Yawˇshuˆ 5 - Akha

¹ Iˇsaˬleˬlaˆ tsawˇ haˬ deuˬ lawˇ baˬ tsehˆ doˆ gʼaˬ ngeh keuˆ ni, Yawˇdaˬ lawˇ baˬ-ahˇ Sahˬpaˬ Miˬyehˇ bi gui-iˇ-euˬ gaˇ kawˆ, Yawˇdaˬ lawˇ baˬ nahˇ ma ga kʼehˬ paw kʼaˇ jawˇ-eu Aˬmawˇliˆ sahˬ paˬ dawˬ tawˆ luꞈ hawˇ-eu Gʼahˇ ceh-euˬ Iˬ ma laˆ shaˆ caw caw-ehˇ jawˇ-eu Kaˬnaˬ sahˬ paˬ dawˬ tawˆ luꞈ ya gaˬ-euˬ meh. Iˇsaˬleˬlaˆ tsawˇ haˬ deuˬ baˬ da neh, aˬ yawꞈ maꞈ guˆ laˇ-awˇ, nui ma gʼaˬ baˬ dui dui laˇ taˬ-euˬ meh.

Giˇlaˇgaˬlaˇ lehˇ kuˇ-eu jawˇ duˬ-ahˇ baˆ kʼoˆ mehˬ dzaˬ yehˬ-euˬ

² Kʼoeˇ naˇ, “Kʼaˬ lo neh mi cehˇ jiˇ baˆ jahˇ doˆ-awˇ, Iˇsaˬleˬlaˆ tsawˇ haˬ deuˬ-ahˇ baˆ kʼoˆ mehˬ dzaˬ yehˬ nehˬ-awˬ” lehˇ, Yawˇshuˆ-ahˇ Sahˬpaˬ Miˬyehˇ ehˇ nehˬ-euˬ meh.

³ Kʼoeˇ ngeh, Sahˬpaˬ Miˬyehˇ neh dawˬ biꞈ nehˬ-euˬ loꞈ-ehˇ, Yawˇshuˆ mˇ-awˇ, Baˆ kʼoˆ mehˬ dzaˬ yehˬ-euˬ gawˬ duˇ lehˇ kuˇ-eu jawˇ duˬ-ahˇ, Iˇsaˬleˬlaˆ tsawˇ haˬ deuˬ-ahˇ aˬ yawꞈ baˆ kʼoˆ mehˬ dzaˬ yehˬ mehˬ-euˬ meh.

^4-6 Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ-ahˇ neh doˆ laˇ ngeh, kʼaˬ dzeˇ zaˬ dawˬ tawˆ luꞈ baˆ kʼoˆ mehˬ dzaˬ yehˬ gʼaˬ-euˬ meh. Ehˇ kʼawꞈ, Iˇsaˬleˬlaˆ tsawˇ haˬ deuˬ bawˇ tsahˬ bawˇ dahˇ-ahˇ cah luꞈ-eu oeˬ tseˇ kʼoꞈ aˇ yamˬ laꞈ kʼoeˇ dehꞈ le-euˬ aˬ li tiˬ gʼaˬ-iˬ baˆ kʼoˆ mehˬ dzaˬ maˬ yehˬ-aˬ siˬ. Aˇ yamˬ kʼoeˇ yamˬ jiˇ le ngeh, Iˇjiˇtuˆ miˇ kʼahˬ-ahˇ neh doˆ laˇ ngeh guiˇ kʼaˇ deuˆ nya laˇ-euˬ kʼaˬ dzeˇ zaˬ deuˬ shiˇ dzeuˇ jiˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ ehˇ dawˬ-ahˇ aˬ yawꞈ maꞈ maˬ naˇ haˬ geuꞈ-aˬ. Sahˬpaˬ Miˬyehˇ neh kamˬ taˬ-euˬ loꞈ-ehˇ, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ saˇ jaˇ dzaˬ taˬ-euˬ miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ kʼoeˇ kʼahˬ laꞈ kʼoeˇ aˬ yawꞈ maꞈ-ahˇ maˬ bi uˇ leˇ-a.

⁷ Tsawˇ haˬ kʼoeˇ deuˬ-euˬ aˬ li deuˬ-ahˇ baˆ kʼoˆ mehˬ dzaˬ tiˬ poˆ-iˬ maˬ ya yehˬ nehˬ-euˬ miˇ neh, tsawˇ haˬ yaw shuiꞈ kʼoeˇ jo-ahˇ Yawˇshuˆ baˆ kʼoˆ mehˬ dzaˬ yehˬ nehˬ-euˬ jeˬ pyeuꞈ-eu meh.

⁸ Baˆ kʼoˆ mehˬ dzaˬ yehˬ-eu gaˇ kʼoeˇ hmˬ mˇ luiˆ gʼaˬ ngeh, maˇ naˇ taˬ leˇ jiˇ ngeh keuˆ ni Iˇsaˬleˬlaˆ tsawˇ jeuˬ tiˬ jeuˬ jeuˬ lah ni sehˬ gʼawˆ laꞈ kʼoeˇ jawˇ naˬ-euˬ meh.

⁹ “Iˇjiˇtuˆ miˇ kʼahˬ laꞈ kʼoeˇ aˬ cawˬ zaˬ kʼaˆ ya geuꞈ-euˬ shaˬ zahˬ naw maꞈ kʼoeˇ taˆ ngaˇ maˬ paˇ bi keuˆ le ma” lehˇ, Yawˇshuˆ-ahˇ Sahˬpaˬ Miˬyehˇ ehˇ nehˬ-euˬ meh. Kʼoeˇ miˇ neh jawˇ duˬ kʼoeˇ tsahˇ-ahˇ Giˇlaˇgaˬlaˇ lehˇ myahˇ nehˬ-awˇ, tsawˇ myahˇ kʼoeˇ iˬ nahˇ keuˆ ni jaˆ luꞈ-eu meh.

¹⁰ Yeˬliˇkoˇ meuˬ dawˬ peh deh ga-ahˇ jaˆ-eu Giˇlaˇgaˬlaˇ-ahˇ Iˇsaˬleˬlaˆ tsawˇ haˬ deuˬ sehˬ gʼawˆ gʼawˆ-awˇ jawˇ naˬ luꞈ ngeh, ba la kʼoeˇ siˬ tseˇ oeˬ nah tiˬ nah uˬ ciꞈ uˬ taw paw Baˬsaˬkaˬ bawˬ-iˬ gʼeh-euˬ meh.

¹¹ Yawˬ nah yawˬ, Kaˬnaˬ miˇ kʼahˬ-ahˇ doˆ-eu dzaˇ aˬ yawꞈ maˬ dzaˬ beh beh-euˬ meh. Cehꞈ nyawˬ hawˇ-eu dehˬ tseˬ maˬ ahˇ-eu kaˬ muˇ aˬ yawꞈ maꞈ dzaˬ-euˬ meh.

¹² Kʼoeˇ ngeh neh naˇ, maˬ naˆ kaˬ muˇ maˬ paˇ ga le ni tsehˆ leˇ-awˇ, Iˇsaˬleˬlaˆ tsawˇ haˬ deuˬ maˬ naˆ kaˬ muˇ maˬ paˇ ya dzaˬ ni pyeuꞈ-iˇ-awˇ, Kaˬnaˬ miˇ kʼahˬ-ahˇ doˆ-eu dzaˇ deuˬ aˬ yawꞈ maꞈ dzaˬ-euˬ meh.

Yawˇshuˆ hawˇ-eu mi cehˇ tuˆ tehˬ luꞈ-eu tsawˇ haˬ tiˬ gʼaˬ

¹³ Yeˬliˇkoˇ meuˬ dawˬ peh Yawˇshuˆ le keuˆ ngeh, aˬ yawꞈ mehˬ shi mi cehˇ tuˆ tehˬ-awˇ yawꞈ luꞈ-eu tsawˇ haˬ tiˬ gʼaˬ-ahˇ ja pyuˬ ni aˬ yawꞈ ya mawˇ-euˬ meh. Tsawˇ haˬ kʼoeˇ gʼaˬ dawˬ peh Yawˇ shuˆ le-awˇ, “Nawˇ nga maꞈ-euˬ guiˇ zaˬ te loˇ. Maˬ ngeuˇ naˇ, nga maꞈ-ahˇ muiˇ-eu tsawˇ haˬ te loˇ” lehˇ naˇ haˬ-euˬ meh.

¹⁴ Tsawˇ haˬ kʼoeˇ gʼaˬ ehˇ-eu, “Maˬ ngeuˇ. Sahˬpaˬ Miˬyehˇ-euˬ guiˇ maꞈ-ahˇ aˬ yuiꞈ geuꞈ-awˇ uˆ lahˇ-eu gʼaˬ loꞈ-ehˇ ngaˇ oe-euˬ ma.” Yawˇshuˆ uˬ duˬ tahˬ-eu laꞈ kʼoeˇ miˇ tsa ga lah-awˇ ehˇ-eu, “Ngaˇ-aˬ, nawˬ-euˬ zaˬ kʼaˆ pyeuꞈ-eu ma. Nawˇ ngaˬ-ahˇ aˬ jeˬ bi mˇ mawꞈ-eu nya.”

¹⁵ Sahˬpaˬ Miˬyehˇ-euˬ guiˇ maꞈ-ahˇ aˬ yuiꞈ geuꞈ-awˇ uˆ lahˇ-eu gʼaˬ ehˇ-eu, “Nawˬ-euˬ sehˬ nawˆ lehˆ-awˬ. Nawˇ yawꞈ luꞈ-eu jawˇ duˬ heu muiˬ-eu shawˇ-eu jawˇ duˬ pyeuꞈ-eu meh.” Yawˇshuˆ gʼeh aˬ yawꞈ-ahˇ kʼaˇ ehˇ nehˬ-euˬ loꞈ-ehˇ mˇ-euˬ meh.