Yeˬlaˬmiˇ 19 - Akha

Ga paˆ-euˬ ciˬ cuˇ

¹ “Ciˬ cuˇ tiˬ siˬ zeuˇ laˬ-iˇ-awˬ” lehˇ Sahˬpaˬ Miˬyehˇ ngaˬ-ahˇ ehˇ-eu meh. “Aˬ yuiꞈ aˬ tsu geuꞈ-eu tiˬ paˆ na deuˬ hawˇ-eu, aˇ kʼoꞈ kʼawˆ laˇ-euˬ piˇ ma tiˬ paˆ na deuˬ kʼawꞈ sheuˬ-awˇ,

² oeˬ lahˬ tehˆ duˬ lahˇ kʼehˬ-ahˇ neh, Hiˬnoˬ deh kʼawꞈ-ahˇ iˇ doˆ gʼeh-awˬ” lehˇ ehˇ-eu meh. Kʼoeˇ gaˇ, aˬ yawꞈ neh bi ngehˬ-euˬ dawˬ deuˬ ngaˇ ya ngehˬ-eu meh.

³ Sahˬpaˬ Miˬyehˇ ngaˬ-ahˇ heu loꞈ-ehˇ bi ngehˬ bi tmˇ laꞈ-euˬ meh. “Yuˇdaˆ sahˬ paˬ deuˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ Iˇsaˬleˬlaˆ-euˬ Miˬyehˇ ehˇ gaˇ naˇ haˬ-awˬ. Kʼaˇ ya gaˬ-eu tsawˇ haˬ deuˬ myaꞈ leˇ jiˇ paˬ-ehˇ gʼeh-eu guˆ-eu gaˆ-eu jeˬ, jawˇ duˬ heu tsahˇ-ahˇ ngaˇ bi keuˆ le ma.

⁴ Miˇ kʼahˬ zaˬ deuˬ ngaˬ-ahˇ byehˇ dzeh-awˇ, aˬ yawꞈ maꞈ maˬ ehˇ, aˬ yawꞈ maꞈ-euˬ aˬ poeˬ aˬ bawˇ deuˬ maˬ ehˇ, Yuˇdaˆ sahˬ paˬ deuˬ maˬ ehˇ, tiˬ jawˇ-iˬ maˬ gaˬ haw-euˬ miˬ yehˇ nui deuˬ-ahˇ lawˇ nehˬ shehˇ nehˬ-eu laꞈ kʼoeˇ, jawˇ duˬ heu tsahˇ-ahˇ laˆ jawꞈ-euˬ meh. Jawˇ duˬ heu tsahˇ-ahˇ, iˬ baˇ maˬ ahˇ-eu tsawˇ haˬ deuˬ-euˬ shiˬ aˬ yawꞈ maꞈ bi yoeˇ byah-euˬ meh.

⁵ Aˬ yawꞈ maꞈ-euˬ zaˬ deuˬ-ahˇ miˬ dzaˬ dzah puiˆ-awˇ lawˇ-eu lehˇ, Baˬlaˇ miˬ yehˇ gʼaˇ duˬ lawˇ duˬ gʼawˬ mya ni jahˇ taˬ-eu meh. Aˬ yawꞈ maꞈ kʼoeˇ loꞈ-ehˇ jahˇ ni ngaˇ dawˬ maˬ biꞈ haw-aˬ. Kʼoeˇ loꞈ-ehˇ jahˇ-eu lehˇ, nui ma laꞈ kʼoeˇ tehꞈ-ehˇ kʼawꞈ maˬ shaˇ noeˬ haw-aˬ.

⁶ Kʼoeˇ miˇ neh, jawˇ duˬ heu tsahˇ-ahˇ Tawˇpehˆ lehˇ maˬ ehˇ, Hiˬnoˬ deh kʼawꞈ lehˇ maˬ ehˇ, maˬ paˇ ya kuˇ haw-ehˇ, tsawˇ haˬ sehꞈ gahˬ-euˬ deh kʼawꞈ lehˇ ya kuˇ-eu aˇ nah aˇ yamˬ keuˆ le tehꞈ-a.

⁷ Jawˇ duˬ heu tsahˇ-ahˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ jawˇ-eu tsawˇ haˬ deuˬ-euˬ nui kʼahˇ dawˬ tawˆ luꞈ, ngaˇ laˆ cawˆ nehˬ jiˇ ma. Muiˇ-eu deuˬ neh aˬ yawꞈ maꞈ-ahˇ guiˇ bi deuˆ gʼaˬ-awˇ, bi deuˆ sehꞈ jiˇ ma. Aˬ yawꞈ maꞈ-ahˇ, aˇ jiˇ hawˇ-eu bawˇ tsahˬ jeˬ zaˬ deuˬ-euˬ dzaˇ bi pyeuꞈ-iˇ ma.

⁸ Kʼaˇ iˇ kʼaˇ laˇ tsehˆ-eu deuˬ tsawˬ guˆ-iˇ-awˇ zahˬ leˇ paˬ-ehˇ, meuˬ heu meuˬ kʼoeˇ taˆ guˆ dui dui laˇ paˬ-ehˇ gʼeh-eu luˬ-iˇ seˇ-iˇ-eu jeˬ ngaˇ bi keuˆ le ma.

⁹ Muiˇ-eu deuˬ meuˬ-ahˇ loꞈ jawˬ-awˇ, aˬ yawꞈ maꞈ-ahˇ sehꞈ-eu lehˇ leh jeh tehꞈ-a. Aˬ yawꞈ maꞈ-ahˇ loꞈ jawˬ taˬ-euˬ kʼoeˇ aˇ naˆ ni guˆ laˇ paˬ-ehˇ gʼeh-eu nga lehˇ ehˇ ngeh, meuˬ laꞈ kʼoeˇ jawˇ-eu deuˬ tiˬ gʼaˬ-euˬ shaˬ jiˇ tiˬ gʼaˬ dzaˬ gaˇ keuˆ-awˇ, yawˬ ha-euˬ zaˬ-euˬ shaˬ jiˇ ya dzaˬ gaˇ keuˆ tehꞈ-a.”

¹⁰ Kʼoeˇ naˇ, “Ngaˬ nehˬ-ehˇ iˇ-euˬ tsawˇ haˬ deuˬ mehˬ shi, ciˬ cuˇ pyehˬ ka-awˇ bi ga paˆ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh.

¹¹ Kʼoeˇ naˇ, “Aˬ yawꞈ maꞈ-ahˇ heu loꞈ-ehˇ ehˇ nehˬ-awˬ” lehˇ ehˇ-eu meh. “Tsawˇ haˬ heu deuˬ hawˇ-eu meuˬ heu meuˬ-ahˇ ngaˇ heu loꞈ-ehˇ bi ga paˆ ma. Ciˬ cuˇ heu siˬ paˆ-iˇ shaˆ-iˇ-euˬ loꞈ-ehˇ, maˬ paˇ tsoꞈ tsaꞈ leˇ nya ni pyeuꞈ-iˇ tehꞈ-a. Tawˇpehˆ lehˇ kuˇ-eu jawˇ duˬ kʼoeˇ tsahˇ-ahˇ kʼawꞈ, aˬ yawꞈ maꞈ tsawˇ shiˇ ya baꞈ pahˬ gaˇ keuˆ tehꞈ-a. Aˬ jeˬ miˇ neh ehˇ naˇ, nui gaˇ baꞈ pahˬ kʼaˇ maˬ za ni tsawˇ shiˇ myaˬ dui dui tehꞈ-a.

¹² Meuˬ heu meuˬ hawˇ-eu heu gaˇ jawˇ-eu tsawˇ haˬ deuˬ-ahˇ, Tawˇpehˆ lehˇ kuˇ-eu jawˇ duˬ kʼoeˇ tsahˇ loꞈ-ehˇ pyeuꞈ laˇ ni ngaˇ jahˇ nehˬ ma.

¹³ Yeˬluˇsaˬlehˬ meuˬ-ahˇ jaˆ-eu nymˇ deuˬ maˬ ehˇ, Yuˇdaˆ sahˬ paˬ deuˬ-euˬ nymˇ deuˬ maˬ ehˇ, nymˇ mˬ kʼoeˇ taˆ aˬ guiˇ deuˬ-ahˇ tsiˇ yaw saw jeˬ doꞈ damˬ-awˇ, miˬ yehˇ nui deuˬ-ahˇ aˬ gaꞈ dzaˇ uiˇ kʼaˇ-awˇ lawˇ nehˬ-euˬ nymˇ yawˬ nymˇ na luꞈ, Tawˇpehˆ lehˇ kuˇ-eu jawˇ duˬ loꞈ-ehˇ, maˬ muiˬ maˬ shawˇ-eu jeˬ pyeuꞈ-iˇ tehꞈ-a.”

¹⁴ Kʼoeˇ naˇ, Sahˬpaˬ Miˬyehˇ ngaˬ-ahˇ kʼehˇ gʼeh-awˇ, aˬ yawꞈ-euˬ gʼaˇ duˬ bi ngehˬ dah-iˇ-euˬ Tawˇpehˆ lehˇ kuˇ-eu jawˇ duˬ kʼoeˇ tsahˇ-ahˇ neh ngaˇ doˆ laˇ-awˇ, Uˬ duˬ tahˬ nymˇ nymˇ ma-euˬ kmˇ cehˇ laꞈ kʼoeˇ yawꞈ-awˇ, tsawˇ haˬ dawˬ tawˆ luꞈ-ahˇ heu loꞈ-ehˇ ehˇ nehˬ-euˬ ma.

¹⁵ Baoˬ huiˬ-eu Sahˬpaˬ Miˬyehˇ pyeuꞈ-eu Iˇsaˬleˬlaˆ Miˬyehˇ-euˬ dawˬ heu deuˬ, aˬ yawꞈ maꞈ-ahˇ ngaˇ ehˇ nehˬ-euˬ ma. “Meuˬ heu meuˬ hawˇ-eu dawˬ peh jaˆ-eu meuˬ dawˬ tawˆ luꞈ kʼoeˇ taˆ, ngaˬ neh kʼaˇ ehˇ taˬ-euˬ kʼehˬ-eu kʼaˆ-eu jeˬ dawˬ tawˆ luꞈ ngaˇ bi keuˆ le ma. Aˬ jeˬ miˇ neh ehˇ naˇ, naw maꞈ nui ma gʼahˇ dui dui-awˇ, ngaˬ-euˬ dawˬ-ahˇ maˬ naˇ haˬ geuꞈ-a.”