Yaˇ kʼaˬ daˇ 9 - Akha

Aˬbiˇmaˬlehˆ

¹ Giˇdoˬ-euˬ aˬ li Aˬbiˇmaˬlehˆ-aˬ, aˬ yawꞈ aˬ ma-euˬ aˇ jeuˬ aˇ ca dawˬ tawˆ luꞈ jawˇ luꞈ-eu Sheˬkmˬ meuˬ-ahˇ iˇ-awˇ, heu loꞈ-ehˇ ehˇ nehˬ-iˇ-euˬ meh.

² “Sheˬkmˬ meuˬ-ahˇ jawˇ-eu tsawˇ haˬ-ahˇ heu loꞈ-ehˇ naˇ haˬ-iˇ-sheˇ. Giˇdoˬ-euˬ aˬ li shiꞈ tseˇ gʼaˬ luꞈ bi uˆ lahˇ-eu loˇ. Maˬ ngeuˇ naˇ, tiˬ gʼaˬ tehꞈ-ehˇ bi uˆ lahˇ-eu loˇ lehˇ naˇ haˬ haw sheˇ. Aˬbiˇmaˬlehˆ-aˬ, naw maꞈ-euˬ shiˬ shaˬ pyeuꞈ-eu gaˇ taˬ ngehˇ lawˬ lehˇ ehˇ nehˬ-awˬ.”

³ Aˬ yawꞈ-euˬ aˬ ma-euˬ aˬ yuiꞈ aˬ nyiˇ deuˬ aˬ yawꞈ gʼaˇ duˬ Sheˬkmˬ meuˬ-ahˇ jawˇ-eu tsawˇ haˬ deuˬ nehˬ-ehˇ gaˇ kawˆ kʼoeˇ ja uˇ haw ngeh, Sheˬkmˬ meuˬ-ahˇ jawˇ-eu tsawˇ haˬ deuˬ Aˬbiˇmaˬlehˆ mehˬ nah caw teh ma lehˇ noeˬ tsehˆ-euˬ meh. Aˬ jeˬ miˇ neh ehˇ naˇ, aˬ yawꞈ-aˬ, aˬ yawꞈ maꞈ-euˬ aˇ jeuˬ aˇ ca pyeuꞈ-eu meh.

⁴ Dawˬ ma saˇ jaˇ-euˬ Baˬlaˇ miˬ yehˇ lehˇ kuˇ-eu miˬ yehˇ-euˬ uˬ duˬ tahˬ nymˇ-ahˇ jaˆ-eu shuiˇ maˇ byaˆ shiꞈ tseˇ byaˆ aˬ yawꞈ maꞈ yuˇ-awˇ, Aˬbiˇmaˬlehˆ-ahˇ biꞈ-euˬ meh. Gaˇ dahˇ maˬ tsoeˬ-ehˇ nui noeˬ maˬ baw-eu tsawˇ haˬ deuˬ-ahˇ aˇ poeˬ biꞈ nehˬ-awˇ, aˬ yawꞈ-euˬ mehˬ nah bi caw teh-eu gʼaˇ duˬ, shuiˇ kʼoeˇ deuˬ aˬ yawꞈ zmˬ-euˬ meh.

⁵ Awˇpaˬlaˇ meuˬ-ahˇ, aˬ yawꞈ-euˬ aˬ da-euˬ nymˇ-ahˇ aˬ yawꞈ iˇ-awˇ, Giˇdoˬ-euˬ aˬ li deuˬ pyeuꞈ-eu aˬ yawꞈ-euˬ mehˇ nmˇ shiꞈ tseˇ gʼaˬ-ahˇ kʼaˬ lo tiˬ siˬ kʼoeˇ taˆ tehꞈ-ehˇ sehꞈ daˆ jiˇ nehˬ-euˬ meh. Ehˇ kʼawꞈ, Giˇdoˬ-euˬ aˬ li zaˬ saˬ gʼaˬ pyeuꞈ-eu Yoˇdamˬ gʼaˬ cehˆ zaꞈ-awˇ, maˬ bi sehꞈ ni law-iˇ-euˬ meh.

⁶ Kʼoeˇ naˇ, Sheˬkmˬ meuˬ hawˇ-eu Behˬmiˇloˬ meuˬ-ahˇ jawˇ-eu tsawˇ haˬ dawˬ tawˆ luꞈ, Sheˬkmˬ meuˬ-ahˇ jaˆ-eu muiˬ-eu shawˇ-eu tsuiꞈ kaˆ aˇ bawˇ-ahˇ tiˬ kawˆ loꞈ-ehˇ iˇ-awˇ, Aˬbiˇmaˬlehˆ-ahˇ kʼoeˇ gaˇ sahˬ paˬka nehˬ-euˬ meh.

⁷ Gaˇ kawˆ kʼoeˇ Yoˇdamˬ ya gaˬ ngeh, Geˬlaˬzmˬ gawˬ jawˬ uˬ du daˆ leˇ-awˇ, aˬ yawꞈ maꞈ-ahˇ heu loꞈ-ehˇ guˇ gaˬ nehˬ-euˬ meh. “Sheˬkmˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ-euˬ dawˬ-ahˇ Miˬyehˇ naˇ haˬ ni, ngaˇ ehˇ gaˇ naw maꞈ naˇ haˬ sheˇ.

⁸ Aˇ hu ba, aˇ bawˇ kʼaˇ ngeuˇ-eu tiˬ gaˇ uiˬ leˇ-awˇ aˬ yawꞈ maꞈ gʼaˇ duˬ sahˬ paˬ tseˇ doˆ-euˬ meh. Kʼoeˇ ngeh, ‘Nga maꞈ-euˬ sahˬ paˬ geuꞈ-awˬ’ lehˇ saˬ loˬ aˇ bawˇ-ahˇ aˬ yawꞈ maꞈ ehˇ nehˬ-euˬ meh.

⁹ Saˬ loˬ aˇ bawˇ ehˇ-eu, ‘Naw maꞈ-ahˇ ngaˇ uˆ lahˇ uˆ lahˇ-ehˇ jawˇ naˇ, miˬ yehˇ hawˇ-eu tsawˇ haˬ zaˬ deuˬ-ahˇ taˬ huiˬ taˬ mahˇ nehˬ gaˇ zmˬ-eu ngaˬ-euˬ tsiˇ ngaˇ maˬ paˇ bi doˆ laˇ nya meh’ lehˇ ehˇ-eu meh.

¹⁰ Kʼoeˇ ngeh, aˇ bawˇ kʼoeˇ deuˬ, siˬ guˬ aˇ bawˇ-ahˇ, ‘Nawˇ laˇ-awˇ nga maꞈ-euˬ sahˬ paˬ geuꞈ laˇ-awˬ’ lehˇ ehˇ nehˬ-euˬ meh.

¹¹ Ehˇ kʼawꞈ, siˬ guˬ aˇ bawˇ ehˇ-eu, ‘Ngaˇ naw maꞈ-ahˇ uˆ lahˇ uˆ lahˇ-ehˇ jawˇ naˇ, yaw coeˇ coeˇ dui dui-eu siˬ guˬ aˇ siˬ ngaˇ maˬ paˇ bi siˬ le nya meh’ lehˇ ehˇ-eu meh.

¹² Kʼoeˇ naˇ, aˬ gaꞈ baw duˆ-ahˇ, ‘Nawˇ laˇ-awˇ nga maꞈ-euˬ sahˬ paˬ geuꞈ laˇ-awˬ’ lehˇ aˇ bawˇ kʼoeˇ deuˬ ehˇ nehˬ-euˬ meh.

¹³ Ehˇ kʼawꞈ, aˬ gaꞈ baw duˆ ehˇ-eu, ‘Naw maꞈ-ahˇ ngaˇ uˆ lahˇ uˆ lahˇ-ehˇ jawˇ naˇ, miˬ yehˇ hawˇ-eu tsawˇ haˬ zaˬ deuˬ-ahˇ laˬ kʼaˬ bi cehˇ-eu aˬ gaꞈ dzaˇ uiˇ ngaˇ maˬ paˇ bi doˆ le nya meh’ lehˇ ehˇ-eu meh.

¹⁴ Kʼoeˇ naˇ, aˇ bawˇ dawˬ tawˆ luꞈ, ‘Nawˇ laˇ-awˇ nga maꞈ-euˬ sahˬ paˬ geuꞈ laˇ-awˬ’ lehˇ, aˬ gah baw duˆ-ahˇ ehˇ nehˬ-euˬ meh.

¹⁵ Aˬ gah baw duˆ ehˇ-eu, ‘Naw maꞈ ngaˬ-ahˇ naw maꞈ-eu sahˬ paˬ aˬ diˇ aˬ maˇ bi geuꞈ mawꞈ te lehˇ ngeuˇ naˇ, ngaˇ jawˇ gaˇ naˇ shmˇ awˆ laˇ-awˬ. Naw maꞈ naˇ shmˇ maˬ awˆ laˇ naˇ, aˬ gah tsoꞈ-eu ngaˬ-eu uˬ pyaˬ uˬ laꞈ deuˬ-ahˇ miˬ dzaˬ doꞈ doˆ laˇ-awˇ, Leˬbaˬnoˬ-ahˇ jaˆ-eu miˬ shuˬ aˇ bawˇ deuˬ-ahˇ puiˆ dzaˬ tehꞈ-a’ lehˇ ehˇ-eu meh.

¹⁶ “Naw maꞈ Aˬbiˇmaˬlehˆ-ahˇ sahˬ paˬ bi geuꞈ ngeh, aˬ diˇ aˬ maˇ yaw sui yaw dawˇ laꞈ kʼoeˇ mˇ-euˬ ma loˇ. Giˇdoˬ neh mˇ yaꞈ-euˬ gaˇ-ahˇ naw maꞈ maˬ ngehˇ ni, aˬ yawꞈ hawˇ-eu aˬ yawꞈ-euˬ nymˇ jiˇ-ahˇ naw maꞈ yaw zeu baw luꞈ ma loˇ.

¹⁷ Naw maꞈ gʼaˇ duˬ ngaˬ da neh guiˇ deuˆ yaꞈ-euˬ gaˇ taˬ ngehˇ. Aˬ yawꞈ-euˬ gʼawˇ mawˇ damˬ nehˬ-eu laꞈ kʼoeˇ, Miˇdiˬyaˬ tsawˇ haˬ-euˬ aˬ laꞈ laꞈ kʼoeˇ naw maꞈ-ahˇ ka kʼoꞈ-euˬ meh.

¹⁸ Ehˇ kʼawꞈ, naw maꞈ iˬ nah ngaˬ da-euˬ nymˇ jiˇ-ahˇ puiˬ-euˬ meh. Ngaˬ da-euˬ zaˬ miˬ zaˬ zaˬ kʼaˆ gʼaˬ neh ciˬ-euˬ aˬ yawꞈ-euˬ aˬ li Aˬbiˇmaˬlehˆ-aˬ, naw maꞈ-euˬ aˬ yuiꞈ aˬ nyiˇ pyeuꞈ-eu miˇ neh, ngaˬ da-euˬ aˬ li shiꞈ tseˇ gʼaˬ-ahˇ, tiˬ nah laꞈ kʼoeˇ tehꞈ-ehˇ kʼaˬ lo tiˬ siˬ kʼoeˇ taˆ naw maꞈ sehꞈ jiˇ-awˇ, Aˬbiˇmaˬlehˆ-ahˇ Sheˬkmˬ meuˬ-euˬ sahˬ paˬ bi geuꞈ-euˬ meh.

¹⁹ Giˇdoˬ hawˇ-eu aˬ yawꞈ-euˬ nymˇ jiˇ-ahˇ naw maꞈ neh jahˇ nehˬ-euˬ heu yaw sui yaw dawˇ meh lehˇ ngeuˇ naˇ, Aˬbiˇmaˬlehˆ-ahˇ naw maꞈ nui kʼahˇ shiˇ-awˇ, Aˬbiˇmaˬlehˆ kʼawꞈ, naw maꞈ-ahˇ nui kʼahˇ shiˇ luꞈ-uˇ.

²⁰ Ehˇ kʼawꞈ, naw maꞈ neh mˇ-euˬ heu maˬ sui maˬ dawˇ naˇ, Aˬbiˇmaˬlehˆ laꞈ kʼoeˇ neh miˬ dzaˬ doꞈ doˆ laˇ-awˇ, Sheˬkmˬ meuˬ hawˇ-eu Behˬmiˇloˬ meuˬ laꞈ kʼoeˇ jawˇ-eu tsawˇ haˬ deuˬ-ahˇ puiˆ-awˇ, Sheˬkmˬ meuˬ hawˇ-eu Behˬmiˇloˬ meuˬ-ahˇ jawˇ-eu tsawˇ haˬ deuˬ laꞈ kʼoeˇ neh kʼawꞈ, miˬ dzaˬ doꞈ doˆ laˇ-awˇ, Aˬbiˇmaˬlehˆ-ahˇ puiˆ luꞈ-uˇ.”

²¹ Kʼoeˇ naˇ, Yoˇdamˬ-aˬ, Aˬbiˇmaˬlehˆ-ahˇ guˆ-eu miˇ neh, gaˇ mahˇ kaˬ gaˇ cehˆ jawˇ-iˇ-euˬ meh.

²² Iˇsaˬleˬlaˆ miˇ kʼahˬ-ahˇ Aˬbiˇmaˬlehˆ smˇ kʼoꞈ uˆ lahˇ-euˬ meh.

²³ Kʼoeˇ naˇ, Aˬbiˇmaˬlehˆ hawˇ-eu Sheˬkmˬ meuˬ-ahˇ jawˇ-eu tsawˇ haˬ deuˬ tiˬ gʼaˬ tiˇ gʼaˬ muiˇ ni, Miˬyehˇ jahˇ nehˬ-awˇ, aˬ yawꞈ maꞈ Aˬbiˇmaˬlehˆ-ahˇ puiˬ-euˬ meh.

²⁴ Aˬbiˇmaˬlehˆ maˬ ehˇ, Giˇdoˬ-euˬ aˬ li shiꞈ tseˇ gʼaˬ-ahˇ sehꞈ ni aˬ yawꞈ-ahˇ gʼaˬ biꞈ-eu tsawˇ haˬ deuˬ maˬ ehˇ, aˬ yawꞈ maꞈ neh kʼaˇ mˇ-euˬ loꞈ-ehˇ ya daˬ poˆ ni, kʼoeˇ loꞈ-ehˇ pyeuꞈ laˇ-euˬ meh.

²⁵ Sheˬkmˬ tsawˇ haˬ deuˬ-aˬ, Aˬbiˇmaˬlehˆ-ahˇ guiˇ deuˆ kʼoeˬ-eu gʼaˇ duˬ, gawˬ jawˬ gawˬ duˇ doe ni tsawˇ haˬ pyehˬ taˬ-awˇ, kʼaˇ iˇ kʼaˇ laˇ tsehˆ-eu deuˬ-ahˇ tsawˇ haˬ kʼoeˇ deuˬ tahˇ joe joe-euˬ meh.

²⁶ Kʼoeˇ naˇ, Eˇbehˆ-euˬ aˬ li Gaˬlaˆ aˬ ha mehˇ nmˇ Sheˬkmˬ meuˬ-ahˇ neh oe ngeh, Sheˬkmˬ meuˬ-ahˇ jawˇ-eu tsawˇ haˬ deuˬ aˬ yawꞈ-ahˇ noeˬ tmˬ-awˇ gʼoe-euˬ meh.

²⁷ Aˬ yawꞈ maꞈ dawˬ tawˆ luꞈ aˬ gaꞈ yaˇ kmˇ-ahˇ aˬ gaꞈ aˇ siˬ pyaˆ laˬ-iˇ-awˇ, aˬ gaꞈ dzaˇ uiˇ jahˇ-awˇ bawˬ-iˬ gʼeh-euˬ meh. Aˬ yawꞈ maꞈ-euˬ miˬ yehˇ-euˬ uˬ duˬ tahˬ nymˇ laꞈ kʼoeˇ aˬ yawꞈ maꞈ uˇ leˇ-awˇ, dzaˬ taꞈ dawˇ taꞈ-eu laꞈ kʼoeˇ, Aˬbiˇmaˬlehˆ-ahˇ ja bu ja doeˇ-awˇ yaˬ kʼehˇ yaˬ-euˬ meh.

²⁸ Gaˬlaˆ ehˇ-eu, “Aˬ dui maꞈ Sheˬkmˬ meuˬ-ahˇ jawˇ-eu tsawˇ haˬ deuˬ aˬ joˆ-ehˇ gʼeh-eu tsawˇ haˬ pyeuꞈ ta. Aˬ jeˬ miˇ neh Aˬbiˇmaˬlehˆ-euˬ laꞈ oꞈ ya awꞈ ta. Aˬ yawꞈ aˬ suˇ gʼaˬ-a. Giˇdoˬ-euˬ aˬ li maˬ ngeuˇ-a loˇ. Aˬbiˇmaˬlehˆ-euˬ dawˬ-ahˇ Zeˬbuˇlaˆ naˇ haˬ geuꞈ kʼawꞈ, aˬ dui maꞈ maˬ naˇ haˬ geuꞈ. Naw maꞈ aˇ jeuˬ-euˬ aˬ da yaw dzahˇ gʼaˬ pyeuꞈ-eu Haˬmawˬ-ahˇ saˇ jaˇ ziꞈ-awˬ.

²⁹ Tsawˇ haˬ heu deuˬ-ahˇ ngaˇ aˬ yuiꞈ geuꞈ-awˇ sheuˬ gʼeh mawꞈ-eu nui ma ahˇ ma. Aˬbiˇmaˬlehˆ-ahˇ ngaˇ yuˇ dzeh ma. Nawˬ-euˬ guiˇ maꞈ deuˬ deh uiˬ-awˇ ngaˬ-ahˇ guiˇ deuˆ laˇ-awˬ lehˇ, aˬ yawꞈ-ahˇ ngaˇ ehˇ nehˬ ma.”

³⁰ Gaˬlaˆ-euˬ dawˬ kʼoeˇ deuˬ-ahˇ Sheˬkmˬ meuˬ-ahˇ uˆ lahˇ luꞈ-eu gʼaˬ pyeuꞈ-eu Zeˬbuˇlaˆ ya gaˬ ngeh, nui ma pehˇ-eu meh.

³¹ Kʼoeˇ ngeh, Aˬluˇmaˬ meuˬ-ahˇ jawˇ luꞈ-eu Aˬbiˇmaˬlehˆ jawˇ gaˇ aˬ yawꞈ tsawˇ haˬ pyehˬ gʼeh-awˇ, heu loꞈ-ehˇ bi tsaꞈ gaˬ-iˇ-euˬ meh. “Eˇbehˆ-euˬ aˬ li Gaˬlaˆ aˬ ha mehˇ nmˇ Sheˬkmˬ meuˬ-ahˇ oe-awˇ, nawˬ-ahˇ meuˬ laꞈ kʼoeˇ maˬ bi uˇ le lehˇ lmˬ lmˬ-ehˇ jawˇ luꞈ meh.

³² Nawˇ hawˇ-eu nawˬ-euˬ tsawˇ haˬ deuˬ uˬ ciꞈ paw oe-awˇ, deh ga-ahˇ dzuˇ zaꞈ taˬ-eu tsaˬ meh.

³³ Kʼoeˇ naˇ, uˬ shawˬ paw nahˇ ma doˆ laˇ ngeh yamˬ-ahˇ tuˇ laˇ-awˇ, meuˬ-ahˇ ja pyuˬ ni guiˇ deuˆ le-awˬ. Gaˬlaˆ hawˇ-eu aˬ yawꞈ-euˬ tsawˇ haˬ deuˬ nawˬ-ahˇ guiˇ deuˆ le-eu lehˇ doˆ le ngeh, haw-awˇ neh jahˇ nehˬ-awˬ.”

³⁴ Kʼoeˇ ngeh, Aˬbiˇmaˬlehˆ hawˇ-eu aˬ yawꞈ-euˬ tsawˇ haˬ dawˬ tawˆ luꞈ uˬ ciꞈ paw iˇ-awˇ, oeˬ muˇ muˇ-awˇ Sheˬkmˬ meuˬ laꞈ nyiˇ paw dzuˇ zaꞈ taˬ-euˬ meh.

³⁵ Gaˬlaˆ doˆ le-awˇ, meuˬ meuˬ lahˇ lahˇ kʼehˬ-ahˇ yawꞈ luꞈ gaˇ ya mawˇ ngeh, aˬ yawꞈ maꞈ dzuˇ zaꞈ luꞈ-eu tuˇ laˇ-euˬ meh.

³⁶ Aˬ yawꞈ maꞈ-ahˇ Gaˬlaˆ ya mawˇ-awˇ, “Gawˬ jawˬ uˬ duˬ neh tsawˇ haˬ zaꞈ ka le gaˇ haw sheˇ” lehˇ, Zeˬbuˇlaˆ-ahˇ ehˇ nehˬ-euˬ meh. Zeˬbuˇlaˆ ehˇ-eu, “Kʼoeˇ-aˬ, tsawˇ haˬ maˬ ngeuˇ-a. Gawˬ jawˬ-ahˇ jaˆ-eu naˇ shmˇ-ahˇ nawˇ haw bahˬ-euˬ nga.”

³⁷ Gaˬlaˆ paˇ ehˇ-eu, “Haw sheˇ. Gawˬ jawˬ dahˇ teˇ caw caw-ehˇ tsawˇ haˬ tiˬ deuˬ cehˆ ka leꞈ luꞈ-awˇ, ja maw maw-eu deuˬ-euˬ tsuiꞈ kaˆ aˇ bawˇ paw neh gaˇ ma caw caw-ehˇ kʼawꞈ, tiˬ deuˬ cehˆ gʼeh laꞈ luꞈ nga.”

³⁸ Gaˬlaˆ-ahˇ Zeˬbuˇlaˆ ehˇ nehˬ-eu, “Nawˬ neh lmˬ-euˬ dawˬ dawˬ ma kʼoeˇ deuˬ aˬ gaˇ iˇ jiˇ taˬ. Aˬ jeˬ miˇ neh aˬ dui maꞈ Aˬbiˇmaˬlehˆ-euˬ laꞈ oꞈ ya awꞈ ta lehˇ nawˇ ehˇ-euˬ maˬ ngeuˇ te loˇ. Tsawˇ haˬ heu deuˬ-aˬ, nawˬ neh ja bu ja doeˇ-awˇ yaˬ kʼehˇ yaˬ nehˬ-euˬ tsawˇ haˬ kʼoeˇ deuˬ meh. Doˆ-iˇ-awˇ aˬ yawꞈ maꞈ-ahˇ guiˇ deuˆ-iˇ-awˬ.”

³⁹ Gaˬlaˆ-aˬ, Sheˬkmˬ meuˬ-ahˇ jawˇ-eu tsawˇ haˬ deuˬ sheuˬ-awˇ, Aˬbiˇmaˬlehˆ-ahˇ deuˆ-euˬ meh.

⁴⁰ Gaˬlaˆ cehˆ-awˇ, aˬ yawꞈ-euˬ mehˬ nah Aˬbiˇmaˬlehˆ teh-euˬ meh. Aˬ yawꞈ maꞈ cehˆ ngeh, tsawˇ haˬ gʼawˬ mya ni bi deuˆ sehꞈ-awˇ, meuˬ-euˬ lahˇ kʼehˬ-ahˇ keuˆ ni shiˇ keuˆ taˬ-euˬ meh.

⁴¹ Aˬbiˇmaˬlehˆ-aˬ, Aˬluˇmaˬ meuˬ-ahˇ jawˇ-awˇ, Gaˬlaˆ aˬ ha mehˇ nmˇ-ahˇ Sheˬkmˬ meuˬ-ahˇ maˬ bi jawˇ ni Zeˬbuˇlaˆ neh teh dzeh nehˬ-euˬ meh.

⁴² Yawˬ nah yawˬ, Sheˬkmˬ meuˬ-ahˇ jawˇ-eu tsawˇ haˬ deuˬ meuˬ-euˬ laꞈ nyiˇ deh ga-ahˇ doˆ le-eu lehˇ lehˬ hmˬ luꞈ-eu Aˬbiˇmaˬlehˆ ya siˬ-euˬ meh.

⁴³ Kʼoeˇ ngeh, aˬ yawꞈ-euˬ tsawˇ haˬ sheuˬ-awˇ, smˬ muˇ biˇ-awˇ, deh ga-ahˇ dzuˇ zaꞈ-awˇ loꞈ-euˬ meh. Meuˬ laꞈ kʼoeˇ neh tsawˇ haˬ doˆ le gaˇ aˬ yawꞈ ya mawˇ ngeh, tsawˇ haˬ kʼoeˇ deuˬ-ahˇ sehꞈ-eu lehˇ, dzuˇ zaꞈ luꞈ gaˇ neh aˬ yawꞈ doˆ laˇ-euˬ meh.

⁴⁴ Aˬbiˇmaˬlehˆ hawˇ-eu aˬ yawꞈ-euˬ aˇ muˇ, meuˬ-euˬ lahˇ kʼehˬ-ahˇ loꞈ-iˇ-eu lehˇ cehˆ gʼeh-awˇ, dzeˇ-eu aˇ muˇ kʼoeˇ nyiˬ muˇ-aˬ, deh ga-ahˇ doˆ le-eu tsawˇ haˬ deuˬ-ahˇ deuˆ sehꞈ jiˇ-euˬ meh.

⁴⁵ Nah ga-ehˇ guiˇ deuˆ-awˇ, meuˬ kʼoeˇ meuˬ-ahˇ Aˬbiˇmaˬlehˆ deuˆ gʼaˬ-euˬ meh. Kʼoeˇ gaˇ jawˇ-eu tsawˇ haˬ deuˬ-ahˇ sehꞈ-awˇ, meuˬ-ahˇ laˆ luˬ laˆ seˇ nehˬ-awˇ, saˬ deuꞈ sehˬ-euˬ meh.

⁴⁶ Sheˬkmˬ meuˬ-euˬ nymˇ nymˇ ma laꞈ kʼoeˇ jawˇ-eu aˬ yuiꞈ aˬ tsu deuˬ gaˇ kawˆ kʼoeˇ ya gaˬ ngeh, ziꞈ dah ni tsoˆ taˬ-euˬ dawˬ ma saˇ jaˇ-euˬ Baˬlaˇ miˬyehˇ-euˬ nymˇ-ahˇ cehˆ uˇ leˇ-euˬ meh.

⁴⁷ Aˬ yawꞈ maꞈ kʼoeˇ gaˇ uiˬ leˇ-awˇ jawˇ-eu gaˇ kawˆ, Aˬbiˇmaˬlehˆ-ahˇ aˬ cawˬ ehˇ gaˬ-iˇ-euˬ meh.

⁴⁸ Kʼoeˇ ngeh, Aˬbiˇmaˬlehˆ aˬ yawꞈ-euˬ tsawˇ haˬ sheuˬ-awˇ, Zaˬlaˬmoˬ gawˬ jawˬ-ahˇ daˆ leˇ-euˬ meh. Kʼoeˇ gaˇ le keuˆ ngeh, aˬ yawꞈ deuˆ haˬ yuˇ-awˇ, aˇ bawˇ uˬ laꞈ tiˬ laꞈ deuˆ-awˇ baꞈ pu-ahˇ baꞈ-euˬ meh. Aˬ yawꞈ-euˬ tsawˇ haˬ deuˬ-ahˇ kʼawꞈ, aˬ yawꞈ kʼaˇ jahˇ-eu loꞈ-ehˇ yaw kawˇ-ehˇ jahˇ-awˬ lehˇ aˬ yawꞈ ehˇ nehˬ-euˬ meh.

⁴⁹ Tsawˇ haˬ yawˬ gʼaˬ na luꞈ, aˇ bawˇ uˬ laꞈ tiˬ gʼaˬ tiˬ laꞈ deuˆ baꞈ-awˇ, Aˬbiˇmaˬlehˆ-euˬ mehˬ nah caw teh kʼoꞈ leꞈ-awˇ, ziꞈ dah ni tsoˆ taˬ-euˬ nymˇ nymˇ ma-ahˇ gahˬ tehˬ-euˬ meh. Kʼoeˇ naˇ, miˬ dzaˬ dzah puiˆ-awˇ, nymˇ nymˇ ma laꞈ kʼoeˇ cehˆ zaꞈ-euˬ tsawˇ haˬ dawˬ tawˆ luꞈ shiˇ jiˇ-euˬ meh. Kʼaˬ dzeˇ zaˬ hawˇ-eu zaˬ miˬ zaˬ dawˬ tawˆ luꞈ, tiˬ heˇ gʼaˬ ehˇ gʼaˬ ni shiˇ-euˬ meh.

⁵⁰ Kʼoeˇ naˇ, Deˬbehˇ meuˬ-ahˇ Aˬbiˇmaˬlehˆ loꞈ jawˬ-iˇ-awˇ, deuˆ gʼaˬ-euˬ meh.

⁵¹ Meuˬ kʼoeˇ meuˬ laꞈ kʼoeˇ ziꞈ dah ni tsoˆ taˬ-euˬ nymˇ nymˇ ma tiˬ nymˇ jaˆ-awˇ, kʼaˬ dzeˇ zaˬ hawˇ-eu zaˬ miˬ zaˬ deuˬ maˬ ehˇ, aˬ yuiꞈ aˬ tsu deuˬ maˬ ehˇ, kʼoeˇ gaˇ cehˆ zaꞈ leˇ-euˬ meh. Aˬ yawꞈ maꞈ laˇ gʼoˆ mawˬ tawꞈ tawꞈ tehˬ yaꞈ-awˇ, nymˇ kʼaˬ boeˬ paw daˆ leˇ jiˇ-euˬ meh.

⁵² Nymˇ nymˇ goˇ kʼoeˇ nymˇ-ahˇ guiˇ deuˆ-eu lehˇ Aˬbiˇmaˬlehˆ laˇ keuˆ ngeh, nymˇ kʼoeˇ nymˇ-ahˇ miˬ dzaˬ dzah puiˆ-eu lehˇ laˇ gʼoˆ jaˆ gaˇ le-euˬ meh.

⁵³ Ehˇ kʼawꞈ, zaˬ miˬ zaˬ tiˬ gʼaˬ neh aˬ yawꞈ-euˬ uˬ duˬ-ahˇ lo lehˬ pyehˬ deh-awˇ, aˬ yawꞈ-euˬ uˬ duˬ kmˬ paˆ-iˇ-euˬ meh.

⁵⁴ Kʼoeˇ ngeh, aˬ yawꞈ-euˬ guiˇ deuˆ-eu keu ka deuˬ bi baꞈ-euˬ zaˬ guˬ tiˬ gʼaˬ-ahˇ aˬ yawꞈ yaw kawˇ-ehˇ kuˇ-awˇ, “Nawˬ-euˬ mi cehˇ gʼeu doˆ-awˇ ngaˬ-ahˇ sehꞈ-awˬ. Zaˬ miˬ zaˬ neh ngaˬ-ahˇ sehꞈ-euˬ meh lehˇ aˬ cawˬ maˬ bi ehˇ mawꞈ nya.” Zaˬ guˬ kʼoeˇ gʼaˬ aˬ yawꞈ-ahˇ mi cehˇ tsawˆ-awˇ, bi shiˇ-euˬ meh.

⁵⁵ Aˬbiˇmaˬlehˆ shiˇ-euˬ gaˇ Iˇsaˬleˬlaˆ tsawˇ haˬ deuˬ ya mawˇ ngeh, yawˬ gʼaˬ na luꞈ iˇ kʼahˇ-ahˇ gʼoꞈ-iˇ jiˇ-euˬ meh.

⁵⁶ Aˬ yawꞈ-euˬ mehˇ nmˇ shiꞈ tseˇ gʼaˬ-ahˇ sehꞈ-eu laꞈ kʼoeˇ, aˬ yawꞈ-euˬ aˬ da-ahˇ Aˬbiˇmaˬlehˆ mˇ bahˬ-euˬ iˬ baˇ aˇ poeˬ, Aˬbiˇmaˬlehˆ-ahˇ Miˬyehˇ kʼoeˇ loꞈ-ehˇ jahˇ kʼoꞈ nehˬ-euˬ meh.

⁵⁷ Giˇdoˬ-euˬ a li Yoˇdamˬ neh Sheˬkmˬ meuˬ-ahˇ jawˇ-eu tsawˇ haˬ deuˬ-ahˇ yaˬ kʼehˇ yaˬ-awˇ ehˇ nehˬ-euˬ loꞈ-ehˇ, Sheˬkmˬ tsawˇ haˬ deuˬ kʼawꞈ, aˬ yawꞈ maꞈ neh yaw haiˬ jeˬ mˇ-euˬ loꞈ-ehˇ paˇ ya daˬ ni, Miˬyehˇ kʼoeˇ loꞈ-ehˇ jahˇ kʼoꞈ nehˬ-euˬ meh.