Yaˇ kʼaˬ daˇ 1 - Akha

Yuˇdaˆ tsawˇ jeuˬ hawˇ-eu Suˇmoˬ tsawˇ jeuˬ neh Aˬdoˬniˇbeˬzehˇ-ahˇ nyehꞈ-euˬ

¹ Yawˇshuˆ shiˇ dzeuˇ ngeh, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ naˇ haˬ-eu, “Nga maꞈ tsawˇ jeuˬ deuˬ laꞈ kʼoeˇ, tsawˇ jeuˬ aˬ geu jeuˬ aˬ cawˬ mehˬ hu le-awˇ, Kaˬnaˬ tsawˇ jeuˬ-ahˇ guiˇ ya deuˆ leˇ nmˇ.”

² Sahˬpaˬ Miˬyehˇ ehˇ-eu, “Yuˇdaˆ tsawˇ jeuˬ aˬ cawˬ mehˬ hu ya le meh. Aˬ yawꞈ maꞈ-ahˇ, miˇ kʼahˬ kʼoeˇ kʼahˬ-ahˇ bi deuˆ gʼaˬ ma.”

³ Yuˇdaˆ tsawˇ haˬ deuˬ Suˇmoˬ tsawˇ haˬ deuˬ-ahˇ ehˇ nehˬ-eu, “Nga maꞈ-ahˇ biꞈ laꞈ-euˬ miˇ kʼahˬ-ahˇ nga maꞈ nehˬ-ehˇ tiˬ kawˆ loꞈ-ehˇ le-awˇ, Kaˬnaˬ tsawˇ jeuˬ-ahˇ guiˇ deuˆ leˇ kaˇ-euˇ. Kʼoeˇ naˇ, naw maꞈ-ahˇ biꞈ nehˬ-euˬ miˇ kʼahˬ-ahˇ, naw maꞈ nehˬ-ehˇ kʼawꞈ nga maꞈ le ma.” Kʼoeˇ ngeh, Suˇmoˬ tsawˇ haˬ deuˬ aˬ yawꞈ maꞈ nehˬ-ehˇ le-euˬ meh.

⁴ Yuˇdaˆ tsawˇ haˬ deuˬ guiˇ deuˆ leˇ-awˇ, Kaˬnaˬ tsawˇ jeuˬ hawˇ-eu Paˬyehˆ tsawˇ jeuˬ kʼoeˇ taˆ, aˬ yawꞈ maꞈ-ahˇ Sahˬpaˬ Miˬyehˇ bi gʼaˬ leˇ-awˇ, Beˬzehˇ meuˬ laꞈ kʼoeˇ tsawˇ haˬ tiˬ heˇ gʼaˬ-ahˇ aˬ yawꞈ maꞈ deuˆ gʼaˬ-euˬ meh.

⁵ Kʼoeˇ gaˇ, Aˬdoˬniˇbeˬzehˇ-ahˇ aˬ yawꞈ maꞈ tahˬ puˬ-awˇ, guiˇ deuˆ-euˬ meh.

⁶ Aˬdoˬniˇbeˬzehˇ cehˆ byoˆ-euˬ kʼawꞈ, aˬ yawꞈ maꞈ paˇ teh mi-awˇ, kuiˇ ma laꞈ ma toˆ tsehˆ nehˬ-euˬ meh.

⁷ Aˬdoˬniˇbeˬzehˇ ehˇ-eu, “Kuiˇ ma laꞈ ma bi toˆ tsehˆ-euˬ sahˬ paˬ shiꞈ tseˇ gʼaˬ, ngaˬ-eu hawˬ jeh uˬ moˆ dzaˬ dzeh dawˇ dzeh gʼoˆ dzaˬ-euˬ meh. Aˬ yawꞈ maꞈ-ahˇ ngaˬ neh jahˇ nehˬ-euˬ jeˬ, Miˬyehˇ ngaˬ-ahˇ paˇ bi keuˆ le laꞈ-euˬ nga.” Aˬ yawꞈ-ahˇ Yeˬluˇsaˬlehˬ meuˬ-ahˇ nyehꞈ kʼoꞈ gʼeh-awˇ, kʼoeˇ gaˇ shiˇ-euˬ meh.

Yeˬluˇsaˬlehˬ meuˬ hawˇ-eu Heˬbyoˬ meuˬ-ahˇ Yuˇdaˆ tsawˇ jeuˬ neh deuˆ gʼaˬ-euˬ

⁸ Yuˇdaˆ tsawˇ haˬ deuˬ Yeˬluˇsaˬlehˬ meuˬ-ahˇ guiˇ deuˆ-awˇ, deuˆ gʼaˬ-euˬ meh. Kʼoeˇ gaˇ jawˇ-eu tsawˇ haˬ deuˬ-ahˇ sehꞈ-awˇ, meuˬ-ahˇ miˬ dzaˬ keuˬ dzeh-euˬ meh.

⁹ Kʼoeˇ naˇ, gawˬ jawˬ gawˬ duˇ deuˬ, gʼaˬ lawˬ deuˬ hawˇ-eu, laꞈ oˆ paw gui coˇ ni gʼeh-eu miˇ kʼahˬ-ahˇ jawˇ-eu Kaˬnaˬ tsawˇ haˬ deuˬ jawˇ gaˇ aˬ yawꞈ maꞈ iˇ-awˇ, guiˇ deuˆ-iˇ-euˬ meh.

¹⁰ Giˇliˇyaˆaˬbaˬ meuˬ lehˇ kuˇ-eu Heˬbyoˬ meuˬ-ahˇ jawˇ-eu Kaˬnaˬ tsawˇ haˬ deuˬ jawˇ gaˇ aˬ yawꞈ maꞈ le-awˇ, guiˇ deuˆ leˇ-euˬ meh. Sheˬshaiˇ aˇ jeuˬ, Aˬhiˇmaˬ aˇ jeuˬ hawˇ-eu, Taˬlaˬmehˇ aˇ jeuˬ-ahˇ, kʼoeˇ gaˇ aˬ yawꞈ maꞈ deuˆ gʼaˬ-euˬ meh.

Deˬbeuˬ meuˬ-ahˇ Awˇdaˬneˬlaˇ deuˆ gʼaˬ-euˬ

¹¹ Kʼoeˇ gaˇ neh naˇ, kʼoeˇ ngeh ziˇ-ahˇ Giˇliˇyaˆseˬpeuˬ lehˇ kuˇ-eu Deˬbeuˬ meuˬ-ahˇ Yuˇdaˆ tsawˇ haˬ deuˬ guiˇ deuˆ le-euˬ meh.

¹² Aˬ yawꞈ maꞈ laꞈ kʼoeˇ, Gaˬlehˆ lehˇ kuˇ-euˬ gʼaˬ ehˇ-eu, “Giˇliˇyaˆseˬpeuˬ meuˬ-ahˇ deuˆ gʼaˬ-eu tsawˇ haˬ-ahˇ, ngaˬ buˇ Aˬkaˆsahˬ bi mˇ dzaˬ le ma.”

¹³ Gaˬlehˆ-euˬ aˬ nyiˇ Gaˬnaˆ-euˬ aˬ li Awˇdaˬneˬlaˇ gʼaˬ, meuˬ kʼoeˇ meuˬ-ahˇ deuˆ gʼaˬ-euˬ meh. Kʼoeˇ miˇ neh, Gaˬlehˆ-aˬ, aˬ yawꞈ-euˬ aˬ buˇ Aˬkaˆsahˬ-ahˇ, Awˇdaˬneˬlaˇ-ahˇ bi mˇ dzaˬ-iˇ-euˬ meh.

¹⁴ Oeˇ mˇ baˇ ngeh nah, Nawˬ da-ahˇ deh yaˇ tiˬ kawˬ shaˇ-awˬ lehˇ, Aˬkaˆsahˬ-ahˇ Awˇdaˬneˬlaˇ ehˇ nehˬ-euˬ meh. Kʼoeˇ naˇ, Aˬkaˆsahˬ mahˬ tahˬ laˆ dziˬ luꞈ-eu zaˬ ka-iˇ ngeh, “Aˬ jeˬ mawꞈ-eu nya buˇ-oˬ” lehˇ, Gaˬlehˆ aˬ yawꞈ-ahˇ naˇ haˬ-euˬ meh.

¹⁵ Aˬ yawꞈ ehˇ-eu, “Ngaˇ iˇ cuꞈ lah deuˬ geuꞈ mawꞈ-eu ma. Nawˬ neh ngaˬ-ahˇ biꞈ laꞈ-euˬ miˇ tsaˬ-aˬ, gui coˇ ni gʼeh-eu meh.” Kʼoeˇ naˇ, laꞈ taˆ paw jaˆ-eu iˇ cuꞈ lawˇ gawˆ deuˬ maˬ ehˇ, laꞈ oˆ paw jaˆ-eu iˇ cuꞈ lawˇ gawˆ deuˬ maˬ ehˇ, aˬ yawꞈ-ahˇ Gaˬlehˆ biꞈ-euˬ meh.

Yuˇdaˆ tsawˇ jeuˬ hawˇ-eu Beˬyaˬmiˬ tsawˇ jeuˬ miˇ kʼahˬ deuˆ za-euˬ

¹⁶ Moˇseˬ-euˬ aˬ mawˬ-euˬ zaˬ deuˬ uˆ deuˬ pyeuꞈ-eu Kaˬnaˆ tsawˇ haˬ deuˬ-aˬ, Saˬloˬ aˇ bawˇ bawˇ yaˇ-euˬ meuˬ pyeuꞈ-eu Yeˬliˇkoˇ meuˬ-ahˇ neh Yuˇdaˆ miˇ kʼahˬ laꞈ kʼoeˇ Aˬlaˬdaˇ meuˬ-euˬ laꞈ oˆ paw deˬ ko ni gʼeh-eu miˇ kʼahˬ-ahˇ, Yuˇdaˆ tsawˇ haˬ deuˬ nehˬ-ehˇ iˇ gʼeh-awˇ, Aˬmaˬlehˇ tsawˇ haˬ deuˬ nehˬ-ehˇ jawˇ-iˇ-euˬ meh.

¹⁷ Yuˇdaˆ tsawˇ haˬ deuˬ Suˇmoˬ tsawˇ haˬ deuˬ nehˬ-ehˇ iˇ-awˇ, aˬ yawꞈ maꞈ nehˬ-ehˇ tiˬ kawˆ loꞈ-ehˇ, Zeˬpaˇ meuˬ-ahˇ jawˇ-eu Kaˬnaˬ tsawˇ haˬ deuˬ-ahˇ deuˆ gʼaˬ-euˬ meh. Meuˬ kʼoeˇ meuˬ-ahˇ aˬ yawꞈ maꞈ yaˬ kʼehˇ yaˬ-awˇ laˆ cawˆ nehˬ-awˇ, Hawˇmaˬ meuˬ lehˇ myahˇ nehˬ-euˬ meh.

^18-19 Yuˇdaˆ tsawˇ haˬ deuˬ-ahˇ Sahˬpaˬ Miˬyehˇ caw ba nehˬ-awˇ, gawˬ jawˬ gawˬ duˇ miˇ kʼahˬ-ahˇ aˬ yawꞈ maꞈ za-euˬ meh. Ehˇ kʼawꞈ, Gaˬzaˬ meuˬ, Aˬshaˇgaˬloˇ meuˬ, Eˇkaˬloˬ meuˬ heu deuˬ hawˇ-eu meuˬ heu deuˬ-euˬ gahˬ kaˬ-ahˇ aˬ yawꞈ maꞈ guiˇ maˬ deuˆ-a. Iˬ ma laˆ shaˆ lawˇ deh caw caw-ehˇ jawˇ-eu tsawˇ haˬ heu deuˬ shmˇ mahˬ laˆ lawˬ deuˬ jaˆ-eu miˇ neh, Yuˇdaˆ tsawˇ haˬ deuˬ aˬ yawꞈ maꞈ-ahˇ maˬ teh doˆ nya-a.

²⁰ Moˇseˬ neh dawˬ biꞈ taˬ-euˬ loꞈ-ehˇ, Gaˬlehˆ-ahˇ Heˬbyoˬ meuˬ biꞈ-euˬ meh. Meuˬ kʼoeˇ meuˬ laꞈ kʼoeˇ jawˇ-eu Aˬnaˬkaˆ-euˬ zaˬ deuˬ uˆ deuˬ pyeuꞈ-eu aˇ jeuˬ smˇ jeuˬ-ahˇ aˬ yawꞈ teh doˆ-euˬ meh.

²¹ Ehˇ kʼawꞈ, Beˬyaˬmiˬ tsawˇ jeuˬ-aˬ, Yeˬluˇsaˬlehˬ meuˬ laꞈ kʼoeˇ jawˇ-eu Yeˬbuˇ tsawˇ jeuˬ-ahˇ maˬ teh doˆ-ehˇ, Yeˬbuˇ tsawˇ jeuˬ hawˇ-eu Beˬyaˬmiˬ tsawˇ jeuˬ tiˬ kawˆ loꞈ-ehˇ jawˇ daˆ leꞈ-euˬ meh.

Eˇpaˬleˬ tsawˇ jeuˬ hawˇ-eu Maˬnaˇseˬ tsawˇ jeuˬ Beˬdeˬlaˇ meuˬ-ahˇ deuˆ gʼaˬ-euˬ

^22-23 Eˇpaˬleˬ tsawˇ jeuˬ hawˇ-eu Maˬnaˇseˬ tsawˇ jeuˬ deuˬ, kʼoeˇ ngeh jo-ahˇ Luˇzaˆ meuˬ lehˇ kuˇ-eu Beˬdeˬlaˇ meuˬ-ahˇ guiˇ deuˆ-awˇ, aˬ yawꞈ maꞈ-ahˇ Sahˬpaˬ Miˬyehˇ caw ba nehˬ-euˬ meh. Aˬ yawꞈ maꞈ tsawˇ haˬ pyehˬ gʼeh-awˇ, meuˬ kʼoeˇ meuˬ-ahˇ bi kʼoeˬ sho haw-iˇ-euˬ meh.

²⁴ Kʼoeˬ sho haw-iˇ-euˬ tsawˇ haˬ kʼoeˇ deuˬ, tsawˇ haˬ tiˬ gʼaˬ meuˬ laꞈ kʼoeˇ neh doˆ le luꞈ-eu ya mawˇ-awˇ, “Nga maꞈ-ahˇ meuˬ-ahˇ uˇ le-eu gaˇ ma mehˬ nehˬ laꞈ-awˬ. Nga maꞈ nawˬ-ahˇ tiˬ jeˬ-iˬ maˬ jahˇ” lehˇ ehˇ nehˬ-euˬ meh.

²⁵ Kʼoeˇ ngeh, tsawˇ haˬ kʼoeˇ gʼaˬ aˬ yawꞈ maꞈ-ahˇ gaˇ ma mehˬ nehˬ-awˇ, Eˇpaˬleˬ hawˇ-eu Maˬnaˇseˬ tsawˇ haˬ deuˬ, meuˬ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ sehꞈ jiˇ-awˇ, tsawˇ haˬ kʼoeˇ gʼaˬ hawˇ-eu aˬ yawꞈ-euˬ miˬ sawˇ zaˬ deuˬ tehꞈ-ehˇ bi dzeuˇ-iˇ-euˬ meh.

²⁶ Aˇ nah, tsawˇ haˬ kʼoeˇ gʼaˬ Heˬtaˆ tsawˇ haˬ-euˬ miˇ kʼahˬ-ahˇ le-awˇ, meuˬ tiˬ meuˬ teˬ-awˇ, Luˇzaˆ meuˬ lehˇ myahˇ nehˬ-euˬ meh. Meuˬ kʼoeˇ meuˬ-ahˇ iˬ nah keuˆ ni kʼoeˇ loꞈ-ehˇ kuˇ luꞈ-eu meh.

Iˇsaˬleˬlaˆ tsawˇ haˬ deuˬ neh maˬ teh doˆ-euˬ tsawˇ haˬ deuˬ

²⁷ Maˬnaˇseˬ tsawˇ jeuˬ-aˬ, Behˬshaˬ meuˬ, Taˬnehˇ meuˬ, Dawˇlaˆ meuˬ, Eˇbaˬleˬ meuˬ, Meˬgiˇdoˬ meuˬ hawˇ-eu, meuˬ heu deuˬ-euˬ tahˬ gʼoꞈ tahˬ jawˇ jaˆ-eu meuˬ meuˬ zaˬ deuˬ-ahˇ jawˇ-eu tsawˇ haˬ deuˬ-ahˇ maˬ teh doˆ-a. Kaˬnaˬ tsawˇ haˬ deuˬ kʼoeˇ gaˇ jawˇ daˆ leꞈ-euˬ meh.

²⁸ Iˇsaˬleˬlaˆ tsawˇ haˬ deuˬ gʼaˬ kʼaˆ dzehˬ laˇ ngeh kʼawꞈ, Kaˬnaˬ tsawˇ haˬ deuˬ-ahˇ maˬ teh doˆ jiˇ nehˬ ni, aˬ yawꞈ maꞈ gʼaˇ duˬ gaˇ bi mˇ-euˬ meh.

²⁹ Eˇpaˬleˬ tsawˇ jeuˬ-aˬ, Geˬzeuˬ meuˬ-ahˇ jawˇ-eu Kaˬnaˬ tsawˇ haˬ deuˬ-ahˇ maˬ teh doˆ-ehˇ, Kaˬnaˬ tsawˇ haˬ kʼoeˇ deuˬ aˬ yawꞈ maꞈ nehˬ-ehˇ tiˬ kawˆ loꞈ-ehˇ jawˇ-euˬ meh.

³⁰ Zeˬbuˬluˬ tsawˇ jeuˬ-aˬ, Giˇtaˬloˬ meuˬ hawˇ-eu Naˬhaˬlaˇ meuˬ-ahˇ jawˇ-eu tsawˇ haˬ deuˬ-ahˇ maˬ teh doˆ-ehˇ, Kaˬnaˬ tsawˇ haˬ kʼoeˇ deuˬ aˬ yawꞈ maꞈ nehˬ-ehˇ tiˬ kawˆ loꞈ-ehˇ jawˇ daˆ leꞈ-awˇ, aˬ yawꞈ maꞈ-euˬ gaˇ bi mˇ-euˬ meh.

³¹ Aˬshaˬ tsawˇ jeuˬ-aˬ, Aˬkawˇ meuˬ, Siˇdoˬ meuˬ, Aˬhaˬlehˇ meuˬ, Aˬkaˬziˇ meuˬ, Heˬlaˬbaˬ meuˬ, Aˬpyehˇ meuˬ hawˇ-eu, Leˬhawˇbaˆ meuˬ heu deuˬ-ahˇ jawˇ-eu tsawˇ haˬ deuˬ-ahˇ maˬ teh doˆ-a.

³² Aˬshaˬ tsawˇ jeuˬ-aˬ, kʼoeˇ gaˇ jawˇ-eu Kaˬnaˬ tsawˇ haˬ deuˬ-ahˇ maˬ teh doˆ-ehˇ, tiˬ kawˆ loꞈ-ehˇ jawˇ-euˬ meh.

³³ Naˬtaˬliˇ tsawˇ jeuˬ-aˬ, Behˬsheˬmehˇ meuˬ hawˇ-eu, Behˬdaˬnaˆ meuˬ-ahˇ jawˇ-eu tsawˇ haˬ deuˬ-ahˇ maˬ teh doˆ-a. Naˬtaˬliˇ tsawˇ haˬ deuˬ-aˬ, kʼoeˇ gaˇ jawˇ-eu Kaˬnaˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ jawˇ-eu meh. Ehˇ kʼawꞈ, tsawˇ haˬ kʼoeˇ deuˬ-ahˇ aˬ yawꞈ maꞈ-euˬ gaˇ bi mˇ-euˬ meh.

³⁴ Aˬmawˇliˆ tsawˇ haˬ deuˬ Daˬ tsawˇ jeuˬ-ahˇ gawˬ jawˬ gawˬ duˇ paw teh daˆ-awˇ, deh ga-ahˇ maˬ bi oe ka-a.

³⁵ Aˬmawˇliˆ tsawˇ haˬ kʼoeˇ deuˬ, Aiˬjaˬloˬ meuˬ, Shaˬlaˬbeˬ meuˬ hawˇ-eu, Heˬyehˆ gawˬ jawˬ-ahˇ jawˇ luꞈ-eu meh. Ehˇ kʼawꞈ, Eˇpaˬleˬ tsawˇ jeuˬ hawˇ-eu Maˬnaˇseˬ tsawˇ jeuˬ, Aˬmawˇliˆ tsawˇ haˬ deuˬ-ahˇ uˆ lahˇ-awˇ, aˬ yawꞈ maꞈ gʼaˇ duˬ gaˇ bi mˇ-euˬ meh.

³⁶ Aˬmawˇliˆ tsawˇ haˬ-euˬ miˇ kaˬ-aˬ, Seˇlaˇ meuˬ-euˬ laꞈ taˆ paw Aˬkaˬlaˬbeˬ gʼaˬ lahˇ nyiˬ tsehˆ-ehˇ jaˆ-eu meh.