Yeˬlaˬmiˇ 15 - Akha

Yuˇdaˆ tsawˇ haˬ shaˬ zahˬ ya naꞈ tehꞈ-a

¹ Sahˬpaˬ Miˬyehˇ ngaˬ-ahˇ ehˇ-eu, “Moˇseˬ hawˇ-eu Saˬmeuˬlaˆ aˬ ha nyaꞈ ngaˬ-euˬ mehˬ shi yawꞈ laˇ-awˇ shaˇ ju kʼawꞈ, tsawˇ haˬ heu deuˬ-ahˇ ngaˇ gʼawˬ shaˬ maˬ gaˬ. Ngaˇ mawˇ gaˇ aˬ yawꞈ maꞈ maˬ bi jawˇ ni, gaˇ mahˇ kaˬ gaˇ bi iˇ byoˆ-awˬ.

² Aˬ geu paw ya iˇ byoˆ nmˇ lehˇ, aˬ yawꞈ maꞈ nawˬ-ahˇ naˇ haˬ ngeh, tiˬ paˆ na deuˬ naˇ-awˇ shiˇ gaˇ maˬ ehˇ, tiˬ paˆ na deuˬ guiˇ deuˆ-awˇ ya shiˇ gaˇ maˬ ehˇ, tiˬ paˆ na deuˬ hawˬ mehꞈ ya dzahˬ sehꞈ gaˇ maˬ ehˇ, tiˬ paˆ na deuˬ aˬ cawˬ bi paꞈ gʼeh gaˇ maˬ ehˇ, ya daˬ meh lehˇ ngaˬ neh ehˇ taˬ-euˬ dawˬ, aˬ yawꞈ maꞈ-ahˇ nawˇ ehˇ nehˬ-awˬ.

³ Guˆ dui dui laˇ paˬ-ehˇ gʼeh-eu oeˬ jeˬ, aˬ yawꞈ maꞈ-euˬ kʼoeˇ taˆ bi keuˆ le-eu gʼaˇ duˬ, Sahˬpaˬ Miˬyehˇ pyeuꞈ-eu ngaˇ noeˬ tsehˆ taˬ-euˬ ma. Aˬ yawꞈ maꞈ guiˇ deuˆ gaˇ bi sehꞈ tehꞈ-a. Aˬ yawꞈ-euˬ gʼawˇ mawˇ-ahˇ aˬ kuiˬ baꞈ tehꞈ-a. Aˇ jiˇ deuˬ aˬ yawꞈ maꞈ-ahˇ toˆ dzaˬ-awˇ, dzeˇ-eu deuˬ-ahˇ bawˇ tsahˬ jeˬ zaˬ deuˬ dzaˬ tehꞈ-a.

⁴ Maˬnaˇseˬ-euˬ aˬ li Heˬsaˬgiˇ gʼaˬ Yuˇdaˆ miˇ kʼahˬ-ahˇ uˆ lahˇ ngeh, Yeˬluˇsaˬlehˬ meuˬ-ahˇ aˬ yawꞈ neh mˇ yaꞈ-eu jeˬ baˬ da neh, miˇ tsaˬ kʼoeˇ taˆ jawˇ-eu tsawˇ haˬ dawˬ tawˆ luꞈ guˆ-iˇ ni, aˬ yawꞈ maꞈ-ahˇ ngaˇ jahˇ nehˬ ma.”

⁵ Sahˬpaˬ Miˬyehˇ ehˇ-eu , “Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ-ahˇ gʼawˬ shaˬ gaˬ nehˬ-eu aˬ suˇ jawˇ nmˇ. Naw maꞈ-ahˇ shaˬ zahˬ caw mˇ-eu aˬ suˇ jawˇ nmˇ. Naw maꞈ jawˇ gaˇ naˬ le-awˇ haw nehˬ-eu aˬ suˇ jawˇ nmˇ.

⁶ Naw maꞈ ngaˬ-ahˇ byehˇ dzeh-euˬ meh. Naw maꞈ ngaˬ-ahˇ naˇ kʼah ciˬ pyawˇ nehˬ laꞈ-euˬ meh. Kʼoeˇ baˬ da neh ngaˇ nui ma pehˇ-eu maˬ dzahˬ tehˬ coeˇ-ehˇ, ngaˬ-euˬ aˬ laꞈ cawˬ doˆ leꞈ-awˇ, naw maꞈ-ahˇ baꞈ deh leꞈ-euˬ ma.

⁷ Miˇ kʼahˬ heu kʼahˬ-ahˇ kʼaˇ jaˆ-eu meuˬ deuˬ laꞈ kʼoeˇ, gʼo yoeˬ loꞈ-ehˇ jaˬ lehˇ baw gaˇ naw maꞈ-ahˇ ngaˇ dzeh diˇ-euˬ ma. Ngaˬ-euˬ tsawˇ haˬ deuˬ-oˇ, naw maꞈ yaw haiˬ jeˬ maˬ byehˇ-eu miˇ neh, naw maꞈ-ahˇ ngaˇ laˆ luˬ laˆ seˇ nehˬ-awˇ, naw maꞈ-euˬ zaˬ deuˬ-ahˇ ngaˇ sehꞈ-euˬ ma.

⁸ Laˆ shaˆ lawˇ deh jaˆ-eu kʼaˇ shuiꞈ maˬ tseˇ, naw maꞈ miˇ kʼahˬ miˬ coeˬ miˬ ma myaˬ meh. Loˆ laˇ-euˬ zaˬ yo deuˬ-ahˇ ngaˇ sehꞈ-awˇ, aˬ ma deuˬ-ahˇ shaˬ zahˬ bi naꞈ-euˬ ma. Guˆ dui dui-iˇ-awˇ laˇ baˇ-iˇ paˬ-ehˇ, aˬ yawꞈ maꞈ kʼoeˇ taˆ ngaˇ shaˆ shiˇ pyehˬ gʼeh-euˬ ma.

⁹ Zaˬ shiꞈ gʼaˬ bi shiˇ-euˬ aˬ ma saꞈ saꞈ ma gʼawˇ daˆ-eu meh. Aˬ yawꞈ gʼaˇ duˬ nah gʼahˇ uˬ ciꞈ loꞈ-ehˇ zahˇ-awˇ, nui ma shaˬ zahˬ maˬ pi coeˇ-a. Naw maꞈ maˬ shiˇ dzeuˇ-ehˇ kʼaˇ dehꞈ-eu deuˬ, muiˇ-eu deuˬ neh bi sehꞈ ma lehˇ, Sahˬpaˬ Miˬyehˇ pyeuꞈ-eu ngaˬ neh ehˇ taˬ-euˬ jaˆ-eu ma.”

Sahˬpaˬ Miˬyehˇ-ahˇ Yeˬlaˬmiˇ shaˇ ju-eu

¹⁰ Ngaˇ yaw dehꞈ dehꞈ-eu nui saˇ tiˬ pawꞈ-iˬ maˬ oꞈ miˇ-a. Aˬ jeˬ miˇ neh ngaˬ ma ngaˬ-ahˇ miˇ tsaˬ kʼoeˇ taˆ bi dehꞈ le-euˬ maˬ siˬ miˇ-a. Miˇ kʼahˬ heu kʼahˬ-ahˇ kʼaˇ jawˇ-eu tsawˇ haˬ yawˬ gʼaˬ na luꞈ nehˬ-ehˇ ngaˇ ya ceh-awˇ, ya ja dzaˬ luꞈ-eu ma. Ngaˇ aˬ cawˬ-euˬ pyuˇ maˬ shaˇ paˇ-ehˇ, aˬ cawˬ-ahˇ pyuˇ maˬ paˇ nehˬ kʼawꞈ, yawˬ gʼaˬ na luꞈ ngaˬ-ahˇ yaˬ kʼehˇ yaˬ-eu meh.

¹¹ Sahˬpaˬ Miˬyehˇ-oˇ, nawˬ-euˬ nui kʼahˇ ngaˇ maˬ mˇ byah-ehˇ, ngaˬ-ahˇ muiˇ-eu deuˬ kʼoeˇ taˆ shaˬ-eu zahˬ-eu jeˬ keuˆ le ngeh, aˬ yawꞈ maꞈ-euˬ dah zaˇ ngaˇ nawˬ-ahˇ maˬ shaˇ ju-euˬ ngeuˇ naˇ, aˬ yawꞈ maꞈ neh yaˬ kʼehˇ kʼaˇ yaˬ-euˬ jeˬ ngaˬ-euˬ kʼoeˇ taˆ keuˆ le luꞈ-uˇ.

¹² (Tsawˇ haˬ tiˬ gʼaˬ-iˬ shmˇ shmˇ kahˬ maˬ ngawˬ kʼehꞈ nya-a. Laꞈ taˆ paw kʼahˬ-ahˇ jaˆ-eu guiˬ shuiˇ keuˬ-eu shmˇ shmˇ kahˬ ngawˬ kʼehꞈ-eu-aˬ, kʼoeˇ naˆ maˬ tseˇ kʼaˆ dzehˬ-eu meh.)

¹³ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Miˇ kʼahˬ heu kʼahˬ doe ni ngaˬ-euˬ tsawˇ haˬ deuˬ iˬ baˇ mˇ byah taˬ-euˬ miˇ neh, aˬ yawꞈ maꞈ-ahˇ ngaˇ kʼehˬ nehˬ-eu laꞈ kʼoeˇ, muiˇ-eu deuˬ-ahˇ ngaˇ pyehˬ gʼeh leꞈ-awˇ, aˬ yawꞈ maꞈ-euˬ pyuˇ shuiˆ myawˬ gahˬ deuˬ bi pi geuꞈ jiˇ ma.

¹⁴ Ngaˬ-euˬ nui pehˇ miˬ dzaˬ-ahˇ duˇ-awˇ, tiˬ jawˇ-iˬ maˬ miˆ-iˇ ni doꞈ-eu miˇ neh, maˬ siˬ maˬ suˇ-eu miˇ kʼahˬ laꞈ kʼoeˇ, aˬ yawꞈ maꞈ-ahˇ muiˇ-eu tsawˇ haˬ deuˬ neh kʼehˇ-euˬ gaˇ bi mˇ ma.”

¹⁵ Kʼoeˇ ngeh, ngaˇ heu loꞈ-ehˇ ehˇ-euˬ ma. “Sahˬpaˬ Miˬyehˇ-oˇ, nawˇ siˬ nya luꞈ meh. Ngaˬ-ahˇ noeˬ keuˆ-awˇ caw ba nehˬ laꞈ-awˬ. Ngaˬ-ahˇ kʼehˬ nehˬ kʼaˆ nehˬ laꞈ-euˬ tsawˇ haˬ deuˬ kʼoeˇ taˆ, laꞈ poˆ bi poˆ kʼoꞈ nehˬ laꞈ-awˬ. Ngaˬ-ahˇ bi sehꞈ laˇ gaˇ keuˆ ni, aˬ yawꞈ maꞈ-ahˇ nawˇ taˬ oˇ oꞈ nehˬ. Nawˬ-euˬ gʼaˇ duˬ ngaˇ dawˬ doeˇ ya daˬ luꞈ gaˇ taˬ ngehˇ nehˬ laꞈ.

¹⁶ Nawˇ ngaˬ-ahˇ dawˬ ngehˬ cawˬ le ngeh, yawˬ dawˬ na luꞈ ngaˇ naˇ haˬ-euˬ ma. Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ-oˇ, ngaˇ nawˬ-euˬ zaˬ pyeuꞈ-awˇ, nawˬ-euˬ dawˬ baˬ da neh ngaˬ-euˬ nui ma laꞈ kʼoeˇ laˬ kʼaˬ cehˇ-eu jeˬ byah-eu ma.

¹⁷ Ngaˇ aˬ cawˬ nehˬ-ehˇ uiˇ uiˇ-ehˇ laˬ kʼaˬ cehˇ-eu laꞈ kʼoeˇ, aˇ yamˬ maˬ bi jiˇ haw-aˬ. Nawˬ-euˬ dawˬ-ahˇ naˇ haˬ geuꞈ-eu laꞈ kʼoeˇ yawˬ haˇ yawˬ ha jawˇ-awˇ, nui ma pehˇ pehˇ-ehˇ shaˬ-euˬ ma. Aˬ jeˬ miˇ neh ngaˬ-euˬ shaˬ zahˬ maˬ jiˇ ta.

¹⁸ Aˬ jeˬ miˇ neh ngaˬ-euˬ naˇ gawˇ taˬ leˇ-euˬ maˬ baw ta. Jawˇ la yamˬ-ahˇ gui-iˇ-eu lawˇ gawˆ loꞈ-ehˇ, nawˇ ngaˬ-ahˇ bi shaˬ-eu gʼeh te loˇ.”

¹⁹ Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ-eu meh. “Nawˇ ngaˇ jawˇ gaˇ gʼoꞈ kʼoꞈ laˇ naˇ, nawˬ-ahˇ ngaˇ paˇ ha geuꞈ-awˇ, ngaˬ-euˬ gaˇ paˇ bi mˇ ma. Gaˇ dahˇ maˬ tsoeˬ-eu dawˬ ngehˬ ngehˬ-ehˇ maˬ jawˇ ni, aˇ poeˬ kʼaˆ-eu dawˬ ngehˬ paˇ naˇ, ngaˬ-euˬ gʼaˇ duˬ ngehˬ dah-eu gʼaˬ paˇ bi geuꞈ ma. Kʼoeˇ loꞈ-ehˇ jahˇ naˇ, miˇ kʼahˬ zaˬ deuˬ nawˇ jawˇ gaˇ gʼoꞈ laˇ tehꞈ-a. Aˬ yawꞈ maꞈ jawˇ gaˇ nawˇ iˇ-eu maˬ loˬ-aˇ.

²⁰ Aˬ yawꞈ maꞈ-euˬ mehˬ shi, maˇ jawˆ ni gʼeh-eu guiˬ shuiˇ neh maˇ taˬ-euˬ meuˬ meuˬ lahˇ loꞈ-ehˇ nawˇ ziꞈ tehꞈ-a. Aˬ yawꞈ maꞈ nawˬ-ahˇ guiˇ deuˆ kʼawꞈ, nawˬ-ahˇ maˬ gʼaˬ laˇ-aˇ. Nawˬ nehˬ-ehˇ ngaˇ jawˇ-awˇ, nawˬ-ahˇ haw teˬ haw piˇ nehˬ ma.

²¹ Maˬ tsaˬ maˬ dawˇ-eu tsawˇ haˬ yaw haiˬ deuˬ-euˬ baoˬ uˬ moˆ, nawˬ-ahˇ ngaˇ ka kʼoꞈ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”