Yaˇ kʼaˬ daˇ 16 - Akha

Gaˬzaˬ meuˬ-euˬ laˇ gʼoˆ baꞈ dzeh-euˬ

¹ Tiˬ nah-aˬ, Piˇliˇtiˆ tsawˇ haˬ-euˬ meuˬ pyeuꞈ-eu Gaˬzaˬ meuˬ-ahˇ Saˬsoˬ iˇ-awˇ, meh maˬ laˇ tiˬ gʼaˬ nehˬ-ehˇ yuꞈ taꞈ-euˬ meh.

² Saˬsoˬ kʼoeˇ gaˇ oe taˬ-euˬ gaˇ, Gaˬzaˬ meuˬ-ahˇ jawˇ-eu tsawˇ haˬ deuˬ ya siˬ-awˇ, jawˇ duˬ kʼoeˇ tsahˇ-ahˇ loꞈ jawˬ-awˇ, uˬ ciꞈ miˇ lah-ehˇ meuˬ lahˇ kʼehˬ-ahˇ aˬ yawꞈ-ahˇ loꞈ-euˬ meh. “Uˬ bya bya laˇ ngeh keuˆ ni aˬ yawꞈ-ahˇ loꞈ-awˇ sehꞈ ma” lehˇ aˬ yawꞈ maꞈ noeˬ-awˇ, uˬ ciꞈ miˇ lah-ehˇ ciꞈ cuˇ ni jawˇ-euˬ meh.

³ Saˬsoˬ-aˬ, sehˇ gʼahˇ ceh laˇ ngeh keuˆ ni tehꞈ-ehˇ yuꞈ zaˇ-ahˇ yuꞈ-euˬ meh. Aˬ yawꞈ tuˇ-awˇ, meuˬ lahˇ laˇ gʼoˆ maˬ ehˇ, laˇ gʼoˆ bahˬ maˬ ehˇ, dawˬ tawˆ luꞈ gʼeu lehˆ doˆ-awˇ, aˬ yawꞈ-euˬ baꞈ pu-ahˇ baꞈ-awˇ, Heˬbyoˬ meuˬ-euˬ laꞈ taˆ jaˆ-eu gawˬ duˇ uˬ du baꞈ daˆ gʼeh-euˬ meh.

Saˬsoˬ hawˇ-eu Deˬliˇlaˆ

⁴ Kʼoeˇ naˇ, Sawˇyehˆ deh kʼawꞈ-ahˇ jawˇ-eu Deˬliˇlaˆ lehˇ myahˇ-euˬ zaˬ miˬ zaˬ tiˬ gʼaˬ nehˬ-ehˇ, Saˬsoˬ zaˬ kʼaˬ kʼaˬ-euˬ meh.

⁵ Piˇliˇtiˆ sahˬ paˬ ngaˬ gʼaˬ zaˬ miˬ zaˬ kʼoeˇ gʼaˬ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Aˬ jeˬ baˬ da neh Saˬsoˬ teu naˆ naˆ-ehˇ gʼaˬ kʼaˆ-eu gaˇ kawˆ maˬ ehˇ, aˬ joˆ-ehˇ jahˇ-awˇ aˬ yawꞈ-ahˇ nyehꞈ-awˇ paꞈ tawꞈ-eu laꞈ kʼoeˇ kʼehˬ nehˬ kʼaˆ nehˬ nya-eu gaˇ kawˆ maˬ ehˇ, tsawˇ gahˇ gahˇ-awˇ aˬ yawꞈ-ahˇ naˇ haˬ-awˬ. Nga maꞈ tiˬ gʼaˬ-euˬ pyuˇ maˇ byaˆ tiˬ heˇ tiˬ yaˇ byaˆ nawˬ-ahˇ biꞈ ma.”

⁶ Kʼoeˇ naˇ, Deˬliˇlaˆ Saˬsoˬ-ahˇ ehˇ nehˬ-eu, “Aˬ jeˬ baˬ da neh nawˇ teu naˆ naˆ-ehˇ gʼaˬ kʼaˆ-eu gaˇ kawˆ ngaˬ-ahˇ ehˇ nehˬ laꞈ sheˇ, Aˬ cawˬ nawˬ-ahˇ paꞈ tawꞈ-awˇ kʼehˬ nehˬ kʼaˆ nehˬ mawꞈ naˇ aˬ joˆ-ehˇ ya jahˇ nmˇ lehˇ ehˇ haw sheˇ.”

⁷ Saˬsoˬ ehˇ-eu, “Maˬ gui-iˇ dah-euˬ kaˆ kaˆ pi yaw shuiꞈ shiꞈ pi neh ngaˬ-ahˇ paꞈ tawꞈ naˇ, ngaˇ kʼawꞈ aˬ cawˬ loꞈ-ehˇ gʼaˬ baˬ-eu tsawˇ haˬ tiˬ gʼaˬ pyeuꞈ-iˇ tehꞈ-a.”

⁸ Kʼoeˇ ngeh, Piˇliˇtiˆ sahˬ paˬ kʼoeˇ ngaˬ gʼaˬ, maˬ gui-iˇ dah-euˬ kaˆ kaˆ pi yaw shuiꞈ shiꞈ pi Deˬliˇlaˆ-ahˇ biꞈ-awˇ, Deˬliˇlaˆ gʼaˬ Saˬsoˬ-ahˇ paꞈ tawꞈ-euˬ meh.

⁹ Kuˆ lawˆ yawˬ lawˆ yawˬ laꞈ kʼoeˇ tsawˇ haˬ tiˬ deuˬ bi loꞈ-awˇ, “Saˬsoˬ-oˇ, Piˇliˇtiˆ tsawˇ haˬ deuˬ laˇ meh de” lehˇ guˇ-euˬ meh. Ehˇ kʼawꞈ, saˬ kahˇ-ahˇ miˬ dzaˬ puiˆ tsehˆ-eu loꞈ-ehˇ, kaˆ kaˆ pi kʼoeˇ deuˬ-ahˇ aˬ yawꞈ behˇ tsehˆ jiˇ-euˬ meh. Kʼoeˇ miˇneh, Saˬsoˬ gʼaˬ kʼaˆ-eu gaˇkawˆ zaꞈ taˬ-euˬ jeˬ-ahˇ aˬyawꞈ maꞈ maˬ ya siˬ-a.

¹⁰ Saˬsoˬ-ahˇ Deˬliˇlaˆ ehˇ nehˬ-eu,“ Nawˇ ngaˬ-ahˇ kʼaˇ ngeuˇ-eu loꞈ-ehˇ maˬ ehˇ nehˬ laꞈ ni, tsawˇ uˬ laˆ uˬ nehˬ laꞈ-eu nga. Aˬ cawˬ nawˬ-ahˇ aˬ joˆ-ehˇ jahˇ-awˇ paꞈ tawꞈ nya nmˇ lehˇ ngaˬ-ahˇ tiˬ poˆ paˇ ehˇ nehˬ laꞈ sheˇ.”

¹¹ Saˬsoˬ ehˇ-eu, “Tiˬ poˆ-iˬ maˬ zmˬ haw-euˬ aˇ caˆ yaw shuiꞈ neh aˬ yawꞈ maꞈ ngaˬ-ahˇ paꞈ tawꞈ naˇ, ngaˇ kʼawꞈ aˬ cawˬ loꞈ-ehˇ gʼaˬ baˬ-eu tsawˇ haˬ tiˬ gʼaˬ pyeuꞈ-iˇ tehꞈ-a.”

¹² Kʼoeˇ ngeh, Deˬliˇlaˆ aˇ caˆ yaw shuiꞈ poˆ-awˇ, aˬ yawꞈ-ahˇ paꞈ tawꞈ-awˇ, “Saˬsoˬ-oˇ, Piˇliˇtiˆ tsawˇ haˬ deuˬ laˇ meh de” lehˇ guˇ-euˬ meh. Tsawˇ haˬ kʼoeˇ deuˬ-aˬ, kuˆ lawˆ yawˬ lawˆ yawˬ laꞈ kʼoeˇ loꞈ luꞈ-eu meh. Ehˇ kʼawˬ, aˬ yawꞈ-euˬ laꞈ du-ahˇ paꞈ tawꞈ taˬ-euˬ aˇ caˆ kʼoeˇ deuˬ-ahˇ, saˬ kahˇ gʼeu tsehˆ-eu loꞈ-ehˇ, aˬ yawꞈ yaw awˇ laꞈ-ehˇ behˇ tsehˆ-euˬ meh.

¹³ Saˬsoˬ-ahˇ Deˬliˇlaˆ ehˇ nehˬ-eu, “Nymˬ-mˇ keuˆ ni, kʼaˇ ngeuˇ-eu loꞈ-ehˇ nawˇ ngaˬ-ahˇ maˬ ehˇ nehˬ laꞈ ni tsawˇ uˬ laˆ uˬ nehˬ laꞈ-euˬ nga. Aˬ cawˬ nawˬ-ahˇ aˬ joˆ-ehˇ jahˇ-awˇ paꞈ tawꞈ ziꞈ nya nmˇ lehˇ ngaˬ-ahˇ ehˇ nehˬ laꞈ-awˬ.” Saˬsoˬ ehˇ-eu, “Ngaˬ-euˬ uˬ duˬ tsehˇ kahˇ caˆ pyehꞈ shiꞈ pyehꞈ-ahˇ, saˬ nmˇ zaꞈ gaˇ zaꞈ tehˬ-awˇ, taꞈ cmˬ deh ciˇ taˬ naˇ, ngaˇ kʼawꞈ aˬ cawˬ loꞈ-ehˇ gʼaˬ baˬ-eu tsawˇ haˬ tiˬ gʼaˬ pyeuꞈ-iˇ tehꞈ-a.”

¹⁴ Kʼoeˇ naˇ, Deˬliˇlaˆ gʼaˬ Saˬsoˬ-ahˇ laˆ yuꞈ-awˇ, aˬ yawꞈ-euˬ uˬ duˬ tsehˇ kahˇ caˆ pyehꞈ shiꞈ pyehꞈ-ahˇ, saˬ nmˇ zaꞈ gaˇ zaꞈ tehˬ-euˬ meh. Kʼoeˇ naˇ, taꞈ cmˬ deh ciˇ-awˇ, “Saˬsoˬ-oˇ, Piˇliˇtiˆ tsawˇ haˬ deuˬ laˇ meh de” lehˇ guˇ-euˬ meh. Ehˇ kʼawꞈ, Saˬsoˬ noeˬ laˇ-awˇ, saˬ nmˇ zaꞈ gaˇ zaꞈ tehˬ taˬ-euˬ aˬ yawꞈ-euˬ uˬ duˬ tsehˇ kahˇ gʼeu lehˆ doˆ-euˬ meh.

¹⁵ Kʼoeˇ naˇ, Saˬsoˬ-ahˇ Deˬliˇlaˆ ehˇ nehˬ-eu, “Nawˇ ngaˬ-ahˇ maˬ gaˬ gaˇ, gaˬ ma lehˇ aˬ jeˬ gʼeh jaˬ myawꞈ myawꞈ te. Aˬ jeˬ baˬ da neh nawˇ teu naˆ naˆ-ehˇ gʼaˬ kʼaˆ-eu gaˇ kawˆ ngaˬ-ahˇ maˬ ehˇ mehˬ nehˬ laꞈ ni, smˬ poˆ keuˆ ni tsawˇ uˬ laˆ uˬ nehˬ laꞈ te.”

¹⁶ Aˬ yawꞈ nah yawꞈ, gaˇ kawˆ kʼoeˇ hmˬ tehꞈ-ehˇ Deˬliˇlaˆ naˇ haˬ nawˆ nawˆ-eu miˇ neh, Saˬsoˬ maˬ gaˬ coeˇ-ehˇ pyeuꞈ laˇ taˬ-euˬ meh.

¹⁷ Kʼoeˇ miˇ neh, aˇ saˬ saˬ laˇ ngeh, kʼaˇ ngeuˇ-eu loꞈ-ehˇ ehˇ nehˬ-euˬ meh. Aˬ yawꞈ ehˇ-eu, “Ngaˬ-euˬ uˬ duˬ tsehˇ kahˇ tiˬ poˆ-iˬ maˬ tehˬ haw-aˬ. Ngaˇ dehꞈ le ngeh neh, Naˬzaˬliˇ tsawˇ haˬ tiˬ gʼaˬ loꞈ-ehˇ Sahˬpaˬ Miˬyehˇ-ahˇ a nehˬ taˬ-euˬ ma. Ngaˬ-euˬ uˬ duˬ tsehˇ kahˇ tehˬ dzeh shaw naˇ, ngaˬ-euˬ gʼaˬ byoˆ-iˇ jiˇ-awˇ, aˬ cawˬ loꞈ-ehˇ gʼaˬ baˬ-eu tsawˇ haˬ tiˬ gʼaˬ pyeuꞈ-iˇ meh.”

¹⁸ Kʼaˇ ngeuˇ-eu loꞈ-ehˇ dawˇ coe ni Saˬsoˬ ehˇ-eu nga lehˇ Deˬliˇlaˆ ya siˬ duˬ ngeh, “Piˇliˇtiˆ sahˬ paˬ deuˬ-ahˇ tiˬ poˆ paˇ oe siˬ. Aˬ yawꞈ ngaˬ-ahˇ kʼaˇ ngeuˇ-eu loꞈ-ehˇ dawˇ coe ni ehˇ mehˬ nehˬ laꞈ gʼaˬ-euˬ meh” lehˇ tsaꞈ ahˇ gʼeh-euˬ meh. Kʼoeˇ ngeh, aˬ yawꞈ maꞈ oe-awˇ, pyuˇ kʼawꞈ tiˬ poˆ tehꞈ-ehˇ yuˇ leꞈ-euˬ meh.

¹⁹ Deˬliˇlaˆ-aˬ, aˬ yawꞈ-euˬ saˬ pyaˬ kʼoeˇ taˆ Saˬsoˬ-ahˇ laˆ yuꞈ-awˇ, tsawˇ haˬ tiˬ gʼaˬ kuˇ-awˇ, Saˬsoˬ-euˬ uˬ duˬ tsehˇ kahˇ caˆ pyehꞈ kʼoeˇ shiꞈ pyehꞈ bi tehˬ dzeh-euˬ meh. Kʼoeˇ ngeh, aˬ yawꞈ-euˬ gʼaˬ byoˆ jiˇ-euˬ miˇ neh, Deˬliˇlaˆ aˬ yawꞈ-ahˇ kʼehˬ-eu aˇ dahˬ beh-euˬ meh.

²⁰ “Saˬsoˬ-oˇ, Piˇliˇtiˆ tsawˇ haˬ deuˬ laˇ luꞈ meh” lehˇ Deˬliˇlaˆ kuˇ ngeh, aˬ yawꞈ noeˬ laˇ-awˇ, “Aˬ myah myah loꞈ-ehˇ teuˆ puiˇ-awˇ doˆ-iˇ ma” lehˇ aˬ yawꞈ noeˬ-euˬ meh. Sahˬpaˬ Miˬyehˇ aˬ yawꞈ-ahˇ byehˇ dzeh-euˬ gaˇ kawˆ aˬ yawꞈ maꞈ siˬ nya-a.

²¹ Piˇliˇtiˆ tsawˇ haˬ deuˬ aˬ yawꞈ-ahˇ paꞈ-awˇ, aˬ yawꞈ-euˬ myaˆ nuiˆ kʼeuꞈ doˆ nehˬ-euˬ meh. Aˬ yawꞈ maꞈ aˬ yawꞈ-ahˇ Gaˬzaˬ meuˬ-ahˇ sheuˬ gʼeh-awˇ, guiˬ shuiˇ aˇ caˆ bi daˬ-awˇ, paꞈ kuˆ laꞈ kʼoeˇ lo lehˬ bi lehˬ-euˬ meh.

²² Ehˇ kʼawꞈ, aˬ yawꞈ-euˬ uˬ duˬ tsehˇ kahˇ paˇ mahˇ le luꞈ-eu meh.

Saˬsoˬ shiˇ-euˬ

²³ Piˇliˇtiˆ sahˬ paˬ deuˬ tiˬ gaˇ uiˬ leˇ-awˇ, bawˬ-iˬ gʼeh-eu laꞈ kʼoeˇ, aˬ yawꞈ maꞈ-euˬ Daˬgoˬ miˬ yehˇ-ahˇ huiˬ dui dui-eu lawˇ-eu shehˇ-eu jeˬ mˇ nehˬ-euˬ meh. “Aˬ dui-euˬ miˬ yehˇ neh Saˬsoˬ-ahˇ aˬ dui-euˬ aˬ laꞈ laꞈ kʼoeˇ a nehˬ laꞈ-eu meh” lehˇ aˬ yawꞈ maꞈ caˇ-eu meh.

²⁴ Aˬ cawˬ aˬ yawꞈ-ahˇ mawˇ ngeh, aˬ yawꞈ maꞈ-euˬ miˬ yehˇ-ahˇ heu loꞈ-ehˇ ja ceuˬ-eu meh. “Nga maꞈ-euˬ miˇ kʼahˬ laˆ cawˆ-awˇ, nga maꞈ-euˬ tsawˇ haˬ gʼawˬ mya ni sehꞈ-euˬ Saˬsoˬ-ahˇ, nga maꞈ-euˬ miˬ yehˇ neh nga maꞈ-euˬ aˬ laꞈ laꞈ kʼoeˇ a nehˬ laꞈ-euˬ meh.”

²⁵ Aˬ yawꞈ maꞈ yaw kʼaˆ-ehˇ byawˬ gʼa-eu laꞈ kʼoeˇ, “Saˬsoˬ-ahˇ sheuˬ doˆ laꞈ-awˇ nga maꞈ-ahˇ bi laˆ byawˬ laˇ-awˬ” lehˇ guˇ-eu meh. Kʼoeˇ ngeh, aˬ cawˬ Saˬsoˬ-ahˇ paꞈ kuˆ laꞈ kʼoeˇ neh sheuˬ doˆ laꞈ-awˇ, aˬ yawꞈ maꞈ-ahˇ Saˬsoˬ laˆ byawˬ nehˬ-euˬ meh. Kʼawˇ zeuˇ deuˬ-euˬ yaw kaˬ-ahˇ, aˬ yawꞈ-ahˇ bi yawꞈ-euˬ meh.

²⁶ Kʼoeˇ ngeh, aˬ yawꞈ-euˬ aˬ laꞈ-ahˇ tsahˇ tsahˇ-ehˇ bi cah-euˬ aˬ li kʼoeˇ li-ahˇ aˬ yawꞈ ehˇ nehˬ-eu, “Nymˇ nymˇ ma heu nymˇ-ahˇ toˆ tehˬ taˬ-euˬ kʼawˇ zeuˇ-ahˇ ngaˬ-ahˇ bi toeˬ ciˆ laꞈ sheˇ. Ngaˇ kʼoeˇ gaˇ kʼawˬ daˇ mawꞈ nya.”

²⁷ Kʼaˬ dzeˇ zaˬ hawˇ-eu zaˬ miˬ zaˬ deuˬ nymˇ kʼoeˇ nymˇ-ahˇ tiˬ teuˇ jawˇ luꞈ-eu meh. Piˇliˇtiˆ sahˬ paˬ ngaˬ gʼaˬ luꞈ kʼoeˇ gaˇ jawˇ luꞈ-eu meh. Nymˇ mˬ kʼoeˇ taˆ kʼawꞈ, zaˬ miˬ zaˬ hawˇ-eu kʼaˬ dzeˇ zaˬ smˬ heˇ gʼaˬ daˆ-awˇ, Saˬsoˬ neh aˬ yawꞈ maꞈ-ahˇ laˆ byawˬ nehˬ gaˇ haw haw-ehˇ jawˇ-eu meh.

²⁸ Kʼoeˇ ngeh, Saˬsoˬ heu loꞈ-ehˇ guiˬ lahˬ shaˇ-euˬ meh. “Dawˬ tawˆ luꞈ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, ngaˬ-ahˇ taˬ ngehˇ nehˬ laꞈ. Miˬyehˇ-oˇ, ngaˬ-euˬ myaˆ nuiˆ nyiˬ nuiˆ luꞈ laˇ behꞈ nehˬ laꞈ-eu Piˇliˇtiˆ tsawˇ haˬ deuˬ-ahˇ heu tiˬ poˆ tehꞈ-ehˇ ngaˇ jahˇ kʼoꞈ nehˬ-eu gʼaˇ duˬ, ngaˬ-euˬ gʼaˬ kʼoeˇ deuˬ ngaˬ-ahˇ tiˬ poˆ paˇ biꞈ nehˬ laꞈ siˬ.”

²⁹ Kʼoeˇ naˇ, nymˇ kʼoeˇ nymˇ-euˬ gʼahˇ ceh nyiˬ paˆ-ehˇ jaˆ-eu, nymˇ kʼoeˇ nymˇ-ahˇ toˆ tehˬ taˬ-euˬ kʼawˇ zeuˇ kʼoeˇ nyiˬ zeuˇ-ahˇ Saˬsoˬ sawˆ zaˬ-euˬ meh. Kʼawˇ zeuˇ kʼoeˇ nyiˬ zeuˇ aˇ kaˬ-ahˇ aˬ yawꞈ yawꞈ-awˇ, aˬ yawꞈ-euˬ aˬ laꞈ neh kʼawˇ zeuˇ kʼoeˇ nyiˬ zeuˇ-ahˇ dehˬ gʼawˬ-euˬ meh.

³⁰ Kʼoeˇ naˇ, “Piˇliˇtiˆ tsawˇ haˬ deuˬ nehˬ-ehˇ ngaˬ-ahˇ bi shiˇ laꞈ-awˬ” lehˇ aˬ yawꞈ guˇ-awˇ, gʼaˬ kʼaˇ jaˆ-eu shaˇ-awˇ dehˬ ngeh, nymˇ kʼoeˇ nymˇ coˬ pyaˆ-awˇ, sahˬ paˬ kʼoeˇ ngaˬ gʼaˬ hawˇ-eu tsawˇ haˬ yawˬ gʼaˬ na luꞈ-ahˇ deh sehꞈ-euˬ meh. Saˬsoˬ yaw dehꞈ dehꞈ ngeh aˬ cawˬ-ahˇ sehꞈ-euˬ myaˆ maˬ tseˇ, aˬ yawꞈ siˇ ngeh poˆ sehꞈ myaˬ dzehˬ-euˬ meh.

³¹ Aˬ yawꞈ-euˬ mehˇ nmˇ deuˬ hawˇ-eu aˬ yawꞈ-euˬ aˬ yuiꞈ aˬ nyiˇ deuˬ aˬ yawꞈ-euˬ gʼawˇ mawˇ baꞈ kʼoꞈ laˬ le-awˇ, Zoˇlahˬ meuˬ hawˇ-eu Eˇshaˬtawˇlaˆ meuˬ yaw kaˬ-ahˇ jaˆ-eu aˬ yawꞈ aˬ da Maˬnoˇaˬ-euˬ lmˬ bymˇ-ahˇ baꞈ pahˬ-euˬ meh. Aˬ yawꞈ-aˬ, Iˇsaˬleˬlaˆ tsawˇ haˬ deuˬ kʼoeˇ taˆ nyiˬ tseˇ kʼoꞈ keuˆ ni aˬ yuiꞈ geuꞈ-euˬ meh.