Biblia Todo Logo
Bìoball air-loidhne

- Sanasan -

Yeˬlaˬmiˇ 16 - Akha


Yeˬlaˬmiˇ gʼaˇ duˬ Sahˬpaˬ Miˬyehˇ-euˬ nui kʼahˇ

1 Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

2 “Heu loꞈ-ehˇ gʼeh-eu miˇ kʼahˬ laꞈ kʼoeˇ, nawˇ cawˬ maˬ ya shaˇ baw-ehˇ, zaˬ maˬ ya bi jawˇ-a.

3 Heu gaˇ dehꞈ le-euˬ aˬ buˇ aˬ li deuˬ hawˇ-eu aˬ ma aˬ da deuˬ kʼoeˇ taˆ, aˬ jeˬ keuˆ le-eu lehˇ gʼeh-eu gaˇ kawˆ ngaˇ nawˬ-ahˇ ehˇ nehˬ nyaˇ.

4 Guˆ dui dui laˇ paˬ-ehˇ gʼeh-eu naˇ gawˇ baˬ da neh aˬ yawꞈ maꞈ ya shiˇ-awˇ, aˬ yawꞈ maꞈ gʼaˇ duˬ tsawˇ ngoeˇ ngoeˇ nehˬ-awˇ, baꞈ pahˬ nehˬ-eu tsawˇ haˬ maˬ jawˇ ni pyeuꞈ laˇ tehꞈ-a. Aˬ nyoˬ mawˇ neˇ-euˬ keˬ tawˆ bymˇ taˬ-euˬ loꞈ-ehˇ, aˬ yawꞈ maꞈ miˇ tsa shiˇ uiˬ taˬ-awˇ ga tehꞈ-a. Guiˇ deuˆ-eu laꞈ kʼoeˇ maˬ ehˇ, mehꞈ-eu shuꞈ-eu baˬ da neh maˬ ehˇ, aˬ yawꞈ maꞈ ya shiˇ-awˇ, aˇ jiˇ hawˇ-eu bawˇ tsahˬ jeˬ zaˬ deuˬ aˬ yawꞈ maꞈ-ahˇ dzaˬ tehꞈ-a.

5 “Shiˇ-euˬ tsawˇ haˬ deuˬ gʼaˇ duˬ tsawˇ ngoeˇ ngoeˇ-eu nymˇ jiˇ laꞈ kʼoeˇ nawˇ taˬ uˇ leˇ. Aˬ cawˬ gʼaˇ duˬ nui ma shaˬ zahˬ taˬ mˇ. Ngaˬ-euˬ tsawˇ haˬ deuˬ-ahˇ ngaˇ nui saˇ oꞈ-eu guiˬ lahˬ maˬ paˇ biꞈ-ehˇ, gʼoeˇ-eu gaˬ-eu jeˬ hawˇ-eu gʼawˬ shaˬ gaˬ-eu jeˬ maˬ paˇ bi mawˇ ma.

6 Miˇ kʼahˬ heu kʼahˬ laꞈ kʼoeˇ jawˇ-eu smˇ muiˬ iˇ shaˬ dawˬ tawˆ luꞈ ya shiˇ-awˇ, baꞈ pahˬ nehˬ-eu gʼaˬ maˬ jawˇ-ehˇ, tsawˇ ngoeˇ ngoeˇ nehˬ-eu gʼaˬ kʼawꞈ maˬ jawˇ ni pyeuꞈ-iˇ tehꞈ-a. Yawˬ ha-euˬ gʼawˇ mawˇ laˆ tahˬ laˆ naˇ-eu jeˬ mˇ-eu laꞈ kʼoeˇ maˬ ehˇ, uˬ duˬ jehˆ dzeh-eu laꞈ kʼoeˇ maˬ ehˇ, noeˬ shaˬ dui dui-eu gaˇ kawˆ bi siˬ bi mawˇ-eu tsawˇ haˬ maˬ jawˇ-ehˇ pyeuꞈ-iˇ tehꞈ-a.

7 Gaˬ-eu gʼoeˇ-eu tsawˇ haˬ tiˬ gʼaˬ na shiˇ-euˬ kʼawꞈ, dzaˬ taꞈ dawˇ taꞈ-awˇ, gʼaˬ biꞈ-eu gʼaˬ maˬ jawˇ-ehˇ pyeuꞈ-iˇ tehꞈ-a. Aˬ ma aˬ da bi shiˇ-euˬ tsawˇ haˬ nehˬ-ehˇ kʼawꞈ, jawˇ cawˬ cawˬ nehˬ-eu tiˬ gʼaˬ-iˬ maˬ jawˇ ni pyeuꞈ-iˇ tehꞈ-a.

8 “Bawˬ-iˬ gʼeh luꞈ-eu nymˇ jiˇ laꞈ kʼoeˇ nawˇ taˬ uˇ leˇ. Aˬ yawꞈ maꞈ nehˬ-ehˇ ga nuiˇ leˇ-awˇ taˬ dzaˬ taˬ dawˇ taꞈ.

9 Baoˬ huiˬ-eu Sahˬpaˬ Miˬyehˇ Iˇsaˬleˬlaˆ-euˬ Miˬyehˇ pyeuꞈ-eu ngaˇ ehˇ gaˇ naˇ haˬ sheˇ. Laˬ kʼaˬ cehˇ-awˇ byawˬ gʼa muˆ gʼa-eu teˇ saˇ deuˬ hawˇ-eu, oeˇ mˇ baˇ gaˇ cehˇ gʼa-eu teˇ saˇ deuˬ-ahˇ, ngaˇ ciˬ cuˇ ni bi pyeuꞈ-iˇ ma. Heu gaˇ jawˇ-eu tsawˇ haˬ deuˬ kʼoeˇ loꞈ-ehˇ pyeuꞈ laˇ gaˇ ya mawˇ tehꞈ-a.

10 “Gaˇ kawˆ heu deuˬ dawˬ tawˆ luꞈ aˬ yawꞈ maꞈ-ahˇ nawˇ ja nehˬ ngeh, aˬ jeˬ miˇ neh aˬ yawꞈ maꞈ-ahˇ kʼoeˇ naˆ naˆ-ehˇ kʼehˬ nehˬ-eu gʼaˇ duˬ ngaˇ noeˬ tsehˆ taˬ-eu ta lehˇ, aˬ yawꞈ maꞈ nawˬ-ahˇ naˇ haˬ laˇ tehꞈ-a. Aˬ yawꞈ maꞈ iˬ baˇ mˇ taˬ-euˬ aˬ jeˬ jaˆ-awˇ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ maꞈ neh mˇ bahˬ taˬ-euˬ aˬ jeˬ jaˆ ta lehˇ naˇ haˬ laˇ tehꞈ-a.

11 Kʼoeˇ naˇ, Sahˬpaˬ Miˬyehˇ heu loꞈ-ehˇ ehˇ-eu meh lehˇ aˬ yawꞈ maꞈ-ahˇ ehˇ nehˬ-awˬ. Naw maꞈ-euˬ aˬ poeˬ aˬ bawˇ deuˬ ngaˬ-ahˇ byehˇ dzeh yaꞈ-awˇ, miˬ yehˇ nui deuˬ-ahˇ uˬ duˬ tahˬ-awˇ, miˬ yehˇ kʼoeˇ deuˬ-euˬ nui kʼahˇ mˇ-euˬ meh. Aˬ yawꞈ maꞈ ngaˬ-ahˇ byehˇ-awˇ, ngaˬ neh mehˬ nehˬ tsoˆ nehˬ-euˬ dawˬ deuˬ-ahˇ maˬ naˇ haˬ geuꞈ-a.

12 Ehˇ kʼawꞈ, naw maꞈ-aˬ, naw maꞈ-euˬ aˬ poeˬ aˬ bawˇ kʼoeˇ deuˬ naˆ maˬ tseˇ dehꞈ doeˇ-euˬ meh. Naw maꞈ dawˬ tawˆ luꞈ nui ma gʼahˇ dui dui-awˇ, yaw haiˬ jeˬ mˇ-eu laꞈ kʼoeˇ, ngaˬ-euˬ ehˇ dawˬ maˬ naˇ haˬ geuꞈ-a.

13 Kʼoeˇ miˇ neh miˇ kʼahˬ heu kʼahˬ laꞈ kʼoeˇ neh naw maꞈ-ahˇ ngaˇ biˬ doˆ-awˇ, naw maꞈ-euˬ aˬ poeˬ aˬ bawˇ deuˬ kʼawꞈ maˬ gaˬ haw-ehˇ, naw maꞈ kʼawꞈ maˬ gaˬ haw-euˬ miˇ kʼahˬ laꞈ kʼoeˇ biˬ ahˇ nehˬ ma. Kʼoeˇ gaˇ uˬ ciꞈ nah gʼahˇ maˬ ehˇ miˬ yehˇ nui deuˬ-euˬ nui kʼahˇ naw maꞈ ya mˇ byah-awˇ, naw maꞈ-ahˇ ngaˇ gʼawˬ shaˬ maˬ gaˬ nehˬ lehˇ ehˇ-eu meh lehˇ ehˇ nehˬ-awˬ.”


Aˬ cawˬ miˇ kʼahˬ-ahˇ neh ya gʼoꞈ doˆ laˇ-eu

14 Sahˬpaˬ Miˬyehˇ ehˇ-eu, “Aˬ yawꞈ maꞈ saˇ jaˇ dzaˬ ngeh, ‘Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ dehꞈ luꞈ-eu Miˬyehˇ-euˬ tsawˇ myahˇ uˬ moˆ kamˬ-eu ma’ lehˇ maˬ paˇ ehˇ ni byehˇ-eu aˇ nah keuˆ le tehꞈ-a.

15 Aˬ yawꞈ maꞈ saˇ jaˇ dzaˬ-awˇ kamˬ ngeh, ‘Iˇsaˬleˬlaˆ tsawˇ haˬ deuˬ-ahˇ laꞈ taˆ paw jaˆ-eu miˇ kʼahˬ-ahˇ neh sheuˬ doˆ nehˬ leꞈ-euˬ gʼaˬ pyeuꞈ-eu dehꞈ luꞈ-eu Miˬyehˇ-euˬ tsawˇ myahˇ uˬ moˆ’ lehˇ ya ehˇ paˇ-awˇ, ‘Aˬ yawꞈ maꞈ-ahˇ kʼaˇ teh byaˆ nehˬ-euˬ miˇ kʼahˬ deuˬ-ahˇ neh sheuˬ doˆ nehˬ leꞈ-euˬ gʼaˬ pyeuꞈ-eu dehꞈ luꞈ-eu Miˬyehˇ-euˬ tsawˇ myahˇ uˬ moˆ kamˬ-eu ma’ lehˇ ya ehˇ paˇ-eu aˇ nah keuˆ le tehꞈ-a. Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ taˬ-euˬ miˇ kʼahˬ pyeuꞈ-eu aˬ yawꞈ maꞈ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˇ sheuˬ kʼoꞈ keuˆ nehˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”


Kʼehˬ-eu kʼaˆ-eu jeˬ keuˆ le luꞈ-eu

16 Sahˬpaˬ Miˬyehˇ ehˇ-eu, “Ngaˬ shaˬ nyehꞈ-eu tsawˇ haˬ gʼawˬ mya ni ngaˇ pyehˬ gʼeh leꞈ-awˇ, tsawˇ haˬ heu deuˬ-ahˇ ngaˇ bi nyehꞈ ma. Kʼoeˇ naˇ, shaˬ teh teh-eu tsawˇ haˬ gʼawˬ mya ni paˇ pyehˬ gʼeh leꞈ-awˇ, gawˬ jawˬ gawˬ duˇ lo kʼahˬ lo guˇ doe ni aˬ yawꞈ maꞈ-ahˇ ngaˇ bi teh ma.

17 Aˬ yawꞈ maꞈ kʼaˇ mˇ kʼaˇ shaˇ-eu jeˬ ngaˇ mawˇ luꞈ ma. Ngaˬ-euˬ mehˬ shi zaꞈ taˬ-euˬ tiˬ jeˬ-iˬ maˬ jaˆ. Ngaˇ maˬ mawˇ ni aˬ yawꞈ maꞈ iˬ baˇ maˬ mˇ dzeuˇ nya-a.

18 Shiˇ taˬ-euˬ tsawˇ haˬ loꞈ-ehˇ saꞈ maˬ gʼawˇ nya-eu tahˬ pahˬ aˬ ma mawˇ kawˇ deuˬ neh ngaˬ-euˬ miˇ kʼahˬ-ahˇ aˬ yawꞈ maꞈ laˆ jawꞈ-awˇ, maˬ ngeuˇ-eu miˬ yehˇ deuˬ hehˇ byah leꞈ taˬ-euˬ miˇ neh, aˬ yawꞈ maꞈ neh mˇ-euˬ iˬ baˇ aˇ poeˬ aˬ yawꞈ maꞈ-ahˇ ngaˇ nyiˬ bymˇ paˇ kʼehˬ poˆ nehˬ ma.”


Yeˬlaˬmiˇ Sahˬpaˬ Miˬyehˇ-ahˇ gʼaˬ huiˬ-eu

19 Sahˬpaˬ Miˬyehˇ-oˇ, ngaˬ-ahˇ haw piˇ-awˇ gʼaˬ biꞈ nehˬ laꞈ-eu gʼaˬ nawˇ meh. Shaˬ-eu zahˬ-eu aˇ yamˬ laꞈ kʼoeˇ, nawˇ ngaˬ-ahˇ ngehˬ gʼeh dah teˬ nehˬ laꞈ-euˬ meh. Miˇ tsaˬ tsawˇ jeuˬ deuˬ mˬ dzeˇ miˇ dzeˇ-ahˇ neh nawˇ jawˇ gaˇ laˇ-awˇ, heu loꞈ-ehˇ ehˇ tehꞈ-a. “Nga maꞈ-euˬ aˬ poeˬ aˬ bawˇ deuˬ-aˬ, maˬ ngeuˇ-eu miˬ yehˇ deuˬ-ahˇ tehꞈ-ehˇ gʼoe-awˇ, gaˇ dahˇ maˬ tsoeˬ-eu tahˬ pahˬ aˬ ma mawˇ kawˇ deuˬ-ahˇ tehꞈ-ehˇ jah-euˬ meh.

20 Tsawˇ haˬ zaˬ yawˬ ha-euˬ miˬ yehˇ tehˆ nya ta loˇ. Maˬ tehˆ nya-aˇ. Paˇ tehˆ nya lawˬ naˇ kʼawꞈ, miˬ yehˇ maˇ maˇ ni maˬ paˇ ngeuˇ-aˇ.”

21 Kʼoeˇ miˇ neh, Sahˬpaˬ Miˬyehˇ ehˇ-euˬ, “Mˬ maˬ maˬ byaˆ zaˇ ziˇ maˬ ngehˇ leˇ coeˇ ni, tsawˇ jeuˬ kʼoeˇ deuˬ-ahˇ ngaˬ-euˬ baoˬ ngaˇ bi mawˇ ma. Ngaˇ Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ ya siˬ du tehꞈ-a.”

Akha Bible Revision (Latin Script) © Thailand Bible Society, 2011.

Thailand Bible Society
Lean sinn:



Sanasan