Yeˬlaˬmiˇ 11 - Akha

Yeˬlaˬmiˇ hawˇ-eu dawˬ ma saˇ jaˇ

¹ Yeˬlaˬmiˇ jawˇ gaˇ keuˆ le-euˬ Sahˬpaˬ Miˬyehˇ-euˬ dawˬ-aˬ, heu loꞈ-ehˇ meh.

² “Dawˬ ma saˇ jaˇ heu hmˬ-ahˇ taꞈ-eu dawˬ deuˬ-ahˇ naˇ haˬ-awˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ dzawˇ mehˬ nehˬ-awˬ.

³ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ, aˬ yawꞈ maꞈ-ahˇ dzawˇ nehˬ-awˬ. Dawˬ ma saˇ jaˇ heu hmˬ-ahˇ taꞈ-eu dawˬ deuˬ-ahˇ maˬ naˇ haˬ-eu tsawˇ haˬ yawˬ gʼaˬ na luꞈ kʼoeˇ taˆ, yaˬ kʼehˇ yaˬ-eu jeˬ keuˆ le tehꞈ-a.

⁴ Dawˬ ma saˇ jaˇ heu-aˬ, shmˇ baw guiˇ duˬ loꞈ-ehˇ duˇ-eu Iˇjiˇtuˆ miˇ kʼahˬ-ahˇ neh, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˇ sheuˬ doˆ nehˬ ngeh, aˬ poeˬ aˬ bawˇ kʼoeˇ deuˬ nehˬ-ehˇ dzaˬ taˬ-euˬ dawˬ ma saˇ jaˇ ma. Ngaˬ-euˬ ehˇ dawˬ naˇ haˬ-awˇ, ngaˬ neh dawˬ kʼaˇ biꞈ-euˬ yawˬ jeˬ na luꞈ ya mˇ meh lehˇ, aˬ yawꞈ maꞈ-ahˇ ngaˇ ehˇ nehˬ-euˬ ma. Ngaˬ-euˬ ehˇ dawˬ naˇ haˬ geuꞈ naˇ, aˬ yawꞈ maꞈ ngaˬ-euˬ tsawˇ haˬ pyeuꞈ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ ma lehˇ ehˇ nehˬ-euˬ ma.

⁵ Kʼoeˇ naˇ, aˬ yawꞈ maꞈ-euˬ aˬ poeˬ aˬ bawˇ deuˬ nehˬ-ehˇ, ngaˬ neh dzaˬ taˬ-euˬ saˇ jaˇ-ahˇ ngaˇ ziꞈ-awˇ, nymˬ-mˇ aˬ yawꞈ maꞈ jawˇ luꞈ-eu miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ heu kʼahˬ, aˬ yawꞈ maꞈ-ahˇ ngaˇ biꞈ ma lehˇ ehˇ nehˬ-euˬ ma.” Kʼoeˇ ngeh, “Sahˬpaˬ Miˬyehˇ nawˇ kʼaˇ ehˇ-eu loꞈ-ehˇ ngaˇ mˇ ma” lehˇ, ngaˇ ehˇ kʼoꞈ nehˬ-euˬ ma.

⁶ Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu, Yeˬluˇsaˬlehˬ meuˬ-ahˇ gaˇ ma doe ni ngaˬ-euˬ dawˬ tsaꞈ gaˬ-iˇ-awˇ, dawˬ ma saˇ jaˇ-ahˇ taꞈ-eu dawˬ deuˬ-ahˇ naˇ haˬ-awˇ caw teh-awˬ lehˇ ehˇ nehˬ-awˬ.

⁷ Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ Iˇjiˇtuˆ miˇ kʼahˬ laꞈ kʼoeˇ ngaˇ sheuˬ doˆ nehˬ ngeh, ngaˬ-euˬ ehˇ dawˬ-ahˇ ya naˇ haˬ meh lehˇ ngaˇ ehˇ duˬ nehˬ-awˇ, iˬ nah keuˆ ni ngaˇ kʼoeˇ loꞈ-ehˇ ehˇ luꞈ-eu ma.

⁸ Ehˇ kʼawꞈ, aˬ yawꞈ maꞈ maˬ naˇ haˬ-ehˇ, aˇ hu aˇ nah loꞈ-ehˇ tehꞈ-ehˇ nui ma gʼahˇ-awˇ, yaw haiˬ jeˬ tehꞈ-ehˇ mˇ-eu meh. Dawˬ ma saˇ jaˇ mehˬ nah ya caw teh meh lehˇ aˬ yawꞈ maꞈ-ahˇ ngaˇ dawˬ biꞈ-euˬ kʼawꞈ, aˬ yawꞈ maꞈ maˬ naˇ haˬ geuꞈ-a. Kʼoeˇ baˬ da neh, dawˬ ma saˇ jaˇ laꞈ kʼoeˇ kʼaˇ ehˇ taˬ-euˬ kʼehˬ-eu kʼaˆ-eu jeˬ dawˬ tawˆ luꞈ, aˬ yawꞈ maꞈ kʼoeˇ taˆ ngaˇ bi keuˆ le-euˬ ma.”

⁹ Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ ngaˬ-ahˇ puiˬ-eu lehˇ gʼeh-eu meh.

¹⁰ Ngaˬ-euˬ ehˇ dawˬ maˬ naˇ haˬ geuꞈ-eu aˬ yawꞈ maꞈ-euˬ aˬ poeˬ aˬ bawˇ deuˬ neh mˇ-euˬ iˬ baˇ-ahˇ, aˬ yawꞈ maꞈ paˇ mˇ poˆ-euˬ meh. Aˬ yawꞈ maꞈ miˬ yehˇ nui deuˬ-ahˇ uˬ duˬ tahˬ-euˬ meh. Iˇsaˬleˬlaˆ tsawˇ haˬ deuˬ hawˇ-eu Yuˇdaˆ tsawˇ haˬ deuˬ-aˬ, aˬ yawꞈ maꞈ-euˬ aˬ poeˬ aˬ bawˇ deuˬ nehˬ-ehˇ ngaˬ neh dzaˬ taˬ-euˬ dawˬ ma saˇ jaˇ-ahˇ puiˬ-euˬ meh.

¹¹ Kʼoeˇ miˇ neh, aˬ yawꞈ maꞈ maˬ cehˆ dzeuˇ nya-eu luˬ-iˇ seˇ-iˇ-eu jeˬ bi keuˆ le ma lehˇ nymˬ-mˇ aˬ yawꞈ maꞈ-ahˇ ngaˇ ehˇ-eu ma. Caw ba nehˬ laꞈ lehˇ aˬ yawꞈ maꞈ ngaˬ-ahˇ guˇ-awˇ shaˇ kʼawꞈ, ngaˇ maˬ naˇ haˬ nehˬ.

¹² Kʼoeˇ naˇ, Yuˇdaˆ miˇ kʼahˬ-euˬ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ, aˬ yawꞈ maꞈ lawˇ nehˬ shehˇ nehˬ luꞈ-eu miˬ yehˇ deuˬ jawˇ gaˇ iˇ-awˇ, caw ba nehˬ laꞈ lehˇ shaˇ-iˇ tehꞈ-a. Ehˇ kʼawꞈ, luˬ-iˇ seˇ-iˇ-eu jeˬ keuˆ le ngeh, miˬ yehˇ kʼoeˇ deuˬ aˬ yawꞈ maꞈ-ahˇ maˬ ka kʼoꞈ nehˬ nya-a.

¹³ Yuˇdaˆ miˇ kʼahˬ-aˬ, meuˬ kʼaˇ jaˆ-eu myaˆ ni miˬ yehˇ jawˇ myaˬ-awˇ, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-aˬ, nui daˆ daˆ laˇ paˬ-ehˇ gʼeh-eu Baˬlaˇ miˬ yehˇ-ahˇ lawˇ nehˬ-eu gʼaˇ duˬ, meuˬ laꞈ kʼoeˇ gaˇ ma kʼaˇ jaˆ gaˇ lawˇ duˬ tsoˆ taˬ-euˬ meh.

¹⁴ Yeˬlaˬmiˇ-oˇ, tsawˇ haˬ heu deuˬ-euˬ dah zaˇ ngaˬ-ahˇ guiˬ lahˬ taˬ shaˇ. Aˬ yawꞈ maꞈ shaˬ le zahˬ le-awˇ, caw ba nehˬ laꞈ lehˇ ngaˬ-ahˇ shaˇ ngeh, ngaˇ maˬ naˇ haˬ nehˬ.”

¹⁵ Sahˬpaˬ Miˬyehˇ ehˇ-eu, “Ngaˇ gaˬ-eu tsawˇ haˬ deuˬ yaw haiˬ jeˬ mˇ luꞈ meh. Aˬ yawꞈ maꞈ ngaˬ-euˬ Uˬ duˬ tahˬ nymˇ nymˇ ma-ahˇ aˬ jeˬ taꞈ ta. Saˇ jaˇ dzaˬ-awˇ jeˬ zaˬ lawˇ-eu shehˇ-eu laꞈ kʼoeˇ, guˆ-eu gaˆ-eu jeˬ maˬ bi keuˆ le ni aˬ yawꞈ maꞈ jahˇ nya ma lehˇ noeˬ ta loˇ. Kʼoeˇ baˬ da neh aˬ yawꞈ maꞈ nui saˇ za ta loˇ.

¹⁶ Aˇ hu aˬ yawꞈ maꞈ-ahˇ ngaˇ, aˇ paꞈ sahˇ-awˇ aˇ siˬ muiˬ dui dui-eu saˬ loˬ aˇ bawˇ lehˇ myahˇ-euˬ ma. Ehˇ kʼawꞈ, nymˬ-mˇ poˆ jawˇ-aˬ, mˬ jeˬ jeˬ-eu loꞈ-ehˇ mahˇ laˇ gaˇ keuˆ ni aˇ paꞈ deuˬ-ahˇ ngaˇ dzah puiˆ-awˇ, uˬ laꞈ deuˬ-ahˇ ngawˬ kʼehꞈ nehˬ ma.

¹⁷ “Iˇsaˬleˬlaˆ hawˇ-eu Yuˇdaˆ-ahˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ka-euˬ ma. Ehˇ kʼawꞈ, aˬ yawꞈ maꞈ kʼoeˇ taˆ guˆ-eu gaˆ-eu jeˬ bi keuˆ le-eu lehˇ, nymˬ-mˇ ngaˇ lehˬ hmˬ luꞈ-eu ma. Aˬ yawꞈ maꞈ dehꞈ lehˬ mˇ lehˬ-euˬ miˇ neh, yawˬ haˇ yawˬ ha kʼoeˇ loꞈ-ehˇ keuˆ le ni mˇ-euˬ meh. Baˬlaˇ miˬ yehˇ-ahˇ lawˇ-eu shehˇ-eu laꞈ kʼoeˇ, ngaˇ nui ma pehˇ ni aˬ yawꞈ maꞈ mˇ-euˬ meh.”

Yeˬlaˬmiˇ-ahˇ sehꞈ-eu lehˇ gʼeh-eu

¹⁸ Muiˇ-eu deuˬ ngaˬ-ahˇ yaw doeˇ jahˇ-eu lehˇ gʼeh-eu gaˇ kawˆ, Sahˬpaˬ Miˬyehˇ ngaˬ-ahˇ bi siˬ laꞈ-euˬ meh.

¹⁹ Ngaˇ-aˬ aˬ cawˬ neh bi sehꞈ dzaˬ-eu lehˇ gʼeh-eu nahˬ jawˆ ni gʼeh-eu yawˇ zaˬ-ahˇ duˇ-eu ma. Aˬ yawꞈ maꞈ ngaˬ-ahˇ yaw doeˇ jahˇ mawꞈ law hawˇ ngaˬ lehˇ ngaˇ maˬ siˬ-aˬ. Aˬ yawꞈ maꞈ heu loꞈ-ehˇ ehˇ-eu meh. “Aˇ siˬ siˬ-eu aˇ bawˇ heu bawˇ tuˇ dzeh kaˇ-euˇ. Tsawˇ haˬ tiˬ gʼaˬ-iˬ maˬ noeˬ mawˇ coeˇ ni, bi ngehˇ jiˇ-eu gʼaˇ duˬ sehꞈ byoˆ kaˇ-euˇ.”

²⁰ Kʼoeˇ naˇ ngaˇ heu loꞈ-ehˇ guiˬ lahˬ shaˇ-euˬ ma. “Baoˬ huiˬ-eu Sahˬpaˬ Miˬyehˇ-oˇ, nawˇ dawˇ coe ni yaˇ kʼaˬ daˇ-awˇ, tsawˇ haˬ-euˬ nui ma-ahˇ lawˬ haw-eu meh. Ngaˬ-euˬ dehꞈ jeˬ dehꞈ kawˆ nawˬ-ahˇ a nehˬ taˬ-euˬ miˇ neh, tsawˇ haˬ kʼoeˇ deuˬ-ahˇ nawˇ laꞈ poˆ poˆ kʼoꞈ nehˬ gaˇ, ngaˬ-ahˇ bi mawˇ nehˬ laꞈ.”

²¹ Aˬnaˬtawˇ meuˬ-ahˇ jawˇ-eu deuˬ ngaˬ-ahˇ bi shiˇ mawꞈ-awˇ, Sahˬpaˬ Miˬyehˇ neh bi ngehˬ bi tmˇ-euˬ jeˬ-ahˇ ngaˇ dzawˇ gaˬ dzawˇ gaˬ-ehˇ cah naˇ, aˬ yawꞈ maꞈ ngaˬ-ahˇ sehꞈ ma lehˇ ehˇ-eu meh.

²² Kʼoeˇ miˇ neh , Baoˬ huiˬ-eu Sahˬpaˬ Miˬyehˇ ehˇ-eu, “Aˬ yawꞈ maꞈ-ahˇ ngaˇ kʼehˬ nehˬ kʼaˆ nehˬ ma. Aˬ yawꞈ maꞈ-euˬ aˬ li zaˬ guˬ deuˬ guiˇ deuˆ gaˇ ya shiˇ tehꞈ-a. Aˬ yawꞈ maꞈ-euˬ aˬ buˇ aˬ li deuˬ hawˬ mehꞈ ya dzahˬ sehꞈ tehꞈ-a.

²³ Aˬnaˬtawˇ meuˬ-ahˇ jawˇ-eu tsawˇ haˬ deuˬ kʼoeˇ taˆ guˆ-eu gaˆ-eu jeˬ bi keuˆ le-eu gʼaˇ duˬ, ngaˇ aˇ nah aˇ yamˬ laˆ tsaˬ taˬ-euˬ ma. Aˇ nah aˇ yamˬ kʼoeˇ keuˆ laˇ ngeh, aˬ yawꞈ maꞈ tiˬ gʼaˬ-iˬ maˬ dzeuˇ-iˇ-aˇ.”