Yawˇshuˆ 8 - Akha

Aˬiˇ meuˬ-ahˇ deuˆ gʼaˬ-awˇ laˆ luˬ laˆ seˇ-euˬ

¹ Yawˇshuˆ-ahˇ Sahˬpaˬ Miˬyehˇ ehˇ nehˬ-eu, “Yehˇ dawˬ tawˆ luꞈ sheuˬ-awˇ, Aˬiˇ meuˬ-ahˇ guiˇ deuˆ leˇ-awˬ. Guˆ-eu nui ma maˬ ehˇ, gʼaˬ baˬ-eu nui ma maˬ ehˇ, taˬ bi ahˇ. Ngaˇ nawˬ-ahˇ Aˬiˇ sahˬ paˬ-ahˇ bi gʼaˬ leˇ ma. Aˬ yawꞈ-euˬ tsawˇ haˬ, aˬ yawꞈ-euˬ meuˬ hawˇ-eu, aˬ yawꞈ-euˬ miˇ kʼahˬ-aˬ, nawˬ-euˬ pyeuꞈ laˇ tehꞈ-a.

² Yeˬliˇkoˇ meuˬ hawˇ-eu Yeˬliˇkoˇ sahˬ paˬ-ahˇ nawˬ neh jahˇ nehˬ-euˬ loꞈ-ehˇ, Aˬiˇ meuˬ hawˇ-eu Aˬiˇ sahˬ paˬ-ahˇ jahˇ nehˬ-awˬ. Ehˇ kʼawꞈ, nymˬ-mˇ poˆ-aˬ, kʼoeˇ gaˇ jaˆ-eu myawˬ gahˬ deuˬ hawˇ-eu jeˬ zaˬ deuˬ naw maꞈ geuꞈ-awˬ. Meuˬ kʼoeˇ meuˬ-euˬ naˇ kʼah paw neh le-awˇ, maˬ noeˬ maˬ duˇ-ehˇ jawˇ gaˇ ja pyuˬ ni guiˇ deuˆ leˇ-eu gʼaˇ duˬ lehˬ hmˬ-awˬ.”

³ Kʼoeˇ naˇ, Yawˇshuˆ-aˬ, aˬ yawꞈ-euˬ yehˇ dawˬ tawˆ luꞈ nehˬ-ehˇ Aˬiˇ meuˬ-ahˇ le-eu lehˇ lehˬ hmˬ dah-euˬ meh. Nya dui dui-eu yehˇ smˬ muiˇ gʼaˬ aˬ yawꞈ tseˇ doˆ-awˇ, uˬ ciꞈ paw meuˬ kʼoeˇ meuˬ-ahˇ pyehˬ gʼeh-euˬ meh.

⁴ Aˬ yawꞈ maꞈ-ahˇ aˬ yawꞈ heu loꞈ-ehˇ dawˬ biꞈ-awˇ pyehˬ gʼeh-euˬ meh. “Meuˬ kʼoeˇ meuˬ-euˬ kʼoeˇ paw paˆ aˇ dzehˬ-ehˇ maˬ kaˬ gaˇ dzuˇ zaꞈ-awˇ, guiˇ deuˆ-eu gʼaˇ duˬ noeˬ gahˇ taˬ-awˬ.

⁵ Ngaˇ hawˇ-eu ngaˬ-euˬ yehˇ deuˬ meuˬ-ahˇ le ma. Aˬiˇ meuˬ-ahˇ jawˇ-eu tsawˇ haˬ deuˬ nga maꞈ-ahˇ guiˇ deuˆ le ngeh, yaw beh poˆ cehˆ-euˬ loꞈ-ehˇ nga maꞈ cehˆ ma.

⁶ Meuˬ-ahˇ neh gaˇ mahˇ kaˬ gaˇ keuˆ ni, aˬ yawꞈ maꞈ nga maꞈ-ahˇ teh le tehꞈ-a. Yaw beh poˆ loꞈ-ehˇ aˬ dui maꞈ cehˆ gʼoꞈ tehꞈ-a lehˇ aˬ yawꞈ maꞈ noeˬ tehꞈ-a.

⁷ Kʼoeˇ ngeh, naw maꞈ dzuˇ zaꞈ taˬ-euˬ gaˇ neh doˆ laˇ-awˇ, meuˬ kʼoeˇ meuˬ-ahˇ deuˆ gʼaˬ-awˬ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ meuˬ kʼoeˇ meuˬ biꞈ laꞈ tehꞈ-a.

⁸ Meuˬ kʼoeˇ meuˬ-ahˇ naw maꞈ deuˆ gʼaˬ ngeh, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ miˬ dzaˬ dzah puiˆ nehˬ-awˬ. Naw maꞈ kʼoeˇ loꞈ-ehˇ mˇ-eu gʼaˇ duˬ, ngaˇ naw maꞈ-ahˇ dawˬ biꞈ-eu ma” lehˇ ehˇ nehˬ-euˬ meh.

⁹ Kʼoeˇ naˇ, Yawˇshuˆ aˬ yawꞈ maꞈ-ahˇ pyehˬ gʼeh ngeh, Aˬiˇ meuˬ-euˬ nahˇ ma doˆ kʼehˬ paw aˬ yawꞈ maꞈ le-awˇ, Aˬiˇ meuˬ hawˇ-eu Beˬdeˬlaˇ meuˬ yaw kaˬ-ahˇ dzuˇ zaꞈ leˇ-euˬ meh.

¹⁰ Uˬ shawˬ yaw naꞈ-ehˇ Yawˇshuˆ tuˇ-awˇ, yehˇ deuˬ-ahˇ kuˇ uiˬ-euˬ meh. Kʼoeˇ naˇ, aˬ yawꞈ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ yehˇ kʼoeˇ deuˬ-ahˇ Aˬiˇ meuˬ-ahˇ sheuˬ gʼeh-euˬ meh.

¹¹ Aˬ yawꞈ nehˬ-ehˇ cah luꞈ-eu yehˇ deuˬ meuˬ lahˇ laˇ gʼoˆ gʼoˆ ma jaˆ-eu paw le-awˇ, Aˬiˇ meuˬ nehˬ-ehˇ deh kʼawꞈ tiˬ kʼawꞈ kaˇ-ehˇ, laꞈ taˆ paw pyawˬ-ahˇ taˆ tsoˆ-awˇ jawˇ-euˬ meh.

¹² Tsawˇ haˬ ngaˬ heˇ gʼaˬ aˬ yawꞈ tseˇ doˆ-awˇ, meuˬ-euˬ nahˇ ma doˆ kʼehˬ paw, Aˬiˇ meuˬ hawˇ-eu Beˬdeˬlaˇ meuˬ yaw kaˬ-ahˇ bi dzuˇ zaꞈ-euˬ meh.

¹³ Meuˬ-euˬ laꞈ taˆ paw pyawˬ-ahˇ taˆ tsoˆ-awˇ jawˇ-eu yehˇ deuˬ maˬ ehˇ, nahˇ ma ga kʼehˬ paw le-euˬ yehˇ deuˬ maˬ ehˇ, guiˇ guiˇ maꞈ dawˬ tawˆ luꞈ guiˇ deuˆ-eu gʼaˇ duˬ lehˬ hmˬ dah taˬ-euˬ meh. Yawˇ shuˆ-aˬ, deh kʼawꞈ-ahˇ uˬ ciꞈ yaꞈ bya-euˬ meh.

¹⁴ Yawˇshuˆ-euˬ yehˇ deuˬ-ahˇ Aˬiˇ sahˬ paˬ mawˇ ngeh, yaw kawˇ-ehˇ lehˬ hmˬ-euˬ meh. Aˬ yawꞈ hawˇ-eu aˬ yawꞈ-euˬ tsawˇ haˬ dawˬ tawˆ luꞈ, Iˇsaˬleˬlaˆ tsawˇ haˬ deuˬ-ahˇ aˬ yawꞈ maꞈ yaw beh poˆ guiˇ deuˆ-euˬ jawˇ duˬ pyeuꞈ-eu Yawˇdaˬ deh kʼawꞈ-ahˇ oe ka-euˬ meh. Naˇ kʼah paw neh aˬ yawꞈ maꞈ-ahˇ deuˆ le tehꞈ-a lehˇ aˬ yawꞈ maꞈ maˬ siˬ nya-a.

¹⁵ Yawˇshuˆ hawˇ-eu aˬ yawꞈ-euˬ tsawˇ haˬ deuˬ-aˬ, naˇ kʼah paw jiˆ gʼoꞈ-iˇ-eu geuꞈ-awˇ, juˇ tsui ni gʼeh-eu bawˇ tsahˬ paw cehˆ-euˬ meh.

¹⁶ Kʼoeˇ ngeh, meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ kuˇ doˆ-awˇ, Yawˇshuˆ maꞈ-euˬ mehˬ nah teh-euˬ meh. Yawˇshuˆ-euˬ mehˬ nah aˬ yawꞈ maꞈ teh teh-ehˇ, meuˬ-ahˇ neh gaˇ mahˇ iˇ kaˬ-euˬ meh.

¹⁷ Aˬiˇ meuˬ-ahˇ kʼaˇ jawˇ-eu tsawˇ haˬ yawˬ gʼaˬ na luꞈ, Iˇsaˬleˬlaˆ tsawˇ haˬ deuˬ-euˬ mehˬ nah teh le jiˇ-awˇ, meuˬ-euˬ lahˇ kʼehˬ pah dzeh yaꞈ-awˇ, loꞈ piˇ-eu tsawˇ haˬ tiˬ gʼaˬ-iˬ maˬ jawˇ ni bi jaˆ yaꞈ-euˬ meh.

¹⁸ Kʼoeˇ ngeh, Yawˇshuˆ-ahˇ Sahˬpaˬ Miˬyehˇ ehˇ nehˬ-eu, “Nawˬ-euˬ gahˬ yuˇ-awˇ, Aˬiˇ meuˬ-ahˇ toeˬ ceh-awˬ. Meuˬ kʼoeˇ meuˬ nawˬ-ahˇ ngaˇ biꞈ ma.” Aˬ yawꞈ-ahˇ kʼaˇ ehˇ nehˬ-euˬ loꞈ-ehˇ Yawˇshuˆ mˇ-euˬ meh.

¹⁹ Aˬ yawꞈ-euˬ aˬ laꞈ baꞈ diˇ-eu nehˬ-ehˇ, dzuˇ zaꞈ luꞈ-eu tsawˇ haˬ deuˬ yaw kawˇ-ehˇ tuˇ laˇ-awˇ, meuˬ-ahˇ cehˆ uˇ gʼeh-awˇ deuˆ geuꞈ-euˬ meh. Aˬ yawꞈ maꞈ meuˬ kʼoeˇ meuˬ-ahˇ yaw kawˇ-ehˇ miˬ dzaˬ dzah puiˆ-euˬ meh.

²⁰ Aˬiˇ meuˬ-ahˇ jawˇ-eu tsawˇ haˬ deuˬ naˇ kʼah paw ciˬ pyawˇ haw ngeh, mˬ-ahˇ keuˆ ni miˬ dzaˬ uˬ kʼoeˬ du doˆ laˇ gaˇ ya mawˇ-euˬ meh. Aˬ yawꞈ maꞈ cehˆ buˬ kʼaˇ maˬ za-ehˇ pyeuꞈ-iˇ-euˬ meh. Aˬ jeˬ miˇ neh ehˇ naˇ, juˇ tsui ni gʼeh-eu bawˇ tsahˬ paw cehˆ-euˬ Iˇsaˬleˬlaˆ tsawˇ haˬ deuˬ kʼawꞈ, naˇ kʼah paw gʼoꞈ kʼoꞈ laˇ-awˇ, aˬ yawꞈ maꞈ-ahˇ deuˆ-eu meh.

²¹ Yawˇshuˆ hawˇ-eu aˬ yawꞈ-euˬ tsawˇ haˬ deuˬ kʼawꞈ, aˬ yawꞈ maꞈ-euˬ tsawˇ haˬ deuˬ meuˬ deuˆ za-awˇ miˬ dzaˬ dzah puiˆ nehˬ-euˬ gaˇ ya mawˇ ngeh, naˇ kʼah paw paˇ gʼoꞈ laˇ-awˇ, Aˬiˇ tsawˇ haˬ deuˬ-ahˇ sehꞈ-euˬ meh.

²² Meuˬ-ahˇ uˇ leˇ-euˬ Iˇsaˬleˬlaˆ tsawˇ haˬ deuˬ kʼawꞈ paˇ oe ka-awˇ, guiˇ deuˆ le-euˬ meh. Kʼoeˇ ngeh, Iˇsaˬleˬlaˆ tsawˇ haˬ deuˬ aˬ yawꞈ maꞈ-euˬ tiˬ jawˬ jawˬ lahˇ taˬ-euˬ gaˇ Aˬiˇ tsawˇ haˬ deuˬ ya mawˇ-awˇ, dawˬ tawˆ luꞈ bi sehꞈ jiˇ-euˬ meh. Tsawˇ haˬ tiˬ gʼaˬ-iˬ maˬ cehˆ buˬ nya-ehˇ, tiˬ gʼaˬ-iˬ maˬ dzeuˇ-iˇ ni bi sehꞈ jiˇ-euˬ meh.

²³ Aˬiˇ sahˬ paˬ tiˬ gʼaˬ tehꞈ-ehˇ dzeuˇ-iˇ-awˇ, aˬ yawꞈ-ahˇ Yawˇshuˆ jawˇ gaˇ nyehꞈ gʼeh-euˬ meh.

²⁴ Aˬ yawꞈ maꞈ-ahˇ caw teh keuˆ le-euˬ juˇ tsui ni gʼeh-eu bawˇ tsahˬ-ahˇ, muiˇ-eu tsawˇ haˬ yawˬ gʼaˬ na luꞈ-ahˇ Iˇsaˬleˬlaˆ tsawˇ haˬ deuˬ neh sehꞈ jiˇ-euˬ meh. Kʼoeˇ naˇ, Aˬiˇ meuˬ-ahˇ aˬ yawꞈ maꞈ paˇ le-awˇ, kʼoeˇ gaˇ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ sehꞈ-euˬ meh.

^25-26 Aˬiˇ meuˬ-ahˇ jawˇ-eu tsawˇ haˬ yawˬ gʼaˬ na luꞈ-ahˇ maˬ sehꞈ jiˇ kʼoeˇ keuˆ ni, Yawˇshuˆ-euˬ aˬ laꞈ maˬ baꞈ ka ni, Aˬiˇ meuˬ-ahˇ gahˬ neh toeˬ tsoˆ taˬ-euˬ meh. Aˬiˇ meuˬ-ahˇ kʼaˇ jawˇ-eu tsawˇ haˬ kʼaˬ dzeˇ zaˬ hawˇ-eu zaˬ miˬ zaˬ tiˬ muiˇ nyiˬ heˇ gʼaˬ dawˬ tawˆ luꞈ bi sehꞈ jiˇ-euˬ meh.

²⁷ Sahˬpaˬ Miˬyehˇ neh Yawˇshuˆ-ahˇ ehˇ nehˬ-euˬ loꞈ-ehˇ, meuˬ laꞈ kʼoeˇ jaˆ-eu myawˬ gahˬ hawˇ-eu jeˬ zaˬ deuˬ-ahˇ Iˇsaˬleˬlaˆ tsawˇ haˬ deuˬ yuˇ geuꞈ-euˬ meh.

²⁸ Yawˇshuˆ-aˬ, Aˬiˇ meuˬ-ahˇ miˬ dzaˬ keuˬ dzeh-awˇ bi jaˆ yaꞈ-euˬ meh. Iˬ nah keuˆ ni kʼoeˇ loꞈ-ehˇ jaˆ luꞈ-eu meh.

²⁹ Aˬiˇ sahˬ paˬ-ahˇ, aˇ bawˇ tiˬ bawˇ-ahˇ aˬ yawꞈ paꞈ gʼeu sehꞈ nehˬ-awˇ, uˬ ciꞈ paw keuˆ ni kʼoeˇ loꞈ-ehˇ bi jaˆ-euˬ meh. Nahˇ ma ga ahˇ ngeh, “Shiˇ-euˬ sahˬ paˬ kʼoeˇ gʼaˬ-euˬ gʼawˇ mawˇ yuˇ gʼeh-awˬ” lehˇ Yawˇshuˆ dawˬ biꞈ-awˇ, meuˬ lahˇ laˇ gʼoˆ dawˬ peh baꞈ dzeh-awˇ bi jaˆ-euˬ meh. Kʼoeˇ-euˬ kʼoeˇ taˆ kʼaˬ lo lo bymˇ bymˇ ma aˬ yawꞈ maꞈ baꞈ bymˇ-awˇ, kʼaˬ lo lo bymˇ kʼoeˇ, iˬ nah keuˆ ni kʼoeˇ gaˇ jaˆ luꞈ-eu meh.

Eˇbaˬlaˇ gawˬ jawˬ-ahˇ Zahˇ dawˬ kʼoꞈ dawˬ gui-euˬ

³⁰ Kʼoeˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ, Eˇbaˬlaˇ gawˬ jawˬ kʼoeˇ taˆ, lawˇ duˬ ti tsahˇ Yawˇshuˆ gawˬ-euˬ meh.

³¹ “Shmˇ dzahˬ taꞈ neh maˬ taꞈ byawꞈ-euˬ kʼaˬ lo neh gawˬ-euˬ lawˇ duˬ” lehˇ, Moˇseˬ-euˬ Zahˇ dawˬ kʼoꞈ dawˬ sahˬ boꞈ laꞈ kʼoeˇ ehˇ taˬ-awˇ, Moˇseˬ neh Iˇsaˬleˬlaˆ tsawˇ haˬ deuˬ-ahˇ mehˬ nehˬ tsoˆ nehˬ yaꞈ-euˬ loꞈ-ehˇ, lawˇ duˬ kʼoeˇ hmˬ aˬ yawꞈ gawˬ-euˬ meh. Lawˇ duˬ kʼoeˇ hmˬ kʼoeˇ taˆ, miˬ dzaˬ dzah puiˆ-awˇ lawˇ-eu jeˬ Sahˬpaˬ Miˬyehˇ-ahˇ aˬ yawꞈ maꞈ lawˇ nehˬ-awˇ, cawˬ cawˬ taꞈ-eu lawˇ-eu jeˬ kʼawꞈ, lawˇ-euˬ meh.

³² Iˇsaˬleˬlaˆ tsawˇ haˬ deuˬ haw luꞈ ngeh, Moˇseˬ neh boꞈ taˬ-eu Zahˇ dawˬ kʼoꞈ dawˬ-ahˇ, kʼaˬ lo kʼoeˇ taˆ Yawˇshuˆ boꞈ-euˬ meh.

³³ Iˇsaˬleˬlaˆ tsawˇ haˬ deuˬ, aˬ yawꞈ maꞈ-euˬ aˬ yuiꞈ aˬ tsu deuˬ, yaw huiˬ yaw mahˇ deuˬ, yaˇ kʼaˬ daˇ-eu deuˬ hawˇ-eu, aˬ yawꞈ maꞈ nehˬ-ehˇ jawˇ-eu aˬ cawˬ tsawˇ jeuˬ deuˬ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-euˬ kʼoeˇ paˆ ma paˆ-ehˇ, bahˬ keuˆ baꞈ-eu Leˬbiˇ tsawˇ jeuˬ piˇ ma deuˬ nehˬ-ehˇ mehˬ shiˬ pyawˇ-ehˇ yawꞈ-euˬ meh. Tsawˇ haˬ tiˬ paˆ deuˬ Geˬlaˬzmˬ gawˬ jawˬ paw naˇ kʼah pyawˇ-ehˇ yawꞈ-awˇ, tiˬ paˆ deuˬ-aˬ Eˇbaˬlaˇ gawˬ jawˬ paw naˇ kʼah pyawˇ-ehˇ yawꞈ-euˬ meh. Aˬ yawꞈ maꞈ-ahˇ guiˬ lahˬ biꞈ-eu aˇ yamˬ keuˆ laˇ ngeh kʼoeˇ loꞈ-ehˇ jahˇ-awˬ lehˇ, Sahˬpaˬ Miˬyehˇ-euˬ zaˬ kʼaˆ Moˇseˬ neh ehˇ taˬ-euˬ jaˆ-eu meh.

³⁴ Kʼoeˇ naˇ, Zahˇ dawˬ kʼoꞈ dawˬ sahˬ boꞈ laꞈ kʼoeˇ kʼaˇ boꞈ taˬ-euˬ loꞈ-ehˇ, guiˬ lahˬ biꞈ-eu dawˬ deuˬ maˬ ehˇ, yaˬ kʼehˇ yaˬ-eu dawˬ deuˬ maˬ ehˇ, Zahˇ dawˬ kʼoꞈ dawˬ dawˬ tawꞈ luꞈ-ahˇ Yawˇshuˆ guˇ-awˇ gui-euˬ meh.

³⁵ Zaˬ miˬ zaˬ deuˬ, zaˬ deuˬ hawˇ-eu, aˬ yawꞈ maꞈ nehˬ-ehˇ jawˇ luꞈ-eu aˬ cawˬ tsawˇ jeuˬ deuˬ ahˇ leˇ-ehˇ, kʼaˇ uiˬ laˇ taˬ-euˬ tsawˇ haˬ dawˬ tawˆ luꞈ-ahˇ, Moˇseˬ-euˬ Zahˇ dawˬ kʼoꞈ dawˬ tiˬ dawˬ-iˬ maˬ bi dzeˇ yaꞈ ni Yawˇshuˆ gui mehˬ nehˬ-euˬ meh.