Yaˇ kʼaˬ daˇ 14 - Akha

Saˬsoˬ hawˇ-eu Tmˇnahˬ meuˬ-ahˇ jawˇ-eu zaˬ miˬ zaˬ zaˬ guˬ tiˬ gʼaˬ

¹ Tiˬ nah keuˆ laˇ ngeh, Tmˇnahˬ meuˬ-ahˇ Saˬsoˬ iˇ-awˇ, Piˇliˇtiˆ tsawˇ jeuˬ aˬ buˇ zaˬ guˬ tiˬ gʼaˬ-ahˇ mawˇ yaꞈ-euˬ meh.

² Kʼoeˇ naˇ, aˬ yawꞈ-euˬ aˬ ma aˬ da jawˇ gaˇ aˬ yawꞈ gʼoꞈ leˇ-awˇ, heu loꞈ-ehˇ ehˇ nehˬ-euˬ meh. “Tmˇnahˬ meuˬ laꞈ kʼoeˇ, Piˇliˇtiˆ zaˬ miˬ aˬ buˇ zaˬ guˬ tiˬ gʼaˬ-ahˇ ngaˇ mawˇ yaꞈ-euˬ ma. Zaˬ miˬ aˬ buˇ kʼoeˇ gʼaˬ-ahˇ sheuˬ laˬ-iˇ-awˇ, ngaˬ-ahˇ bi sheuˬ dahˬ dzaˬ laꞈ-awˬ.”

³ Ehˇ kʼawꞈ, aˬ yawꞈ-euˬ aˬ ma aˬ da aˬ yawꞈ-ahˇ ehˇ nehˬ-eu, “Lawˇ ciꞈ zaˬ pyeuꞈ-eu Piˇliˇtiˆ tsawˇ haˬ deuˬ jawˇ gaˇ aˬ jeˬ miˇ neh nawˇ miˬ zaˬ ya gʼa-iˇ ta. Aˬ dui-euˬ tsawˇ jeuˬ, aˬ dui pehˬ-euˬ aˇ jeuˬ laꞈ kʼoeˇ aˬ buˇ zaˬ guˬ maˬ poˆ mawˇ nya nya loˇ.” Ehˇ kʼawꞈ, Saˬsoˬ aˬ yawꞈ-euˬ aˬ da gʼaˬ-ahˇehˇ nehˬ-eu, “Aˬ buˇ kʼoeˇ gʼaˬ-ahˇ sheuˬ laˬ-iˇ-awˬ. Aˬ yawꞈ-ahˇ ngaˇ mawꞈ dui dui nya.”

⁴ Sahˬpaˬ Miˬyehˇ-aˬ, Piˇliˇtiˆ tsawˇ haˬ deuˬ-ahˇ guiˇ deuˆ mawꞈ-eu miˇ neh, Saˬsoˬ kʼoeˇ loꞈ-ehˇ mˇ ni laˆ saˆ taˬ-euˬ gaˇ kawˆ aˬ yawꞈ-euˬ aˬ da aˬ ma maˬ siˬ nya-a. Aˇ yamˬ kʼoeˇ yamˬ laꞈ kʼoeˇ, Piˇliˇtiˆ tsawˇ haˬ deuˬ Iˇsaˬleˬlaˆ tsawˇ jeuˬ-ahˇ uˆ lahˇ luꞈ-eu meh.

⁵ Kʼoeˇ naˇ, Saˬsoˬ-aˬ, aˬ yawꞈ-euˬ aˬ da aˬ ma nehˬ-ehˇ Tmˇnahˬ meuˬ-ahˇ iˇ-euˬ meh. Aˬ gaꞈ yaˇ kmˇ caw caw-ehˇ aˬ yawꞈ maꞈ iˇ luꞈ ngeh, huiˬ loˆ laˇ-euˬ aˇ laˬ jaˬ shiˇ aˬ buˬ tiˬ mawˇ lmˬ luꞈ-eu aˬ yawꞈ ya gaˬ-euˬ meh.

⁶ Ja pyuˬ ni, Sahˬpaˬ Miˬyehˇ-euˬ baoˬ Saˬsoˬ-ahˇ gʼaˬ bi kʼaˆ laˇ-awˇ, ciꞈ myehꞈ ciꞈ zaˬ-ahˇ ngawˬ paˆ-eu loꞈ-ehˇ, aˇ laˬ jaˬ shiˇ kʼoeˇ mawˇ-ahˇ aˬ yawꞈ-euˬ aˬ laꞈ neh ngawˬ paˆ dzeh-euˬ meh. Ehˇ kʼawꞈ, aˬ yawꞈ kʼoeˇ loꞈ-ehˇ jahˇ-euˬ gaˇ kawˆ, aˬ yawꞈ-euˬ aˬ da aˬ ma-ahˇ aˬ yawꞈ maˬ ehˇ nehˬ-a.

⁷ Kʼoeˇ naˇ, zaˬ miˬ aˬ buˇ kʼoeˇ gʼaˬ-ahˇ aˬ yawꞈ dawˬ ngehˬ cawˬ-iˇ-awˇ, mawꞈ leˇ-euˬ meh.

⁸ Heu myaˆ nah byah laˇ ngeh, zaˬ miˬ aˬ buˇ kʼoeˇ gʼaˬ-ahˇ sheuˬ-iˇ-eu lehˇ Saˬsoˬ iˇ-euˬ meh. Aˬ yawꞈ gaˇ pehˇ iˇ luˬ ngeh, aˬ yawꞈ neh laˆ sehꞈ nehˬ-euˬ aˇ laˬ jaˬ shiˇ kʼoeˇ mawˇ-ahˇ haw-iˇ-eu lehˇ, gaˇ ma gaˇ dzeˇ paw iˇ uˇ-euˬ meh. Kʼoeˇ ngeh, shiˇ taˬ-euˬ aˇ laˬ jaˬ shiˇ kʼoeˇ mawˇ-euˬ gʼawˇ mawˇ laꞈ kʼoeˇ, byaˬ kuˬ lah lah leˇ-awˇ, byaˬ byaˬ uiˇ dahˬ luꞈ gaˇ aˬ yawꞈ ya mawˇ-awˇ, zahˬ leˇ-euˬ meh.

⁹ Byaˬ byaˬ uiˇ kʼoeˇ aˬ yawꞈ beuˬ-awˇ, byaˬ byaˬ uiˇ dzaˬ dzaˬ-ehˇ iˇ-euˬ meh. Kʼoeˇ naˇ, aˬ yawꞈ-euˬ aˬ da aˬ ma jawˇ gaˇ iˇ-awˇ, byaˬ byaˬ uiˇ kʼoeˇ biꞈ-awˇ bi dzaˬ ngeh, aˬ nyaꞈ dzeˇ zaˬ kʼawꞈ byaˬ byaˬ uiˇ kʼoeˇ dzaˬ-euˬ meh. Ehˇ kʼawꞈ, shiˇ taˬ-euˬ aˇ laˬ jaˬ shiˇ kʼoeˇ mawˇ-euˬ gʼawˇ mawˇ laꞈ kʼoeˇ byaˬ byaˬ uiˇ kʼoeˇ beuˬ laꞈ-euˬ gaˇ kawˆ, aˬ yawꞈ nyaꞈ-ahˇ Saˬsoˬ maˬ ehˇ nehˬ-a.

¹⁰ Zaˬ miˬ aˬ buˇ kʼoeˇ gʼaˬ-euˬ nymˇ-ahˇ aˬ yawꞈ-euˬ aˬ da iˇ-awˇ, Saˬsoˬ dzaˬ byawˇ tiˬ byawˇ lawˇ-euˬ meh. Kʼoeˇ-aˬ, zaˬ daꞈ gʼaˬ ya mˇ-eu zahˇ sahˇ kʼoꞈ pyeuꞈ-eu meh.

¹¹ Piˇliˇtiˆ tsawˇ haˬ deuˬ aˬ yawꞈ-ahˇ mawˇ ngeh, zaˬ daꞈ smˬ tseˇ gʼaˬ pyehˬ gʼeh-awˇ, aˬ yawꞈ nehˬ-ehˇ bi jawˇ-euˬ meh.

¹² Zaˬ daꞈ kʼoeˇ deuˬ-ahˇ Saˬsoˬ ehˇ nehˬ-eu, “Ngaˇ naw maꞈ-ahˇ tsaˬ dzoˆ dzoˆ haw ma. Oeˇ mˇ baˇ-eu bawˬ-iˬ gʼeh-eu aˇ yamˬ heu shiꞈ nah laꞈ kʼoeˇ naw maꞈ tsaˬ tsehˆ nya naˇ, shawˇ jehˆ ni gʼeh-eu saˬ paˇ neh guꞈ taˬ-euˬ pehˇ kʼahˬ pehˇ mahˇ smˬ tseˇ kahˇ hawˇ-eu, mehˬ tsoeˬ smˬ tseˇ shehˆ naw maꞈ-ahˇ ngaˇ biꞈ ma.

¹³ Naw maꞈ maˬ tsaˬ tsehˆ nya naˇ, shawˇ jehˆ ni gʼeh-eu saˬ paˇ neh guꞈ taˬ-eu pehˇ kʼahˬ pehˇ mahˇ smˬ tseˇ kahˇ hawˇ-eu mehˬ tsoeˬ smˬ tseˇ shehˆ naw maꞈ ngaˬ-ahˇ ya biꞈ meh.” Aˬ yawꞈ maꞈ ehˇ-eu, “Nawˇ dzoˆ mawꞈ-eu jeˬ ehˇ haw sheˇ. Nga maꞈ naˇ haˬ haw la.”

¹⁴ Saˬsoˬ ehˇ-eu, “Dzaˬ-eu gʼaˬ laꞈ kʼoeˇ dzaˇ doˆ le-awˇ, Gʼaˬ kʼaˆ-eu gʼaˬ laꞈ kʼoeˇ yaw coeˇ jeˬ doˆ le-eu lehˇ ehˇ-eu aˬ jeˬ-a.” Smˬ nah keuˆ ni, dawˬ kʼoeˇ dawˬ aˬ yawꞈ maꞈ maˬ tsaˬ tsehˆ nya-ehˇ jawˇ-eu meh.

¹⁵ Oeˬ nah tiˬ nah keuˆ laˇ ngeh, Saˬsoˬ-euˬ miˬ zaˬ-ahˇ aˬ yawꞈ maꞈ ehˇ nehˬ-eu, “Dawˬ kʼoeˇ dawˬ-euˬ dawˬ tsuiꞈ nga maꞈ-ahˇ ehˇ nehˬ laꞈ ni, nawˬ-eu kʼaˬ dzeˇ zaˬ-ahˇ nawˇ tsawˇ gahˇ gahˇ-awˬ. Nawˇ kʼoeˇ loꞈ-ehˇ maˬ mˇ naˇ, nawˬ da-euˬ nymˇ-ahˇ nga maꞈ miˬ dzaˬ keuˬ puiˆ-awˇ, nawˬ-ahˇ bi puiˆ sehꞈ ma. Nga maꞈ-ahˇ tahˇ joe joe-eu lehˇ, naw nyaꞈ dzeˇ zaˬ nga maꞈ-ahˇ kuˇ teˬ loˇ.”

¹⁶ Kʼoeˇ naˇ, Saˬsoˬ-euˬ miˬ zaˬ myaˆ biˇ ju ju-ehˇ Saˬsoˬ jawˇ gaˇ iˇ-awˇ, “Nawˇ ngaˬ-ahˇ maˬ gaˬ-a. Nawˇ ngaˬ-ahˇ bye-eu nga. Ngaˬ-euˬ cawˬ deuˬ-ahˇ nawˬ neh naˇ haˬ-euˬ dawˬ kʼoeˇ dawˬ-euˬ dawˬ tsuiꞈ aˬ jeˬ miˇ neh maˬ ehˇ mehˬ laꞈ te.” Saˬsoˬ ehˇ-eu, “Ngaˬ da ngaˬ ma-ahˇ kʼawꞈ ngaˇ maˬ ehˇ mehˬ nehˬ ni bi jaˆ-eu dawˬ, ngaˇ nawˬ-ahˇ ehˇ mehˬ kʼmˬ ta loˇ.”

¹⁷ Aˬ yawꞈ miˬ zaˬ-aˬ, bawˬ-iˬ gʼeh luꞈ-eu kʼoeˇ shiꞈ nah laꞈ kʼoeˇ, maˬ tsehˆ leˇ ni ngoeˇ ngoeˇ-ehˇ jawˇ-euˬ meh. Maˬ gaˬ nahˇ-ehˇ pyeuꞈ laˇ ngeh keuˆ ni, naˇ haˬ nawˆ nawˆ-eu miˇ neh, shiꞈ nah tiˬ nah keuˆ laˇ ngeh, dawˬ kʼoeˇ dawˬ-euˬ dawˬ tsuiꞈ, aˬ yawꞈ-euˬ miˬ zaˬ-ahˇ Saˬsoˬ ehˇ mehˬ nehˬ-euˬ meh. Kʼoeˇ naˇ, aˬ yawꞈ-euˬ miˬ zaˬ gʼaˬ Piˇliˇtiˆ tsawˇ haˬ deuˬ-ahˇ, dawˬ kʼoeˇ dawˬ-euˬ dawˬ tsuiꞈ dzawˇ nehˬ-iˇ-euˬ meh.

¹⁸ Shiꞈ nah tiˬ nah keuˆ laˇ ngeh, yuꞈ zaˇ kuˆ lawˆ-ahˇ Saˬsoˬ maˬ uˇ leˇ mi naˆ-ehˇ, meuˬ kʼoeˇ meuˬ-ahˇ jawˇ-eu tsawˇ haˬ deuˬ aˬ yawꞈ-ahˇ ehˇ-eu, “Byaˬ byaˬ uiˇ naˆ maˬ tseˇ coeˇ-eu aˬ jeˬ paˇ jaˆ ta. Aˇ laˬ jaˬ shiˇ naˆ maˬ tseˇ gʼaˬ kʼaˆ-eu aˬ jeˬ paˇ jawˇ ta.” Saˬsoˬ ehˇ-eu, “Naw maꞈ ngaˬ-euˬ mawˇ neˇ mawˇ ma neh deh yaˇ maˬ tsehˬ-euˬ law nmˇ-aˬ, nymˬ-mˇ keuˆ ni dawˬ tsuiꞈ kʼoeˇ maˬ siˬ nya-aˇ.”

¹⁹ Ja pyuˬ ni, Sahˬpaˬ Miˬyehˇ-euˬ baoˬ aˬ yawꞈ-ahˇ gʼaˬ bi kʼaˆ laˇ-awˇ, Aˬshaˇgaˬloˇ meuˬ-ahˇ aˬ yawꞈ iˇ-awˇ, tsawˇ haˬ smˬ tseˇ gʼaˬ-ahˇ sehꞈ-awˇ, aˬ yawꞈ maꞈ-euˬ myawˬ deuˬ yuˇ geuꞈ-euˬ meh. Aˬ yawꞈ maꞈ-euˬ muiˬ-eu mehˬ tsoeˬ deuˬ lehˆ doˆ-awˇ, tsaˬ dzoˆ dawˬ tsuiꞈ tsaˬ tsehˆ-euˬ tsawˇ haˬ kʼoeˇ deuˬ-ahˇ biꞈ-euˬ meh.

²⁰ Kʼoeˇ naˇ, pyeuꞈ laˇ-euˬ gaˇ kawˆ kʼoeˇ baˬ da neh nui ma pehˇ dui dui-eu laꞈ kʼoeˇ, iˇ kahˇ-ahˇ gʼoꞈ leˇ-euˬ meh. Kʼoeˇ ngeh, Saˬsoˬ-euˬ miˬ zaˬ-ahˇ, oeˇ mˇ baˇ ngeh Saˬsoˬ nehˬ-ehˇ bi nuiˇ caw-euˬ gʼaˬ-ahˇ bi mˇ dzaˬ-iˇ-euˬ meh.