Yeˬlaˬmiˇ 18 - Akha

Oeˬ lahˬ tehˆ-eu tsawˇ haˬ-euˬ nymˇ-ahˇ iˇ-euˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Oeˬ lahˬ tehˆ-eu tsawˇ haˬ-euˬ nymˇ-ahˇ iˇ-awˬ. Kʼoeˇ gaˇ, ngaˇ nawˬ-ahˇ dawˬ biꞈ nehˬ le ma.”

³ Ngaˇ kʼoeˇ gaˇ iˇ ngeh, oeˬ lahˬ tehˆ-eu tsawˇ haˬ kʼoeˇ gʼaˬ oeˬ lahˬ tehˆ-eu daˇ jawˇ dawˬ peh oeˬ lahˬ tehˆ luꞈ gaˇ ya mawˇ-euˬ ma.

⁴ Aˬ yawꞈ oeˬ lahˬ tehˆ-eu noeˬ-euˬ miˇ-ahˇ maˬ tsaˬ ngeh, aˬ yawꞈ kʼaˇ noeˬ-euˬ loꞈ-ehˇ yawˬ siˬ yawˬ paˇ tehˆ paˇ-eu meh.

⁵ Kʼoeˇ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

⁶ “Iˇsaˬleˬlaˆ tsawˇ haˬ deuˬ-oˇ, oeˬ lahˬ tehˆ-eu tsawˇ haˬ oeˬ lahˬ tehˆ-eu shaˬ jehˆ yuˇ-awˇ, yawˬ ha kʼaˇ tehˆ mawꞈ-eu jeˬ tehˆ nya-eu loꞈ-ehˇ, naw maꞈ-ahˇ ngaˬ neh noeˬ-euˬ loꞈ-ehˇ maˬ jahˇ nya ta loˇ. Oeˬ lahˬ tehˆ-eu shaˬ jehˆ kʼoeˇ oeˬ lahˬ tehˆ-eu gʼaˬ-euˬ aˬ laꞈ laꞈ kʼoeˇ jaˆ-eu loꞈ-ehˇ, naw maꞈ kʼawꞈ ngaˬ-euˬ aˬ laꞈ laꞈ kʼoeˇ jaˆ-eu ma.

⁷ Tsawˇ jeuˬ tiˬ jeuˬ-ahˇ ngaˇ puˇ ngawˬ ngawˬ lehˆ doˆ-awˇ, ngawˬ kʼehꞈ ngawˬ kʼoeˆ nehˬ-eu laꞈ kʼoeˇ laˆ luˬ laˆ seˇ nehˬ ma lehˇ ngaˇ ehˇ-euˬ kʼawꞈ,

⁸ tsawˇ jeuˬ kʼoeˇ jeuˬ noeˬ paˇ-awˇ yaw haiˬ jeˬ maˬ mˇ ni byehˇ naˇ, ngaˬ neh ehˇ-euˬ loꞈ-ehˇ maˬ jahˇ nehˬ ni byehˇ nya ma.

⁹ Yawˬ dawˬ yawˬ paˇ ehˇ naˇ, tsawˇ jeuˬ tiˬ jeuˬ-ahˇ ngaˇ ka dehꞈ-awˇ laˆ huiˬ laˆ mahˇ nehˬ ma lehˇ ngaˇ ehˇ kʼawꞈ,

¹⁰ tsawˇ jeuˬ kʼoeˇ jeuˬ ngaˬ-euˬ ehˇ dawˬ maˬ naˇ haˬ-ehˇ yaw haiˬ jeˬ mˇ naˇ, ngaˬ neh ehˇ-euˬ loꞈ-ehˇ ngaˇ maˬ mˇ ni byehˇ nya ma.

¹¹ Nymˬ-mˇ poˆ jawˇ-aˬ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Aˬ yawꞈ maꞈ-ahˇ ngaˇ kʼehˬ nehˬ kʼaˆ nehˬ-eu lehˇ lehˬ hmˬ taˬ-euˬ ma. Aˬ yawꞈ maꞈ-euˬ dehꞈ jeˬ dehꞈ kawˆ paˇ-awˇ, iˬ baˇ maˬ mˇ ni byehˇ-awˬ lehˇ ehˇ nehˬ-awˬ.

¹² Ehˇ kʼawꞈ, aˬ yawꞈ maꞈ heu loꞈ-ehˇ ehˇ tehꞈ-a. ‘Aˬ jeˬ miˇ neh nga maꞈ dehꞈ jeˬ dehꞈ kawˆ paˇ-eu loˬ ta. Nga maꞈ nui ma kʼaˇ gʼahˇ mawꞈ-eu gʼahˇ-awˇ, yaw haiˬ jeˬ mˇ mˇ-ehˇ dehꞈ ma’ lehˇ ehˇ tehꞈ-a.”

Sahˬpaˬ Miˬyehˇ-ahˇ byehˇ dzeh-eu

¹³ Sahˬpaˬ Miˬyehˇ ehˇ-eu, “Heu loꞈ-ehˇ gʼeh-eu gaˇ kawˆ gaˬ haw maˬ loˇ lehˇ, tsawˇ jeuˬ yawˬ jeuˬ na luꞈ-ahˇ naˇ haˬ sheˇ. Iˇsaˬleˬlaˆ tsawˇ haˬ deuˬ-aˬ, guˆ dui dui laˇ paˬ-ehˇ gʼeh-eu jeˬ mˇ-euˬ meh.

¹⁴ Leˬbaˬnoˬ gawˬ jawˬ-euˬ lo guˇ uˬ du, ngehˇ maˬ ga-eu yamˬ baw meh loˇ. Tsehꞈ ngeuˇ ni gʼeh-eu gawˬ jawˬ kʼoeˇ-ahˇ yoeˇ ka-eu, lawˇ gawˆ tsiˇ-iˇ-euˬ baw ta loˇ.

¹⁵ Ehˇ kʼawꞈ, ngaˬ-euˬ tsawˇ haˬ ngaˬ-ahˇ ngehˇ-awˇ, tahˬ pahˬ aˬ ma-ahˇ tsiˇ yaw saw doꞈ damˬ-euˬ meh. Aˬ yawꞈ maꞈ iˇ-eu gaˇ ma-ahˇ sahˬ tiꞈ tiꞈ-awˇ, gaˇ ma yaw oeˇ kahˇ-ahˇ maˬ paˇ cah-ehˇ, maˬ dzehꞈ dahˇ-euˬ gaˇ ma-ahˇcah-eu meh.

¹⁶ Miˇ kʼahˬ heu kʼahˬ tsawˇ haˬ maˬ jawˇ peuˬ ni aˬ yawꞈ maꞈ laˆ pyeuꞈ-awˇ, mˬ maˬ maˬ byaˆ zaˇ ziˇ aˬ cawˬ ja bu duˬ laˆ pyeuꞈ yaꞈ-euˬ meh. Kʼaˇ iˇ kʼaˇ laˇ tsehˆ-eu tsawˇ haˬ tsawˬ guˆ-iˇ-awˇ, zahˬ dui dui leˇ-awˇ uˬ duˬ juiꞈ tehꞈ-a.

¹⁷ Nahˇ ma doˆ kʼehˬ paw baw gʼeh leꞈ-euˬ jaˬ lehˇ neh, kʼaˬ lehˇ bi baw byoˆ-eu loꞈ-ehˇ, muiˇ-eu tsawˇ haˬ deuˬ-euˬ mehˬ shi, ngaˬ-euˬ tsawˇ haˬ deuˬ-ahˇ ngaˇ teh byaˆ ma. Aˬ yawꞈ maꞈ-ahˇ naˇ kʼah ciˬ pyawˇ nehˬ-awˇ, shaˬ dui zahˬ dui dui-eu jeˬ keuˆ le ngeh, ngehˬ maˬ gʼeh ni byehˇ dzeh nehˬ ma.

Yeˬlaˬmiˇ-ahˇ yaw doeˇ jahˇ-eu lehˇ gʼeh-eu

¹⁸ Aˬ yawꞈ maꞈ ehˇ-eu, “Yeˬlaˬmiˇ-ahˇ tiˬ jeˬ paˬ jahˇ nehˬ kaˇ-euˇ. Aˬ dui-ahˇ mehˬ nehˬ tsoˆ nehˬ laꞈ-eu gʼaˇ duˬ piˇ ma aˬ myah luꞈ jawˇ tehꞈ-a. Aˬ dui-ahˇ ja noeˬ ja duˇ nehˬ-eu gʼaˇ duˬ, zaˬ siˬ tsawˇ gahˇ byah-eu tsawˇ haˬ kʼawꞈ aˬ myah luꞈ jawˇ-awˇ, aˬ dui-ahˇ Miˬyehˇ gʼaˇ duˬ ngehˬ dah nehˬ laꞈ-eu tsawˇ haˬ kʼawꞈ, aˬ myah luꞈ jawˇ tehꞈ-a. Aˬ dui aˬ yawꞈ-ahˇ ceh-awˇ, aˬ yawꞈ ehˇ gaˇ maˬ naˇ haˬ nehˬ ni byehˇ kaˇ-euˇ.”

¹⁹ Kʼoeˇ miˇ neh ngaˇ heu loꞈ-ehˇ guiˬ lahˬ shaˇ-euˬ ma. “Sahˬpaˬ Miˬyehˇ ngaˬ-euˬ shaˇ dawˬ gaˬ-awˇ, ngaˬ-ahˇ muiˇ-eu deuˬ ehˇ luꞈ gaˇ naˇ haˬ nehˬ laꞈ.

²⁰ Yaw muiˬ jeˬ mˇ-eu yaw doeˇ oꞈ ta loˇ. Ngaˇ bi ga ahˇ-eu lehˇ aˬ yawꞈ maꞈ duˬ kʼahˬ kʼahˬ-euˬ meh. Nawˬ-euˬ nui pehˇ aˬ yawꞈ maꞈ kʼoeˇ taˆ maˬ bi keuˆ le-eu gʼaˇ duˬ, nawˬ-euˬ mehˬ shi ngaˇ yawꞈ laˇ-awˇ, aˬ yawꞈ maꞈ-euˬ dah zaˇ ngehˬ piˇ tmˇ piˇ-euˬ gaˇ, maˬ ngehˇ ni noeˬ keuˆ laꞈ.

²¹ Ehˇ kʼawꞈ, mehꞈ-eu shuꞈ-eu hawˇ-eu mi zaˬ mi cehˇ baˬ da, aˬ yawꞈ maꞈ-euˬ zaˬ deuˬ bi shiˇ jiˇ-awˬ. Kʼaˬ dzeˇ zaˬ deuˬ naˇ gawˇ gawˇ sehꞈ jiˇ-awˇ, zaˬ deuˬ mi zaˬ mi cehˇ laꞈ-ahˇ shiˇ-awˇ, zaˬ miˬ zaˬ deuˬ miˬ coeˬ bi coeˬ-iˇ-awˬ.

²² Ngaˇ bi ga ahˇ-eu gʼaˇ duˬ aˬ yawꞈ maꞈ duˬ kʼahˬ kʼahˬ taˬ-awˇ, ngaˬ-euˬ aˬ kuiˇ bi paꞈ leˇ-eu lahˇ ju kʼmˇ-euˬ miˇ neh, aˬ yawꞈ maꞈ-ahˇ deuˆ-eu guiˇ maꞈ nawˇ pyehˬ ahˇ-awˇ, aˬ yawꞈ maꞈ-euˬ nymˇ laꞈ kʼoeˇ ngoeˇ-eu jeˬ keuˆ le luꞈ-uˇ.

²³ Ehˇ kʼawꞈ, aˬ yawꞈ maꞈ ngaˬ-ahˇ sehꞈ-eu lehˇ gʼeh-eu gaˇ kawˆ, Sahˬpaˬ Miˬyehˇ nawˇ mawˇ jiˇ luꞈ-eu meh. Aˬ yawꞈ maꞈ-ahˇ iˬ baˇ maˬ pyehˬ nehˬ-ehˇ, aˬ yawꞈ maꞈ-euˬ yaw lehˬ taˬ byehˇ byoˆ nehˬ. Aˬ yawꞈ maꞈ-ahˇ aˬ cawˬ neh guiˇ bi deuˆ gʼaˬ-awˇ, nawˇ nui ma pehˇ ngeh aˬ yawꞈ maꞈ-ahˇ kʼehˬ nehˬ-awˬ.