Yeˬlaˬmiˇ 17 - Akha

Yuˇdaˆ tsawˇ haˬ-ahˇ kʼehˬ nehˬ kʼaˆ nehˬ-eu

¹ Sahˬpaˬ Miˬyehˇ ehˇ-eu, “Yuˇdaˆ tsawˇ haˬ deuˬ-oˇ, naw maꞈ-euˬ iˬ baˇ-ahˇ shmˇ sahˬ duˇ neh boꞈ taˬ-euˬ meh. Gʼahˇ dui dui-eu kʼaˬ lo sehˇ daˇ ceh neh naw maꞈ-euˬ nui ma-ahˇ kawˆ boꞈ taˬ-awˇ, naw maꞈ-euˬ lawˇ duˬ laꞈ coeˇ doe ni taꞈ boꞈ taˬ-euˬ meh.

² Aˬsheˇlaˬ miˬ yehˇ ma gʼaˇ duˬ kʼahˬ tuˇ taˬ-euˬ lawˇ duˬ deuˬ hawˇ-eu mawˇ kawˇ deuˬ-ahˇ, naw maꞈ-euˬ tsawˇ haˬ deuˬ uˬ duˬ tahˬ-eu meh. Mawˇ kawˇ kʼoeˇ deuˬ-ahˇ, aˇ paꞈ sahˇ-awˇ aˬ myah luꞈ nyoeˇ jawꞈ ni jaˆ-eu aˇ bawˇ dawˬ pehˬ kʼaˇ ngeuˇ gaˇ maˬ ehˇ, gawˬ duˇ uˬ du doe ni maˬ ehˇ,

³ deh ga-ahˇ jaˆ-eu gawˬ jawˬ deuˬ kʼoeˇ taˆ maˬ ehˇ, ka tuˇ gahˬ taˬ-euˬ meh. Naw maꞈ-euˬ miˇ kʼahˬ doe ni naw maꞈ neh mˇ byah taˬ-euˬ iˬ baˇ baˬ da neh, naw maꞈ-ahˇ muiˇ-eu deuˬ neh naw maꞈ-euˬ pyuˇ shuiˇ myawˬ gahˬ bi yuˇ geuꞈ jiˇ ma.

⁴ Ngaˬ neh naw maꞈ-ahˇ biꞈ taˬ-euˬ miˇ kʼahˬ naw maꞈ ya byehˇ dzeh-awˇ, maˬ siˬ maˬ suˇ-eu miˇ kʼahˬ laꞈ kʼoeˇ, naw maꞈ-ahˇ muiˇ-eu tsawˇ haˬ deuˬ neh kʼehˇ-euˬ gaˇ-ahˇ naw maꞈ ya mˇ tehꞈ-a. Aˬ jeˬ miˇ neh ehˇ naˇ, ngaˬ-euˬ nui pehˇ miˬ dzaˬ doꞈ gaˇ duˇ-awˇ, tiˬ jawˇ-iˬ maˬ miˆ-iˇ-a.”

Sahˬpaˬ Miˬyehˇ-euˬ dawˬ daˬ deuˬ

⁵ Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-ahˇ byehˇ dzeh yaꞈ-awˇ, maˬ gmˬ-eu tsawˇ haˬ-euˬ gʼaˬ-ahˇ gʼoe-awˇ, tsawˇ haˬ zaˬ-ahˇ nui jah ahˇ-eu gʼaˬ-ahˇ, ngaˇ yaˬ kʼehˇ yaˬ nehˬ ma.

⁶ Aˬ yawꞈ-euˬ guiˬ lahˬ-aˬ, aˇ bawˇ baw duˆ tiˬ jeˬ-iˬ maˬ dehꞈ-eu, miˇ tsaˬ saˬ deuꞈ kuiˇ-awˇ, gui coˇ ni gʼeh-eu bawˇ tsahˬ bawˇ dahˇ-ahˇ, kʼaˇ shuiꞈ shuiꞈ yaˇ kʼoeˇ taˆ dehꞈ-eu baw duˆ-ahˇ duˇ-eu meh. Aˬ yawꞈ gʼaˇ duˬ yaw muiˬ tiˬ jeˬ-iˬ maˬ jaˆ-a.

⁷ Ehˇ kʼawꞈ, ngaˬ-ahˇ gʼoe-eu gʼaˬ-ahˇ, ngaˇ guiˬ lahˬ biꞈ nehˬ ma.

⁸ Tsawˇ haˬ kʼoeˇ gʼaˬ yaw dehꞈ dehꞈ-eu jeˬ-aˬ, lawˇ gawˆ dawˬ peh dehꞈ-eu aˇ bawˇ, iˇ cuꞈ-ahˇ duˬ ciˇ toeˬ puꞈ-awˇ, aˇ paꞈ nyoeˇ jawꞈ ni jaˆ luꞈ-eu miˇ neh, jawˇ la yaw lahˇ-ahˇ maˬ guˆ-ehˇ, uˬ yehˇ-ahˇ kʼahˬ maˬ ya lahˇ ni, aˇ siˬ siˬ-eu maˬ tsehˆ leˇ-eu aˇ bawˇ-ahˇ duˇ-eu meh.

⁹ Tsawˇ haˬ zaˬ-euˬ nui ma aˬ suˇ gʼaˬ siˬ nya ta. Nui ma loꞈ-ehˇ laꞈ gʼoꞈ baw-eu tiˬ jeˬ-iˬ maˬ jaˆ-a. Yaw cawˆ myaˬ-eu miˇ neh maˬ laˆ muiˬ geuꞈ nya-a.

¹⁰ Sahˬpaˬ Miˬyehˇ pyeuꞈ-eu ngaˇ-aˬ, tsawˇ haˬ zaˬ-euˬ nui ma-ahˇ pyehˆ tseˇ-awˇ, yaw gʼoꞈ yaw dawˇ lawˬ haw-eu ma. Tsawˇ haˬ zaˬ-euˬ dehꞈ jeˬ dehꞈ kawˆ-ahˇ ngaˇ haw-awˇ, yawˬ gʼaˬ na luꞈ-ahˇ kʼaˇ oꞈ kʼaˇ geuˇ-eu loꞈ-ehˇ, yaw muiˬ yaw doeˇ guiˬ lahˬ ngaˇ biꞈ-eu ma.”

¹¹ Maˬ sui maˬ dawˇ-eu gaˇ ma-ahˇ gʼoe-awˇ, pyuˇ shuiˇ laˆ za-eu tsawˇ haˬ-aˬ, yawˬ ha maˬ ka taˬ-euˬ ya uˆ uˆ-eu, aˇ jiˇ tiˬ mawˇ-ahˇ duˇ-eu meh. Gʼaˬ kʼaˆ loˆ jaˆ luꞈ ngeh pyuˇ shuiˇ myawˬ gahˬ byoˆ le jiˇ-awˇ, aˇ saˬ saˬ ngeh aˬ dzawˬ dzawˬ-iˇ tehꞈ-a.

¹² Nga maꞈ-euˬ Uˬ duˬ tahˬ nymˇ nymˇ ma-aˬ, aˇ dahˬ beh ngeh neh gawˬ jawˬ yaw goˇ-ahˇ jaˆ-eu, kʼahˬ sehˇ huiˬ-eu nuiˇ mahˬ-ahˇ duˇ-eu meh.

¹³ Sahˬpaˬ Miˬyehˇ nawˇ Iˇsaˬleˬlaˆ-euˬ noeˬ tmˬ duˬ meh. Nawˬ-ahˇ kʼaˇ byehˇ dzeh-eu tsawˇ haˬ kʼoeˇ taˆ, shaꞈ dawˇ-eu jeˬ keuˆ le tehꞈ-a. Dehꞈ-eu saꞈ laˇ iˇ cuꞈ lawˇ kʼawꞈ pyeuꞈ-eu, Sahˬpaˬ Miˬyehˇ nawˬ-ahˇ aˬ yawꞈ maꞈ byehˇ dzeh-euˬ miˇ neh, kʼaˬ lehˇ kʼoeˇ taˆ boꞈ-euˬ tsawˇ myahˇ loꞈ-ehˇ, aˬ yawꞈ maꞈ byoˆ-iˇ jiˇ tehꞈ-a.

Caw ba nehˬ laꞈ lehˇ Sahˬpaˬ Miˬyehˇ-ahˇ Yeˬlaˬmiˇ shaˇ-eu

¹⁴ Sahˬpaˬ Miˬyehˇ-oˇ, ngaˬ-euˬ naˇ gawˇ-ahˇ laˆ saˆ nehˬ laꞈ-awˬ. Nawˇ laˆ saˆ nehˬ laꞈ naˇ, ngaˬ-euˬ naˇ gawˇ taˬ leˇ tehꞈ-a. Ngaˬ-ahˇ ka kʼoꞈ nehˬ laꞈ-awˬ. Nawˇ ka kʼoꞈ nehˬ laꞈ naˇ, ngaˇ ya buˬ ya law-iˇ tehꞈ-a. Nawˬ-euˬ guiˬ lahˬ-ahˇ ngaˇ ja ceuˬ-eu ma.

¹⁵ “Sahˬpaˬ Miˬyehˇ neh nga maꞈ-ahˇ ja guˆ-euˬ dawˬ kʼoeˇ deuˬ aˬ geu gaˇ iˇ jiˇ-euˬ ta. Nymˬ-mˇ bi keuˆ le-awˬ tawˇ” lehˇ, aˬ cawˬ ngaˬ-ahˇ ehˇ luꞈ meh.

¹⁶ Ehˇ kʼawꞈ ni Sahˬpaˬ Miˬyehˇ-oˇ, aˬ yawꞈ maꞈ kʼoeˇ taˆ shaˬ zahˬ bi keuˆ le-awˬ lehˇ nawˬ-ahˇ ngaˇ maˬ shaˇ-aˬ. Aˬ yawꞈ maꞈ-ahˇ shaˬ zahˬ laˆ naꞈ nehˬ mawꞈ-eu nui ma ngaˬ-euˬ laꞈ kʼoeˇ maˬ ahˇ-eu nawˇ siˬ nya meh. Ngaˬ neh kʼaˇ ngehˬ kʼaˇ tmˇ-euˬ jeˬ dawˬ tawˆ luꞈ nawˇ siˬ nya jiˇ meh.

¹⁷ Ngaˬ-ahˇ taˬ bi guˆ laꞈ. Guˆ-eu gaˆ-eu aˇ yamˬ laꞈ kʼoeˇ, ngaˬ-euˬ gʼoe duˬ nawˇ meh.

¹⁸ Ngaˬ-ahˇ kʼehˬ-eu tsawˇ haˬ deuˬ kʼoeˇ taˆ shaꞈ dawˇ-eu jeˬ bi keuˆ le-awˬ. Ehˇ kʼawꞈ, ngaˬ-ahˇ daˬ taˬ bi ga laꞈ. Aˬ yawꞈ maꞈ-ahˇ laˆ guˆ nehˬ-awˬ. Ehˇ kʼawꞈ, ngaˬ-euˬ kʼoeˇ taˆ guˆ-eu jeˬ taˬ bi keuˆ le laꞈ. Aˬ yawꞈ-euˬ kʼoeˇ taˆ shaˬ zahˬ guˆ gaˆ bi keuˆ le-awˇ, laˆ piˬ laˆ byoˆ nehˬ-awˬ.

Jawˇ nah-ahˇ lah-eu daw-eu

¹⁹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Yeˬlaˬmiˇ-oˇ, Yuˇdaˆ sahˬ paˬ deuˬ meuˬ-ahˇ iˇ doˆ laˇ doˆ ngeh cah tsehˆ duˬ pyeuꞈ-eu ‘Miˇ kʼahˬ zaˬ-euˬ lahˇ kʼehˬ’ lehˇ kuˇ-eu lahˇ kʼehˬ-ahˇ iˇ-awˇ, ngaˬ-euˬ dawˬ tsaꞈ gaˬ nehˬ-iˇ-awˬ. Kʼoeˇ naˇ, Yeˬluˇsaˬlehˬ meuˬ-euˬ lahˇ kʼehˬ yawˬ kʼehˬ na luꞈ-ahˇ iˇ doe-awˬ.

²⁰ Sahˬ paˬ deuˬ-ahˇ maˬ ehˇ, Yuˇdaˆ miˇ kʼahˬ zaˬ dawˬ tawˆ luꞈ-ahˇ maˬ ehˇ, Yeˬluˇsaˬlehˬ meuˬ-ahˇ kʼaˇ jawˇ-eu tsawˇ haˬ deuˬ-ahˇ maˬ ehˇ, lahˇ kʼehˬ kʼoeˇ deuˬ-ahˇ kʼaˇ uˇ laˇ-eu tsawˇ haˬ deuˬ-ahˇ maˬ ehˇ, ngaˬ neh ehˇ-euˬ dawˬ-ahˇ naˇ haˬ-awˬ lehˇ ehˇ nehˬ-awˬ.

²¹ Aˬ yawꞈ maꞈ maˬ shiˇ-ehˇ dehꞈ mawꞈ naˇ, jawˇ nah ngeh nah-ahˇ myawˬ ma ya baꞈ maˬ ya pi-a lehˇ ehˇ nehˬ-awˬ. Jawˇ nah ngeh nah-ahˇ Yeˬluˇsaˬlehˬ meuˬ-euˬ lahˇ kʼehˬ deuˬ-ahˇ neh myawˬ maˬ ya sha ahˇ-a.

²² Jawˇ nah ngeh nah-ahˇ, yawˬ ha-euˬ nymˇ laꞈ kʼoeˇ jaˆ-eu myawˬ maˬ ya sha doˆ-a. Gaˇ maˬ ya mˇ-a. Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh dawˬ biꞈ taˬ-eu loꞈ-ehˇ, aˇ nah kʼoeˇ nah-ahˇ nah muiˬ nah shawˇ loꞈ-ehˇ ya lah ya daw meh.

²³ Aˬ yawꞈ maꞈ-euˬ aˬ poeˬ aˬ bawˇ deuˬ ngaˬ-euˬ ehˇ dawˬ-ahˇ maˬ taˬ huiˬ-ehˇ maˬ naˇ haˬ geuꞈ-eu uˬ taꞈ, nui ma gʼahˇ dui dui-awˇ, ngaˬ neh mehˬ nehˬ-euˬ dawˬ naˬ bawˇ-ahˇ maˬ gaˬ leˇ-ehˇ, ngaˬ-euˬ zahˇ sahˇ kʼoꞈ-ahˇ maˬ dzaw geuꞈ-a.

²⁴ “Ngaˬ-euˬ dawˬ deuˬ-ahˇ ya naˇ haˬ geuꞈ meh lehˇ, tsawˇ haˬ kʼoeˇ deuˬ-ahˇ ehˇ nehˬ-awˬ. Jawˇ nah ngeh nah-ahˇ, lahˇ kʼehˬ heu deuˬ-ahˇ neh meuˬ laꞈ kʼoeˇ myawˬ maˬ ya sha ahˇ-a. Jawˇ nah ngeh nah-ahˇ, nah muiˬ nah shawˇ aˇ nah loꞈ-ehˇ aˬ yawꞈ maꞈ ya lah ya daw-awˇ, gaˇ aˬ geu jeˬ maˬ kaˬ, maˬ ya mˇ-a.

²⁵ Kʼoeˇ loꞈ-ehˇ jahˇ naˇ, aˬ yawꞈ maꞈ sahˬ paˬ sahˬ ma deuˬ meuˬ-euˬ lahˇ kʼehˬ kʼoeˇ deuˬ laꞈ kʼoeˇ uˇ laˇ-awˇ, sahˬ paˬ Daˬbiˇ dzoeˬ dzaˬ ngeh loꞈ-ehˇ, baoˬ huiˬ tehꞈ-a. Yuˇdaˆ miˇ kʼahˬ zaˬ deuˬ hawˇ-eu Yeˬluˇsaˬlehˬ meuˬ laꞈ kʼoeˇ jawˇ-eu tsawˇ haˬ deuˬ nehˬ-ehˇ tiˬ kawˆ loꞈ-ehˇ, mahˬ laˆ lawˬ hawˇ-eu mahˬ deuˬ kʼoeˇ taˆ aˬ yawꞈ maꞈ dziˬ-awˇ, Yeˬluˇsaˬlehˬ meuˬ laꞈ kʼoeˇ, aˬ myah luꞈ tsawˇ haˬ tiˬ byah ni jawˇ tehꞈ-a.

²⁶ Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ jawˇ-eu tsawˇ haˬ deuˬ hawˇ-eu, Yeˬluˇsaˬlehˬ meuˬ-euˬ jawˬ jawˬ-ehˇ jawˇ-eu tsawˇ haˬ deuˬ laˇ tehꞈ-a. Beˬyaˬmiˬ miˇ kʼahˬ-ahˇ neh maˬ ehˇ, gawˬ jawˬ dawˬ dahˬ-ahˇ neh maˬ ehˇ, gawˬ jawˬ gawˬ duˇ-ahˇ neh maˬ ehˇ, Yuˇdaˆ miˇ kʼahˬ laꞈ oˆ dzaˬ-ahˇ neh maˬ ehˇ, aˬ yawꞈ maꞈ laˇ tehꞈ-a. Miˬ dzaˬ dzah puiˆ-awˇ, lawˇ-eu jeˬ maˬ ehˇ, lawˇ-eu shehˇ-eu nui jeˬ maˬ ehˇ, dzaˬ la gʼo cehˇ lawˇ-eu jeˬ maˬ ehˇ, tsiˇ yaw saw lawˇ-eu jeˬ maˬ ehˇ, guiˬ lahˬ-ahˇ noeˬ keuˆ-eu lawˇ-eu jeˬ maˬ ehˇ, ngaˬ-euˬ Uˬ duˬ tahˬ nymˇ nymˇ ma-ahˇ aˬ yawꞈ maꞈ yuˇ laꞈ tehꞈ-a.

²⁷ Ehˇ kʼawꞈ, aˬ yawꞈ maꞈ ngaˬ-euˬ ehˇ dawˬ ya naˇ haˬ-awˇ, jawˇ nah-ahˇ nah muiˬ nah shawˇ aˇ nah loꞈ-ehˇ ya lah ya daw tehꞈ-a. Jawˇ nah ngeh nah-ahˇ Yeˬluˇsaˬlehˬ meuˬ-euˬ lahˇ kʼehˬ deuˬ laꞈ kʼoeˇ myawˬ sha doˆ sha ahˇ-eu jeˬ maˬ ya mˇ-a. Aˬ yawꞈ maꞈ kʼoeˇ loꞈ-ehˇ jahˇ naˇ, Yeˬluˇsaˬlehˬ meuˬ-euˬ lahˇ kʼehˬ deuˬ-ahˇ ngaˇ miˬ dzaˬ keuˬ dzeh-awˇ, miˬ dzaˬ kʼoeˇ Yeˬluˇsaˬlehˬ meuˬ laꞈ kʼoeˇ jaˆ-eu sahˬ paˬ-euˬ nymˇ deuˬ-ahˇ puiˆ-awˇ, tiˬ gʼaˬ-iˬ maˬ laˆ miˇ nya ni puiˆ dzaˬ jiˇ tehꞈ-a.”