Yaˇ kʼaˬ daˇ 18 - Akha

Miˇkaˬ hawˇ-eu Daˬ tsawˇ jeuˬ

¹ Aˇ nah aˇ yamˬ kʼoeˇ yamˬ laꞈ kʼoeˇ, Iˇsaˬleˬlaˆ tsawˇ jeuˬ sahˬ paˬ maˬ baw-a. Kʼoeˇ ngeh, Daˬ tsawˇ jeuˬ-aˬ, aˬ yawꞈ maꞈ jawˇ-eu gʼaˇ duˬ miˇ kʼahˬ poˆ luꞈ-eu meh. Aˬ jeˬ miˇ neh ehˇ naˇ, kʼoeˇ ngeh yamˬ-ahˇ keuˆ ni, Iˇsaˬleˬlaˆ tsawˇ jeuˬ nui deuˬ miˇ kʼahˬ za gʼaˬ jiˇ-euˬ kʼawꞈ, aˬ yawꞈ maꞈ miˇ kʼahˬ maˬ za ni jawˇ luꞈ-eu meh.

² Daˬ tsawˇ haˬ deuˬ-aˬ, aˬ yawꞈ maꞈ-euˬ aˇ jeuˬ dawˬ tawˆ luꞈ laꞈ kʼoeˇ , noeˬ tmˬ nya paˬ-ehˇ gʼeh-eu tsawˇ haˬ ngaˬ gʼaˬ tseˇ doˆ-awˇ, miˇ kʼahˬ bi pyehˆ tseˇ haw-iˇ-eu gʼaˇ duˬ mehˬ nehˬ tsoˆ nehˬ-euˬ meh. Kʼoeˇ naˇ, Zoˇlahˬ hawˇ-eu Eˇshaˬtawˇlaˆ meuˬ-ahˇ neh pyehˬ gʼeh-euˬ meh. Eˇpaˬleˬ miˇ kʼahˬ gawˬ jawˬ gawˬ duˇ-ahˇ aˬ yawꞈ maꞈ le keuˆ ngeh, Miˇkaˬ-euˬ nymˇ-ahˇ naˬ-euˬ meh.

³ Aˬ yawꞈ maꞈ kʼoeˇ gaˇ naˬ luꞈ ngeh, Leˬbiˇ tsawˇ haˬ zaˬ guˬ kʼoeˇ gʼaˬ dawˬ ngehˬ-eu kawˬ sheu-ahˇ aˬ yawꞈ maꞈ naˇ haˬ siˬ-awˇ, aˬ yawꞈ jawˇ gaˇ-iˇ-awˇ, “Nawˇ heu gaˇ aˬ jeˬ gʼeh laˇ teˬ. Aˬ suˇ gʼaˬ neh nawˬ-ahˇ heu gaˇ sheuˬ laꞈ-euˬ ta.”

⁴ Zaˬ guˬ kʼoeˇ gʼaˬ ehˇ-eu, “Miˇkaˬ ngaˬ-ahˇ aˇ poeˬ biꞈ laꞈ-awˇ, ngaˇ aˬ yawꞈ-euˬ piˇ ma geuꞈ luꞈ-eu ma.”

⁵ Aˬ yawꞈ maꞈ ehˇ-eu, “Nga maꞈ gaˇ ma doˆ-iˇ ngeh, nga maꞈ neh noeˬ taˬ-eu loꞈ-ehˇ mˇ pyeuꞈ nya paˬ-ehˇ gʼeh ngaˇ loˇ lehˇ, Miˬyehˇ-ahˇ tiˬ poˆ naˇ haˬ nehˬ laꞈ sheˇ.”

⁶ Piˇ ma kʼoeˇ gʼaˬ ehˇ-eu, “Tiˬ jeˬ-iˬ maˬ noeˬ shaˬ ni iˇ-awˬ. Naw maꞈ gaˇ ma doˆ-iˇ ngeh, Sahˬpaˬ Miˬyehˇ naw maꞈ-ahˇ haw luꞈ pyaˆ luꞈ meh.”

⁷ Kʼoeˇ ngeh, tsawˇ haˬ kʼoeˇ ngaˬ gʼaˬ doˆ-iˇ-awˇ, Laˬiˇshaˆ meuˬ paw iˇ gʼeh-euˬ meh. Kʼoeˇ gaˇ jawˇ-eu tsawˇ haˬ deuˬ-aˬ, Siˇdoˬ tsawˇ haˬ deuˬ loꞈ-ehˇ, guˆ kʼaˇ maˬ za ni saˇ lehˆ ni dehꞈ dzaˬ luꞈ gaˇ aˬ yawꞈ maꞈ ya mawˇ-euˬ meh. Aˬ yawꞈ maꞈ-aˬ, nui saˇ oꞈ-awˇ, ciˬ cuˇ ni jawˇ-eu laꞈ kʼoeˇ, tiˬ gʼaˬ tiˇ gʼaˬ dawˬ ja maˬ doˆ-ehˇ, aˬ yawꞈ maꞈ kʼaˇ loˬ-eu yawˬ jeˬ na luꞈ jaˆ kuꞈ gaˇ ya mawˇ-euˬ meh.

⁸ Tsawˇ haˬ kʼoeˇ ngaˬ gʼaˬ, Zoˇlahˬ meuˬ hawˇ-eu Eˇshaˬtawˇlaˆ meuˬ-ahˇ gʼoꞈ keuˆ leˇ ngeh, aˬ yawꞈ maꞈ neh ya mawˇ yaꞈ-euˬ gaˇ kawˆ, aˬ yawꞈ maꞈ-euˬ miˇ kʼahˬ zaˬ deuˬ aˬ yawꞈ maꞈ-ahˇ naˇ haˬ-euˬ meh.

⁹ Aˬ yawꞈ maꞈ ehˇ-eu, “Laˬiˇshaˆ meuˬ-ahˇ aˬ dui maꞈ guiˇ deuˆ-iˇ kaˇ-euˇ. Miˇ kʼahˬ kʼoeˇ kʼahˬ muiˬ dui dui-eu miˇ kʼahˬ pyeuꞈ-eu nga maꞈ mawˇ yaꞈ-euˬ ma. Tiˬ jeˬ-iˬ maˬ jahˇ ni heu gaˇ dzuˇ dzuˇ-ehˇ taˬ paˇ jawˇ. Yaw kawˇ ma-ehˇ iˇ-awˇ miˇ kʼahˬ kʼoeˇ kʼahˬ deuˆ geuꞈ-iˇ-awˬ.

¹⁰ Naw maꞈ kʼoeˇ gaˇ iˇ keuˆ ngeh, tsawˇ haˬ kʼoeˇ deuˬ tiˬ jeˬ-ahˇ-iˬ kʼahˬ maˬ lahˇ ni jawˇ luꞈ gaˇ ya mawˇ tehꞈ-a. Kʼoeˇ-aˬ, huiˬ-eu miˇ kʼahˬ tiˬ kʼahˬ pyeuꞈ-eu meh. Tsawˇ haˬ zaˬ kʼaˇ geuꞈ mawꞈ-eu jeˬ kʼoeˇ gaˇ jaˆ kuꞈ-awˇ, miˇ kʼahˬ kʼoeˇ kʼahˬ Miˬyehˇ naw maꞈ-ahˇ biꞈ laꞈ gʼaˬ-euˬ meh.”

¹¹ Kʼoeˇ naˇ, Daˬ tsawˇ jeuˬ laꞈ kʼoeˇ tsawˇ haˬ koꞈ yaˇ gʼaˬ guiˇ deuˆ-eu lehˬ hmˬ dah-awˇ, Zoˇlahˬ hawˇ-eu Eˇshaˬtawˇlaˆ meuˬ-ahˇ neh doˆ-iˇ-euˬ meh.

¹² Aˬ yawꞈ maꞈ le-awˇ, Yuˇdaˆ miˇ kʼahˬ Giˇliˇyaˆyeˬlmˬ meuˬ-euˬ nahˇ ma ga kʼehˬ paw taˆ tsoˆ-awˇ naˬ-euˬ meh. Kʼoeˇ miˇ neh, jawˇ duˬ kʼoeˇ tsahˇ-ahˇ, iˬ nah keuˆ ni Daˬ-euˬ taˆ lehˇ kuˇ-eu meh.

¹³ Kʼoeˇ gaˇ neh aˬ yawꞈ maꞈ paˇ le gʼeh-awˇ, Eˇpaˬleˬ miˇ kʼahˬ gawˬ jawˬ gawˬ duˇ-ahˇ jaˆ-eu Miˇkaˬ-euˬ nymˇ-ahˇ le keuˆ-euˬ meh.

¹⁴ Kʼoeˇ naˇ, Laˬiˇshaˆ meuˬ jawˬ jawˬ-ehˇ pyehˆ tseˇ haw-iˇ-euˬ tsawˇ haˬ kʼoeˇ ngaˬ gʼaˬ aˬ yawꞈ maꞈ-euˬ cawˬ deuˬ-ahˇ ehˇ nehˬ-eu, “Heu gaˇ jaˆ-eu nymˇ heu deuˬ tiˬ nymˇ laꞈ kʼoeˇ, daˇ kawˬ-ahˇ pyuˇ yaw taˬ-euˬ tahˬ pahˬ aˬ ma mawˇ kawˇ tiˬ hmˬ jaˆ-eu naw maꞈ siˬ nya ma loˇ. Kʼoeˇ uˬ taꞈ, tahˬ pahˬ aˬ ma mawˇ kawˇ nui deuˬ hawˇ-eu piˇ ma dm-eu pehˇ kʼahˬ tiˬ kahˇ jaˆ-a siˬ. Aˬ dui maꞈ aˬ joˆ-ehˇ jahˇ nmˇ.”

¹⁵ Kʼoeˇ naˇ, Leˬbiˇ tsawˇ haˬ zaˬ guˬ kʼoeˇ gʼaˬ jawˇ-eu Miˇkaˬ-euˬ nymˇ-ahˇ aˬ yawꞈ maꞈ uˇ-iˇ-awˇ, Leˬbiˇ tsawˇ haˬ kʼoeˇ gʼaˬ-ahˇ, Jawˇ saˇ doˆ miˇ-a loˇ lehˇ ngehˬ cawˬ-euˬ meh.

¹⁶ Kʼoeˇ ngeh, guiˇ deuˆ-eu lehˬ hmˬ taˬ-euˬ Daˬ tsawˇ haˬ kʼoeˇ koꞈ yaˇ gʼaˬ, kmˇ cehˇ laˇ gʼoˆ-ahˇ yawꞈ luꞈ-eu meh.

¹⁷ Piˇ ma kʼoeˇ gʼaˬ guiˇ deuˆ-eu keu ka baꞈ luꞈ-eu yehˇ kʼoeˇ deuˬ nehˬ-ehˇ kmˇ cehˇ gʼoˆ kʼehˬ-ahˇ yawꞈ luꞈ ngeh, kʼoeˬ sho haw-iˇ-euˬ tsawˇ haˬ kʼoeˇ ngaˬ gʼaˬ tiˬ poˆ tehꞈ-ehˇ nymˇ laꞈ kʼoeˇ uˇ-iˇ-awˇ, daˇ kawˬ-ahˇ pyuˇ yaw taˬ-euˬ tahˬ pahˬ aˬ ma mawˇ kawˇ kʼoeˇ hmˬ maˬ ehˇ, tahˬ pahˬ aˬ ma mawˇ kawˇ nui deuˬ maˬ ehˇ, piˇ ma dm-eu pehˇ kʼahˬ maˬ ehˇ, yuˇ-euˬ meh.

¹⁸ Tsawˇ haˬ kʼoeˇ deuˬ Miˇkaˬ-euˬ nymˇ-ahˇ uˇ-iˇ-awˇ, daˇ kawˬ-ahˇ pyuˇ yaw taˬ-euˬ tahˬ pahˬ aˬ ma mawˇ kawˇ maˬ ehˇ, tahˬ pahˬ aˬ ma mawˇ kawˇ nui deuˬ maˬ ehˇ, piˇ ma dm-eu pehˇ kʼahˬ maˬ ehˇ, yuˇ ngeh, “Naw maꞈ aˬ jeˬ jahˇ te” lehˇ, piˇ ma kʼoeˇ gʼaˬ aˬ yawꞈ maꞈ-ahˇ ehˇ-eu meh.

¹⁹ Aˬ yawꞈ maꞈ ehˇ-eu, “Dawˬ tiˬ dawˬ-iˬ maˬ ngeh ni aˬ ciˇ cu ni jawˇ-awˬ. Nga maꞈ nehˬ-ehˇ oe-awˇ, nga maꞈ-ahˇ nui noeˬ nui duˇ biꞈ-awˇ, nga maꞈ-euˬ piˇ ma geuꞈ le-awˬ. Tsawˇ haˬ tiˬ pehˬ zaˬ-euˬ piˇ ma geuꞈ-eu naˆ maˬ tseˇ, Iˇsaˬleˬlaˆ tsawˇ jeuˬ tiˬ jeuˬ kʼoeˇ taˆ piˇ ma maˬ geuꞈ mawꞈ nya loˇ.”

²⁰ Kʼoeˇ ngeh, piˇ ma kʼoeˇ gʼaˬ laˬ kʼaˬ cehˇ-eu laꞈ kʼoeˇ, muiˬ-eu shawˇ-eu mˇ myawˬ kʼoeˇ deuˬ yuˇ-awˇ, aˬ yawꞈ maꞈ nehˬ-ehˇ iˇ gʼeh-euˬ meh.

²¹ Aˬ yawꞈ maꞈ-euˬ myawˬ deuˬ, jeˬ zaˬ deuˬ hawˇ-eu, myawˬ gahˬ deuˬ mehˬ hu paw bi iˇ-awˇ, tsawˇ haˬ kʼoeˇ deuˬ doˆ-iˇ-euˬ meh.

²² Daˬ tsawˇ haˬ kʼoeˇ deuˬ ui cuiˆ gaˇ mahˇ iˇ kaˬ ngeh, “Guiˇ deuˆ-iˇ kaˇ-euˇ” lehˇ, dawˬ peh jawˇ-eu tsawˇ haˬ deuˬ-ahˇ Miˇkaˬ kuˇ gaˬ-awˇ, Daˬ tsawˇ haˬ kʼoeˇ deuˬ-euˬ mehˬ nah teh miˇ-euˬ meh.

²³ Daˬ tsawˇ haˬ deuˬ MiˇKaˬ-ahˇ ehˇ-eu, “Aˬ jeˬ gʼeh-eu lehˇ guˇ te. Tsawˇ haˬ teu deuˬ sheuˬ-awˇ aˬ jeˬ gʼeh le teˬ.”

²⁴ Miˇkaˬ ehˇ-eu, “Aˬ jeˬ gʼeh-eu guˇ te lehˇ naw maꞈ ngaˬ-ahˇ paˇ naˇ haˬ te loˇ. Ngaˬ-euˬ piˇ ma hawˇ-eu ngaˬ neh jahˇ taˬ-eu miˬ yehˇ deuˬ-ahˇ naw maꞈ yuˇ-awˇ cehˆ-euˬ maˬ ngeuˇ te loˇ. Ngaˇ jawˇ gaˇ aˬ jeˬ paˇ jaˆ yaꞈ taˬ.”

²⁵ Daˬ tsawˇ haˬ deuˬ ehˇ-eu, “Tsawˇ haˬ heu deuˬ nui ma pehˇ laˇ-awˇ nawˬ-ahˇ guiˇ maˬ bi deuˆ mawꞈ naˇ, tiˬ jeˬ-iˬ maˬ ngehˬ ni ciˬ cuˇ ni jawˇ-awˬ. Nawˇ hawˇ-eu nawˬ-euˬ miˬ sawˇ zaˬ dawˬ tawˆ luꞈ ya shiˇ jiˇ nmˬ-mˇ.”

²⁶ Kʼoeˇ loꞈ-ehˇ ehˇ gʼaˬ-awˇ, aˬ yawꞈ maꞈ mehˬ hu paw paˇ iˇ gʼeh-euˬ meh. Tsawˇ haˬ kʼoeˇ deuˬ myaˬ dui dui gaˇ Miˇkaˬ ya mawˇ ngeh, tiˬ jeˬ-iˬ maˬ jahˇ ni iˇ kahˇ paw gʼoꞈ leˇ-euˬ meh.

²⁷ Kʼoeˇ naˇ, Miˇkaˬ-euˬ piˇ ma hawˇ-eu aˬ yawꞈ neh jahˇ taˬ-euˬ myawˬ deuˬ yuˇ-awˇ, tiˬ jeˬ-iˬ kʼahˬ maˬ lahˇ ni nui saˇ oꞈ-eu laꞈ kʼoeˇ jawˇ luꞈ-eu Laˬiˇshaˆ meuˬ-ahˇ aˬ yawꞈ maꞈ iˇ-euˬ meh. Meuˬ kʼoeˇ meuˬ-ahˇ jawˇ-eu tsawˇ haˬ deuˬ-ahˇ aˬ yawꞈ maꞈ sehꞈ-awˇ, meuˬ kʼoeˇ meuˬ-ahˇ kʼawꞈ miˬ dzaˬ keuˬ dzeh-euˬ meh.

²⁸ Tsawˇ haˬ kʼoeˇ deuˬ-ahˇ ka kʼoꞈ nehˬ-eu tiˬ gʼaˬ-iˬ maˬ jawˇ-a. Aˬ jeˬ miˇ neh ehˇ naˇ, Siˇdoˬ meuˬ-ahˇ neh gaˇ mahˇ kaˬ gaˇ aˬ yawꞈ maꞈ jawˇ-awˇ, aˬ cawˬ nehˬ-ehˇ cawˬ cawˬ taꞈ-eu laꞈ kʼoeˇ iˇ tawꞈ laˇ tawꞈ-eu maˬ jaˆ-eu miˇ neh meh. Meuˬ kʼoeˇ meuˬ-aˬ, Behˬleˬhawˇbaˆ meuˬ dawˬ peh deh kʼawꞈ-ahˇ jaˆ-eu meh. Daˬ tsawˇ haˬ deuˬ meuˬ kʼoeˇ meuˬ-ahˇ paˇ tsoˆ muiˬ-awˇ jawˇ-euˬ meh.

²⁹ Yaˬkoˆ-euˬ aˬ li aˬ yawꞈ maꞈ-euˬ aˬ da yaw dzahˇ gʼaˬ pyeuꞈ-eu Daˬ-euˬ tsawˇ myahˇ yuˇ-awˇ, Laˬiˇshaˆ meuˬ-ahˇ Daˬ meuˬ lehˇ myahˇ paˇ nehˬ-euˬ meh.

³⁰ Daˬ tsawˇ haˬ deuˬ uˬ duˬ tahˬ-eu gʼaˇ duˬ tahˬ pahˬ aˬ ma mawˇ kawˇ ka tuˇ-awˇ, Moˇseˬ-euˬ oeˬ paˬ pyeuꞈ-awˇ, Geˬlaˬshmˬ-euˬ aˬ li pyeuꞈ-eu Yawˇnaˆshaˬ gʼaˬ Daˬ tsawˇ jeuˬ-euˬ piˇ ma geuꞈ-euˬ meh. Tsawˇ haˬ kʼoeˇ deuˬ-ahˇ aˬ cawˬ-euˬ miˇ kʼahˬ-ahˇ bi nyehꞈ byoˆ gʼeh-euˬ aˇ yamˬ-ahˇ keuˆ ni, aˬ yawꞈ-euˬ zaˬ deuˬ uˆ deuˬ piˇ ma geuꞈ ka leꞈ-euˬ meh.

³¹ Miˬyehˇ-ahˇ uˬ duˬ tahˬ-eu sehˬ gʼawˆ kʼoeˇ, Shiˇloˬ meuˬ-ahˇ kʼaˇ jaˆ kʼoeˇ keuˆ ni, Miˇkaˬ-euˬ tahˬ pahˬ aˬ ma mawˇ kawˇ kʼawꞈ kʼoeˇ gaˇ jaˆ-euˬ meh.