Yawˇshuˆ 6 - Akha

Yeˬliˇkoˇ meuˬ-ahˇ deuˆ gʼaˬ-euˬ

¹ Yeˬliˇkoˇ meuˬ-euˬ meuˬ lahˇ laˇ gʼoˆ deuˬ piˬ tehˬ taˬ-awˇ, Iˇsaˬleˬlaˆ tsawˇ haˬ deuˬ maˬ uˇ leˇ nya ni loꞈ jawˬ taˬ-euˬ meh. Tsawˇ haˬ tiˬ gʼaˬ-iˬ maˬ uˇ leˇ nya-eu uˬ taꞈ, doˆ kʼawꞈ maˬ doˆ le nya-a.

² Yawˇshuˆ-ahˇ Sahˬpaˬ Miˬyehˇ ehˇ nehˬ-eu, “Yeˬliˇkoˇ meuˬ-euˬ sahˬ paˬ hawˇ-eu aˬ yawꞈ-euˬ kʼaˆ dui dui-eu guiˇ deuˆ-eu tsawˇ haˬ deuˬ nehˬ-ehˇ tiˬ kawˆ loꞈ-ehˇ, Yeˬliˇkoˇ meuˬ kʼoeˇ nawˬ-euˬ aˬ laꞈ laꞈ kʼoeˇ ngaˇ a nehˬ-eu ma.

³ Nawˇ hawˇ-eu guiˇ deuˆ-eu nawˬ-euˬ tsawˇ haˬ deuˬ koꞈ nah keuˆ ni tiˬ nah tiˬ poˆ meuˬ kʼoeˇ meuˬ-ahˇ cah jawˬ-awˬ.

⁴ Daˇ heh yuˇ luꞈ-eu piˇ ma shiꞈ gʼaˬ-ahˇ Dawˬ ma saˇ jaˇ Bahˬ keuˆ mehˬ shi bi cah-awˬ. Shiꞈ nah tiˬ nah-ahˇ, piˇ ma kʼoeˇ deuˬ daˇ heh baw luꞈ ngeh, nawˇ hawˇ-eu guiˇ deuˆ-eu nawˬ-euˬ tsawˇ haˬ deuˬ, meuˬ-ahˇ shiꞈ jawˬ cah jawˬ-awˬ.

⁵ Kʼoeˇ naˇ, aˬ yawꞈ maꞈ-ahˇ daˇ heh teˇ saˇ gʼawˬ mahˇ ni bi baw yeu gʼeh-awˬ. Teˇ saˇ kʼoeˇ naw maꞈ ya gaˬ-eu nehˬ-ehˇ, tsawˇ haˬ dawˬ tawˆ luꞈ guˇ kʼaˆ leꞈ-awˬ. Kʼoeˇ ngeh, meuˬ meuˬ lahˇ byaˆ le tehꞈ-a. Kʼoeˇ naˇ, guiˇ guiˇ maꞈ maꞈ lah-ehˇ meuˬ laꞈ kʼoeˇ uˇ leˇ-awˬ.”

⁶ Yawˇshuˆ piˇ ma deuˬ-ahˇ kuˇ-awˇ ehˇ nehˬ-eu, “Dawˬ ma saˇ jaˇ Bahˬ keuˆ baꞈ-awˇ, kʼoeˇ-euˬ mehˬ hu paw piˇ ma shiꞈ gʼaˬ daˇ heh baꞈ-awˇ cah-awˬ.”

⁷ Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ mehˬ hu guiˇ daˬ daˬ-eu guiˇ maꞈ tiˬ maꞈ cah-awˇ, meuˬ-ahˇ cah jawˬ-eu gʼaˇ duˬ, aˬ yawꞈ-euˬ tsawˇ haˬ deuˬ-ahˇ Yawˇshuˆ dawˬ biꞈ-euˬ meh.

^8-9 Yawˇshuˆ neh dawˬ biꞈ nehˬ-euˬ loꞈ-ehˇ, daˇ heh baw luꞈ-eu piˇ ma deuˬ mehˬ hu, guiˇ daˬ daˬ-eu guiˇ maꞈ doˆ-iˇ-euˬ meh. Kʼoeˇ-euˬ naˇ kʼah, Dawˬ ma saˇ jaˇ Bahˬ keuˆ baꞈ luꞈ-eu piˇ ma deuˬ doˆ-iˇ-awˇ, naˇ kʼah paw jawˇ saˬ saˬ-eu guiˇ guiˇ maꞈ tiˬ maꞈ caw teh luꞈ-eu meh. Kʼoeˇ loꞈ-ehˇ doˆ-iˇ luꞈ ngeh, daˇ heh teˇ saˇ maˬ tsehˆ leˇ ni baw luꞈ-eu meh.

¹⁰ Ehˇ kʼawꞈ, aˬ yawꞈ dawˬ maˬ biꞈ kʼoeˇ keuˆ ni, guˇ-eu maˬ ehˇ, dawˬ ngehˬ cawˬ-eu maˬ ehˇ, maˬ ya gʼeh-a lehˇ aˬ yawꞈ-euˬ tsawˇ haˬ deuˬ-ahˇ Yawˇshuˆ ehˇ nehˬ taˬ-euˬ meh.

¹¹ Kʼoeˇ loꞈ-ehˇ, “Dawˬ ma saˇ jaˇ Bahˬ keuˆ baꞈ-awˇ meuˬ-ahˇ tiˬ jawˬ cah jawˬ-awˬ” lehˇ, tsawˇ haˬ kʼoeˇ maꞈ-ahˇ aˬ yawꞈ ehˇ nehˬ-euˬ meh. Kʼoeˇ naˇ, sehˬ gʼawˆ-ahˇ aˬ yawꞈ maꞈ paˇ gʼoꞈ le-awˇ, uˬ ciꞈ yaꞈ le-euˬ meh.

^12-13 Yawˬ nah yawˬ uˬ shawˬ yaw naꞈ-ehˇ Yawˇshuˆ lehˬ hmˬ-awˇ, yaw beh nah loꞈ-ehˇ, piˇ ma hawˇ-eu guiˇ deuˆ-eu tsawˇ haˬ deuˬ meuˬ kʼoeˇ meuˬ-ahˇ nyiˬ poˆ tiˬ poˆ paˇ cah jawˬ-euˬ meh. Guiˇ daˬ daˬ-eu guiˇ maꞈ kʼoeˇ maꞈ mehˬ hu hu saˬ doˆ-iˇ-awˇ, kʼoeˇ-euˬ mehˬ nah daˇ heh shiꞈ heh baw luꞈ-eu piˇ ma shiꞈ gʼaˬ doˆ-iˇ-euˬ meh. Kʼoeˇ-euˬ naˇ kʼah, Dawˬ ma saˇ jaˇ Bahˬ keuˆ baꞈ luꞈ-eu piˇ ma deuˬ doˆ-iˇ-awˇ, naˇ kʼah paw jawˇ saˬ saˬ-eu guiˇ maꞈ aˬ cawˬ jeˬ nah nah saˬ doˆ-iˇ-euˬ meh. Kʼoeˇ loꞈ-ehˇ doˆ-iˇ luꞈ ngeh, daˇ heh teˇ saˇ maˬ tsehˆ leˇ ni baw luꞈ-eu meh.

¹⁴ Nyiˬ nah tiˬ nah pyeuꞈ-eu kʼoeˇ ngeh nah kʼawꞈ, aˬ yawꞈ maꞈ meuˬ-ahˇ tiˬ jawˬ cah jawˬ-awˇ, sehˬ gʼawˆ-ahˇ paˇ gʼoꞈ naˬ le-euˬ meh. Koꞈ nah keuˆ ni aˬ yawꞈ maꞈ kʼoeˇ loꞈ-ehˇ cah jawˬ-euˬ meh.

¹⁵ Shiꞈ nah tiˬ nah uˬ bya bya laˇ-eu nehˬ-ehˇ aˬ yawꞈ maꞈ tuˇ-awˇ, yaw beh kʼaˇ cah-euˬ loꞈ-ehˇ, meuˬ-ahˇ shiꞈ jawˬ cah jawˬ-euˬ meh. Tiˬ nah laꞈ kʼoeˇ meuˬ kʼoeˇ meuˬ-ahˇ shiꞈ jawˬ cah jawˬ-euˬ-aˬ, kʼoeˇ ngeh nah tiˬ nah tehꞈ meh.

¹⁶ Shiꞈ jawˬ tiˬ jawˬ keuˆ laˇ-awˇ, piˇ ma deuˬ daˇ heh baw-eu lehˇ gʼeh ngeh, aˬ yawꞈ-euˬ tsawˇ haˬ deuˬ-ahˇ “Guˇ-awˬ” lehˇ Yawˇshuˆ dawˬ biꞈ nehˬ-awˇ, heu loꞈ-ehˇ ehˇ nehˬ-euˬ meh. “Meuˬ heu meuˬ Sahˬpaˬ Miˬyehˇ naw maꞈ-ahˇ biꞈ gʼaˬ-euˬ meh.

¹⁷ Meuˬ hawˇ-eu meuˬ laꞈ kʼoeˇ kʼaˇ jaˆ-eu yawˬ jeˬ na luꞈ, Sahˬpaˬ Miˬyehˇ-ahˇ lawˇ nehˬ-eu jeˬ loꞈ-ehˇ sawˇ-awˇ, geuꞈ-eu jeˬ maˬ ahˇ-ehˇ pyeuꞈ-iˇ ngeh keuˆ ni ya laˆ luˬ ya laˆ seˇ nehˬ meh. Meh maˬ laˇ Laˬhaˇ hawˇ-eu aˬ yawꞈ-euˬ nymˇ jiˇ-ahˇ tehꞈ-ehˇ maˬ laˆ luˬ maˬ laˆ seˇ nehˬ ni ya taˬ nehˬ meh. Aˬ jeˬ miˇ neh ehˇ naˇ, aˬ dui neh bi kʼoeˬ sho haw leˇ-euˬ tsawˇ haˬ-ahˇ aˬ yawꞈ sheuˬ zaꞈ nehˬ-euˬ meh.

¹⁸ Ya laˆ luˬ ya laˆ seˇ nehˬ-eu mˇ myawˬ kʼoeˇ deuˬ tiˬ jeˬ-iˬ naw maꞈ maˬ ya yuˇ geuꞈ-a. Naw maꞈ yuˇ naˇ, shaˬ-eu zahˬ-eu jeˬ hawˇ-eu luˬ-iˇ seˇ-iˇ-eu jeˬ Iˇsaˬleˬlaˆ tsawˇ haˬ deuˬ-euˬ sehˬ gʼawˆ kʼoeˇ taˆ keuˆ le ni naw maꞈ jahˇ gaˇ duˇ-eu meh.

¹⁹ Pyuˇ, shuiˇ, guiˬ shuiˇ hawˇ-eu shmˇ neh kʼaˇ jahˇ taˬ-euˬ jeˬ dawˬ tawˆ luꞈ, Sahˬpaˬ Miˬyehˇ gʼaˇ duˬ ya bi jaˆ meh. Kʼoeˇ deuˬ-ahˇ Sahˬpaˬ Miˬyehˇ-euˬ pyuˇ daˬ laꞈ kʼoeˇ ya dawˆ ahˇ meh.”

²⁰ Kʼoeˇ naˇ, piˇ ma deuˬ daˇ heh baw-euˬ meh. Daˇ heh teˇ saˇ ya gaˬ-eu nehˬ-ehˇ, tsawˇ haˬ kʼoeˇ deuˬ guˇ kʼaˆ leꞈ-awˇ, meuˬ meuˬ lahˇ byaˆ-iˇ-euˬ meh. Kʼoeˇ ngeh, guiˇ maꞈ maꞈ lah ni, yawˬ ha mehˬ shi tiˬ dawˇ gawˬ duˇ-ahˇ daˆ leˇ-awˇ, meuˬ-ahˇ uˇ leˇ-euˬ meh.

²¹ Meuˬ-ahˇ kʼaˇ jawˇ-eu kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, zaˬ guˬ maˬ ehˇ, tsawˇ kʼaˆ maˬ ehˇ, yawˬ gʼaˬ na luꞈ-ahˇ mi cehˇ neh aˬ yawꞈ maꞈ sehꞈ-euˬ meh. Mawˇ neˇ, yawˇ hawˇ-eu ciꞈ myehꞈ deuˬ-ahˇ kʼawꞈ aˬ yawꞈ maꞈ sehꞈ-euˬ meh.

²² Kʼoeˇ naˇ, bi kʼoeˬ sho haw leˇ-euˬ tsawˇ haˬ kʼoeˇ nyiˬ gʼaˬ-ahˇ Yawˇshuˆ ehˇ nehˬ-eu, “Naw nyaꞈ neh saˇ jaˇ biꞈ taˬ-euˬ loꞈ-ehˇ, meh maˬ laˇ kʼoeˇ gʼaˬ-euˬ nymˇ-ahˇ iˇ-awˇ, aˬ yawꞈ hawˇ-eu aˬ yawꞈ-euˬ nymˇ kʼahˬ zaˬ deuˬ sheuˬ doˆ laˬ-iˇ-awˬ.”

²³ Kʼoeˇ ngeh, aˬ yawꞈ nyaꞈ iˇ-awˇ, Laˬhaˇ hawˇ-eu aˬ yawꞈ-euˬ aˬ ma aˬ da maˬ ehˇ, aˬ yawꞈ-euˬ aˬ mahˇ aˬ da deuˬ maˬ ehˇ, aˬ yawꞈ-euˬ nymˇ kʼahˬ zaˬ deuˬ maˬ ehˇ, tiˬ kawˆ loꞈ-ehˇ sheuˬ doˆ laꞈ-euˬ meh. Aˬ ha pehˬ hawˇ-eu aˬ ha pehˬ-euˬ zaˬ kʼaˆ dawˬ tawˆ luꞈ-ahˇ, Iˇsaˬleˬlaˆ tsawˇ haˬ deuˬ-euˬ sehˬ gʼawˆ dawˬ peh, guˆ kʼaˇ maˬ za gaˇ sheuˬ taˬ-awˇ bi jawˇ-euˬ meh.

²⁴ Kʼoeˇ naˇ, meuˬ-ahˇ aˬ yawꞈ maꞈ miˬ dzaˬ keuˬ doꞈ-awˇ, meuˬ hawˇ-eu meuˬ laꞈ kʼoeˇ kʼaˇ jaˆ-eu yawˬ jeˬ na luꞈ puiˆ byoˆ jiˇ-euˬ meh. Shuiˇ, pyuˇ, guiˬ shuiˇ hawˇ-eu shmˇ neh kʼaˇ jahˇ taˬ-euˬ mˇ myawˬ deuˬ tehꞈ-ehˇ aˬ yawꞈ maꞈ yuˇ-awˇ, Sahˬpaˬ Miˬyehˇ-euˬ pyuˇ daˬ laꞈ kʼoeˇ dawˆ ahˇ-euˬ meh.

²⁵ Ehˇ kʼawꞈ, meh maˬ laˇ Laˬhaˇ hawˇ-eu aˬ yawꞈ-euˬ aˬ yuiꞈ aˬ nyiˇ deuˬ-ahˇ Yawˇshuˆ bi dzeuˇ-iˇ-euˬ meh. Aˬ jeˬ miˇ neh ehˇ naˇ, Yawˇshuˆ neh Yeˬliˇkoˇ meuˬ-ahˇ bi kʼoeˬ sho haw leˇ-euˬ tsawˇ haˬ kʼoeˇ nyiˬ gʼaˬ-ahˇ, Laˬhaˇ neh sheuˬ zaꞈ nehˬ-euˬ meh. Laˬhaˇ-euˬ zaˬ deuˬ uˆ deuˬ iˬ nah keuˆ ni Iˇsaˬleˬlaˆ miˇ kʼahˬ laꞈ kʼoeˇ jawˇ luꞈ-eu meh.

²⁶ Kʼoeˇ ngeh, yahˇ dui dui paˬ-ehˇ gʼeh-eu jeˬ Yawˇshuˆ ehˇ-eu, “Yeˬliˇkoˇ meuˬ paˇ tsoˆ muiˬ-eu lehˇ kʼaˇ leh jeh-eu tsawˇ haˬ aˬ geu gʼaˬ maˬ kaˬ, Sahˬpaˬ Miˬyehˇ neh yaˬ kʼehˇ yaˬ nehˬ-euˬ jeˬ-ahˇ ya daˬ tehꞈ-a. Meuˬ gawˬ dahˬ beh nehˬ-eu gʼaˬ-aˬ, aˬ li aˬ yuiꞈ ya bi shiˇ-awˇ, Meuˬ-euˬ lahˇ kʼehˬ gawˬ-eu gʼaˬ-aˬ, aˬ li zaˬ saˬ bi shiˇ tehꞈ-a” lehˇ ehˇ-euˬ meh.

²⁷ Kʼoeˇ naˇ, Yawˇshuˆ nehˬ-ehˇ Sahˬpaˬ Miˬyehˇ jawˇ-awˇ, Yawˇshuˆ tsawˇ myahˇ doˆ-eu gaˇ kawˆ miˇ kʼahˬ kʼoeˇ kʼahˬ doe ni Yawˇshuˆ tsawˇ myahˇ doˆ-euˬ meh.