Yaˇ kʼaˬ daˇ 4 - Akha

Diˬboˇlaˬ hawˇ-eu Baˬyehˇ

¹ Eˬhuˇdaˆ shiˇ dzeuˇ ngeh, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ mehˬ shi iˬ baˇ paˇ mˇ poˆ-euˬ meh.

² Kʼoeˇ miˇ neh, Sahˬpaˬ Miˬyehˇ-aˬ, Haˬzawˇ meuˬ-ahˇ jawˇ-awˇ uˆ lahˇ-eu Kaˬnaˬ sahˬ paˬ Yaˬbiˬ-ahˇ, Iˇsaˬleˬlaˆ tsawˇ haˬ-ahˇ bi deuˆ gʼaˬ-euˬ meh. Aˬ yawꞈ-euˬ guiˇ maꞈ kʼoeˇ taˆ aˬ yuiꞈ geuꞈ-eu gʼaˬ-aˬ, Gawˇiˆ miˇ kʼahˬ Haˬloˇshehˆ meuˬ-ahˇ jawˇ-eu Siˇseˬlaˇ pyeuꞈ-eu meh.

³ Yaˬbiˬ-aˬ, shmˇ mahˬ laˆ lawˬ gʼoeˬ yaˇ laˇ jawˇ-awˇ, Iˇsaˬleˬlaˆ tsawˇ haˬ-ahˇ gʼawˬ shaˬ maˬ gaˬ ni kʼehˬ nehˬ kʼaˆ nehˬ-eu laꞈ kʼoeˇ, nyiˬ tseˇ kʼoꞈ uˆ lahˇ-euˬ meh. Kʼoeˇ naˇ, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ, caw ba le-awˬ lehˇ guˇ guˇ-ehˇ ngoeˇ-euˬ meh.

⁴ Kʼoeˇ ngeh yamˬ-ahˇ, Laˬpiˇdoˆ-euˬ miˬ zaˬ Diˬboˇlaˬ-aˬ, Miˬyehˇ gʼaˇ duˬ ngehˬ dah-eu gʼaˬ pyeuꞈ-awˇ, Iˇsaˬleˬlaˆ tsawˇ haˬ deuˬ-ahˇ yaˇ kʼaˬ daˇ nehˬ-eu gʼaˬ geuꞈ luꞈ-eu meh.

⁵ Eˇpaˬleˬ miˇ kʼahˬ gawˬ jawˬ gawˬ duˇ-ahˇ, Laˬmahˬ meuˬ hawˇ-eu Beˬdeˬlaˇ meuˬ yaw kaˬ-ahˇ jaˆ-eu daoˇ aˇ bawˬ tiˬ bawˬ dawˬ pehˬ-ahˇ aˬ yawˬ jawˇ-awˇ, Iˇsaˬleˬlaˆ tsawˇ haˬ deuˬ kʼoeˇ gaˇ le-awˇ yaˇ kʼaˬ bi daˇ-euˬ meh.

⁶ Tiˬ nah keuˆ laˇ ngeh, Naˬtaˬliˇ miˇ kʼahˬ Geˬdeˬshaˆ meuˬ-ahˇ jawˇ-eu Aˬbiˇnamˬ-euˬ aˬ li Baˬyehˇ jawˇ gaˇ aˬ yawꞈ iˇ-awˇ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ heu loꞈ-ehˇ dawˬ biꞈ leꞈ-euˬ meh. ‘Naˬtaˬliˇ tsawˇ jeuˬ hawˇ-eu Zeˬbuˬluˬ tsawˇ jeuˬ laꞈ kʼoeˇ, tsawˇ haˬ tiˬ muiˇ gʼaˬ sheuˬ-awˇ, Taˬbawˬ gawˬ jawˬ-ahˇ le-awˬ.

⁷ Giˇshoˬ lawˇ baˬ-ahˇ nawˬ-ahˇ guiˇ bi deuˆ le-eu gʼaˇ duˬ, sahˬ paˬ Yaˬbiˬ-euˬ guiˇ maꞈ kʼoeˇ taˆ aˬ yuiꞈ geuꞈ-awˇ uˆ lahˇ-eu Siˇseˬlaˇ-ahˇ ngaˇ sheuˬ leꞈ ma. Aˬ yawꞈ-aˬ, mahˬ laˆ lawˬ deuˬ hawˇ-eu yehˇ deuˬ jawˇ kʼawꞈ, ngaˇ nawˬ-ahˇ aˬ yawꞈ-ahˇ bi gʼaˬ leˇ ma’ lehˇ dawˬ biꞈ le-euˬ meh.”

⁸ Kʼoeˇ ngeh, Baˬyehˇ ehˇ-eu, “Nawˇ ngaˬ nehˬ-ehˇ le naˇ, ngaˇ le ma. Ehˇ kʼawꞈ, nawˇ ngaˬ nehˬ-ehˇ maˬ le naˇ, ngaˇ maˬ le.”

⁹ Diˬboˇlaˬ ehˇ-eu, “Toˆ-ehˇ ngeuˇ naˇ, nawˬ nehˬ-ehˇ ngaˇ le ma. Ehˇ kʼawꞈ, guiˇ deuˆ-eu gʼaˬ leˇ-eu miˇ neh, nawˇ tsawˇ myahˇ za tehꞈ-a lehˇ taˬ noeˬ. Aˬ jeˬ miˇ neh ehˇ naˇ, Siˇseˬlaˇ-ahˇ zaˬ miˬ zaˬ tiˬ gʼaˬ-euˬ aˬ laꞈ laꞈ kʼoeˇ a nehˬ tehꞈ-a.” Kʼoeˇ naˇ, Diˬboˇlaˬ-aˬ, Baˬyehˇ nehˬ-ehˇ Geˬdeˬshaˆ meuˬ-ahˇ le-euˬ meh.

¹⁰ Zeˬbuˬluˬ tsawˇ jeuˬ hawˇ-eu Naˬtaˬliˇ tsawˇ jeuˬ-ahˇ Geˬdeˬshaˆ meuˬ-ahˇ Baˬyehˇ sheuˬ gʼeh ngeh, tsawˇ haˬ tiˬ muiˇ gʼaˬ aˬ yawꞈ mehˬ nah caw teh gʼeh-euˬ meh. Diˬboˇlaˬ kʼawꞈ, aˬ yawꞈ nehˬ-ehˇ le-euˬ meh.

¹¹ Kʼoeˇ ngeh, Kaˬnaˆ tsawˇ jeuˬ Heˬbeuˬ-aˬ, Zaˬnaˬneˬ meuˬ-euˬ tsuiꞈ kaˆ aˇ bawˇ dawˬ peh, Geˬdeˬshaˆ meuˬ dawˬ peh tehˬ ni sehˬ gʼawˆ gʼawˆ-awˇ jawˇ luꞈ-eu meh. Aˬ yawꞈ-aˬ, Moˇseˬ-euˬ oeˇ kʼaˬ Hawˇbaˆ-euˬ zaˬ deuˬ uˆ deuˬ pyeuꞈ-eu Kaˬnaˆ tsawˇ haˬ deuˬ nehˬ-ehˇ gʼawˬ-iˇ-awˇ jawˇ doˆ le-euˬ meh.

¹² Taˬbawˬ gawˬ jawˬ kʼoeˇ taˆ Baˬyehˇ daˆ leˇ-euˬ gaˇ, Siˇseˬlaˇ ya siˬ ngeh,

¹³ aˬ yawꞈ-euˬ shmˇ mahˬ laˆ lawˬ gʼoeˬ yaˇ laˇ hawˇ-eu aˬ yawꞈ-euˬ tsawˇ haˬ dawˬ tawˆ luꞈ-ahˇ kuˇ-awˇ, Gawˇiˆ miˇ kʼahˬ Haˬloˇshehˆ meuˬ-ahˇ neh, Giˇshoˬ lawˇ baˬ-ahˇ pyehˬ gʼeh-euˬ meh.

¹⁴ Kʼoeˇ naˇ, Baˬyehˇ-ahˇ Diˬboˇlaˬ ehˇ nehˬ-eu, “Iˇ-awˬ. Sahˬpaˬ Miˬyehˇ nawˬ-ahˇ sheuˬ gʼeh luꞈ meh. Iˬ nah aˬ yawꞈ nawˬ-ahˇ Siˇseˬlaˇ-ahˇ bi gʼaˬ leˇ laꞈ tehꞈ-a.” Kʼoeˇ ngeh, Baˬyehˇ-aˬ, aˬ yawꞈ-euˬ tsawˇ haˬ tiˬ muiˇ gʼaˬ sheuˬ-awˇ, Taˬbawˬ gawˬ jawˬ-ahˇ neh zaꞈ ka-iˇ-euˬ meh.

¹⁵ Baˬyehˇ hawˇ-eu aˬ yawꞈ-euˬ guiˇ maꞈ deuˬ guiˇ deuˆ-iˇ ngeh, Siˇseˬlaˇ hawˇ-eu aˬ yawꞈ-euˬ mahˬ laˆ lawˬ dawˬ tawˆ luꞈ-ahˇ maˬ ehˇ, aˬ yawꞈ-euˬ tsawˇ haˬ deuˬ-ahˇ maˬ ehˇ, Sahˬpaˬ Miˬyehˇ laˆ bahˬ laˆ lahˇ nehˬ-euˬ meh. Siˇseˬlaˇ-aˬ, aˬ yawꞈ-euˬ mahˬ laˆ lawˬ-ahˇ neh tsawˬ ka-awˇ, kuiˇ zoˬ cehˆ-euˬ meh.

¹⁶ Baˬyehˇ-aˬ, mahˬ laˆ lawˬ kʼoeˇ deuˬ hawˇ-eu yehˇ kʼoeˇ deuˬ-ahˇ, Gawˇiˆ miˇ kʼahˬ Haˬloˇshehˆ meuˬ-ahˇ keuˆ ni teh-awˇ, Siˇseˬlaˇ-euˬ guiˇ guiˇ maꞈ maꞈ lah-ehˇ, tiˬ gʼaˬ-iˬ maˬ law-iˇ ni bi sehꞈ jiˇ-euˬ meh.

¹⁷ Siˇseˬlaˇ-aˬ, Kaˬnaˆ tsawˇ haˬ Heˬbeuˬ-euˬ miˬ zaˬ pyeuꞈ-eu Yeˬlaˇ-euˬ sehˬ gʼawˆ-ahˇ cehˆ-euˬ meh. Aˬ jeˬ miˇ neh ehˇ naˇ, Haˬzawˇ sahˬ paˬ Yaˬbiˬ-aˬ, Heˬbeuˬ-euˬ miˬ sawˇ zaˬ deuˬ-ahˇ gʼoe-euˬ meh.

¹⁸ Yeˬlaˇ gʼaˬ Siˇseˬlaˇ-ahˇ ha laˬ-iˇ-awˇ ehˇ-eu, “Laˇ-awˬ. Ngaˬ-eu sehˬ gʼawˆ-ahˇ uˇ laˇ-awˬ. Taˬ guˆ.” Kʼoeˇ ngeh, aˬ yawꞈ le uˇ-awˇ, saˬ paˇ lawˆ kaˬ taw taˬ-euˬ naˇ kʼah paw aˬ yawꞈ-ahˇ Yeˬlaˇ sheuˬ zaꞈ taˬ-euˬ meh.

¹⁹ Aˬ yawꞈ ehˇ-eu, “Ngaˬ-ahˇ iˇ cuꞈ ui cuiˆ bi dawˇ laꞈ sheˇ. Iˇ cuꞈ mehˬ dui dui nya.” Yeˬlaˇ gʼeh, mawˇ neˇ aˬ coeˇ ahˇ-eu shaˬ kʼoˆ pehˇ zeuˇ ciˬ nehˬ-awˇ bi dawˇ-awˇ, paˇ sheuˬ zaꞈ nehˬ-euˬ meh.

²⁰ Kʼoeˇ naˇ, Yeˬlaˇ-ahˇ aˬ yawꞈ ehˇ nehˬ-eu, “Sehˬ gʼawˆ gʼoˆ kʼehˬ-ahˇ yawꞈ-awˇ jawˇ-awˬ. Heu gaˇ tsawˇ haˬ tiˬ gʼaˬ na jawˇ ta loˇ lehˇ aˬ cawˬ naˇ haˬ laˇ naˇ, Maˬ jawˇ-a lehˇ ehˇ kʼoꞈ nehˬ-awˬ.”

²¹ Siˇseˬlaˇ-aˬ, gʼaˬ doeˇ cehˆ doeˇ dui dui-eu miˇ neh, yuꞈ kʼaˆ-euˬ meh. Kʼoeˇ ngeh, Yeˬlaˇ-aˬ, diˬ puˬ tiˬ hmˬ hawˇ-eu, sehˬ gʼawˆ taꞈ cmˬ tiˬ hmˬ yuˇ-awˇ, aˬ yawꞈ jawˇ gaˇ aˬ za za-ehˇ iˇ-awˇ, uˬ duˬ-ahˇ taꞈ cmˬ diˬ-awˇ, miˇ tsa diˬ tsoˆ gʼeh-euˬ meh.

²² Siˇseˬlaˇ-ahˇ Baˬyehˇ poˆ le ngeh, Yeˬlaˇ aˬ yawꞈ-ahˇ ha laˬ-iˇ-awˇ ehˇ nehˬ-eu, “Laˇ-awˬ. Nawˇ poˆ luꞈ-eu gʼaˬ-ahˇ ngaˇ mehˬ nehˬ nyaˇ.” Yeˬlaˇ nehˬ-ehˇ aˬ yawꞈ uˇ leˇ ngeh, Siˇseˬlaˇ-euˬ uˬ duˬ-ahˇ sehˬ gʼawˆ taꞈ cmˬ taꞈ tsoˆ taˬ-awˇ, yaw shiˇ-ehˇ ga gaˇ ya mawˇ-euˬ meh.

²³ Kʼoeˇ ngeh nah, Sahˬpaˬ Miˬyehˇ Iˇsaˬleˬlaˆ tsawˇ haˬ deuˬ-ahˇ, Kaˬnaˬ sahˬ paˬ Yaˬbiˬ-ahˇ bi gʼaˬ leˇ-euˬ meh.

²⁴ Iˇsaˬleˬlaˆ tsawˇ haˬ deuˬ-aˬ, sahˬ paˬ Yaˬbiˬ naˆ maˬ tseˇ tiˬ nah saˇ-i tiˬ nah kʼaˆ dzehˬ laˇ-awˇ, aˬ yawꞈ-ahˇ laˆ luˬ laˆ seˇ nehˬ-euˬ meh.