Yeˬlaˬmiˇ 14 - Akha

Mˬ gʼmˇ gʼmˇ-eu, mehꞈ-eu shuꞈ-eu, mi zaˬ mi cehˇ

¹ Mˬ gʼmˇ gʼmˇ-eu gaˇ kawˆ-ahˇ taꞈ leˇ-awˇ, Sahˬpaˬ Miˬyehˇ ngaˬ-ahˇ ehˇ-eu,

² “Yuˇdaˆ miˇ kʼahˬ tsawˇ ngoeˇ ngoeˇ-awˇ, aˬ yawꞈ-euˬ meuˬ deuˬ shiˇ tsehˆ leˇ luꞈ meh. Aˬ yawꞈ-euˬ tsawˇ haˬ deuˬ shaˬ zahˬ maˬ mˇ coeˇ-ehˇ miˇ tsa yuꞈ-awˇ, Yeˬluˇsaˬlehˬ meuˬ kʼawꞈ caw ba nehˬ laꞈ lehˇ shaˇ luꞈ meh.

³ Smˇ muiˬ aˬ da deuˬ zaˬ kʼaˆ deuˬ-ahˇ kʼehˇ gʼeh-awˇ, iˇ cuꞈ bi kʼawꞈ laˬ-iˇ-euˬ kʼawꞈ, lah duˬ-ahˇ iˇ cuꞈ maˬ dahˬ-eu miˇ neh, iˇ puˬ yawꞈ ngehꞈ-ehˇ gʼoꞈ laˇ-euˬ meh. Aˬ yawꞈ maꞈ nui ma cawˆ-awˇ zahˬ leˇ-euˬ miˇ neh, myaˆ pyawˬ ciˬ zaꞈ-eu meh.

⁴ Uˬ yehˇ maˬ jaˆ-ehˇ miˇ tsaˬ koˆ-iˇ-euˬ miˇ neh, mˇ dzaˬ-eu tsawˇ haˬ deuˬ nui ma cawˆ dui dui-awˇ, myaˆ pyawˬ ciꞈ zaꞈ-euˬ meh.

⁵ Yaˇ moꞈ tseuˆ dzaˬ-eu maˬ jaˆ-eu miˇ neh, deh ga-ahˇ jawˇ-eu kʼaˬ tsehˆ aˬ ma kʼawꞈ, yawˬ ha-euˬ zaˬ-ahˇ byehˇ dzeh yaꞈ-eu meh.

⁶ Bawˇ tsahˬ mahˬ tahˬ laˆ deuˬ gawˬ duˇ uˬ du yawꞈ-awˇ, bawˇ tsahˬ aˬ kuiˬ loꞈ-ehˇ saꞈ gʼawˇ ma ma luꞈ-awˇ, dzaˇ maˬ ya dzaˬ-eu baˬ da neh, myaˆ nuiˆ maˬ mawˇ nya-a.

⁷ Ngaˬ-euˬ tsawˇ haˬ deuˬ ngaˬ-ahˇ heu loꞈ-ehˇ shaˇ-eu meh. Nga maꞈ iˬ bahˇ ahˇ-eu bya tsehˆ ni jaˆ luꞈ kʼawꞈ, Sahˬpaˬ Miˬyehˇ nawˬ neh saˇ jaˇ dzaˬ-euˬ loꞈ-ehˇ, nga maꞈ-ahˇ ngehˬ gʼeh nehˬ laꞈ-awˬ. Nga maꞈ nawˬ-ahˇ gʼawˬ mya poˆ byehˇ dzeh-awˇ, nawˬ-ahˇ mˇ bahˬ laˆ bahˬ-euˬ ma.

⁸ Iˇsaˬleˬlaˆ noeˬ tmˬ duˬ nawˇ tehꞈ meh. Guˆ-eu gaˆ-eu laꞈ kʼoeˇ ka kʼoꞈ nehˬ laꞈ-eu nawˇ tehꞈ meh. Aˬ jeˬ miˇ neh nga maꞈ miˇ kʼahˬ laꞈ kʼoeˇ, boeˇ miˬ siˬ kʼaˬ loꞈ-ehˇ gʼeh nehˬ laꞈ te. Uˬ ciꞈ tiˬ miˇ tehꞈ-ehˇ yaꞈ-eu daˬ yah loꞈ-ehˇ, aˬ jeˬ miˇ neh gʼeh nehˬ laꞈ te.

⁹ Aˬ cawˬ neh ja pyuˬ ni bi nyehꞈ mi-euˬ tsawˇ haˬ hawˇ-eu ngehˬ maˬ gʼeh nehˬ nya-ehˇ pyeuꞈ-iˇ-euˬ yehˇ loꞈ-ehˇ, aˬ joˆ-ehˇ gʼeh laꞈ te. Sahˬpaˬ Miˬyehˇ nawˇ nga maꞈ nehˬ-ehˇ aˬ diˇ jawˇ luꞈ meh. Nga maꞈ nawˬ-euˬ tsawˇ haˬ pyeuꞈ luꞈ-eu ma. Nga maꞈ-ahˇ taˬ byehˇ dzeh nehˬ laꞈ.”

¹⁰ Tsawˇ haˬ heu deuˬ gaˇ kawˆ Sahˬpaˬ Miˬyehˇ ehˇ-eu, “Aˬ yawꞈ maꞈ ngaˬ-euˬ mehˬ shi neh doˆ-iˇ-awˇ, doe doe-ehˇ cah mawꞈ-eu nui ma ahˇ-awˇ, yawˬ ha-euˬ nui kʼahˇ-ahˇ maˬ nyehꞈ tehˬ gʼaˬ coeˇ-eu miˇ neh, aˬ yawꞈ maꞈ-ahˇ ngaˇ nui ma maˬ tsaˬ nya. Aˬ yawꞈ maꞈ neh mˇ lehˬ-euˬ jeˬ-ahˇ ngaˇ maˬ ngehˇ-ehˇ aˬ yawꞈ maꞈ-euˬ iˬ baˇ baˬ da neh ngaˇ kʼehˬ nehˬ ma.”

¹¹ Sahˬpaˬ Miˬyehˇ ngaˬ-ahˇ ehˇ-eu, “Tsawˇ haˬ heu deuˬ-ahˇ caw ba nehˬ-awˬ lehˇ ngaˬ-ahˇ taˬ shaˇ.

¹² Aˬ yawꞈ maꞈ maˬ dzaˬ maˬ dawˇ ni lah daw kʼawꞈ, aˬ yawꞈ maꞈ-euˬ shaˇ dawˬ-ahˇ ngaˇ maˬ naˇ haˬ. Miˬ dzaˬ dzah puiˆ-awˇ lawˇ-eu jeˬ hawˇ-eu dzaˬ la gʼo cehˇ lawˇ-eu jeˬ lawˇ nehˬ laꞈ kʼawꞈ, aˬ yawꞈ maꞈ-ahˇ ngaˇ nui kʼahˇ maˬ shiˇ. Guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ laꞈ kʼoeˇ, aˬ yawꞈ maꞈ-ahˇ ngaˇ bi shiˇ ma.”

¹³ Kʼoeˇ naˇ, ngaˇ heu loꞈ-ehˇ ehˇ-euˬ ma. “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˬ neh saˇ jaˇ dzaˬ taˬ-euˬ jaˆ-eu miˇ neh, miˇ kʼahˬ heu kʼahˬ laꞈ kʼoeˇ guiˇ deuˆ-eu jeˬ hawˇ-eu mehꞈ-eu shuꞈ-eu jeˬ maˬ keuˆ le-ehˇ, nui saˇ oꞈ-eu jeˬ tehꞈ-ehˇ keuˆ le tehꞈ-a lehˇ, Miˬyehˇ gʼaˇ duˬ ngehˬ dah-eu deuˬ ehˇ luꞈ-eu nawˇ siˬ nya meh.”

¹⁴ Ehˇ kʼawꞈ, Sahˬpaˬ Miˬyehˇ ehˇ-eu, “Miˬyehˇ gʼaˇ duˬ ngehˬ dah-eu deuˬ-aˬ, ngaˬ-euˬ tsawˇ myahˇ-ahˇ gʼoe-awˇ jaˬ myawꞈ myawꞈ luꞈ meh. Aˬ yawꞈ maꞈ-ahˇ ngaˬ neh pyehˬ leꞈ-euˬ maˬ ngeuˇ. Ngaˬ-euˬ dah zaˇ dawˬ tiˬ dawˬ-iˬ bi ngehˬ le-euˬ maˬ ngeuˇ. Yaw sahˇ laꞈ kʼoeˇ aˬ yawꞈ maꞈ kʼaˇ ya siˬ kʼaˇ ya mawˇ-euˬ loꞈ-ehˇ ngehˬ-eu tmˇ-eu ma lehˇ aˬ yawꞈ maꞈ ehˇ kʼawꞈ, aˬ yawꞈ maꞈ ngehˬ-eu dawˬ kʼoeˇ deuˬ ngaˬ-euˬ dawˬ maˬ ngeuˇ. Mehˬ hu paw pyeuꞈ laˇ-eu gaˇ kawˆ aˬ yawꞈ maꞈ ehˇ-eu kʼoeˇ-aˬ, aˬ yawꞈ maꞈ neh kʼaˇ noeˬ doˆ-euˬ loꞈ-ehˇ ehˇ-eu jeˬ pyeuꞈ-awˇ, gaˇ dahˇ maˬ tsoeˬ-aˬ.

¹⁵ Ngaˬ neh pyehˬ gʼeh leꞈ-awˇ Miˬyehˇ gʼaˇ duˬ bi ngehˬ dah le-euˬ tsawˇ haˬ maˬ ngeuˇ gaˇ, ngaˬ-euˬ tsawˇ myahˇ-ahˇ dehˬ lehꞈ dehˬ lehꞈ-ehˇ, guiˇ deuˆ-eu jeˬ hawˇ-eu mehꞈ-eu shuꞈ-eu jeˬ miˇ kʼahˬ heu kʼahˬ kʼoeˇ taˆ maˬ keuˆ le-aˇ lehˇ ehˇ luꞈ-eu tsawˇ haˬ kʼoeˇ deuˬ-ahˇ, Sahˬpaˬ Miˬyehˇ pyeuꞈ-eu ngaˇ aˬ joˆ-ehˇ jahˇ nehˬ-eu lehˇ gʼeh-eu gaˇ kawˆ, nawˬ-ahˇ ehˇ nehˬ nyaˇ. Guiˇ deuˆ-eu jeˬ hawˇ-eu mehꞈ-eu shuꞈ-eu jeˬ laꞈ kʼoeˇ, aˬ yawꞈ maꞈ-ahˇ ngaˇ bi shiˇ ma.

¹⁶ Aˬ yawꞈ maꞈ neh Miˬyehˇ gʼaˇ duˬ ngehˬ dah nehˬ-euˬ tsawˇ haˬ kʼoeˇ deuˬ kʼawꞈ, kʼoeˇ loꞈ-ehˇ ya shiˇ tehꞈ-a. Yeˬluˇsaˬlehˬ meuˬ-euˬ gaˇ ma doe ni aˬ yawꞈ maꞈ shiˇ taˬ-awˇ ga-awˇ, aˬ yawꞈ maꞈ-ahˇ duˬ pahˬ nehˬ-eu gʼaˬ maˬ jawˇ ni jaˆ tehꞈ-a. Aˬ yawꞈ maꞈ-euˬ miˬ sawˇ zaˬ hawˇ-eu aˬ buˇ aˬ li dawˬ tawˆ luꞈ kʼoeˇ taˆ, kʼoeˇ loꞈ-ehˇ keuˆ le tehꞈ-a. Aˬ yawꞈ maꞈ neh dehꞈ doeˇ-euˬ gaˇ geuˇ leˇ ni, ngaˇ kʼehˬ nehˬ kʼaˆ nehˬ ma.”

¹⁷ Aˬ yawꞈ maꞈ-ahˇ heu loꞈ-ehˇ ehˇ nehˬ-iˇ-eu gʼaˇ duˬ Sahˬpaˬ Miˬyehˇ ngaˬ-ahˇ dawˬ biꞈ laꞈ-euˬ meh. “Ngaˬ-euˬ tsawˇ haˬ deuˬ yaw kʼaˆ-ehˇ bi laˆ naˇ-awˇ, aˇ dzehˬ-ehˇ deuˬ leˇ-euˬ miˇ neh, ngaˬ-euˬ myaˆ biˇ maˬ tsiˇ leˇ ni yoeˇ-awˇ, maˬ naˬ leˇ ni ya ngoeˇ luꞈ-uˇ.

¹⁸ Deh ga-ahˇ ngaˇ iˇ doˆ haw ngeh, guiˇ deuˆ sehꞈ-euˬ tsawˇ shiˇ deuˬ ga gaˇ ya mawˇ-awˇ, meuˬ laꞈ kʼoeˇ ngaˇ uˇ leˇ haw ngeh, hawˬ mehꞈ mehꞈ sehꞈ-euˬ tsawˇ shiˇ deuˬ-ahˇ ya mawˇ-euˬ ma. Miˬyehˇ gʼaˇ duˬ ngehˬ dah-eu deuˬ hawˇ-eu piˇ ma deuˬ-aˬ, yawˬ ha-euˬ gaˇ yawˬ ha mˇ luꞈ-eu meh. Ehˇ kʼawꞈ yawˬ ha aˬ jeˬ mˇ luꞈ-eu yawˬ ha maˬ siˬ nya-a.”

Yuˇdaˆ tsawˇ haˬ Sahˬpaˬ Miˬyehˇ-ahˇ shaˇ ju-eu

¹⁹ Sahˬpaˬ Miˬyehˇ nawˇ Yuˇdaˆ tsawˇ haˬ-ahˇ, byehˇ tsehˆ tsehˆ nehˬ laꞈ-euˬ ma loˇ. Ziˇoˬ meuˬ-ahˇ nawˇ maˬ haw nahˇ te loˇ. Nga maꞈ jaˆ gʼaˬ maˬ yaˇ taˬ nya gaˇ keuˆ, aˬ jeˬ miˇ neh nawˇ laˆ naˇ nehˬ laꞈ te. Nui saˇ oꞈ-eu jeˬ-ahˇ nga maꞈ poˆ kʼawꞈ, yaw muiˬ tiˬ jeˬ-iˬ maˬ baw-a. Naˇ gawˇ taˬ leˇ gaˇ nga maꞈ noeˬ tmˬ kʼawꞈ, guˆ-eu gaˆ-eu jeˬ paˇ keuˆ le-euˬ meh.

²⁰ Sahˬpaˬ Miˬyehˇ nawˬ-ahˇ nga maꞈ mˇ bahˬ-euˬ ma. Nga maꞈ mˇ-euˬ iˬ baˇ hawˇ-eu aˬ poeˬ aˬ bawˇ deuˬ-euˬ iˬ baˇ, lehˬ-eu miˇ-a lehˇ nga maꞈ ehˇ-eu ma.

²¹ Nawˬ neh saˇ jaˇ dzaˬ-euˬ gaˇ noeˬ keuˆ-awˇ, nga maꞈ-ahˇ taˬ haw doeˇ nehˬ laꞈ. Yaw shehꞈ kʼahˬ sehˇ huiˬ-eu nawˬ-euˬ nuiˇ mahˬ jaˆ-eu, Yeˬluˇsaˬlehˬ meuˬ daˬ taˬ bi ga laꞈ. Nga maꞈ nehˬ-ehˇ nawˬ neh dzaˬ-euˬ, dawˬ ma saˇ jaˇ taˬ byehˇ nehˬ laꞈ.

²² Aˬ cawˬ tsawˇ jeuˬ-euˬ tahˬ pahˬ aˬ ma mawˇ kawˇ deuˬ, uˬ yehˇ maˬ bi yehˇ le nya-a. Uˬ yehˇ ga doˆ le ni mˬ kʼawꞈ maˬ gʼeh nya-a. Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, kʼoeˇ deuˬ dawˬ tawˆ luꞈ-ahˇ nawˇ mˇ nya-eu miˇ neh, nawˬ-ahˇ nga maꞈ noeˬ tmˬ-eu ma.