Yaˇ kʼaˬ daˇ 11 - Akha

¹ Giˇlaˆ miˇ kʼahˬ-ahˇ jawˇ-eu Yeˬpaˬtaˆ-aˬ, kʼaˆ dui dui-eu guiˇ deuˆ-eu tsawˇ haˬ tiˬ gʼaˬ meh. Aˬ yawꞈ-euˬ aˬ da-aˬ, Giˇlaˆ pyeuꞈ-awˇ, aˬ yawꞈ-euˬ aˬ ma-aˬ, meh maˬ laˇ tiˬ gʼaˬ pyeuꞈ-eu meh.

² Giˇlaˆ-euˬ ma huiˬ gʼaˬ kʼawꞈ aˬ li deuˬ ciˬ-awˇ, aˬ li kʼoeˇ deuˬ huiˬ laˇ ngeh, Yeˬpaˬtaˆ-ahˇ teh dzeh-euˬ meh. “Nawˇ-aˬ, aˬ ma yawˬ ma yawˬ-euˬ aˬ li pyeuꞈ-eu miˇ neh, ngaˬ ha mehˇ nmˇ-euˬ aˬ da-euˬ jeˬ biˇ maˬ za-a” lehˇ, aˬ yawꞈ maꞈ aˬ yawꞈ-ahˇ ehˇ nehˬ-euˬ meh.

³ Aˬ yawꞈ-euˬ mehˇ nmˇ deuˬ jawˇ gaˇ neh Yeˬpaˬtaˆ cehˆ-awˇ, Tawˇbaˬ miˇ kʼahˬ-ahˇ cehˆ jawˇ-iˇ-euˬ meh. Kʼoeˇ gaˇ jawˇ-eu gaˇ dahˇ maˬ tsoeˬ-eu tsawˇ haˬ deuˬ aˬ yawꞈ jawˇ gaˇ uiˬ laˇ-awˇ, aˬ yawꞈ-euˬ mehˬ nah doe doe-ehˇ cah cah-ehˇ jawˇ-euˬ meh.

⁴ Aˇ yamˬ ui cuiˆ myahˇ laˇ ngeh jawˇ, Aˬmoˬ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ guiˇ deuˆ laˇ-euˬ meh.

⁵ Kʼoeˇ loꞈ-ehˇ pyeuꞈ laˇ ngeh, Giˇlaˆ miˇ kʼahˬ-ahˇ jawˇ-eu aˬ yuiꞈ aˬ tsu deuˬ Tawˇbaˬ miˇ kʼahˬ-ahˇ jawˇ-eu Yeˬpaˬtaˆ-ahˇ sheuˬ kʼoꞈ laˬ-iˇ-euˬ meh.

⁶ “Gʼoꞈ laˇ-awˇ, Aˬmoˬ tsawˇ haˬ deuˬ-ahˇ nga maꞈ guiˇ deuˆ gaˇ aˬ yuiꞈ geuꞈ-awˇ sheuˬ gʼeh nehˬ laꞈ-awˬ.” lehˇ ehˇ nehˬ-euˬ meh.

⁷ Ehˇ kʼawꞈ, Yeˬpaˬtaˆ ehˇ-eu, “Naw maꞈ ngaˬ-ahˇ bye dui dui-eu miˇ neh, ngaˬ da-euˬ nymˇ-ahˇ neh ngaˬ-ahˇ teh dzeh nehˬ laꞈ-euˬ meh. Naw maꞈ shaˬ-eu zahˬ-eu jeˬ ya tahˬ puˬ ngeh, aˬ jeˬ miˇ neh ngaˇ jawˇ gaˇ oe te.”

⁸ Yeˬpaˬtaˆ-ahˇ aˬ yawꞈ maꞈ ehˇ nehˬ-eu, “Giˇlaˆ miˇ kʼahˬ-ahˇ jawˇ-eu tsawˇ haˬ dawˬ tawˆ luꞈ kʼoeˇ taˆ nawˇ aˬ yuiꞈ geuꞈ-awˇ, Aˬmoˬ tsawˇ haˬ deuˬ-ahˇ guiˇ deuˆ-eu gʼaˇ duˬ, nga maꞈ nehˬ-ehˇ bi laˇ mawꞈ-eu miˇ neh, nymˬ-mˇ nawˇ jawˇ gaˇ nga maꞈ oe-euˬ ma.”

⁹ Aˬ yawꞈ maꞈ-ahˇ Yeˬpaˬtaˆ ehˇ nehˬ-eu, “Aˬmoˬ tsawˇ haˬ deuˬ-ahˇ guiˇ deuˆ-eu gʼaˇ duˬ, naw maꞈ ngaˬ-ahˇ sheuˬ kʼoꞈ gʼeh-awˇ, Sahˬpaˬ Miˬyehˇ aˬ dui maꞈ-ahˇ bi gʼaˬ leˇ nehˬ laꞈ naˇ, ngaˇ naw maꞈ kʼoeˇ taˆ uˆ lahˇ-eu gʼaˬ geuꞈ ma.”

¹⁰ Aˬ yawꞈ maꞈ gʼeh, “Nga maꞈ nui ma tsaˬ ma. Sahˬpaˬ Miˬyehˇ-aˬ, aˬ dui-euˬ saˇ kiˇ pyeuꞈ luꞈ-uˇ.”

¹¹ Kʼoeˇ naˇ, Giˇlaˆ miˇ kʼahˬ-euˬ aˬ yuiꞈ aˬ tsu deuˬ nehˬ-ehˇ Yeˬpaˬtaˆ le-awˇ, aˬ cawˬ aˬ yawꞈ-ahˇ aˬ yawꞈ maꞈ kʼoeˇ taˆ aˬ yuiꞈ aˬ tsu bi geuꞈ-awˇ, bi uˆ lahˇ-euˬ meh. Kʼoeˇ ngeh, aˬ yawꞈ neh ehˇ-euˬ dawˬ kʼoeˇ dawˬ-ahˇ, Miˇzaˬpaˬ meuˬ-ahˇ, Sahˬpaˬ Miˬyehˇ-euˬ mehˬ shi aˬ yawꞈ tiˬ poˆ paˇ ehˇ poˆ-euˬ meh.

¹² Kʼoeˇ naˇ, Aˬmoˬ sahˬ paˬ jawˇ gaˇ Yeˬpaˬtaˆ tsawˇ haˬ pyehˬ gʼeh-awˇ, “Nawˇ nga maꞈ-ahˇ aˬ jeˬ miˇ neh ya ceh laˇ ta. Aˬ jeˬ miˇ neh nga maꞈ-euˬ miˇ kʼahˬ-ahˇ uˇ laˇ te” lehˇ bi tsaꞈ gaˬ-iˇ-euˬ meh.

¹³ Yeˬpaˬtaˆ neh dawˬ tsaꞈ bi tsaꞈ gaˬ-iˇ-euˬ tsawˇ haˬ deuˬ-ahˇ Aˬmoˬ sahˬ paˬ ehˇ nehˬ-eu, “Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, Aˬnoˬ lawˇ baˬ-ahˇ neh Jaˬboˆ lawˇ baˬ hawˇ-eu Yawˇdaˬ lawˇ baˬ-ahˇ keuˆ ni jaˆ-eu ngaˬ-euˬ miˇ kʼahˬ yuˇ geuꞈ-euˬ meh. Tiˬ jeˬ-iˬ maˬ laˆ bahˬ ni, miˇ kʼahˬ kʼoeˇ iˬ nah ngaˬ-ahˇ ya biꞈ kʼoꞈ laꞈ meh.”

¹⁴ Aˬmoˬ sahˬ paˬ jawˇ gaˇ Yeˬpaˬtaˆ tsawˇ haˬ tiˬ poˆ paˇ pyehˬ gʼeh-awˇ,

¹⁵ heu loꞈ-ehˇ bi tsaꞈ gaˬ-iˇ-euˬ meh. “Mawˇbaˆ miˇ kʼahˬ maˬ ehˇ, Aˬmoˬ miˇ kʼahˬ maˬ ehˇ, Iˇsaˬleˬlaˆ tsawˇ jeuˬ neh yuˇ geuꞈ-euˬ meh lehˇ ehˇ-eu teu maˬ tsaˬ-a.

¹⁶ Pyeuꞈ laˇ-euˬ gaˇ kawˆ heu loꞈ-ehˇ jaˆ-eu meh. Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, bawˇ tsahˬ bawˇ dahˇ paw neh Aˬgaˬbaˬ iˬ ma laˆ shaˆ lahˇ gʼoꞈ-ahˇ iˇ-awˇ, Kaˬdeˬshaˇ-ahˇ laˇ keuˆ-euˬ meh.

¹⁷ Kʼoeˇ ngeh, Eˬdoˬ sahˬ paˬ jawˇ gaˇ aˬ yawꞈ maꞈ tsawˇ haˬ pyehˬ gʼeh-awˇ, aˬ yawꞈ-euˬ miˇ kʼahˬ-ahˇ bi le tsehˆ neh laꞈ lehˇ bi tsaꞈ gaˬ-iˇ-euˬ meh. Ehˇ kʼawꞈ, Eˬdoˬ sahˬ paˬ aˬ yawꞈ maꞈ-ahˇ maˬ bi le tsehˆ-a. Mawˇbaˆ sahˬ paˬ-ahˇ aˬ yawꞈ maꞈ paˇ bi tsaꞈ gaˬ leˇ kʼawꞈ, kʼoeˇ gʼaˬ gʼeh, aˬ yawꞈ-euˬ miˇ kʼahˬ-ahˇ maˬ bi le tsehˆ-a. Kʼoeˇ miˇ neh, Iˇsaˬleˬlaˆ tsawˇ haˬ deuˬ Kaˬdeˬshaˇ-ahˇ tehꞈ-ehˇ jawˇ-euˬ meh.

¹⁸ Kʼoeˇ gaˇ neh naˇ, bawˇ tsahˬ bawˇ dahˇ caw caw-ehˇ aˬ yawꞈ maꞈ paˇ iˇ gʼeh-awˇ, Eˬdoˬ miˇ kʼahˬ hawˇ-eu Mawˇbaˆ miˇ kʼahˬ-ahˇ gaˇ jaw jaw-awˇ, Aˬnoˬ lawˇ baˬ-euˬ nui baˬ paw, Mawˇbaˆ miˇ kʼahˬ-euˬ nahˇ ma doˆ kʼehˬ paw dzeˇ laˇ doˆ-euˬ meh. Aˬ yawꞈ maꞈ kʼoeˇ gaˇ sehˬ gʼawˆ gʼawˆ-awˇ jawˇ-euˬ meh. Aˬnoˬ lawˇ baˬ aˬ yawꞈ maꞈ maˬ tsehˆ doˆ-aˬ. Aˬ jeˬ miˇ neh ehˇ naˇ, kʼoeˇ-aˬ, Mawˇbaˆ miˇ kʼahˬ-euˬ miˇ kaˬ pyeuꞈ-eu meh.

¹⁹ Kʼoeˇ naˇ, Heˬshaˬboˬ meuˬ-ahˇ jawˇ-eu Aˬmawˇliˆ sahˬ paˬ Siˇhoˬ jawˇ gaˇ Iˇsaˬleˬlaˆ tsawˇ haˬ deuˬ tsawˇ haˬ pyehˬ gʼeh-awˇ, ‘Nga maꞈ-euˬ miˇ kʼahˬ-ahˇ le-eu gʼaˇ duˬ, nawˬ-euˬ miˇ kʼahˬ-ahˇ bi le tsehˆ nehˬ laꞈ’ lehˇ bi tsaꞈ gaˬ-iˇ-euˬ meh.

²⁰ Ehˇ kʼawꞈ, Siˇhoˬ-aˬ, Iˇsaˬleˬlaˆ tsawˇ haˬ deuˬ-ahˇ, aˬ yawꞈ-euˬ miˇ kʼahˬ maˬ bi le tsehˆ-a. Aˬ yawꞈ-euˬ guiˇ maꞈ dawˬ tawˆ luꞈ sheuˬ-awˇ, Yaˬhaˇ meuˬ-ahˇ taˆ tsoˆ-awˇ, Iˇsaˬleˬlaˆ tsawˇ haˬ deuˬ-ahˇ guiˇ deuˆ le-euˬ meh.

²¹ Ehˇ kʼawꞈ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, Iˇsaˬleˬlaˆ tsawˇ haˬ deuˬ-ahˇ Siˇhoˬ hawˇ-eu aˬ yawꞈ-euˬ guiˇ maꞈ deuˬ kʼoeˇ taˆ bi gʼaˬ leˇ-euˬ meh. Kʼoeˇ naˇ, kʼoeˇ gaˇ jawˇ-eu Aˬmawˇliˆ tsawˇ haˬ deuˬ-euˬ miˇ kʼahˬ dawˬ tawˆ luꞈ, Iˇsaˬleˬlaˆ tsawˇ haˬ deuˬ yuˇ geuꞈ-euˬ meh.

²² Laꞈ oˆ paw Aˬnoˬ lawˇ baˬ-ahˇ neh, laꞈ taˆ paw Jaˬboˆ lawˇ baˬ-ahˇ keuˆ ni maˬ ehˇ, nahˇ ma doˆ kʼehˬ paw bawˇ tsahˬ bawˇ dahˇ-ahˇ neh nahˇ ma ga kʼehˬ paw Yawˇdaˬ lawˇ baˬ-ahˇ keuˆ ni maˬ ehˇ, kʼaˇ jaˆ-eu Aˬmawˇliˆ tsawˇ haˬ-euˬ miˇ kʼahˬ dawˬ tawˆ luꞈ, Iˇsaˬleˬlaˆ tsawˇ haˬ deuˬ yuˇ geuꞈ-euˬ meh.

²³ Kʼoeˇ miˇ neh, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, aˬ yawꞈ-euˬ tsawˇ haˬ pyeuꞈ-eu Iˇsaˬleˬlaˆ tsawˇ jeuˬ gʼaˇ duˬ, Aˬmawˇliˆ tsawˇ haˬ deuˬ-ahˇ teh-euˬ meh.

²⁴ Miˇ kʼahˬ kʼoeˇ nawˇ paˇ yuˇ kʼoꞈ-eu lehˇ gʼeh te loˇ. Nawˬ-euˬ miˬ yehˇ Sheˬmoˇshaˆ neh nawˬ-ahˇ kʼaˇ biꞈ-euˬ jeˬ nawˇ geuꞈ nya meh. Ehˇ kʼawꞈ, nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh nga maꞈ-ahˇ kʼaˇ biꞈ-euˬ jeˬ-aˬ, nga maꞈ-euˬ pyeuꞈ-eu ma.

²⁵ Baˬlehˇ-euˬ aˬ li Ziˇpoˬ naˆ maˬ tseˇ huiˬ dzehˬ ma lehˇ nawˇ yawˬ haˇ yawˬ ha noeˬ luꞈ te loˇ. Iˇsaˬleˬlaˆ tsawˇ haˬ-ahˇ guiˇ deuˆ ma lehˇ aˬ yawꞈ ehˇ meh loˇ. Aˬ yawꞈ kʼoeˇ loꞈ-ehˇ tiˬ jawˇ-iˬ maˬ ehˇ haw-aˬ. Aˬ yawꞈ nga maꞈ nehˬ-ehˇ guiˇ deuˆ haw mehˬ loˇ.

²⁶ Heˬshaˬboˬ meuˬ hawˇ-eu Aˬyawˬ meuˬ-ahˇ maˬ ehˇ, kʼoeˇ nyiˬ meuˬ-euˬ jawˬ jawˬ-ehˇ jaˆ-eu meuˬ meuˬ zaˬ deuˬ-ahˇ maˬ ehˇ, Aˬnoˬ lawˇ baˬ lawˇ deh caw caw-ehˇ jaˆ-eu meuˬ dawˬ tawˆ luꞈ-ahˇ maˬ ehˇ, Iˇsaˬleˬlaˆ tsawˇ haˬ deuˬ jawˇ luꞈ-eu smˬ yaˇ kʼoꞈ keuˆ laˇ-euˬ meh. Aˇ yamˬ heu myah ni gʼeh-eu laꞈ kʼoeˇ, aˬ jeˬ miˇ neh meuˬ kʼoeˇ deuˬ nawˇ maˬ yuˇ kʼoꞈ geuꞈ te.

²⁷ Nawˬ-ahˇ ngaˇ mˇ lehˬ taˬ-euˬ kʼawꞈ tiˬ jeˬ-iˬ maˬ jaˆ. Nawˇ guiˇ deuˆ le-eu laꞈ kʼoeˇ ngaˬ-ahˇ mˇ lehˬ-euˬ meh. Sahˬpaˬ Miˬyehˇ-aˬ, yaˇ kʼaˬ daˇ-eu gʼaˬ meh. Aˬmoˬ tsawˇ haˬ hawˇ-eu Iˇsaˬleˬlaˆ tsawˇ haˬ yaw kaˬ-ahˇ aˬ yawꞈ iˬ nah yaˇ kʼaˬ daˇ tehꞈ-a.”

²⁸ Ehˇ kʼawꞈ, Yeˬpaˬtaˆ neh dawˬ tsaꞈ biˬ tsaꞈ gaˬ-iˇ-euˬ dawˬ-ahˇ, Aˬmoˬ sahˬ paˬ maˬ naˇ haˬ geuꞈ-a.

²⁹ Kʼoeˇ naˇ, Sahˬpaˬ Miˬyehˇ-euˬ yaw sahˇ Yeˬpaˬtaˆ jawˇ gaˇ oe-euˬ meh. Yeˬpaˬtaˆ-aˬ, Giˇlaˆ miˇ kʼahˬ hawˇ-eu Maˬnaˇseˬ miˇ kʼahˬ doe ni cah-awˇ, Giˇlaˆ miˇ kʼahˬ-ahˇ jaˆ-eu Miˇzaˬpaˬ meuˬ-ahˇ gʼoꞈ laˇ-awˇ, Aˬmoˬ miˇ kʼahˬ paw iˇ-euˬ meh.

³⁰ Sahˬpaˬ Miˬyehˇ-ahˇ Yeˬpaˬtaˆ saˇ jaˇ dzaˬ-awˇ ehˇ-eu, “Nawˇ ngaˬ-ahˇ Aˬmoˬ tsawˇ haˬ deuˬ kʼoeˇ taˆ bi gʼaˬ le nehˬ laꞈ naˇ,

³¹ guiˇ deuˆ gʼaˬ-awˇ gʼoꞈ laˇ ngeh, ngaˬ-euˬ nymˇ laꞈ kʼoeˇ neh aˬ cawˬ jeˬ hu doˆ le-awˇ ngaˬ-ahˇ ha le-euˬ tsawˇ haˬ-ahˇ, miˬ dzaˬ-ahˇ dzah puiˆ-awˇ nawˬ-ahˇ lawˇ nehˬ ma.”

³² Kʼoeˇ naˇ, Yeˬpaˬtaˆ lawˇ baˬ tsehˆ doˆ-awˇ guiˇ deuˆ-iˇ ngeh, aˬ yawꞈ-ahˇ Sahˬpaˬ Miˬyehˇ bi gʼaˬ leˇ-euˬ meh.

³³ Aˬyawˬ meuˬ-ahˇ neh Miˇniˆ meuˬ-euˬ gahˬ kaˬ-ahˇ keuˆ ni, aˬ yawꞈ maꞈ-ahˇ aˬ yawꞈ deuˆ-awˇ, Aˬbeˬlaˆkaˬlaˬmeˬ meuˬ-ahˇ keuˆ ni jaˆ-eu meuˬ nyiˬ tseˇ meuˬ-ahˇ deuˆ-euˬ meh. Tsawˇ haˬ gʼawˬ mya ni bi deuˆ sehꞈ-awˇ, Aˬmoˬ tsawˇ haˬ deuˬ-ahˇ Iˇsaˬleˬlaˆ tsawˇ haˬ deuˬ deuˆ gʼaˬ-euˬ meh.

Yeˬpaˬtaˆ-euˬ aˬ buˇ

³⁴ Miˇzaˬpaˬ meuˬ-ahˇ jaˆ-eu aˬ yawꞈ-euˬ nymˇ-ahˇ Yeˬpaˬtaˆ gʼoꞈ le ngeh, aˬ yawꞈ-euˬ aˬ buˇ cehˇ lehˇ ciˆ-awˇ, gaˇ nyeh nyeh nyeh-ehˇ aˬ yawꞈ-ahˇ ha laˬ le-euˬ meh. Aˬ yawꞈ-aˬ, aˬ buˇ kʼoeˇ tiˬ buˇ tehꞈ-ehˇ jawˇ-eu meh.

³⁵ Aˬ yawꞈ-euˬ aˬ buˇ-ahˇ aˬ yawꞈ ya mawˇ ngeh, noeˬ shaˬ dui dui-eu laꞈ kʼoeˇ yawˬ ha-euˬ meh tsoeˬ cehˬ pyaˬ-awˇ ehˇ-eu, “Ngaˬ buˇ-oˇ, ngaˬ-eu nui ma tsawˬ paˆ-iˇ ni nawˇ jahˇ-euˬ nga. Nawˇ-aˬ, ngaˇ shaˬ zahˬ naꞈ ni jahˇ nehˬ laꞈ-eu tsawˇ haˬ tiˬ gʼaˬ law hawˇ nga. Sahˬpaˬ Miˬyehˇ-ahˇ ngaˇ saˇ jaˇ ziꞈ dah ni dzaˬ gʼaˬ taˬ-euˬ miˇ neh, maˬ paˇ noeˬ paˇ nya meh.”

³⁶ Aˬ yawꞈ-euˬ aˬ buˇ ehˇ-eu, “Sahˬpaˬ Miˬyehˇ-ahˇ nawˇ saˇ jaˇ dzaˬ taˬ-euˬ jaˆ naˇ, nawˬ neh dzaˬ taˬ-euˬ loꞈ-ehˇ ngaˬ-euˬ kʼoeˇ taˆ bi keuˆ le-awˬ. Aˬ jeˬ miˇ neh ehˇ naˇ, nawˬ-ahˇ muiˇ-eu Aˬmoˬ tsawˇ haˬ deuˬ kʼoeˇ taˆ, Sahˬpaˬ Miˬyehˇ nawˬ-ahˇ laꞈ poˆ bi poˆ gʼaˬ-eu meh.”

³⁷ Ehˇ kʼawꞈ, aˬ yawꞈ-euˬ aˬ da-ahˇ aˬ yawꞈ shaˇ-eu, “Ngaˬ-ahˇ heu loꞈ-ehˇ bi jahˇ laꞈ-awˬ. Ngaˇ-aˬ, miˬ daꞈ daꞈ shuiꞈ pyeuꞈ luꞈ-eu aˇ yamˬ laꞈ kʼoeˇ ya shiˇ-eu gaˇ kawˆ heu, ngaˬ-euˬ aˬ yehˇ deuˬ nehˬ-ehˇ gawˬ jawˬ doe ni cah-awˇ tsawˇ ngoeˇ ngoeˇ-eu gʼaˇ duˬ, ngaˬ-ahˇ ba la nyiˬ siˬ aˇ yamˬ biꞈ nehˬ laꞈ-awˬ.”

³⁸ Yeˬpaˬtaˆ-aˬ, aˬ yawꞈ-euˬ aˬ buˇ-ahˇ ba la nyiˬ siˬ pyehˬ nehˬ-awˇ, bi iˇ-euˬ meh. Aˬ buˇ kʼoeˇ buˇ hawˇ-eu aˬ yawꞈ-euˬ cawˬ deuˬ gawˬ jawˬ-ahˇ daˆ leˇ-awˇ, tsawˇ ngoeˇ ngoeˇ leˇ-euˬ meh. Aˬ jeˬ miˇ neh ehˇ naˇ, smˇ miˇ maˬ iˇ, zaˬ maˬ jawˇ le mi naˆ-ehˇ aˬ yawꞈ ya shiˇ-euˬ miˇ neh meh.

³⁹ Ba la nyiˬ siˬ byah laˇ ngeh, aˬ yawꞈ aˬ da jawˇ gaˇ aˬ yawꞈ gʼoꞈ le-euˬ meh. Kʼoeˇ ngeh, aˬ yawꞈ-euˬ aˬ da neh Sahˬpaˬ Miˬyehˇ-ahˇ saˇ jaˇ dzaˬ taˬ-euˬ loꞈ-ehˇ mˇ-awˇ, aˬ yawꞈ ya shiˇ-euˬ meh. Aˬ yawꞈ-aˬ, kʼaˬ dzeˇ zaˬ nehˬ-ehˇ maˬ jawˇ taꞈ haw-euˬ miˬ daꞈ daꞈ shuiꞈ tiˬ gʼaˬ pyeuꞈ-eu meh. Kʼoeˇ ngeh neh naˇ, Iˇsaˬleˬlaˆ tsawˇ haˬ laꞈ kʼoeˇ zahˇ sahˇ kʼoꞈ heu loꞈ-ehˇ jaˆ ka leꞈ-euˬ meh.

⁴⁰ Zaˬ miˬ aˬ buˇ zaˬ guˬ deuˬ tiˬ kʼoꞈ-euˬ oeˬ nah doˆ-iˇ-awˇ, Giˇlaˆ miˇ kʼahˬ-ahˇ jawˇ-euˬ Yeˬpaˬtaˆ-euˬ aˬ buˇ gʼaˇ duˬ tsawˇ ngoeˇ ya ngoeˇ-eu meh.