Yawˇshuˆ 7 - Akha

Aˬkaˬ-euˬ iˬ baˇ

¹ Yeˬliˇkoˇ meuˬ-ahˇ kʼaˇ jaˆ-eu, ya laˆ luˬ ya laˆ seˇ nehˬ-eu mˇ myawˬ aˬ geu jeˬ maˬ kaˬ, maˬ ya yuˇ geuꞈ-a lehˇ Sahˬpaˬ Miˬyehˇ neh dawˬ biꞈ taˬ-euˬ gaˇ maˬ naˇ haˬ geuꞈ-eu iˬ baˇ, Iˇsaˬleˬlaˆ tsawˇ haˬ deuˬ laꞈ kʼoeˇ jaˆ laˇ-euˬ meh. Aˬkaˬ lehˇ myahˇ-euˬ tsawˇ haˬ tiˬ gʼaˬ dawˬ kʼoeˇ dawˬ-ahˇ maˬ naˇ haˬ geuꞈ-euˬ baˬ da neh, Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ nui ma pehˇ laˇ-euˬ meh. Aˬkaˬ-aˬ, Kaˬmiˬ-euˬ aˬ li pyeuꞈ-awˇ, Zaˬbaˬdiˇ-euˬ oeˬ paˬ pyeuꞈ-eu meh. Aˬ yawꞈ-aˬ, Yuˇdaˆ tsawˇ jeuˬ Zeˬlahˬ aˇ jeuˬ meh.

² Yawˇshuˆ-aˬ, Yeˬliˇkoˇ meuˬ-ahˇ neh, Behˬdaˬbeˬ meuˬ dawˬ peh Beˬdeˬlaˇ meuˬ-euˬ nahˇ ma doˆ kʼehˬ paw jaˆ-eu Aˬiˇ meuˬ-ahˇ tsawˇ haˬ tiˬ deuˬ pyehˬ gʼeh-awˇ, miˇ kʼahˬ kʼoeˇ kʼahˬ-ahˇ bi kʼoeˬ sho haw-iˇ-euˬ meh. Aˬ yawꞈ maꞈ kʼoeˬ sho haw-iˇ gʼaˬ ngeh,

³ Yawˇshuˆ jawˇ gaˇ gʼoꞈ laˇ-awˇ, “Tsawˇ haˬ yawˬ gʼaˬ na luꞈ le-awˇ Aˬiˇ meuˬ-ahˇ guiˇ deuˆ-leˇ-eu maˬ loˬ-a. Meuˬ kʼoeˇ meuˬ-aˬ, meuˬ yaw huiˬ tiˬ meuˬ maˬ ngeuˇ-a” lehˇ dzawˇ mehˬ laˇ-euˬ meh.

⁴ Kʼoeˇ naˇ, Iˇsaˬleˬlaˆ tsawˇ haˬ smˬ heˇ gʼaˬ iˇ-awˇ guiˇ deuˆ iˇ-euˬ meh. Ehˇ kʼawꞈ, maˬ deuˆ gʼaˬ nya-ehˇ paˇ ya cehˆ gʼoꞈ laꞈ-euˬ meh.

⁵ Aˬiˇ meuˬ-ahˇ jawˇ-eu tsawˇ haˬ deuˬ, meuˬ meuˬ lahˇ laˇ gʼoˆ-ahˇ neh Sheˬbaˬlmˬ lehˇ kuˇ-eu jawˇ duˬ-ahˇ keuˆ ni aˬ yawꞈ maꞈ-ahˇ teh-awˇ, gawˬ duˇ baˬ gʼa-ahˇ Iˇsaˬleˬlaˆ tsawˇ haˬ smˬ tseˇ koꞈ gʼaˬ bi sehꞈ-euˬ meh. Kʼoeˇ naˇ, Iˇsaˬleˬlaˆ tsawˇ haˬ deuˬ nui ma baˬ laˇ-awˇ guˆ-euˬ meh.

⁶ Yawˇshuˆ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ noeˬ shaˬ dui dui-eu laꞈ kʼoeˇ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ mehˬ shi miˇ tsa ga lah-awˇ, uˬ ciꞈ uˬ taw paw keuˆ ni uˬ duˬ-ahˇ kʼaˬ lehˇ tawˆ daˆ-awˇ ga-euˬ meh.

⁷ Yawˇshuˆ Sahˬpaˬ Miˬyehˇ-ahˇ ehˇ-eu, “Dawˬ tawˆ luꞈ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, aˬ jeˬ miˇ neh nawˇ nga maꞈ-ahˇ Yawˇdaˬ lawˇ baˬ sheuˬ tsehˆ nehˬ laꞈ teˬ. Aˬmawˇliˆ tsawˇ haˬ deuˬ-euˬ aˬ laꞈ laꞈ kʼoeˇ nga maꞈ-ahˇ a nehˬ-eu lehˇ gʼeh te loˇ. Nga maꞈ-ahˇ laˆ luˬ laˆ seˇ-eu lehˇ gʼeh te loˇ. Aˬ jeˬ miˇ neh Yawˇ daˬ lawˇ baˬ kʼoeˇ paw baˬ-ahˇ nga maꞈ-ahˇ maˬ bi jawˇ laꞈ teˬ.

⁸ Sahˬpaˬ Miˬyehˇ-oˇ, muiˇ-eu deuˬ neh Iˇsaˬleˬlaˆ tsawˇ haˬ deuˬ-ahˇ bi teh gʼoꞈ leꞈ-euˬ-aˬ, ngaˇ aˬ jeˬ paˇ ehˇ nya nmˇ.

⁹ Kaˬnaˬ tsawˇ jeuˬ hawˇ-eu miˇ kʼahˬ heu kʼahˬ laꞈ kʼoeˇ kʼaˇ jawˇ-eu tsawˇ jeuˬ yawˬ jeuˬ na luꞈ gaˇ kawˆ heu ya gaˬ tehꞈ-a. Aˬ yawꞈ maꞈ nga maꞈ-ahˇ jawˬ lahˇ-awˇ, nga maꞈ yawˬ gʼaˬ na luꞈ-ahˇ sehꞈ tehꞈ-a. Kʼoeˇ ngeh, nawˬ-euˬ tsawˇ myahˇ maˬ ya cawˆ-iˇ ni nawˇ aˬ joˆ-ehˇ jahˇ nmˇ.”

¹⁰ Yawˇshuˆ-ahˇ Sahˬpaˬ Miˬyehˇ ehˇ nehˬ-eu, “Tuˇ-awˬ. Aˬ jeˬ miˇ neh teu loꞈ-ehˇ miˇ tsa joe yuꞈ te.

¹¹ Iˇsaˬleˬlaˆ tsawˇ jeuˬ iˬ baˇ mˇ-euˬ meh. Ngaˬ nehˬ-ehˇ saˇ jaˇ dzaˬ taˬ-euˬ loꞈ-ehˇ aˬ yawꞈ maꞈ maˬ mˇ-aˬ. Ya laˆ luˬ ya laˆ seˇ jiˇ meh lehˇ ehˇ taˬ-euˬ myawˬ tiˬ paˆ na deuˬ aˬ yawꞈ maꞈ yuˇ geuꞈ-euˬ meh. Aˬ yawꞈ maꞈ smˇ kʼoeˬ kʼoeˬ-awˇ jaˬ myawꞈ myawꞈ-eu laꞈ kʼoeˇ, myawˬ kʼoeˇ deuˬ-ahˇ aˬ yawꞈ maꞈ-euˬ myawˬ nehˬ-ehˇ bi jaˆ-euˬ meh.

¹² Kʼoeˇ miˇ neh, Iˇsaˬleˬlaˆ tsawˇ haˬ deuˬ muiˇ-eu deuˬ-ahˇ guiˇ maˬ deuˆ gʼaˬ nya-ehˇ, aˬ cawˬ neh bi teh gʼoꞈ laꞈ-euˬ meh. Aˬ jeˬ miˇ neh ehˇ naˇ, luˬ-iˇ seˇ-iˇ-eu jeˬ, nymˬ-mˇ aˬ yawꞈ maꞈ kʼoeˇ taˆ keuˆ le luꞈ meh. Maˬ ya yuˇ geuꞈ-a lehˇ naw maꞈ-ahˇ ehˇ taˬ-euˬ myawˬ deuˬ-ahˇ naw maꞈ maˬ laˆ luˬ maˬ laˆ seˇ naˇ, naw maꞈ nehˬ-ehˇ ngaˇ maˬ paˇ jawˇ ma.

¹³ Tuˇ-awˬ. Iˇsaˬleˬlaˆ tsawˇ haˬ deuˬ-ahˇ gʼawˇ mawˇ shawˇ-eu zahˇ jahˇ nehˬ-awˇ, ngaˇ jawˇ gaˇ laˇ-eu gʼaˇ duˬ bi lehˬ hmˬ dah-awˬ. Ni shawˬ nah lehˬ hmˬ dah taˬ-awˬ lehˇ aˬ yawꞈ maꞈ-ahˇ ehˇ nehˬ-awˬ. Aˬ jeˬ miˇ neh ehˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ paˬ-ehˇ gʼeh-eu jeˬ jaˆ-eu ma. ‘Iˇsaˬleˬlaˆ tsawˇ jeuˬ-oˇ. Ngaˬ neh ya laˆ luˬ ya laˆ seˇ meh lehˇ ehˇ taˬ-euˬ myawˬ tiˬ deuˬ na, naw maꞈ-euˬ myawˬ gahˬ nehˬ-ehˇ jaˆ luꞈ meh. Myawˬ kʼoeˇ deuˬ naw maꞈ nehˬ-ehˇ kʼaˇ jaˆ kʼoeˇ keuˆ ni, muiˇ-eu deuˬ-ahˇ naw maꞈ guiˇ maˬ deuˆ gʼaˬ nya-a’ lehˇ ehˇ nehˬ paˬ-ehˇ jaˆ-eu ma.

¹⁴ Kʼoeˇ miˇ neh, ni shawˬ uˬ shawˬ paw, tsawˇ jeuˬ tiˬ jeuˬ saˇ-iˬ tiˬ jeuˬ ngaˬ-euˬ mehˬ shi ya laˇ meh lehˇ aˬ yawꞈ maꞈ-ahˇ ehˇ nehˬ-awˬ. Ngaˬ neh laꞈ noeˇ toeˬ-euˬ tsawˇ jeuˬ-euˬ aˇ jeuˬ aˬ yawꞈ jeuˬ yawꞈ, mehˬ hu paw ya doˆ laˇ meh. Kʼoeˇ naˇ, ngaˬ neh laꞈ noeˇ toeˬ-euˬ aˇ jeuˬ-euˬ nymˇ jiˇ aˬ yawꞈ jiˇ yawꞈ mehˬ hu paw ya doˆ laˇ meh. Kʼoeˇ jiˇ naˇ, ngaˬ neh laꞈ noeˇ toeˬ-euˬ nymˇ jiˇ-euˬ tsawˇ haˬ aˬ yawꞈ gʼaˬ yawꞈ, mehˬ hu paw ya doˆ laˇ meh.

¹⁵ Ya laˆ luˬ ya laˆ seˇ jiˇ meh lehˇ ehˇ taˬ-euˬ myawˬ kʼoeˇ deuˬ yuˇ-euˬ ngaˬ neh laꞈ noeˇ toeˬ-euˬ tsawˇ haˬ kʼoeˇ gʼaˬ-ahˇ, aˬ yawꞈ-euˬ miˬ sawˇ zaˬ hawˇ-eu aˬ yawꞈ kʼaˇ jaˆ-eu yawˬ jeˬ na luꞈ nehˬ-ehˇ tiˬ kawˆ loꞈ-ehˇ, miˬ dzaˬ-ahˇ ya dzah puiˆ nehˬ meh. Aˬ jeˬ miˇ neh ehˇ naˇ, guˆ dui dui laˇ paˬ-ehˇ gʼeh-eu shaꞈ dawˇ-eu jeˬ Iˇsaˬleˬlaˆ tsawˇ haˬ kʼoeˇ taˆ keuˆ le ni aˬ yawꞈ mˇ-awˇ, ngaˬ-euˬ dawˬ ma saˇ jaˇ-ahˇ puiˬ-euˬ meh.”

¹⁶ Yawˬ shawˬ yawˬ, Iˇsaˬleˬlaˆ tsawˇ jeuˬ aˬ yawꞈ jeuˬ yawꞈ-ahˇ mehˬ hu paw Yawˇshuˆ bi doˆ laˇ ngeh, Yuˇdaˆ tsawˇ jeuˬ-ahˇ laꞈ noeˇ bi toeˬ-euˬ meh.

¹⁷ Yuˇdaˆ tsawˇ jeuˬ aˇ jeuˬ aˬ yawꞈ jeuˬ yawꞈ mehˬ hu paw paˇ bi doˆ laˇ ngeh, Zeˬlahˬ aˇ jeuˬ-ahˇ laꞈ noeˇ bi toeˬ-euˬ meh. Zeˬlahˬ aˇ jeuˬ-euˬ nymˇ jiˇ aˬ yawꞈ jiˇ yawꞈ-ahˇ mehˬ hu paw bi doˆ laˇ ngeh, Zaˬbaˬdiˇ-euˬ nymˇ jiˇ-ahˇ laꞈ noeˇ bi toeˬ-euˬ meh.

¹⁸ Zaˬbaˬdiˇ-euˬ nymˇ jiˇ-ahˇ taꞈ-eu tsawˇ haˬ aˬ yawꞈ gʼaˬ yawꞈ-ahˇ mehˬ hu paw bi doˆ laˇ ngeh, Zaˬbaˬdiˇ-euˬ oeˬ paˬ Aˬkaˬ-ahˇ laꞈ noeˇ bi toeˬ-euˬ meh. Aˬkaˬ-aˬ, Kaˬmiˬ-euˬ aˬ li meh.

¹⁹ Aˬkaˬ-ahˇ Yawˇshuˆ ehˇ nehˬ-eu, “Ngaˬ li-oˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi nawˬ-euˬ iˬ baˇ-ahˇ dawˇ coe ni ehˇ doˆ-awˬ. Nawˇ aˬ joˆ-ehˇ jahˇ-euˬ gaˇ kawˆ nymˬ-mˇ ngaˬ-ahˇ ehˇ nehˬ laꞈ-awˬ. Ngaˬ-euˬ mehˬ shi tiˬ jeˬ-iˬ taˬ zaꞈ taˬ.”

²⁰ Aˬkaˬ ehˇ-eu, “Ngeuˇ ma. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ mehˬ shi ngaˇ iˬ baˇ mˇ-euˬ ma. Ngaˇ heu loꞈ-ehˇ jahˇ-euˬ ma.

²¹ Aˬ dui maꞈ neh guiˇ deuˆ za-euˬ myawˬ deuˬ laꞈ kʼoeˇ, Baˬbuˇloˬ miˇ kʼahˬ-ahˇ guꞈ-euˬ muiˬ dui dui-eu pehˇ kʼahˬ pehˇ mahˇ tiˬ kahˇ, pyuˇ tiˬ jawꞈ-i dzehˬ ni hawˇ-eu, smˬ kaˇ ehˇ gʼaˬ ni byah-eu shuiˇ shuiˇ kahˬ tiˬ kahˬ ngaˇ mawˇ-euˬ ma. Kʼoeˇ deuˬ-ahˇ ngaˇ geuꞈ mawꞈ dui dui-eu miˇ neh, yuˇ taˬ-awˇ bi jaˆ-euˬ ma. Pyuˇ kʼoeˇ-ahˇ dawˬ dah dah saˬ bi jaˆ-awˇ, myawˬ kʼoeˇ deuˬ-ahˇ ngaˬ-eu sehˬ gʼawˆ laꞈ kʼoeˇ duˬ pahˬ taˬ-euˬ gaˇ nawˇ ya mawˇ tehꞈ-a.”

²² Yawˇshuˆ tsawˇ haˬ pyehˬ gʼeh-awˇ, sehˬ gʼawˆ kʼoeˇ gʼawˆ-ahˇ bi cehˆ haw-iˇ ngeh, pyuˇ kʼoeˇ-ahˇ dawˬ dah dah saˬ bi jaˆ-awˇ, ya laˆ luˬ ya laˆ seˇ meh lehˇ ehˇ taˬ-euˬ myawˬ kʼoeˇ deuˬ duˬ pahˬ taˬ-awˇ jaˆ gaˇ aˬ diˇ aˬ maˇ ya mawˇ-euˬ meh.

²³ Aˬ yawꞈ maꞈ myawˬ kʼoeˇ deuˬ-ahˇ sehˬ gʼawˆ laꞈ kʼoeˇ neh yuˇ doˆ laꞈ-awˇ, Yawˇshuˆ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ jawˇ gaˇ yuˇ gʼeh-awˇ, Sahˬpaˬ Miˬyehˇ-euˬ mehˬ shi bi jaˆ-euˬ meh.

²⁴ Yawˇshuˆ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Aˬkaˬ-ahˇ maˬ ehˇ, Aˬkaˬ-euˬ aˬ buˇ aˬ li deuˬ-ahˇ maˬ ehˇ, aˬ yawꞈ-euˬ mawˇ neˇ, mahˬ tahˬ laˆ hawˇ-eu yawˇ deuˬ-ahˇ maˬ ehˇ, aˬ yawꞈ-euˬ sehˬ gʼawˆ hawˇ-eu aˬ yawꞈ kʼaˇ jaˆ-eu yawˬ jeˬ na luꞈ-ahˇ maˬ ehˇ, nyehꞈ jiˇ yuˇ jiˇ-awˇ, Shaˬ zahˬ Deh kʼawꞈ lehˇ kuˇ-eu tsahˇ-ahˇ yuˇ gʼeh-euˬ meh.

²⁵ Kʼoeˇ naˇ, “Aˬ jeˬ miˇ neh nawˇ nga maꞈ kʼoeˇ taˆ shaˬ-eu zahˬ-eu jeˬ bi keuˆ le teˬ. Nymˬ-mˇ, Sahˬpaˬ Miˬyehˇ nawˬ-euˬ kʼoeˇ taˆ shaˬ-eu zahˬ-eu jeˬ bi keuˆ le tehꞈ-a” lehˇ, Yawˇshuˆ ehˇ-eu meh. Kʼoeˇ ngeh, tsawˇ haˬ dawˬ tawˆ luꞈ Aˬkaˬ-ahˇ kʼaˬ lo neh biˬ sehꞈ-euˬ meh. Aˬ yawꞈ-euˬ miˬ sawˇ zaˬ deuˬ hawˇ-eu aˬ yawꞈ-euˬ myawˬ gahˬ dawˬ tawˆ luꞈ-ahˇ kʼawꞈ, aˬ yawꞈ maꞈ kʼaˬ lo neh biˬ-awˇ, miˬ dzaˬ dzah puiˆ-euˬ meh.

²⁶ Aˬ yawꞈ-euˬ kʼoeˇ taˆ kʼaˬ lo lo bymˇ bymˇ ma baꞈ bymˇ-awˇ, iˬ nah keuˆ ni kʼoeˇ loꞈ-ehˇ jaˆ luꞈ-eu meh. Kʼoeˇ miˇ neh, jawˇ duˬ kʼoeˇ tsahˇ-ahˇ, Shaˬ zahˬ Deh kʼawꞈ lehˇ kuˇ-eu meh. Kʼoeˇ naˇ, Sahˬpaˬ Miˬyehˇ nui ma pehˇ-eu taˬ leˇ-euˬ meh.