Yaˇ kʼaˬ daˇ 17 - Akha

Miˇkaˬ-euˬ tahˬ pahˬ aˬ ma mawˇ kawˇ deuˬ

¹ Aˇ nah aˇ yamˬ kʼoeˇ yamˬ laꞈ kʼoeˇ, Eˇpaˬleˬ miˇ kʼahˬ gawˬ jawˬ gawˬ duˇ paw, Miˇkaˬ lehˇ kuˇ-euˬ tsawˇ haˬ tiˬ gʼaˬ jawˇ-eu meh.

² Aˬ yawꞈ-euˬ aˬ ma-ahˇ aˬ yawꞈ ehˇ nehˬ-eu, “Nawˬ-eu pyuˇ maˇ byaˆ tiˬ heˇ tiˬ yaˇ byaˆ byoˆ ngeh, smˇ kʼoeˬ-ahˇ nawˇ yaˬ kʼehˇ yaˬ-euˬ ngaˇ gaˬ-euˬ ma. Nawˬ-euˬ pyuˇ kʼoeˇ deuˬ ngaˬ neh yuˇ-awˇ, ngaˇ jawˇ gaˇ jaˆ luꞈ meh.” Aˬ yawꞈ-euˬ aˬ ma ehˇ-eu, “Ngaˬ li-oˇ, Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ.”

³ Pyuˇ kʼoeˇ deuˬ aˬ yawꞈ-euˬ aˬ ma-ahˇ biꞈ kʼoꞈ nehˬ ngeh, aˬ ma gʼaˬ ehˇ-eu, “Yaˬ kʼehˇ yaˬ-eu jeˬ ngaˬ li kʼoeˇ taˆ ma ya bi keuˆ le-eu gʼaˇ duˬ, pyuˇ maˇ byaˆ heu deuˬ Sahˬpaˬ Miˬyehˇ-ahˇ ngaˇ aˬ diˇ aˬ maˇ damˬ nehˬ ma. Daˇ kawˬ-ahˇ pyuˇ yaw-awˇ jahˇ-euˬ tahˬ pahˬ aˬ ma mawˇ kawˇ jahˇ gaˇ, pyuˇ kʼoeˇ deuˬ zmˬ ma. Nymˬ-mˇ ngaˇ nawˬ-ahˇ pyuˇ maˇ byaˆ heu deuˬ biꞈ kʼoꞈ nehˬ-eu ma.”

⁴ Kʼoeˇ naˇ, aˬ li gʼaˬ pyuˇ kʼoeˇ deuˬ yuˇ-awˇ, aˬ ma gʼaˬ-ahˇ biꞈ kʼoꞈ nehˬ-euˬ meh. Aˬ ma gʼaˬ pyuˇ maˇ byaˆ nyiˬ yaˇ byaˆ yuˇ-awˇ, ba jiˬ-ahˇ biꞈ-awˇ, daˇ kawˬ-ahˇ pyuˇ yaw-euˬ tahˬ pahˬ aˬ ma mawˇ kawˇ bi jahˇ-euˬ meh. Tahˬ pahˬ aˬ ma mawˇ kawˇ kʼoeˇ hmˬ Miˇkaˬ-euˬ nymˇ-ahˇ bi jaˆ-euˬ meh.

⁵ Miˇkaˬ lehˇ kuˇ-eu tsawˇ haˬ heu gʼaˬ-aˬ, aˬ yawꞈ-euˬ uˬ duˬ tahˬ-eu jawˇ duˬ jaˆ-eu meh. Tahˬ pahˬ aˬ ma mawˇ kawˇ deuˬ hawˇ-eu piˇ ma-euˬ pehˇ kʼahˬ tiˬ kahˇ aˬ yawꞈ guꞈ-awˇ, aˬ yawꞈ-euˬ aˬ li tiˬ gʼaˬ-ahˇ piˇ ma bi geuꞈ-euˬ meh.

⁶ Aˇ yamˬ kʼoeˇ yamˬ laꞈ kʼoeˇ Iˇsaˬleˬlaˆ tsawˇ jeuˬ sahˬ paˬ maˬ baw-eu miˇ neh, aˬ geu gʼaˬ maˬ kaˬ, yawˬ ha kʼaˇ noeˬ-eu jeˬ mˇ luꞈ-eu aˇ yamˬ pyeuꞈ-eu meh.

⁷ Aˇ nah aˇ yamˬ kʼoeˇ yamˬ laꞈ kʼoeˇ, Yuˇdaˆ miˇ kʼahˬ Behˬlehˬhehˬ meuˬ laꞈ kʼoeˇ, Leˬbiˇ tsawˇ haˬ zaˬ guˬ tiˬ gʼaˬ jawˇ-eu meh.

⁸ Behˬlehˬhehˬ meuˬ-ahˇ neh aˬ yawꞈ doˆ laˇ-awˇ, jawˇ duˬ yaw shuiꞈ poˆ poˆ-ehˇ cah luꞈ-eu meh. Aˬ yawꞈ kʼoeˇ loꞈ-ehˇ cah luꞈ ngeh, Eˇpaˬleˬ miˇ kʼahˬ gawˬ jawˬ gawˬ duˇ-ahˇ jaˆ-eu Miˇkaˬ-euˬ nymˇ-ahˇ le keuˆ-euˬ meh.

⁹ “Nawˇ aˬ geu paw neh laˇ teˬ” lehˇ aˬ yawꞈ-ahˇ Miˇkaˬ naˇ haˬ nehˬ-euˬ meh. Aˬ yawꞈ ehˇ-eu, “Ngaˇ-aˬ, Yuˇdaˆ miˇ kʼahˬ Behˬlehˬhehˬ meuˬ-ahˇ jawˇ-eu piˇ ma tiˬ gʼaˬ pyeuꞈ-eu ma. Nymˬ-mˇ jawˇ duˬ poˆ poˆ-ehˇ cah luꞈ-eu ma.”

¹⁰ Miˇkaˬ ehˇ-eu, “Ngaˬ nehˬ-ehˇ jawˇ-awˬ. Ngaˬ-ahˇ nui noeˬ nui duˇ biꞈ-awˇ, ngaˬ-euˬ piˇ ma geuꞈ-awˬ. Tiˬ kʼoꞈ-euˬ pyuˇ maˇ byaˆ tseˇ byaˆ biꞈ-eu uˬ taꞈ, dm gʼaˬ dm lmˇ hawˇ-eu dzaˬ dzaˬ dawˇ dawˇ haw nehˬ ma.”

¹¹ Leˬbiˇ tsawˇ haˬ zaˬ guˬ kʼoeˇ gʼaˬ Miˇkaˬ nehˬ-ehˇ jawˇ-awˇ, aˬ yawꞈ-euˬ aˬ li tiˬ gʼaˬ loꞈ-ehˇ dehꞈ-euˬ meh.

¹² Miˇkaˬ neh aˬ yawꞈ-ahˇ piˇ ma bi geuꞈ-awˇ, Miˇkaˬ-euˬ nymˇ-ahˇ aˬ yawꞈ jawˇ-euˬ meh.

¹³ Miˇkaˬ ehˇ-eu, “Nymˬ-mˇ poˆ jawˇ-aˬ, Leˬbiˇ tsawˇ haˬ piˇ ma tiˬ gʼaˬ ngaˬ nehˬ-ehˇ jawˇ-eu miˇ neh, Sahˬpaˬ Miˬyehˇ ngaˬ-ahˇ bi baw bi za le meh lehˇ ngaˇ siˬ duˬ-eu ma.”