Yaˇ kʼaˬ daˇ 12 - Akha

Yeˬpaˬtaˆ hawˇ-eu Eˇpaˬleˬ tsawˇ haˬ deuˬ

¹ Eˇpaˬleˬ tsawˇ haˬ deuˬ guiˇ deuˆ-eu gʼaˇ duˬ lehˬ hmˬ-awˇ, Yawˇdaˬ lawˇ baˬ tsehˆ doˆ-awˇ, Zaˬpoˬ meuˬ-ahˇ laˇ-awˇ, Yeˬpaˬtaˆ-ahˇ heu loꞈ-ehˇ ehˇ laˇ-euˬ meh. “Aˬ jeˬ miˇ neh nga maꞈ-ahˇ naw maꞈ maˬ kuˇ ni, miˇ kaˬ iˇ dzeuˇ-awˇ, Aˬmoˬ tsawˇ haˬ deuˬ-ahˇ guiˇ deuˆ-iˇ teˬ. Nawˬ-euˬ uˬ duˬ kʼoeˇ taˆ nawˬ-euˬ nymˇ nga maꞈ keuˬ puiˆ ma.”

² Ehˇ kʼawꞈ, aˬ yawꞈ maꞈ-ahˇ Yeˬpaˬtaˆ ehˇ nehˬ-eu, “Ngaˇ hawˇ-eu ngaˬ-euˬ tsawˇ haˬ deuˬ, Aˬmoˬ tsawˇ haˬ deuˬ nehˬ-ehˇ yaw kʼaˆ-ehˇ ja dzaˬ-euˬ ma. Naw maꞈ-ahˇ ngaˇ kuˇ-euˬ kʼawꞈ, naw maꞈ nga maꞈ-ahˇ maˬ ka kʼoꞈ le ni jawˇ-euˬ meh.

³ Naw maꞈ-aˬ, nga maꞈ nehˬ-ehˇ maˬ iˇ nehˬ laꞈ luꞈ-a lehˇ ngaˇ haw tsehˆ-awˇ, ngaˬ-euˬ saꞈ laˇ daˬ-awˇ, miˇ kaˬ iˇ tsehˆ-awˇ guiˇ deuˆ ngeh, Sahˬpaˬ Miˬyehˇ ngaˬ-ahˇ bi gʼaˬ leˇ laꞈ-euˬ meh. Naw maꞈ aˬ jeˬ miˇ neh nymˬ-mˇ ngaˬ-ahˇ guiˇ paˇ deuˆ le te.”

⁴ Kʼoeˇ naˇ, Giˇlaˆ miˇ kʼahˬ-ahˇ jawˇ-eu tsawˇ haˬ dawˬ tawˆ luꞈ-ahˇ Yeˬpaˬtaˆ kuˇ uiˬ-awˇ, Eˇpaˬleˬ tsawˇ haˬ deuˬ-ahˇ guiˇ deuˆ-awˇ, deuˆ gʼaˬ-euˬ meh. Naw maꞈ Giˇlaˆ tsawˇ haˬ deuˬ-aˬ, “Eˇpaˬleˬ tsawˇ jeuˬ hawˇ-eu Maˬnaˇseˬ tsawˇ jeuˬ laꞈ kʼoeˇ neh doˆ-iˇ-awˇ, aˬ cawˬ-ahˇ paˬ maˬ taꞈ-eu tsawˇ haˬ deuˬ meh” lehˇ Eˇpaˬleˬ tsawˇ haˬ deuˬ neh ehˇ taˬ-euˬ jaˆ-eu miˇ neh, aˬ yawꞈ maꞈ-ahˇ kʼoeˇ loꞈ-ehˇ deuˆ gʼaˬ nehˬ-euˬ meh.

⁵ Eˇpaˬleˬ tsawˇ haˬ deuˬ maˬ bi cehˆ dzeuˇ-eu gʼaˇ duˬ, Yawˇdaˬ lawˇ baˬ-ahˇ tsehˆ daˬ kʼaˇ jaˆ gaˇ Giˇlaˆ tsawˇ haˬ deuˬ deuˆ gʼaˬ-awˇ loꞈ-euˬ meh. Cehˆ dzeuˇ mawꞈ-eu Eˇpaˬleˬ tsawˇ haˬ deuˬ, lawˇ baˬ bi tsehˆ nehˬ laꞈ lehˇ kʼaˇ shaˇ ngeh, “Nawˇ Eˇpaˬleˬ tsawˇ haˬ maˬ ngeuˇ loˇ” lehˇ Giˇlaˆ tsawˇ haˬ deuˬ naˇ haˬ-euˬ meh. “Maˬ ngeuˇ” lehˇ ehˇ naˇ,

⁶ “Shiˇbawˇlehˆ” lehˇ ehˇ haw sheˇ lehˇ ehˇ nehˬ-euˬ meh. Kʼoeˇ loꞈ-ehˇ maˬ ehˇ lawˆ nya-ehˇ, “Siˇbawˇlehˆ” lehˇ ehˇ naˇ, Eˇpaˬleˬ tsawˇ haˬ pyeuꞈ-eu yaw duˬ baw-eu miˇ neh, nyehꞈ-awˇ kʼoeˇ gaˇ sehꞈ-euˬ meh. Kʼoeˇ ngeh poˆ Eˇpaˬleˬ tsawˇ haˬ oeˬ muiˇ nyiˬ heˇ gʼaˬ bi sehꞈ-euˬ meh.

⁷ Yeˬpaˬtaˆ-aˬ, Iˇsaˬleˬlaˆ tsawˇ jeuˬ kʼoeˇ taˆ koꞈ kʼoꞈ keuˆ ni aˬ yuiꞈ geuꞈ-euˬ meh. Kʼoeˇ naˇ, aˬ yawꞈ shiˇ-awˇ, Giˇlaˆ miˇ kʼahˬ laꞈ kʼoeˇ, aˬ yawꞈ jawˇ-eu meuˬ-ahˇ aˬ yawꞈ-ahˇ baꞈ pahˬ-euˬ meh.

Eˇbaˬzaˬ, Eˇloˬ, Aˬbaˬdoˬ

⁸ Yeˬpaˬtaˆ dzeuˇ naˇ, Behˬlehˬhehˬ meuˬ-ahˇ jawˇ-eu Eˇbaˬzaˬ gʼaˬ Iˇsaˬleˬlaˆ tsawˇ haˬ deuˬ-ahˇ sheuˬ gʼeh-euˬ meh.

⁹ Aˬ yawꞈ-aˬ, aˬ li smˬ tseˇ li hawˇ-eu aˬ buˇ smˬ tseˇ buˇ jawˇ-eu meh. Aˬ yawꞈ-euˬ aˬ buˇ smˬ tseˇ buˇ-ahˇ, aˬ yawꞈ-ahˇ aˇ jeuˬ maˬ taꞈ-euˬ deuˬ-ahˇ bi mˇ dzaˬ-iˇ-awˇ, aˬ yawꞈ-euˬ aˬ li deuˬ gʼaˇ duˬ, aˬ yawꞈ-ahˇ aˇ jeuˬ aˇ ca maˬ taꞈ-euˬ kuiˬ ma smˬ tseˇ ma sheuˬ ahˇ-euˬ meh. Eˇbaˬzaˬ-aˬ, Iˇsaˬleˬlaˆ tsawˇ jeuˬ-ahˇ shiꞈ kʼoꞈ sheuˬ gʼeh-euˬ meh.

¹⁰ Kʼoeˇ naˇ, aˬ yawꞈ shiˇ-awˇ, Behˬlehˬhehˬ meuˬ-ahˇ aˬ yawꞈ-ahˇ baꞈ pahˬ-euˬ meh.

¹¹ Eˇbaˬzaˬ dzeuˇ naˇ, Zeˬbuˬluˬ tsawˇ jeuˬ Eˇloˬ gʼaˬ Iˇsaˬleˬlaˆ tsawˇ jeuˬ-ahˇ tseˇ kʼoꞈ keuˆ ni sheuˬ gʼeh -euˬ meh.

¹² Kʼoeˇ naˇ, aˬ yawꞈ shiˇ-awˇ, Zeˬbuˬluˬ miˇ kʼahˬ Aiˬjaˬloˬ meuˬ-ahˇ aˬ yawꞈ-ahˇ baꞈ pahˬ-euˬ meh.

¹³ Eˇloˬ dzeuˇ naˇ, Piˇlaˬdoˬ meuˬ-ahˇ jawˇ-eu Hiˇlaˬlehˇ-euˬ aˬ li Aˬbaˬdoˬ gʼaˬ Iˇsaˬleˬlaˆ tsawˇ jeuˬ-ahˇ sheuˬ gʼeh-euˬ meh.

¹⁴ Aˬ yawꞈ-euˬ aˬ li oeˬ tseˇ li jawˇ-awˇ, oeˬ paˬ smˬ tseˇ gʼaˬ jawˇ-eu meh. Aˬ li kʼoeˇ deuˬ hawˇ-eu oeˬ paˬ kʼoeˇ deuˬ, mahˬ tahˬ laˆ shiꞈ tseˇ mawˇ dziˬ-euˬ meh. Aˬbaˬdoˬ-aˬ, Iˇsaˬleˬlaˆ tsawˇ jeuˬ-ahˇ yehꞈ kʼoꞈ sheuˬ gʼeh-euˬ meh.

¹⁵ Kʼoeˇ naˇ, aˬ yawꞈ shiˇ-awˇ, Eˇpaˬleˬ miˇ kʼahˬ laꞈ kʼoeˇ Aˬmaˬlehˇ tsawˇ haˬ deuˬ jawˇ-eu gawˬ jawˬ gawˬ duˇ-ahˇ jaˆ-eu Piˇlaˬdoˬ meuˬ-ahˇ aˬ yawꞈ-ahˇ baꞈ pahˬ-euˬ meh.