-euˬ pyuˇ shuiˇ myawˬ gahˬ dawˬ tawˆ luꞈ hawˇ-eu, Yuˇdaˆ sahˬ paˬ deuˬ-euˬ pyuˇ shuiˇ dawˬ tawˆ luꞈ kʼawꞈ, muiˇ-eu deuˬ neh bi yuˇ geuꞈ jiˇ-awˇ, yawˬ jeˬ na luꞈ Baˬbuˇloˬ miˇ kʼahˬ-ahˇ bi yuˇ gʼeh jiˇ gaˇ keuˆ tehꞈ-a.

⁶ Paˬshuˇlaˆ-oˇ, nawˬ-euˬ shaˬ bymˇ-aˬ, nawˇ hawˇ-eu nawˬ-euˬ miˬ sawˇ zaˬ dawˬ tawˆ luꞈ Baˬbuˇloˬ miˇ kʼahˬ-ahˇ bi nyehꞈ gʼeh jiˇ tehꞈ-a. Kʼoeˇ gaˇ nawˇ ya dehꞈ sehꞈ-awˇ, nawˬ neh mehˇ shuiˇ gʼawˬ mya poˆ shuiˇ-euˬ nawˬ-euˬ cawˬ deuˬ nehˬ-ehˇ tiˬ kawˆ loꞈ-ehˇ, miˇ kʼahˬ kʼoeˇ kʼahˬ-ahˇ ya bi baꞈ pahˬ tehꞈ-a lehˇ ehˇ-eu meh lehˇ ehˇ nehˬ-euˬ ma.”

Yeˬlaˬmiˇ nui ma cawˆ-eu

⁷ Sahˬpaˬ Miˬyehˇ-oˇ, nawˇ ngaˬ-ahˇ mehˇ shuiˇ shuiˇ-awˇ, ngaˇ nawˬ-euˬ mehˇ shuiˇ shuiˇ duˬ ma. Ngaˇ naˆ maˬ tseˇ nawˇ gʼaˬ kʼaˆ-awˇ, ngaˬ-ahˇ zuiˆ gʼaˬ-eu meh. Yawˬ gʼaˬ na luꞈ ngaˬ-ahˇ cehꞈ lehꞈ ka-awˇ, nah doˆ le ngeh naˬ gʼa-eu meh.

⁸ Ngaˇ dawˬ kʼaˇ ngehˬ ngeh ngoeˇ-eu jeˬ oꞈ-awˇ, “Yaw haiˬ hawˇ-eu yaw cawˆ jeˬ tehꞈ nga” lehˇ ya guˇ-eu meh. Sahˬpaˬ Miˬyehˇ nawˬ-euˬ dawˬ ngaˇ ya dzawˇ gaˬ-eu miˇ neh, dawˬ doeˇ daˬ-eu maˬ tsehˆ leˇ nya.

⁹ Ehˇ kʼawꞈ, Sahˬpaˬ Miˬyehˇ-ahˇ ngehˇ byoˆ-awˇ, aˬ yawꞈ tsawˇ myahˇ uˬ moˆ dawˬ dzawˇ maˬ paˇ mˇ ma ehˇ ngeh, nawˬ-euˬ dawˬ kawˬ ngaˬ-euˬ nui ma laꞈ kʼoeˇ, miˬ dzaˬ doꞈ gaˇ duˇ nya. Ngaˇ kʼaˇ dzahˬ tehˬ coeˇ-eu jahˬ kʼawꞈ, maˬ dzahˬ tehˬ gʼaˬ coeˇ nya.

¹⁰ “Yawˬ gaˇ na luꞈ guˆ-eu gaˆ-eu jeˬ keuˆ le-euˬ gaˆ kawˆ, Sahˬ paˬ sahˬ ma deuˬ-ahˇ tsaꞈ gaˬ-iˇ kaˇ-euˇ” lehˇ, yawˬ gʼaˬ na luꞈ dawˬ saˆ saˆ kʼoeˬ luꞈ-eu ngaˇ gaˬ-euˬ ma. Ngaˇ gʼoeˇ dui dui-eu cawˬ deuˬ-ahˇ keuˆ ni, ngaˇ coˬ-iˇ gaˇ dawˬ luꞈ-eu meh. “Aˬ dui maꞈ aˬ yawꞈ-ahˇ tsawˇ gahˇ gahˇ-awˇ, aˬ yawꞈ-ahˇ kʼmˇ paꞈ-awˇ laꞈ poˆ poˆ kaˇ-euˇ” lehˇ, aˬ yawꞈ maꞈ ngaˬ-euˬ gaˇ kawˆ ja luꞈ meh.

¹¹ Ehˇ kʼawꞈ, baoˬ huiˬ-awˇ gʼaˬ kʼaˆ-eu Sahˬpaˬ Miˬyehˇ nawˇ-aˬ, ngaˇ jawˇ paw pyawˬ luꞈ-eu miˇ neh, ngaˬ-ahˇ kʼehˬ-eu tsawˇ haˬ deuˬ sahˬ tiꞈ tiꞈ coˬ-awˇ, ngaˬ-ahˇ maˬ gʼaˬ laˇ ni smˬ-iˇ tehꞈ-a. Aˬ yawꞈ maꞈ smˬ-iˇ-euˬ miˇ neh, mˬ maˬ maˬ byaˆ zaˇ ziˇ ya shaꞈ dawˇ-awˇ, maˬ ngehˇ leˇ coeˇ gaˇ keuˆ tsawˇ myahˇ ya cawˆ tehꞈ-a.

¹² Ehˇ kʼawꞈ, Baoˬ huiˬ-eu Sahˬpaˬ Miˬyehˇ-oˇ, tsawˇ haˬ-ahˇ nawˇ dawˇ coe ni lawˬ haw-awˇ, nui noeˬ nui duˇ dawˬ tawˆ nawˇ siˬ nya jiˇ-eu meh. Kʼoeˇ baˬ da neh ngaˬ-euˬ gaˇ kawˆ, nawˬ-ahˇ daˬ keuˆ laˇ-euˬ loꞈ-ehˇ, muiˇ-eu deuˬ-ahˇ nawˇ laꞈ poˆ poˆ nehˬ-eu, ngaˬ-ahˇ bi mawˇ laꞈ-awˬ.

¹³ Sahˬpaˬ Miˬyehˇ-ahˇ caˇ-awˇ ja ceuˬ-awˬ. Sahˬpaˬ Miˬyehˇ-ahˇ ja ceuˬ-awˬ. Haiˬ-eu tsawˇ haˬ deuˬ neh bi kʼehˬ-euˬ tsawˇ haˬ-ahˇ, aˬ yawꞈ ka kʼoꞈ doˆ nehˬ-eu meh.

¹⁴ Ngaˬ-ahˇ bi dehꞈ le-euˬ aˇ nah yaˬ kʼehˇ yaˬ gaˇ ya daˬ luꞈ-uˇ. Ngaˬ ma ngaˬ-ahˇ bi dehꞈ le-euˬ aˇ nah kʼoeˇ nah, guiˬ lahˬ maˬ huiˬ-eu aˇ nah pyeuꞈ luꞈ-uˇ.

¹⁵ “Nawˬ-euˬ gʼaˇ duˬ aˬ li tiˬ li dehꞈ le gʼaˬ meh” lehˇ tsaꞈ gaˬ-awˇ ngaˬ da laˬ kʼaˬ cehˇ ni dawˬ dzawˇ mˇ-euˬ tsawˇ haˬ, yaˬ kʼehˇ yaˬ gaˇ ya daˬ luꞈ-uˇ.

¹⁶ Sahˬpaˬ Miˬyehˇ gʼawˬ shaˬ maˬ gaˬ nehˬ ni, laˆ cawˆ nehˬ-euˬ meuˬ deuˬ loꞈ-ehˇ, tsawˇ haˬ kʼoeˇ gʼaˬ-euˬ guiˬ lahˬ doeˇ luꞈ-uˇ. Uˬ shawˬ paw naˇ-awˇ mahˇ-eu teˇ saˇ-ahˇ ya gaˬ-awˇ, nah gʼahˇ paw guiˇ deuˆ-awˇ guˇ-eu teˇ saˇ ya gaˬ luꞈ-uˇ.

¹⁷ Ngaˬ ma uˬ maˆ ngaˬ-euˬ lmˬ bymˇ pyeuꞈ ni, aˬ jeˬ miˇ neh ngaˇ maˬ dehꞈ doˆ le mi naˆ-ehˇ, aˬ jeˬ miˇ neh aˬ yawꞈ ngaˬ-ahˇ maˬ sehꞈ-euˬ ta.

¹⁸ Aˬ jeˬ miˇ neh ngaˇ dehꞈ le taˬ. Shaˬ zahˬ mˇ-eu gʼaˇ duˬ dehꞈ le taˬ loˇ. Tiˬ ziˇ jiˇ ni daˬ ga-eu lehˇ dehꞈ le taˬ loˇ.