Yaˇ kʼaˬ daˇ 3 - Akha

Miˇ kʼahˬ kʼoeˇ kʼahˬ laꞈ kʼoeˇ dzeˇ-eu tsawˇ jeuˬ deuˬ

¹ Kʼoeˇ naˇ, Kaˬnaˬ miˇ kʼahˬ laꞈ kʼoeˇ guiˇ maˬ deuˆ haw-euˬ Iˇsaˬleˬlaˆ tsawˇ haˬ deuˬ-ahˇ lawˬ haw-eu gʼaˇ duˬ, tsawˇ jeuˬ tiˬ paˆ na deuˬ-ahˇ Sahˬpaˬ Miˬyehˇ maˬ teh doˆ ni bi dzeˇ yaꞈ-euˬ meh.

² Iˇsaˬleˬlaˆ tsawˇ jeuˬ aˬ yawꞈ jo yawꞈ-ahˇ, guiˇ deuˆ-eu gaˇ kawˆ mehˬ nehˬ mawꞈ-eu miˇ neh, aˬ yawꞈ kʼoeˇ loꞈ-ehˇ mˇ-euˬ meh. Kʼaˆ tiˬ paˆ, guiˇ tiˬ jawˇ-iˬ maˬ deuˆ haw-euˬ tsawˇ haˬ-ahˇ guiˇ deuˆ-eu gaˇ kawˆ mehˬ nehˬ mawꞈ-eu meh.

³ Miˇ kʼahˬ kʼoeˇ kʼahˬ laꞈ kʼoeˇ dzeˇ yaꞈ-euˬ deuˬ-aˬ, Piˇliˇtiˆ meuˬ ngaˬ meuˬ, Kaˬnaˬ tsawˇ jeuˬ dawˬ tawˆ luꞈ hawˇ-eu, Siˇdoˬ tsawˇ jeuˬ uˬ taꞈ Baˬlaˇheˬlaˬmoˬ gawˬ jawˬ hawˇ-eu Haˬmaˆ gʼaˬ lahˇ-ahˇ keuˆ ni jaˆ-eu Leˬbaˬnoˬ gawˬ jawˬ deuˬ-ahˇ jawˇ-eu Hiˇbiˇ tsawˇ haˬ deuˬ meh.

⁴ Moˇseˬ-ahˇ gʼoe-awˇ, Iˇsaˬleˬlaˆ tsawˇ haˬ deuˬ-euˬ aˬ poeˬ aˬ bawˇ deuˬ-ahˇ Sahˬpaˬ Miˬyehˇ neh biꞈ-euˬ zahˇ dawˬ kʼoꞈ dawˬ deuˬ-ahˇ Iˇsaˬleˬlaˆ tsawˇ haˬ deuˬ naˇ haˬ geuꞈ nga loˇ lehˇ, tsawˇ jeuˬ heu deuˬ-ahˇ gʼoe-awˇ lawˬ haw-eu lehˇ lehˬ hmˬ taˬ-euˬ meh.

⁵ Iˇsaˬleˬlaˆ tsawˇ haˬ deuˬ-aˬ, Kaˬnaˬ tsawˇ jeuˬ, Heˬtaˆ tsawˇ jeuˬ, Aˬmawˇliˆ tsawˇ jeuˬ, Paˬyehˆ tsawˇ jeuˬ, Hiˇbiˇ tsawˇ jeuˬ hawˇ-eu , Yeˬbuˇ tsawˇ jeuˬ heu deuˬ nehˬ-ehˇ jawˇ-euˬ meh.

⁶ Tsawˇ jeuˬ kʼoeˇ deuˬ nehˬ-ehˇ sheuˬ dahˬ dzaˬ taꞈ-awˇ, tsawˇ jeuˬ kʼoeˇ deuˬ-euˬ miˬyehˇ deuˬ-ahˇ uˬ duˬ tahˬ-euˬ meh.

Awˇdaˬneˬlaˇ

⁷ Iˇsaˬleˬlaˆ tsawˇ haˬ deuˬ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ngehˇ-awˇ, Baˬlaˇ hawˇ-eu Aˬsheˇlaˬ tahˬ pahˬ aˬ ma mawˇ kawˇ-ahˇ uˬ duˬ tahˬ-euˬ meh.

⁸ Kʼoeˇ miˇ neh, Iˇsaˬleˬlaˆ tsawˇ jeuˬ-ahˇ Sahˬpaˬ Miˬyehˇ nui ma pehˇ laˇ-awˇ, Maˬsoˬpoˬtaˬmiˇ sahˬ paˬ Kuˇshaˬliˇshaˬdeˬ neh aˬ yawꞈ maꞈ-ahˇ guiˇ bi deuˆ gʼaˬ-awˇ, yehꞈ kʼoꞈ byah ni bi uˆ lahˇ-euˬ meh.

⁹ Kʼoeˇ naˇ, Iˇsaˬleˬlaˆ tsawˇ haˬ deuˬ ngoeˇ ngoeˇ-ehˇ guˇ-eu miˇ neh, aˬ yawꞈ maꞈ-ahˇ bi ka kʼoꞈ-eu gʼaˇ duˬ, Sahˬpaˬ Miˬyehˇ tsawˇ haˬ tiˬ gʼaˬ pyehˬ gʼeh-euˬ meh. Tsawˇ haˬ kʼoeˇ gʼaˬ-aˬ, Gaˬlehˆ-euˬ aˬ nyiˇ Gaˬnaˆ-euˬ aˬ li Awˇdaˬneˬlaˇ pyeuꞈ-eu meh.

¹⁰ Sahˬpaˬ Miˬyehˇ-euˬ yaw sahˇ aˬ yawꞈ kʼoeˇ taˆ zaꞈ le-awˇ, Iˇsaˬleˬlaˆ tsawˇ jeuˬ-euˬ aˬ yuiꞈ aˬ tsu bi pyeuꞈ laˇ-euˬ meh. Awˇdaˬneˬlaˇ guiˇ deuˆ-iˇ-awˇ, Sahˬpaˬ Miˬyehˇ neh aˬ yawꞈ-ahˇ, Maˬsoˬpoˬtaˬmiˇ sahˬ paˬ-ahˇ bi gʼaˬ leˇ-euˬ meh.

¹¹ Miˇ kʼahˬ kʼoeˇ kʼahˬ laꞈ kʼoeˇ, oeˬ tseˇ kʼoꞈ keuˆ ni guiˇ maˬ deuˆ-ehˇ nui saˇ oꞈ-euˬ meh. Kʼoeˇ naˇ, Awˇdaˬneˬlaˇ shiˇ-euˬ meh.

Eˬhuˇdaˆ

¹² Iˇsaˬleˬlaˆ tsawˇ jeuˬ, Sahˬpaˬ Miˬyehˇ-euˬ mehˬ shi iˬ baˇ mˇ poˆ-euˬ meh. Kʼoeˇ miˇ neh, Sahˬpaˬ Miˬyehˇ-aˬ, Mawˇbaˆ sahˬ paˬ Eˇgaˬloˬ-ahˇ, Iˇsaˬleˬlaˆ tsawˇ jeuˬ naˆ maˬ tseˇ gʼaˬ bi kʼaˆ dzehˬ laˇ-euˬ meh.

¹³ Eˇgaˬloˬ-aˬ, Aˬmoˬ tsawˇ haˬ deuˬ hawˇ-eu Aˬmaˬlehˇ tsawˇ haˬ deuˬ nehˬ-ehˇ gm leˇ-awˇ, Iˇsaˬleˬlaˆ tsawˇ haˬ deuˬ-ahˇ deuˆ gʼaˬ-awˇ, Saˬloˬ aˇ bawˇ bawˇ yaˇ-euˬ meuˬ pyeuꞈ-eu Yeˬliˇkoˇ meuˬ-ahˇ deuˆ za geuꞈ-euˬ meh.

¹⁴ Eˇgaˬloˬ uˆ lahˇ-euˬ uˬ moˆ, Iˇsaˬleˬlaˆ tsawˇ haˬ deuˬ tseˇ yehꞈ kʼoꞈ jawˇ-euˬ meh.

¹⁵ Kʼoeˇ naˇ, Iˇsaˬleˬlaˆ tsawˇ haˬ deuˬ ngoeˇ ngoeˇ-ehˇ guˇ-eu miˇ neh, aˬ yawꞈ maꞈ-ahˇ bi ka kʼoꞈ-eu gʼaˇ duˬ, Sahˬpaˬ Miˬyehˇ tsawˇ haˬ tiˬ gʼaˬ pyehˬ gʼeh-euˬ meh. Tsawˇ haˬ kʼoeˇ gʼaˬ-aˬ, Beˬyaˬmiˬ tsawˇ jeuˬ Geˬlaˬ-euˬ aˬ li Eˬhuˇdaˆ aˇ ca pyeuꞈ-eu meh. Iˇsaˬleˬlaˆ tsawˇ haˬ deuˬ-aˬ, Eˬhuˇdaˆ-ahˇ kʼehˇ-awˇ, Mawˇbaˆ sahˬ paˬ Eˇgaˬloˬ jawˇ gaˇ laꞈ sawˬ bi sha ha-iˇ-euˬ meh.

¹⁶ Eˬhuˇdaˆ-aˬ, mi seuˬ nyiˬ pyawˬ tsoꞈ-awˇ, tiˬ caˆ mahˇ-eu mi cehˇ tiˬ kahˇ yawˬ haˇ yawˬ ha tehˆ-awˇ, saˬ pyaˬ aˇ maˇ pyaˬ-ahˇ paꞈ tawꞈ taˬ-awˇ, mehˬ tsoeˬ dm kaˬ taˬ-euˬ meh.

¹⁷ Tsuˇ dui dui-eu Eˇgaˬloˬ jawˇ gaˇ aˬ yawꞈ laꞈ sawˬ yuˇ gʼeh nehˬ-euˬ meh.

¹⁸ Eˬhuˇdaˆ laꞈ sawˬ biꞈ nehˬ gʼaˬ ngeh, laꞈ sawˬ baꞈ ha laˇ-euˬ tsawˇ haˬ deuˬ-ahˇ, Gʼoꞈ-iˇ-awˬ lehˇ Eˇgaˬloˬ ehˇ nehˬ-euˬ meh.

¹⁹ Ehˇ kʼawꞈ, Eˬhuˇdaˆ-aˬ, Giˇlaˇgaˬlaˇ-euˬ dawˬ peh, kʼaˬ lo mawˇ kawˇ taꞈ taˬ-euˬ jawˇ duˬ-ahˇ neh, Eˇgaˬloˬ jawˇ gaˇ paˇ gʼoꞈ poˆ laˇ-awˇ, “Huiˬ-eu mahˇ-eu sahˬ paˬ-oˇ, nawˬ-ahˇ ciˬ cuˇ ni ehˇ nehˬ paˬ-ehˇ gʼeh-eu gaˇ kawˆ jaˆ-eu ma” lehˇ ehˇ nehˬ-euˬ meh. Kʼoeˇ naˇ, “Naw maꞈ doˆ-iˇ jiˇ sheˇ” lehˇ, kʼoeˇ gaˇ jawˇ-eu zaˬ kʼaˆ deuˬ-ahˇ sahˬ paˬ ehˇ ngeh, dawˬ tawˆ luꞈ doˆ-iˇ jiˇ-euˬ meh.

²⁰ Kʼoeˇ naˇ, laꞈ taˆ tiˆ-ahˇ jaˆ-eu tsehꞈ ngeuˇ ni gʼeh-eu lawˆ-ahˇ tiˬ gʼaˬ tehꞈ-ehˇ nuiˇ luꞈ-eu sahˬ paˬ jawˇ gaˇ Eˬhuˇdaˆ le-awˇ, “Miˬyehˇ neh nawˬ-ahˇ bi ehˇ gaˬ le-euˬ gaˇ kawˆ jaˆ-eu ma” lehˇ ehˇ nehˬ ngeh, sahˬ paˬ tuˇ-awˇ, gawˬ yawꞈ yawꞈ-euˬ meh.

²¹ Eˬhuˇdaˆ-aˬ, saˬ pyaˬ aˇ maˇ paw pyaˬ-ahˇ paꞈ tawꞈ taˬ-euˬ mi cehˇ-ahˇ aˇ caˇ laꞈ neh gʼawˇ doˆ-awˇ, sahˬ paˬ-euˬ uˬ maˆ-ahˇ tsawˆ tsoˆ nehˬ-euˬ meh.

²² Mi cehˇ mi yoeˬ tiˬ li tsawˆ ahˇ gʼeh-awˇ, mi cehˇ kahˇ lah-ehˇ tsiˇ lehꞈ leˇ-euˬ meh. Naˇ kʼah paw tsawˆ byoe doˆ-awˇ, aˬ kuiˇ nyiˬ kahˬ yaw kaˬ-ahˇ tsawˆ byoe doˆ leꞈ-euˬ mi cehˇ kʼoeˇ kahˇ-ahˇ, Eˬhuˇdaˆ maˬ gʼeu doˆ ni byehˇ yaꞈ-euˬ meh.

²³ Kʼoeˇ naˇ, Eˬhuˇdaˆ laꞈ nyiˇ doˆ le-awˇ, laˇ gʼoˆ piˬ tehˬ-awˇ, mawˬ tawꞈ tawꞈ tehˬ yaꞈ-euˬ meh.

²⁴ Aˬ yawꞈ doˆ-iˇ gʼaˬ-awˇ, zaˬ kʼaˆ deuˬ gʼoꞈ haw leˇ ngeh, laˇ gʼoˆ mawˬ tawꞈ tawꞈ tehˬ taˬ-euˬ gaˇ ya mawˇ-euˬ meh. Ehˇ kʼawꞈ, laꞈ kʼoeˇ paw sahˬpaˬ gʼaˬ naˬ naˬ luꞈ-eu nga lehˇ aˬ yawꞈ maꞈ noeˬ-euˬ meh.

²⁵ Aˬ yawꞈ maꞈ kʼaˇ loꞈ coeˇ-eu loꞈ kʼawꞈ, laˇ gʼoˆ maˬ pah le-eu miˇ neh, mawˬ tawꞈ kahˬ yuˇ-awˇ, laˇ gʼoˆ pah haw-euˬ meh. Kʼoeˇ naˇ, aˬ yawꞈ maꞈ-euˬ sahˬ paˬ yaw shiˇ-ehˇ ga gaˇ aˬ yawꞈ maꞈ ya mawˇ-euˬ meh.

²⁶ Aˬ yawꞈ maꞈ kʼoeˇ loꞈ-ehˇ loꞈ loꞈ-ehˇ jawˇ ngeh, Eˬhuˇdaˆ gaˇ mahˇ kaˬ gaˇ iˇ keuˆ-euˬ meh. Kʼaˬ lo mawˇ kawˇ taꞈ taˬ-euˬ jawˇ duˬ iˇ dzeuˇ-awˇ, Siˇlahˬ meuˬ-ahˇ cehˆ keuˆ-awˇ, buˬ-iˇ-euˬ meh.

²⁷ Eˇpaˬleˬ miˇ kʼahˬ gawˬ jawˬ gawˬ duˇ-ahˇ aˬ yawꞈ cehˆ keuˆ ngeh, Iˇsaˬleˬlaˆ tsawˇ haˬ deuˬ-ahˇ daˇ heh baw gaˬ nehˬ-awˇ, guiˇ deuˆ-eu gʼaˇ duˬ kuˇ-euˬ meh. Kʼoeˇ naˇ, gawˬ duˇ-ahˇ neh, aˬ yawꞈ maꞈ-ahˇ aˬ yawꞈ sheuˬ ka gʼeh-euˬ meh.

²⁸ Aˬ yawꞈ ehˇ-eu, “Ngaˬ-euˬ mehˬ nah caw teh laˇ-awˬ. naw maꞈ-ahˇ muiˇ-eu Mawˇbaˆ tsawˇ haˬ deuˬ-ahˇ, Sahˬpaˬ Miˬyehˇ neh bi gʼaˬ leˇ nehˬ laꞈ-euˬ meh.” Kʼoeˇ ngeh, aˬ yawꞈ maꞈ Eˬhuˇdaˆ-euˬ mehˬ nah iˇ ka gʼeh-awˇ, Mawˇbaˆ tsawˇ haˬ Yawˇdaˬ lawˇ baˬ tsehˆ duˬ-ahˇ, tiˬ gʼaˬ-iˬ maˬ bi laˇ doˆ ni loꞈ tsoeˬ-euˬ meh.

²⁹ Kʼoeˇ ngeh nah, nya dui dui-eu Mawˇbaˆ yehˇ tiˬ muiˇ gʼaˬ-ahˇ, tiˬ gʼaˬ-iˬ maˬ bi law-iˇ ni aˬ yawꞈ maꞈ neh sehꞈ-euˬ meh.

³⁰ Kʼoeˇ ngeh nah, Mawˇbaˆ miˇ kʼahˬ-ahˇ Iˇsaˬleˬlaˆ tsawˇ haˬ deuˬ deuˆ gʼaˬ-awˇ, Iˇsaˬleˬlaˆ miˇ kʼahˬ laꞈ kʼoeˇ, yehꞈ tseˇ kʼoꞈ byah ni guiˇ maˬ deuˆ-ehˇ nui saˇ oꞈ-eu laꞈ kʼoeˇ ya dehꞈ ya jawˇ-euˬ meh.

Shaˬgaˬ

³¹ Aˬ yuiꞈ aˬ tsu yawˬ gʼaˬ yawˬ-aˬ, Aˬnaˬdaˆ-euˬ aˬ li Shaˬgaˬ pyeuꞈ-eu meh. Aˬ yawꞈ kʼawꞈ, mawˇ neˇ-ahˇ tsawˆ-eu daˇ ceh neh, Piˇliˇtiˆ tsawˇ haˬ koꞈ yaˇ gʼa-ahˇ sehꞈ-eu laꞈ kʼoeˇ, Iˇsaˬleˬlaˆ tsawˇ jeuˬ-ahˇ ka kʼoꞈ-euˬ meh.