Yaˇ kʼaˬ daˇ 13 - Akha

Saˬsoˬ dehꞈ le-euˬ

¹ Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-euˬ mehˬ shi iˬ baˇ mˇ-euˬ miˇ neh, Piˇliˇtiˆ tsawˇ haˬ deuˬ neh aˬ yawꞈ maꞈ-ahˇ oeˬ tseˇ kʼoꞈ Sahˬpaˬ Miˬyehˇ bi uˆ lahˇ-euˬ meh.

² Kʼoeˇ ngeh yamˬ-ahˇ, Zoˇlahˬ meuˬ-ahˇ jawˇ-eu Maˬnoˇaˬ lehˇ myahˇ-euˬ tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, Daˬ tsawˇ jeuˬ meh. Aˬ yawꞈ-euˬ nymˇ dahˬ-aˬ, zaˬ tiˬ gʼaˬ-iˬ maˬ jawˇ-a.

³ Sahˬpaˬ Miˬyehˇ-euˬ gʼaˬ kʼehˇ miˬ zaˬ gʼaˬ jawˇ gaˇ oe-awˇ ehˇ-eu, “Nawˇ-aˬ, zaˬ tiˬ gʼaˬ-iˬ maˬ jawˇ le haw-aˬ. Ehˇ kʼawꞈ, gʼawˬ myahˇ maˬ gʼeh-ehˇ nawˇ aˬ nyiˇ pi leˇ-awˇ, aˬ li tiˬ li ya ciˬ tehꞈ-a.

⁴ Aˬ gaꞈ dzaˇ uiˇ hawˇ-eu bi yehꞈ laˇ nya-eu dzaˇ uiˇ maˬ dawˇ-ehˇ, maˬ ya dzaˬ-a lehˇ ehˇ taˬ-euˬ dzaˇ maˬ dzaˬ ni yahˇ-awˬ.

⁵ Nawˬ li dehꞈ le naˇ, aˬ yawꞈ-euˬ uˬ duˬ tsehˇ kahˇ tiˬ jawˇ-iˬ maˬ tehˬ ni ya bi jaˆ meh. Aˬ jeˬ miˇ neh ehˇ naˇ, aˬ yawꞈ dehꞈ le-euˬ tiˬ nah neh, Naˬzaˬliˇ tsawˇ haˬ tiˬ gʼaˬ loꞈ-ehˇ Miˬyehˇ-ahˇ a nehˬ taˬ-euˬ meh. Iˇsaˬleˬlaˆ tsawˇ haˬ deuˬ-ahˇ, Piˇliˇtiˆ tsawˇ haˬ deuˬ-euˬ aˬ laꞈ laꞈ kʼoeˇ neh aˬ yawꞈ ka kʼoꞈ nehˬ tehꞈ-a.”

⁶ Kʼoeˇ naˇ, zaˬ miˬ zaˬ kʼoeˇ gʼaˬ aˬ yawꞈ-euˬ kʼaˬ dzeˇ zaˬ jawˇ gaˇ iˇ-awˇ ehˇ nehˬ-eu, “Mˬ taˆ gʼaˬ kʼehˇ loꞈ-ehˇ tsawˬ guˆ laˇ paˬ-ehˇ gʼeh-eu Miˬyehˇ-euˬ tsawˇ haˬ tiˬ gʼaˬ ngaˇ jawˇ gaˇ oe-euˬ meh. Aˬ geu gaˇ neh oe teˬ lehˇ aˬ yawꞈ-ahˇ ngaˇ maˬ naˇ haˬ ehˇ, aˬ yawꞈ-euˬ tsawˇ myahˇ kʼawꞈ maˬ ehˇ mehˬ nehˬ laꞈ-aˬ.

⁷ Ehˇ kʼawꞈ, ngaˇ aˬ nyiˇ pi leˇ-awˇ, aˬ li tiˬ li ciˬ tehꞈ-a lehˇ aˬ yawꞈ ehˇ-eu meh. Aˬ gaꞈ dzaˇ uiˇ hawˇ-eu yehꞈ laˇ nya-eu dzaˇ uiˇ maˬ dawˇ-ehˇ, taˬ dzaˬ lehˇ ehˇ taˬ-euˬ jeˬ maˬ ya dzaˬ-a lehˇ ehˇ-eu meh. Aˬ jeˬ miˇ neh ehˇ naˇ, aˬ li kʼoeˇ li kʼaˇ dehꞈ kʼoeˇ keuˆ ni, Naˬzaˬliˇ tsawˇ haˬ loꞈ-ehˇ Miˬyehˇ-ahˇ a nehˬ taˬ-euˬ meh lehˇ aˬ yawꞈ ngaˬ-ahˇ ehˇ-eu meh.”

⁸ Kʼoeˇ naˇ, Maˬnoˇaˬ guiˬ lahˬ shaˇ-eu, “Sahˬpaˬ Miˬyehˇ-oˇ, nawˬ neh pyehˬ gʼeh leꞈ-euˬ Miˬyehˇ-euˬ tsawˇ haˬ kʼoeˇ gʼaˬ-ahˇ nga pehˬ jawˇ gaˇ tiˬ poˆ paˇ bi oe-awˇ, aˬ li kʼoeˇ li dehꞈ le ngeh, nga pehˬ aˬ joˆ-ehˇ ya mˇ ya shaˇ-eu gaˇ kawˆ bi ehˇ mehˬ le-awˬ.”

⁹ Maˬnoˇaˬ-euˬ shaˇ dawˬ-ahˇ Miˬyehˇ naˇ haˬ nehˬ-awˇ, miˬ zaˬ gʼaˬ deh yaˇ-ahˇ nuiˇ luꞈ gaˇ, aˬ yawꞈ-euˬ mˬ taˆ gʼaˬ kʼehˇ oe-euˬ meh. Kʼoeˇ ngeh jawˇ, aˬ yawꞈ-euˬ kʼaˬ dzeˇ zaˬ Maˬnoˇaˬ gʼaˬ aˬ yawꞈ nehˬ-ehˇ maˬ jawˇ-a.

¹⁰ Kʼoeˇ miˇ neh, aˬ yawꞈ-euˬ kʼaˬ dzeˇ zaˬ jawˇ gaˇ aˬ yawꞈ tiˬ poˆ tehꞈ-ehˇ cehˆ gʼeh-awˇ, “Haw sheˇ. Kʼoeˇ ngeh nah ngaˇ jawˇ gaˇ oe-euˬ tsawˇ haˬ kʼoeˇ gʼaˬ tiˬ poˆ paˇ doˆ le luꞈ ngaˇ” lehˇ ehˇ nehˬ-euˬ meh.

¹¹ Maˬnoˇaˬ tsawˬ tuˇ-awˇ, aˬ yawꞈ miˬ zaˬ-euˬ mehˬ nah caw teh gʼeh-euˬ meh. Tsawˇ haˬ kʼoeˇ gʼaˬ jawˇ gaˇ aˬ yawꞈ iˇ-awˇ, “Ngaˬ-eu nymˇ dahˬ-ahˇ dawˬ ngehˬ cawˬ le-euˬ kʼoeˇ gʼaˬ nawˇ ma loˇ” lehˇ naˇ haˬ-euˬ meh. Tsawˇ haˬ kʼoeˇ gʼaˬ gʼeh, “Ngeuˇ ma” lehˇ ehˇ-eu meh.

¹² Kʼoeˇ naˇ, Maˬnoˇaˬ ehˇ-eu, “Nawˬ neh ehˇ-euˬ loꞈ-ehˇ pyeuꞈ laˇ ngeh, aˬ li kʼoeˇ gʼaˬ aˬ jeˬ mˇ nmˇ. Aˬ yawꞈ aˬ joˆ-ehˇ yaw dehꞈ ya dehꞈ nmˇ.”

¹³ Mˬ taˆ gʼaˬ kʼehˇ kʼoeˇ gʼaˬ ehˇ-eu, “Ngaˬ neh kʼaˇ ehˇ nehˬ-euˬ yawˬ jeˬ na luꞈ-ahˇ, nawˬ-euˬ nymˇ dahˬ gʼaˬ yawˬ duˬ duˬ-ehˇ ya mˇ meh.

¹⁴ Aˬ gaꞈ baw duˆ-ahˇ neh kʼaˇ doˆ le-euˬ jeˬ tiˬ jeˬ-iˬ aˬ yawꞈ maˬ ya dzaˬ-a. Aˬ gaꞈ dzaˇ uiˇ hawˇ-eu bi yehꞈ laˇ nya-eu dzaˇ uiˇ deuˬ aˬ yawꞈ maꞈ maˬ ya dawˇ-a. Ya sheuˬ meh lehˇ ehˇ taˬ-euˬ dzaˇ deuˬ-ahˇ kʼawꞈ, maˬ dzaˬ ni ya sheuˬ meh. Ngaˬ neh kʼaˇ ehˇ nehˬ-euˬ jeˬ-ahˇ aˬ yawꞈ ya mˇ meh.”

¹⁵ Sahˬpaˬ Miˬyehˇ-euˬ gʼaˬ kʼehˇ kʼoeˇ gʼaˬ-ahˇ Maˬnoˇaˬ ehˇ nehˬ-eu, “Nga nyaꞈ ciꞈ myehꞈ ciꞈ zaˬ tiˬ mawˇ sehꞈ-awˇ dzaˇ jahˇ jaꞈ gʼaˬ ngeh keuˆ ni heu gaˇ jawˇ tawˬ siˬ.”

¹⁶ Sahˬpaˬ Miˬyehˇ-euˬ gʼaˬ kʼehˇ ehˇ-eu, “Nawˇ ngaˬ-ahˇ gʼeu tehˬ kʼawꞈ, nawˬ-euˬ dzaˇ ngaˇ maˬ dzaˬ. Ehˇ kʼawꞈ, nawˇ dzaˇ laˆ saˆ mawꞈ naˇ, miˬ dzaˬ dzah puiˆ-awˇ lawˇ-eu jeˬ loꞈ-ehˇ Sahˬpaˬ Miˬyehˇ-ahˇ lawˇ nehˬ-awˬ.” (Tsawˇ haˬ kʼoeˇ gʼaˬ Sahˬpaˬ Miˬyehˇ-euˬ gʼaˬ kehˇ pyeuꞈ-eu Maˬnoˇaˬ maˬ siˬ nya-a.)

¹⁷ Maˬnoˇaˬ ehˇ-eu, “Nawˬ neh ehˇ taˬ-euˬ loꞈ-ehˇ pyeuꞈ laˇ ngeh, nga pehˬ zaˬ nawˬ-ahˇ taˬ huiˬ taˬ mahˇ nehˬ nya-eu gʼaˇ duˬ, nawˬ-eu tsawˇ myahˇ tiˬ poˆ ehˇ nehˬ laꞈ-awˬ.”

¹⁸ Mˬ taˆ gʼaˬ kʼehˇ ehˇ-eu, “Aˬ jeˬ miˇ neh ngaˬ-euˬ tsawˇ myahˇ siˬ nya mawꞈ-eu nya. Kʼoeˇ-aˬ, zahˬ leˇ paˬ-ehˇ gʼeh-eu tsawˇ myahˇ meh.”

¹⁹ Kʼoeˇ naˇ, ciꞈ myehꞈ ciꞈ zaˬ tiˬ mawˇ hawˇ-eu cehˇ meu ui cuiˆ yuˇ-awˇ, kʼaˬ lo lawˇ duˬ kʼoeˇ taˆ, zahˬ leˇ paˬ-ehˇ gʼeh-eu jeˬ mˇ-eu Sahˬpaˬ Miˬyehˇ-ahˇ lawˇ nehˬ-euˬ meh.

²⁰ Lawˇ duˬ kʼoeˇ taˆ miˬ dzaˬ miˬ lmˇ doꞈ doˆ laˇ ngeh, Sahˬpaˬ Miˬyehˇ-euˬ gʼaˬ kʼehˇ kʼoeˇ gʼaˬ, miˬ lmˇ laꞈ kʼoeˇ mˬ kʼoeˇ taˆ gʼoꞈ daˆ leˇ-euˬ meh. Kʼoeˇ gaˇ ya mawˇ ngeh, Maˬnoˇaˬ aˬ nyaꞈ dzeˇ zaˬ miˇ tsaˬ-ahˇ uˬ duˬ tahˬ moꞈ-awˇ awˆ byaˆ-euˬ meh.

²¹ Maˬnoˇaˬ aˬ nyaꞈ dzeˇ zaˬ mˬ taˆ gʼaˬ kʼehˇ kʼoeˇ gʼaˬ-ahˇ maˬ ya mawˇ-ehˇ pyeuꞈ-iˇ ngeh jawˇ, Sahˬpaˬ Miˬyehˇ-euˬ gʼaˬ kʼehˇ pyeuꞈ-eu nga lehˇ Maˬnoˇaˬ siˬ duˬ-euˬ meh.

²² Maˬnoˇaˬ aˬ yawꞈ-euˬ miˬ zaˬ-ahˇ ehˇ nehˬ-eu, “Aˇ nyaꞈ ya shiˇ-eu yaw duˬ baw-eu nga. Aˬ jeˬ miˇ neh ehˇ naˇ, Miˬyehˇ-ahˇ aˇ nyaꞈ ya mawˇ gʼaˬ-euˬ ma.”

²³ Ehˇ kʼawꞈ, miˬ zaˬ gʼaˬ ehˇ-eu, “Aˇ nyaꞈ-ahˇ Sahˬpaˬ Miˬyehˇ bi shiˇ mawꞈ law nmˇ-aˬ, aˇ nyaꞈ-euˬ lawˇ-eu jeˬ-ahˇ aˬ yawꞈ maˬ ha geuꞈ-ehˇ, heu loꞈ-ehˇ gʼeh-eu jeˬ dawˬ tawˆ luꞈ aˇ nyaꞈ-ahˇ maˬ bi mawˇ laꞈ-eu uˬ taꞈ, heu loꞈ-ehˇ maˬ ehˇ nehˬ laꞈ-aˇ.”

²⁴ Zaˬ miˬ zaˬ kʼoeˇ gʼaˬ aˬ li tiˬ gʼaˬ ciˬ-awˇ, Saˬsoˬ lehˇ myahˇ nehˬ-euˬ meh. Aˬ li kʼoeˇ li huiˬ laˇ-awˇ aˬ yawꞈ-ahˇ Sahˬpaˬ Miˬyehˇ guiˬ lahˬ biꞈ nehˬ-euˬ meh.

²⁵ Zoˇlahˬ hawˇ-eu Eˇshaˬtawˇlaˆ meuˬ-euˬ yaw kaˬ-ahˇ jaˆ-eu Daˬ-euˬ taˆ-ahˇ aˬ yawꞈ jawˇ luꞈ ngeh, Sahˬpaˬ Miˬyehˇ-euˬ baoˬ aˬ yawꞈ-ahˇ gʼaˬ biꞈ lahˬ-euˬ meh.