Yeˬlaˬmiˇ 13 - Akha

Shawˇ jehˆ ni gʼeh-eu saˬ paˇ joꞈ paꞈ

¹ “Shawˇ jehˆ ni gʼeh-eu saˬ paˇ neh guꞈ taˬ-euˬ joꞈ paꞈ tiˬ kahˇ zeuˇ-awˇ paꞈ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh.

² “Ehˇ kʼawꞈ, iˇ cuꞈ taˬ bi aˬ-iˇ” lehˇ ehˇ-eu meh. Kʼoeˇ naˇ, joꞈ paꞈ kʼoeˇ ngaˇ zeuˇ paꞈ-euˬ ma.

³ Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ-eu meh.

⁴ “Uˇpaˬlaˇ lawˇ baˬ-ahˇ iˇ-awˇ, joꞈ paꞈ teu kahˇ lo byoe-ahˇ yuˇ zaꞈ-iˇ-awˬ.”

⁵ Kʼoeˇ ngeh, joꞈ paꞈ kʼoeˇ ngaˇ yuˇ gʼeh-awˇ, Uˇpaˬlaˇ lawˇ baˬ dawˬ peh yuˇ zaꞈ taˬ-iˇ-euˬ ma.

⁶ Aˇ nah aˇ yamˬ ui cuiˆ myahˇ laˇ gʼaˬ ngeh, “Uˇpaˬlaˇ lawˇ baˬ-ahˇ iˇ-awˇ, joꞈ paꞈ kʼoeˇ laˬ kʼoꞈ laˬ-iˇ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh.

⁷ Joꞈ paꞈ kʼoeˇ yuˇ zaꞈ taˬ-euˬ tsahˇ-ahˇ ngaˇ iˇ keuˆ ngeh, peuˬ-iˇ-awˇ jaˆ gaˇ ya mawˇ-euˬ ma.

⁸ Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ-eu meh.

⁹ “Joꞈ paꞈ kʼoeˇ kahˇ peuˬ-iˇ-euˬ gaˇ duˇ ni, Yuˇdaˆ miˇ kʼahˬ-euˬ nui ma huiˬ-eu mahˇ-eu jeˬ hawˇ-eu, Yeˬluˇsaˬlehˬ meuˬ-euˬ nui ma huiˬ dui mahˇ dui dui-eu jeˬ-ahˇ, ngaˇ laˆ cawˆ nehˬ ma.

¹⁰ Haiˬ-eu tsawˇ haˬ kʼoeˇ deuˬ ngaˬ-euˬ ehˇ dawˬ-ahˇ maˬ naˇ haˬ geuꞈ-a. Dzeuˇ laˇ ngeh loꞈ-ehˇ aˬ yawꞈ maꞈ nui ma gʼahˇ-awˇ haiˬ-eu laꞈ kʼoeˇ, miˬ yehˇ nui deuˬ-ahˇ uˬ duˬ tahˬ-awˇ miˬ yehˇ kʼoeˇ deuˬ-euˬ nui kʼahˇ mˇ-eu meh. Kʼoeˇ miˇ neh, peuˬ-iˇ-euˬ joꞈ paꞈ kʼoeˇ kahˇ loꞈ-ehˇ aˬ yawꞈ maꞈ ya cawˆ-iˇ tehꞈ-a.

¹¹ Joꞈ paꞈ kʼoeˇ joꞈ-ahˇ deuˇ geuˆ ni paꞈ ziꞈ taˬ-euˬ loꞈ-ehˇ, Iˇsaˬleˬlaˆ tsawˇ haˬ hawˇ-eu Yuˇdaˆ tsawˇ haˬ dawˬ tawˆ luꞈ, ngaˬ-ahˇ ziꞈ dah ni bi byaˇ tehˬ mawꞈ-eu ma. Aˬ yawꞈ maꞈ ngaˬ-euˬ tsawˇ jeuˬ pyeuꞈ laˇ-awˇ, ngaˬ-euˬ tsawˇ myahˇ yaw shehꞈ kʼahˬ sehˇ huiˬ-awˇ, ngaˬ-ahˇ ja ceuˬ-eu jeˬ bi doˆ laˇ-eu gʼaˇ duˬ, ngaˇ kʼoeˇ loꞈ-ehˇ jahˇ-euˬ ma. Ehˇ kʼawꞈ, ngaˬ-euˬ ehˇ dawˬ-ahˇ aˬ yawꞈ maꞈ maˬ naˇ ha geuꞈ-a.”

Aˬ gaꞈ dzaˇ uiˇ ciˬ cuˇ

¹² Sahˬpaˬ Miˬyehˇ pyeuꞈ-eu Miˬyehˇ ngaˬ-ahˇ heu loꞈ-ehˇ ehˇ-eu meh. “Yeˬlaˬmiˇ-oˇ, aˬ gaꞈ dzaˇ uiˇ ciˬ cuˇ yawˬ siˬ na luꞈ-ahˇ, aˬ gaꞈ dzaˇ uiˇ ya shehˆ byah taˬ meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Kʼoeˇ ngeh, ‘Aˬ gaꞈ dzaˇ uiˇ ciˬ cuˇ yawˬ siˬ na luꞈ-ahˇ aˬ gaꞈ dzaˇ uiˇ ya shehˆ byah meh lehˇ, nga maꞈ siˬ nya ma’ lehˇ, aˬ yawꞈ maꞈ ehˇ laˇ tehꞈ-a.

¹³ Aˬ yawꞈ maꞈ-ahˇ heu loꞈ-ehˇ ehˇ nehˬ-awˬ. Miˇ kʼahˬ heu kʼahˬ laꞈ kʼoeˇ kʼaˇ jawˇ-eu tsawˇ haˬ deuˬ yehꞈ-iˇ jiˇ ngeh keuˆ ni, Sahˬpaˬ Miˬyehˇ pyeuꞈ-eu ngaˇ aˬ gaꞈ dzaˇ uiˇ shehˆ ahˇ nehˬ ma. Daˬbiˇ-euˬ zaˬ deuˬ uˆ deuˬ pyeuꞈ-eu sahˬ paˬ deuˬ maˬ ehˇ, piˇ ma deuˬ maˬ ehˇ, Miˬyehˇ gʼaˇ duˬ ngehˬ dah-eu deuˬ maˬ ehˇ, Yeˬluˇsaˬlehˬ meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ maˬ ehˇ, aˬ gaꞈ dzaˇ uiˇ yehꞈ-iˇ jiˇ ni ngaˇ shehˆ ahˇ nehˬ ma.

¹⁴ Kʼoeˇ naˇ, ciˬ cuˇ tiˬ siˬ tiˇ siˬ biˬ paˆ-eu loꞈ-ehˇ, zaˬ huiˬ zaˬ nyiˇ maˬ tsehˇ ni aˬ yawꞈ maꞈ-ahˇ ngaˇ jahˇ nehˬ ma. Aˬ yawꞈ maꞈ-ahˇ ngaˇ sehꞈ ngeh, gʼawˬ shaˬ gaˬ-eu jeˬ neh laˆ tsoeˬ le kʼawꞈ, maˬ laˆ tsoeˬ nya-aˇ.”

Nui ma huiˬ-eu deuˬ-ahˇ ehˇ nehˬ-euˬ dawˬ

¹⁵ Iˇsaˬleˬlaˆ tsawˇ haˬ deuˬ-oˇ, nui nahˬ nui yu ahˇ-eu laꞈ kʼoeˇ, Sahˬpaˬ Miˬyehˇ ehˇ taˬ-euˬ dawˬ-ahˇ naˇ haˬ sheˇ.

¹⁶ Yaw zahˇ jeˬ maˬ bi keuˆ le mi naˆ-ehˇ, gawˬ jawˬ kʼoeˇ taˆ naw maꞈ sahˬ tiꞈ maˬ ya tiꞈ mi naˆ-ehˇ, naw maꞈ noeˬ tmˬ-euˬ yaw shehꞈ-ahˇ, aˬ yawꞈ zahˇ tsui ni maˬ bi pyeuꞈ-iˇ mi naˆ-ehˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ, naw maꞈ yaw zeu baw-awˬ.

¹⁷ Ehˇ kʼawꞈ, naw maꞈ maˬ naˇ haˬ naˇ, naw maꞈ nui ma huiˬ-eu mahˇ-eu miˇ neh, aˬ cawˬ maˬ bi siˬ ni ngaˇ ngoeˇ kʼoeˬ ma. Sahˬpaˬ Miˬyehˇ-euˬ tsawˇ haˬ deuˬ, aˬ cawˬ neh bi nyehꞈ byoˆ gʼeh-eu miˇ neh, ngaˇ ya ngoeˇ dui dui-awˇ, myaˆ biˇ daˇ lawˇ yoeˇ le tehꞈ-a.

¹⁸ Sahˬpaˬ Miˬyehˇ ngaˬ-ahˇ ehˇ-eu, “Sahˬ paˬ hawˇ-eu aˬ yawꞈ-euˬ aˬ ma-ahˇ, heu loꞈ-ehˇ ehˇ nehˬ-awˬ. Naw maꞈ-euˬ nuiˇ mahˬ-ahˇ byehˇ-awˇ zaꞈ ka le-awˬ. Aˬ jeˬ miˇ neh ehˇ naˇ naw maꞈ uˬ duˬ-ahˇ kʼoˆ luꞈ-eu, kʼahˬ sehˇ huiˬ-eu shuiˇ uˬ kʼoˆ ga lehˆ le tehꞈ-a.

¹⁹ Yuˇdaˆ miˇ kʼahˬ laꞈ oˆ dzaˬ-ahˇ jaˆ-eu meuˬ deuˬ, aˬ cawˬ loꞈ jawˬ jiˇ-euˬ miˇ neh, tiˬ gʼaˬ-iˬ maˬ uˇ leˇ nya-a. Yuˇdaˆ miˇ kʼahˬ-ahˇ kʼaˇ jawˇ-eu deuˬ dawˬ tawˆ luꞈ, aˬ cawˬ neh bi nyehꞈ byoˆ jiˇ gʼeh tehꞈ-a.”

²⁰ Yeˬluˇsaˬlehˬ meuˬ-oˇ haw-awˬ. Nawˬ-ahˇ muiˇ-eu deuˬ laꞈ taˆ paw neh oe luꞈ meh. Nawˬ-ahˇ a nehˬ-awˇ bi haw-euˬ tsawˇ haˬ pyeuꞈ-eu, nawˇ kʼahˬ sehˇ jehˆ luꞈ-eu tsawˇ haˬ kʼoeˇ deuˬ aˬ lehˬ.

²¹ Nawˬ neh cawˬ yaw gʼoeˇ ma lehˇ noeˬ-euˬ deuˬ, nawˬ-ahˇ guiˇ deuˆ gʼaˬ-awˇ uˆ lahˇ laˇ ngeh, nawˇ aˬ joˆ-ehˇ ehˇ nmˇ. Zaˬ miˬ zaˬ zaˬ baw ngeh shaˬ-eu loꞈ-ehˇ, nawˬ-euˬ shaˬ zahˬ kʼoeˇ naˆ ni naꞈ tehꞈ-a.

²² Nawˬ-euˬ pi di bi gʼeu paˆ-awˇ, maˬ gʼeh kʼmˬ-eu jeˬ bi gʼeh gaˇ keuˆ ni, aˬ jeˬ miˇ neh nawˇ shaˬ zahˬ naꞈ-eu siˬ mawꞈ miˇ-a loˇ. Guˆ dui dui laˇ paˬ-ehˇ gʼeh-eu nawˬ-euˬ iˬ baˇ baˬ da, nawˇ kʼoeˇ loꞈ-ehˇ ya daˬ-eu meh lehˇ siˬ nya-awˬ.

²³ Yawˬ ha shaˬ jiˇ naˆ-eu pyuˇ laˇ ni jahˇ nya-awˇ, kʼaˬ zuiˬ aˇ boꞈ byoˆ-iˇ ni tsiˬ shawˇ geuꞈ nya law nmˇ-a. Yaw haiˬ jeˬ tehꞈ-ehˇ mˇ-eu naw maꞈ kʼawꞈ, yaw tsaˬ yaw dawˇ jeˬ mˇ-eu siˬ nya laˇ tehꞈ-a.

²⁴ Kʼaˇ shuiꞈ deh ga paw neh oe-euˬ jaˬ lehˇ lehˇ ma, gʼo yoeˬ baw byoˆ gʼeh-eu loꞈ-ehˇ, Sahˬpaˬ Miˬyehˇ naw maꞈ-ahˇ byaˆ dzeh nehˬ tehꞈ-a.

²⁵ Naw maꞈ guiˬ lahˬ kʼoeˇ naˆ ni doeˇ meh lehˇ, Sahˬpaˬ Miˬyehˇ ehˇ taˬ-euˬ meh. Naw maꞈ aˬ yawꞈ-ahˇ byehˇ dzeh-awˇ, maˬ ngeuˇ-eu miˬ yehˇ-ahˇ gʼoe-eu miˇ neh, naw maꞈ-ahˇ kʼoeˇ loꞈ-ehˇ laˆ shaˬ nehˬ-eu gʼaˇ duˬ, aˬ yawꞈ noeˬ tsehˆ gʼaˬ taˬ-euˬ meh.

²⁶ Naw maꞈ neˇ myawˆ ni bi shaꞈ dawˇ-eu lehˇ, pi di baˬ ba-ahˇ gʼeu luiˆ daˆ nehˬ laꞈ tehꞈ-a.

²⁷ Aˬ yawꞈ bye-eu jeˬ naw maꞈ mˇ luꞈ gaˇ, aˬ yawꞈ haw dehˆ laꞈ taˬ-euˬ meh. Aˬ cawˬ miˬ zaˬ-ahˇ bahˬ-eu kʼaˬ dzeˇ zaˬ loꞈ-ehˇ, mahˬ ma mehˬ nah teh-eu mahˬ paˬ yaw gʼeh loꞈ-ehˇ, gawˬ jawˬ gawˬ duˇ hawˇ-eu deh ga doe ni, lawˇ ciꞈ zaˬ-euˬ miˬ yehˇ-ahˇ naw maꞈ caw teh gaˇ, aˬ yawꞈ haw dehˆ laꞈ-euˬ meh. Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ shaˬ zahˬ ya mˇ dui dui tehꞈ-a. Aˬ myah muiˬ laˇ shawˇ laˇ-eu lehˇ gʼeh te.