Yaˇ kʼaˬ daˇ 5 - Akha

Diˬboˇlaˬ hawˇ-eu Baˬyehˇ-euˬ caˇ dawˬ

¹ Kʼoeˇ ngeh nah, Diˬboˇlaˬ hawˇ-eu Aˬbiˇnamˬ-euˬ aˬ li Baˬyehˇ aˬ nyaꞈ caˇ dawˬ heu bymˇ caˇ-euˬ meh.

² Sahˬpaˬ Miˬyehˇ-ahˇ ja ceuˬ-awˬ. Iˇsaˬleˬlaˆ tsawˇ haˬ deuˬ guiˇ deuˆ-eu noeˬ tsehˆ taˬ-awˇ, Nui ma keuˆ-eu laꞈ kʼoeˇ deuˆ-euˬ meh.

³ Sahˬ paˬ deuˬ-oˇ, naˇ haˬ-awˬ. Uˆ lahˇ-eu aˬ yuiꞈ aˬ tsu deuˬ-oˇ, naˇ haˬ-awˬ. Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ, ngaˇ caˇ dawˬ caˇ-awˇ ja ceuˬ ma. Tahˬ diˬ boe loe diˬ-awˇ ja ceuˬ ma.

⁴ Sahˬpaˬ Miˬyehˇ-oˇ, Siˇyaˆ gawˬ jawˬ deuˬ-ahˇ nawˇ byehˇ yaꞈ ngeh, Eˬdoˬ miˇ kʼahˬ laꞈ kʼoeˇ neh nawˇ doˆ laˇ ngeh, miˇ tsaˬ tahˬ kʼawˇ luˆ luˆ-ehˇ nyeh laˇ-awˇ, mˬ kʼoeˇ taˆ neh uˬ yehˇ yehˇ le-euˬ meh. Mˬ dmˇ-ahˇ iˇ cuꞈ yoeˇ doˆ le-euˬ meh.

⁵ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ mehˬ shi, Siˇnaˆ gawˬ jawˬ-euˬ Sahˬpaˬ Miˬyehˇ mehˬ shi, gawˬ jawˬ deuˬ miˇ luˆ luˆ-eu meh.

⁶ Aˬnaˆ-euˬ aˬ li Shamˬgaˬ yaw dehꞈ dehꞈ ngeh, Yeˬlaˇ yaw dehꞈ dehꞈ ngeh, baw gaꞈ deuˬ gaˇ jawˬ-ahˇ byehˇ-awˇ, iˇ tsehˆ laˇ tsehˆ-eu tsawˇ haˬ deuˬ gaˇ ma gaˇ coeˬ-ahˇ cah-euˬ meh.

⁷ Diˬboˇlaˬ-oˇ, Iˇsaˬleˬlaˆ-euˬ meuˬ deuˬ byehˇ dzeh taˬ-awˇ jaˆ luꞈ meh. Nawˇ maˬ oe kʼoeˇ keuˆ ni yawꞈ ngehꞈ-ehˇ jaˆ luꞈ meh. Iˇsaˬleˬlaˆ gʼaˇ duˬ aˬ ma tiˬ gʼaˬ loꞈ-ehˇ nawˇ oe-awˬ.

⁸ Miˬ yehˇ nui deuˬ-ahˇ Iˇsaˬleˬlaˆ tsawˇ haˬ deuˬ tseˇ geuꞈ ngeh, miˇ kʼahˬ heu kʼahˬ-ahˇ guiˇ keuˆ le-euˬ meh. Iˇsaˬleˬlaˆ tsawˇ haˬ oeˬ muiˇ gʼaˬ laꞈ kʼoeˇ, gahˬ hawˇ-eu dehˬ daˬ duˬ baꞈ-eu tsawˇ haˬ aˬ shuˇ gʼaˬ jawˇ ta.

⁹ Iˇsaˬleˬlaˆ yehˇ-euˬ aˬ yuiꞈ deuˬ hawˇ-eu, nui ma keuˆ-awˇ laˬ kʼaˬ tiˬ cehˇ guiˇ deuˆ-eu deuˬ nehˬ-ehˇ, ngaˇ nui ma taꞈ ma. Sahˬpaˬ Miˬyehˇ-ahˇ ja ceuˬ-awˬ.

¹⁰ Pyuˇ deuˬ ni gʼeh-eu mahˬ tahˬ laˆ dziˬ-awˇ, dziˬ gʼa kʼoeˇ taˆ nuiˇ luꞈ-eu deuˬ maˬ ehˇ, kʼaˇ iˇ kʼaˇ laˇ gaˇ kuiˇ zoˬ cah-eu deuˬ maˬ ehˇ, gaˇ kawˆ heu shaˇ noeˬ haw sheˇ.

¹¹ Naˇ haˬ yawˬ. Lah duˬ dawˬ peh uiˬ leˇ-awˇ lawꞈ gʼa luꞈ-eu deuˬ, Sahˬpaˬ Miˬyehˇ gʼaˬ leˇ-euˬ gaˇ kawˆ, Iˇsaˬleˬlaˆ tsawˇ haˬ deuˬ gʼaˬ leˇ-euˬ gaˇ kawˆ, aˬ yawꞈ maꞈ ja luꞈ meh. Kʼoeˇ naˇ, Sahˬpaˬ Miˬyehˇ-euˬ tsawˇ haˬ deuˬ, aˬ yawꞈ maꞈ-euˬ meuˬ-ahˇ neh doˆ-iˇ-euˬ meh.

¹² Sheuˬ gʼeh-awˬ Diˬboˇlaˬ-oˇ, sheuˬ gʼeh-awˬ. Sheuˬ gʼeh-awˬ. Dawˬ caˇ caˇ-awˇ sheuˬ gʼeh-awˬ. Aˬbiˇnamˬ-euˬ aˬ li Baˬyehˇ-oˇ, mehˬ hu paw iˇ-awˬ. Nawˬ neh nyehꞈ mi-euˬ yehˇ deuˬ-ahˇ sheuˬawˇ mehˬ hu iˇ-awˬ.

¹³ Kʼoeˇ naˇ, saˇ jaˇ ziꞈ-eu deuˬ yawˬ ha-euˬ aˬ yuiꞈ aˬ tsu jawˇ gaˇ oe-euˬ meh. Sahˬpaˬ Miˬyehˇ-euˬ tsawˇ haˬ deuˬ aˬ yawꞈ jawˇ gaˇ oe-awˇ, guiˇ deuˆ-eu lehˬ hmˬ dah-euˬ meh.

¹⁴ Eˇpaˬleˬ miˇ kʼahˬ-ahˇ neh deh kʼawꞈ paw, Beˬyaˬmiˬ tsawˇ jeuˬ hawˇ-eu aˬ yawꞈ maꞈ-euˬ tsawˇ haˬ mehˬ nah, aˬ yawꞈ maꞈ oe-euˬ meh. Aˬ yuiꞈ geuꞈ-awˇ uˆ lahˇ-eu deuˬ Maˬkiˬlaˇ-ahˇ neh oe ka-awˇ, yaw huiˬ yaw mahˇ deuˬ Zeˬbuˬluˬ-ahˇ neh oe ka-euˬ meh.

¹⁵ Iˇsaˬkaˬ tsawˇ jeuˬ aˬ yuiꞈ aˬ tsu deuˬ, Diˬboˇlaˬ nehˬ-ehˇ oe-euˬ meh. Iˇsaˬkaˬ oe-euˬ loꞈ-ehˇ Baˬyehˇ kʼawꞈ oe-awˇ, Baˬyehˇ-euˬ mehˬ nah deh kʼawꞈ-ahˇ, aˬ yawꞈ maꞈ iˇ gʼeh-euˬ meh. Ehˇ kʼawꞈ, Luˇbeˬ tsawˇ jeuˬ nyiˬ jeˬ noeˬ-awˇ, oe-eu maˬ oe-eu maˬ duˬ-a.

¹⁶ Aˬ jeˬ miˇ neh aˬ yawꞈ maꞈ-euˬ yawˇ nehˬ-ehˇ aˬ yawꞈ maꞈ jawˇ yaꞈ ta. Yawˇ bo-eu deuˬ yawˇ zaˬ jaˬ kʼoꞈ gaˇ naˇ haˬ-eu lehˇ jawˇ yaꞈ ta loˇ. Ngeuˇ meh. Luˇbeˬ tsawˇ jeuˬ nyiˬ jeˬ noeˬ meh. Oe-eu maˬ oe-euˬ maˬ duˬ-a.

¹⁷ Gaˆ tsawˇ jeuˬ Yawˇdaˬ lawˇ baˬ nahˇ ma doˆ kʼehˬ paw jawˇ yaꞈ-awˇ, Daˬ tsawˇ jeuˬ saˇ baoˬ dawˬ peh jawˇ yaꞈ-euˬ meh. Aˬshaˬ tsawˇ jeuˬ iˬ ma laˆ shaˆ lawˇ deh-ahˇ jawˇ yaꞈ-euˬ meh. Iˬ ma laˆ shaˆ lawˇ deh caw caw-ehˇ aˬ yawꞈ maꞈ jawˇ yaꞈ-euˬ meh.

¹⁸ Ehˇ kʼawꞈ, Zeˬbuˬluˬ tsawˇ haˬ hawˇ-eu Naˬtaˬliˇ tsawˇ haˬ deuˬ, shiˇ gaˇ maˬ guˆ ni guiˇ deuˆ-euˬ meh.

¹⁹ Meˬgiˇdoˬ lawˇ gawˆ dawˬ peh Taˬnehˇ meuˬ-ahˇ, sahˬ paˬ deuˬ guiˇ deuˆ le-euˬ meh. Kaˬnaˬ sahˬ paˬ deuˬ guiˇ deuˆ le kʼawꞈ, pyuˇ maˬ deuˆ za geuꞈ gʼeh nya-a.

²⁰ Mˬ kʼoeˇ taˆ cah luꞈ-eu aˬ guiˇ deuˬ, Siˇseˬlaˇ-ahˇ guiˇ deuˆ-euˬ meh.

²¹ Aˇ kʼoꞈ kʼawˆ laˇ-euˬ Giˇshoˬ lawˇ baˬ iˇ jeuˬ bi oe-awˇ, aˬ yawꞈ maꞈ-ahˇ yaˆ pyawˇ yaˆ dzeh-euˬ meh. Mehˬ hu paw ngaˇ deuˆ gʼeh leꞈ ma. Gʼaˬ ahˇ-eu laꞈ kʼoeˇ deuˆ gʼeh leꞈ ma.

²² Mahˬ deuˬ mahˬ pyehˬ pyehˬ gahˇ leꞈ-awˇ, aˬ yawꞈ maꞈ-euˬ kuiˇ sehˬ neh, miˇ tsaˬ-ahˇ deh deh-ehˇ oe-eu meh.

²³ Sahˬpaˬ Miˬyehˇ-euˬ gʼaˬ kʼehˇ ehˇ-eu, Meˬloˆ meuˬ-ahˇ yaˬ kʼehˇ yaˬ-awˬ. Yaˬ kʼehˇ yaˬ-awˬ. Yaˬ kʼehˇ yaˬ-awˬ. Kʼoeˇ gaˇ jawˇ-eu deuˬ-ahˇ yaˬ kʼehˇ yaˬ-awˬ. Sahˬpaˬ Miˬyehˇ-ahˇ aˬ yawꞈ maꞈ maˬ caw ba le-a. Aˬ yawꞈ gʼaˇ duˬ guiˇ maˬ deuˆ le-a.

²⁴ Zaˬ miˬ zaˬ deuˬ laꞈ kʼoeˇ aˬ cawˬ naˆ maˬ tseˇ guiˬ lahˬ huiˬ-eu gʼaˬ-aˬ, Kaˬnaˆ tsawˇ haˬ Heˬbeuˬ-euˬ miˬ zaˬ Yeˬlaˇ meh. Sehˬ gʼawˆ-ahˇ jawˇ-eu zaˬ miˬ zaˬ deuˬ laꞈ kʼoeˇ, aˬ cawˬ naˆ maˬ tseˇ aˬ yawꞈ guiˬ lahˬ huiˬ-eu meh.

²⁵ Siˇseˬlaˇ iˇ cuꞈ shaˇ ngeh, aˬ yawꞈ mawˇ neˇ aˬ coeˇ biꞈ-euˬ meh. Huiˬ dui dui-eu kʼmˬ maˬ ciˬ-awˇ, mawˇ neˇ aˬ coeˇ lehˇ hu ciˬ nehˬ-euˬ meh.

²⁶ Tiˬ paw laꞈ-ahˇ sehˬ gʼawˆ taꞈ cmˬ aˬ yawꞈ tuˆ tehˬ-awˇ, tiˬ paw laꞈ-ahˇ laꞈ saˇ maˇ-euˬ diˬ puˬ tuˆ tehˬ-euˬ meh. Siˇseˬlaˇ-euˬ uˬ duˬ-ahˇ aˬ yawꞈ taꞈ-awˇ, uˬ duˬ kmˬ taꞈ paˆ nehˬ-awˇ, uˬ duˬ taꞈ byoe doˆ-euˬ meh.

²⁷ Siˇseˬlaˇ pawˬ tsuiꞈ paw dmˬ ga dmˬ-awˇ, Yeˬlaˇ-euˬ aˬ kuiˇ dawˬ pehˬ-ahˇ coˬ lah-euˬ meh. Yeˬlaˇ-euˬ aˬ kuiˇ dawˬ peh Siˇseˬlaˇ pawˬ tsuiꞈ pawˬ dmˬ ga dmˬ-awˇ, miˇ tsa coˬ lah-awˇ shiˇ tsehˆ-euˬ meh.

²⁸ Siˇseˬlaˇ-euˬ aˬ ma laˇ gʼoˆ zaˬ-ahˇ cu hu-awˇ, shmˇ kaˇ naˇ kʼah jawˇ-awˇ loꞈ luꞈ meh. Aˬ yawꞈ ehˇ-eu, “Aˬ jeˬ miˇ neh aˬ yawꞈ-euˬ mahˬ laˆ lawˬ nymˬ-mˇ keuˆ ni maˬ gʼoꞈ keuˆ laˇ ta. Aˬ jeˬ miˇ neh aˬ yawꞈ-euˬ mahˬ deuˬ teu naˆ naˆ-ehˇ myaꞈ ta.”

²⁹ Tsawˇ gahˇ ahˇ dui dui-eu zaˬ miˬ zaˬ deuˬ aˬ yawꞈ-ahˇ ehˇ-awˇ, aˬ yawꞈ yawˬ haˇ yawˬ ha ehˇ poˆ poˆ-eu,

³⁰ “Aˬ yawꞈ maꞈ myawˬ gahˬ deuˆ za-awˇ biˇ geuꞈ luꞈ-eu jeˬ nga. Yehˇ tiˬ gʼaˬ gʼaˇ duˬ zaˬ miˬ aˬ buˇ nyiˬ gʼaˬ, Siˇseˬlaˇ gʼaˇ duˬ muiˬ dui dui-eu mehˬ tsoeˬ, Sahˬ paˬ miˬ zaˬ-euˬ kawˬ lahˇ-ahˇ dah-eu aˇ boꞈ boꞈ taˬ-euˬ lawˇ dah heu deuˬ biˇ geuꞈ luꞈ-eu jeˬ nga.”

³¹ Sahˬpaˬ Miˬyehˇ-oˇ, nawˬ-ahˇ muiˇ-eu deuˬ dawˬ tawˆ luꞈ, kʼoeˇ loꞈ-ehˇ shiˇ luꞈ-uˇ. Ehˇ kʼawꞈ, nawˬ-eu cawˬ deuˬ-aˬ, doˆ laˇ luꞈ-eu nahˇ ma loꞈ-ehˇ bya luꞈ-uˇ.” Kʼoeˇ naˇ, miˇ kʼahˬ kʼoeˇ kʼahˬ laꞈ kʼoeˇ, oeˬ tseˇ kʼoꞈ byah ni guiˇ maˬ deuˆ-ehˇ nui saˇ oꞈ-eu jeˬ jaˆ-euˬ meh.