Yawˇshuˆ 9 - Akha

Giˇbyoˬ meuˬ-ahˇ jawˇ-eu tsawˇ haˬ deuˬ Yawˇshuˆ-ahˇ jaˬ myawꞈ myawꞈ-euˬ

¹ Yawˇdaˬ lawˇ baˬ nahˇ ma ga kʼehˬ paw jaˆ-eu gawˬ jawˬ gʼaˬ lawˬ hawˇ-eu, Gʼahˇ ceh-euˬ iˬ ma laˆ shaˆ lawˇ deh caw caw-ehˇ laꞈ taˆ paw pyawˬ-ahˇ jaˆ-eu Leˬbaˬnoˬ gawˬ jawˬ-ahˇ keuˆ ni jawˇ luꞈ-eu sahˬ paˬ deuˬ pyeuꞈ-eu, Heˬtaˆ sahˬ paˬ, Aˬmawˇliˆ sahˬ paˬ, Kaˬnaˬ sahˬ paˬ, Paˬyehˆ sahˬ paˬ, Hiˇbiˇ sahˬ paˬ hawˇ-eu Yeˬbuˇ sahˬ paˬ kʼoeˇ deuˬ dawˬ tawˆ luꞈ, Iˇsaˬleˬlaˆ tsawˇ haˬ guiˇ deuˆ gʼaˬ-euˬ gaˇ kawˆ ya siˬ-euˬ meh.

² Yawˇshuˆ hawˇ-eu Iˇsaˬleˬlaˆ tsawˇ haˬ deuˬ-ahˇ guiˇ deuˆ-eu gʼaˇ duˬ, aˬ yawꞈ maꞈ dawˬ tawˆ luꞈ gm leˇ-euˬ meh.

³ Ehˇ kʼawꞈ, Yeˬliˇkoˇ meuˬ hawˇ-eu Aˬiˇ meuˬ-ahˇ Yawˇshuˆ neh jahˇ nehˬ-euˬ gaˇ kawˆ-ahˇ, Hiˇbiˇ tsawˇ jeuˬ pyeuꞈ-eu Giˇbyoˬ meuˬ-ahˇ jawˇ-eu tsawˇ haˬ deuˬ ya gaˬ ngeh,

⁴ aˬ yawꞈ-ahˇ jaˬ myawꞈ myawꞈ ma lehˇ aˬ yawꞈ maꞈ noeˬ tsehˆ taˬ-euˬ meh. Aˬ yawꞈ maꞈ dzaˬ dzaˬ dawˇ dawˇ poˆ uiˬ-awˇ, pehˇ zeuˇ zeuˇ cehˇ deuˬ hawˇ-eu, pehˇ tsahˇ doꞈ taˬ-euˬ aˬ gaꞈ dzaˇ uiˇ dawˆ ahˇ-eu shaˬ kʼoˆ deuˬ-ahˇ shaˇ dawˆ-awˇ, mahˬ tahˬ laˆ kʼoeˇ taˆ kaꞈ daˆ-euˬ meh.

⁵ Aˬ yawꞈ maꞈ mehˬ tsoeˬ yaw pyaˬ dm-awˇ, guꞈ tmˇ taˬ-euˬ sehˬ nawˆ nawˆ cehˇ nawˆ-euˬ meh. Aˬ yawꞈ maꞈ yuˇ leꞈ-euˬ dzaˬ dzaˬ dawˇ dawˇ deuˬ-aˬ, koˆ kaˆ ni gʼeh-awˇ, hmˇ tsi tsi leˇ taˬ-euˬ meh.

⁶ Kʼoeˇ naˇ, Giˇlaˇgaˬlaˇ-ahˇ sehˬ gʼawˆ gʼawˆ-awˇ jawˇ luꞈ-eu Yawˇshuˆ hawˇ-eu Iˇsaˬleˬlaˆ tsawˇ haˬ deuˬ jawˇ gaˇ aˬ yawꞈ maꞈ iˇ-awˇ, “Nga maꞈ-aˬ, gaˇ mahˇ kaˬ-eu miˇ kʼahˬ-ahˇ neh oe-awˇ, naw maꞈ nehˬ-ehˇ saˇ jaˇ dzaˬ taꞈ le-euˬ ma.” lehˇ ehˇ nehˬ-euˬ meh.

⁷ Ehˇ kʼawꞈ, Iˇsaˬleˬlaˆ tsawˇ haˬ deuˬ ehˇ-eu, “Aˬ jeˬ miˇ neh nga maꞈ naw maꞈ nehˬ-ehˇ saˇ jaˇ ya dzaˬ taꞈ ta. Naw maꞈ dawˬ peh jawˇ-eu tsawˇ haˬ pyeuꞈ-eu maˬ siˬ tawˇ.”

⁸ Yawˇshuˆ-ahˇ aˬ yawꞈ maꞈ ehˇ-eu, “Nga maꞈ nawˬ-euˬ zaˬ kʼaˆ pyeuꞈ-eu ma.” Yawˇshuˆ ehˇ-eu, “Naw maꞈ aˬ jeˬ tsawˇ haˬte. Aˬ gaˇ neh oe teˬ.”

⁹ Kʼoeˇ ngeh, aˬ yawꞈ maꞈ aˬ yawꞈ-ahˇ heu loꞈ-ehˇ dzawˇ nehˬ-euˬ meh. “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ gaˇ kawˆ nga maꞈ ya gaˬ-euˬ miˇ neh, gaˇ mahˇ kaˬ-eu miˇ kʼahˬ-ahˇ neh nga maꞈ oe-euˬ ma. Iˇjiˇtuˆ miˇ kʼahˬ laꞈ kʼoeˇ aˬ yawꞈ neh mˇ-euˬ gaˇ kawˆ yawˬ jeˬ na luꞈ nga maꞈ ya gaˬ-euˬ ma.

¹⁰ Yawˇdaˬ lawˇ baˬ nahˇ ma doˆ kʼehˬ paw jawˇ-eu Aˬmawˇliˆ sahˬ paˬ nyiˬ gʼaˬ pyeuꞈ-eu Heˬshaˬboˬ sahˬ paˬ Siˇhoˬ hawˇ-eu Aˬshaˇtaˬyoˇ meuˬ-ahˇ jawˇ-eu Baˬshaˬ sahˬ paˬ Awˇgaˆ-ahˇ aˬ yawꞈ neh jahˇ nehˬ-euˬ gaˇ kawˆ kʼawꞈ nga maꞈ ya gaˬ-euˬ ma.

¹¹ Nga maꞈ-euˬ aˬ yuiꞈ aˬ tsu deuˬ hawˇ-eu nga maꞈ-euˬ miˇ kʼahˬ-ahˇ jawˇ-eu tsawˇ haˬ dawˬ tawˆ luꞈ, dzaˬ dzaˬ dawˇ dawˇ lehˬ hmˬ-awˇ naw maꞈ jawˇ gaˇ iˇ-awˬ lehˇ nga maꞈ-ahˇ kʼehˇ-eu meh. Nga maꞈ-aˬ, naw maꞈ-euˬ zaˬ kʼaˆ pyeuꞈ-eu ma lehˇ ehˇ nehˬ-awˇ saˇ jaˇ dzaˬ-awˬ lehˇ ehˇ nehˬ laꞈ-euˬ meh.

¹² Nga maꞈ-euˬ dzaˬ dzaˬ dawˇ dawˇ-ahˇ haw sheˇ. Naw maꞈ jawˇ gaˇ oe-eu lehˇ iˇ kahˇ-ahˇ neh doˆ le ngeh, yaw lahˇ lahˇ-eu maˬ coꞈ-iˇ dah-euˬ dzaˬ dzaˬ dawˇ dawˇ pyeuꞈ-eu ma. Ehˇ kʼawꞈ, nymˬ-mˇ paˇ haw ngeh, koˆ kaˆ ni pyeuꞈ jiˇ-awˇ, hmˇ tsi tsi leˇ taˬ-euˬ meh.

¹³ Shaˬ kʼoˆ pehˇ zeuˇ heu deuˬ kʼawꞈ, aˬ gaꞈ dzaˇ uiˇ dawˆ ahˇ ngeh shuiꞈ teˇ poˬ ni gʼeh-eu ma. Ehˇ kʼawꞈ, nymˬ-mˇ pyaˬ-iˇ jiˇ-euˬ meh. Gaˇ ma gʼawˬ myahˇ ni ya doˆ le-euˬ miˇ neh, nga maꞈ-euˬ mehˬ tsoeˬ hawˇ-eu sehˬ nawˆ kʼawꞈ pyaˬ-iˇ jiˇ-euˬ ma.”

¹⁴ Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ maˬ naˇ haˬ ni, tsawˇ haˬ kʼoeˇ deuˬ-euˬ dzaˬ dzaˬ dawˇ dawˇ tiˬ paˆ na deuˬ-ahˇ ha geuꞈ-euˬ meh.

¹⁵ Giˇbyoˬ meuˬ-ahˇ jawˇ-eu tsawˇ haˬ deuˬ-ahˇ maˬ sehꞈ ni bi jawˇ-eu gʼaˇ duˬ, cawˬ cawˬ taꞈ-eu saˇ jaˇ Yawˇshuˆ dzaˬ-euˬ meh. Iˇsaˬleˬlaˆ tsawˇ haˬ aˬ yuiꞈ aˬ tsu deuˬ kʼawꞈ, saˇ jaˇ ziꞈ ma lehˇ kamˬ-eu meh.

¹⁶ Saˇ jaˇ dzaˬ gʼaˬ-awˇ smˬ nah byah laˇ ngeh, tsawˇ haˬ kʼoeˇ deuˬ dawˬ peh jawˇ-eu tsawˇ haˬ pyeuꞈ-eu gaˇ kawˆ Iˇsaˬleˬlaˆ tsawˇ haˬ deuˬ ya siˬ-euˬ meh.

¹⁷ Kʼoeˇ naˇ, Iˇsaˬleˬlaˆ tsawˇ haˬ deuˬ gaˇ ma paˇ doˆ-iˇ-awˇ, smˬ nah gaˇ ma le ngeh, tsawˇ haˬ kʼoeˇ deuˬ jawˇ-eu meuˬ deuˬ pyeuꞈ-eu Giˇbyoˬ meuˬ, Sheˬpiˇlaˬ meuˬ, Biˇyoˆ meuˬ hawˇ-eu, Giˇliˇyaˆyeˬlmˬ meuˬ heu deuˬ-ahˇ le keuˆ-euˬ meh.

¹⁸ Ehˇ kʼawꞈ, aˬ yawꞈ maꞈ-ahˇ Iˇsaˬleˬlaˆ tsawˇ haˬ deuˬ maˬ sehꞈ nya-a. Aˬ jeˬ miˇ neh ehˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ uˬ moˆ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ aˬ yawꞈ maꞈ-ahˇ saˇ jaˇ dzaˬ gʼaˬ-euˬ meh. Gaˇ kawˆ kʼoeˇ baˬ da neh, Iˇsaˬleˬlaˆ tsawˇ haˬ deuˬ nui kʼahˇ maˬ shiˇ-ehˇ, aˬ yuiꞈ aˬ tsu deuˬ-ahˇ toˇ-euˬ meh.

¹⁹ Ehˇ kʼawꞈ, aˬ yuiꞈ aˬ tsu deuˬ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ uˬ moˆ, aˬ yawꞈ maꞈ-ahˇ aˬ dui maꞈ saˇ jaˇ dzaˬ gʼaˬ-euˬ ma. Aˬ yawꞈ maꞈ-ahˇ laˆ tahˬ laˆ naˇ-eu jeˬ aˬ dui maˬ mˇ nya-a.

²⁰ Aˬ dui-euˬ saˇ jaˇ baˬ da neh, aˬ yawꞈ maꞈ-ahˇ tiˬ jeˬ-iˬ maˬ jahˇ ni ya bi dehꞈ meh. Kʼoeˇ loꞈ-ehˇ maˬ bi dehꞈ naˇ, Miˬyehˇ aˬ dui maꞈ-ahˇ kʼehˬ nehˬ laꞈ tehꞈ-a.

²¹ Aˬ yawꞈ maꞈ-ahˇ tiˬ jeˬ-iˬ maˬ jahˇ nehˬ ni bi dehꞈ-awˬ. Ehˇ kʼawꞈ, aˬ dui maꞈ gʼaˇ duˬ aˬ yawꞈ maꞈ miˬ dzaˬ ya kʼehꞈ-awˇ, iˇ cuꞈ ya kʼawꞈ nehˬ laꞈ tehꞈ-a.” Aˬ yuiꞈ aˬ tsu deuˬ kʼoeˇ loꞈ-ehˇ ja sawˇ nehˬ-euˬ meh.

²² “Giˇbyoˬ meuˬ-ahˇ jawˇ-eu tsawˇ haˬ deuˬ-ahˇ aˬ yawꞈ jawˇ gaˇ sheuˬ laꞈ-awˬ” lehˇ Yawˇshuˆ dawˬ biꞈ-euˬ meh. Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ heu gaˇ dawˬ peh jawˇ-eu kʼawꞈ, gaˇ mahˇ kaˬ gaˇ jawˇ-eu ma lehˇ aˬ jeˬ miˇ neh nga maꞈ-ahˇ jaˬ myawꞈ myawꞈ te.

²³ Naw maꞈ kʼoeˇ loꞈ-ehˇ jaˬ myawꞈ myawꞈ-euˬ miˇ neh, Miˬyehˇ naw maꞈ-ahˇ yaˬ kʼehˇ yaˬ gʼaˬ-euˬ meh. Naw maꞈ tsawˇ haˬ-aˬ, aˬ myah luꞈ aˬ cawˬ zaˬ kʼaˆ ya geuꞈ-awˇ, ngaˬ-eu Miˬyehˇ-euˬ nymˇ gʼaˇ duˬ miˬ dzaˬ kʼehꞈ-eu hawˇ-eu iˇ cuꞈ kʼawꞈ-eu tsawˇ haˬ ya geuꞈ tehꞈ-a.”

²⁴ Aˬ yawꞈ maꞈ ehˇ-eu, “Miˇ kʼahˬ heu kʼahˬ kʼahˬ lahˬ ni naw maꞈ-ahˇ biꞈ-awˇ, naw maꞈ laˇ uˇ-eu nehˬ-ehˇ miˇ kʼahˬ heu kʼahˬ laꞈ kʼoeˇ jawˇ-eu tsawˇ haˬ deuˬ-ahˇ sehꞈ-eu gʼaˇ duˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh aˬ yawꞈ-euˬ zaˬ kʼaˆ Moˇseˬ-ahˇ dawˬ biꞈ taˬ-euˬ aˬ diˇ aˬ maˇ ngeuˇ meh lehˇ nga maꞈ ya siˬ duˬ-euˬ miˇ neh, kʼoeˇ loꞈ-ehˇ mˇ-euˬ ma. Naw maꞈ-ahˇ nga maꞈ guˆ dui dui-awˇ, nga maꞈ ya shiˇ gaˇ kʼahˬ lahˇ-eu miˇ neh, kʼoeˇ loꞈ-ehˇ mˇ-euˬ ma.

²⁵ Nymˬ-mˇ naw maꞈ-euˬ baoˬ uˬ moˆ nga maꞈ jawˇ luꞈ-eu ma. Naw maꞈ neh tsaˬ meh lehˇ kʼaˇ noeˬ-euˬ loꞈ-ehˇ nga maꞈ-ahˇ jahˇ nehˬ laꞈ-awˬ.”

²⁶ Kʼoeˇ naˇ, aˬ yawꞈ maꞈ-ahˇ Iˇsaˬleˬlaˆ tsawˇ haˬ neh maˬ bi sehꞈ ni Yawˇshuˆ haw lahˇ nehˬ-euˬ meh.

²⁷ Ehˇ kʼawꞈ, aˬ yawꞈ maꞈ-ahˇ zaˬ kʼaˆ bi geuꞈ-awˇ, Iˇsaˬleˬlaˆ tsawˇ haˬ deuˬ gʼaˇ duˬ hawˇ-eu Sahˬpaˬ Miˬyehˇ-euˬ lawˇ duˬ gʼaˇ duˬ, miˬ dzaˬ bi kʼehꞈ-awˇ, iˇ cuꞈ bi kʼawꞈ-euˬ meh. Iˬ nah keuˆ ni, Sahˬpaˬ Miˬyehˇ neh tseˇ doˆ-euˬ jawˇ duˬ-ahˇ, gaˇ kʼoeˇ deuˬ aˬ yawꞈ maꞈ mˇ luꞈ-eu meh.