Yawˇshuˆ 4 - Akha

Noeˬ keuˆ-eu gʼaˇ duˬ kʼaˬ lo baꞈ bymˇ-euˬ

¹ Iˇsaˬleˬlaˆ tsawˇ jeuˬ dawˬ tawˆ luꞈ Yawˇdaˬ lawˇ baˬ tsehˆ doˆ jiˇ ngeh, Yawˇshuˆ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-eu meh.

² “Tsawˇ haˬ tseˇ nyiꞈ gʼaˬ byah ni, tsawˇ jeuˬ tiˬ jeuˬ-euˬ tsawˇ haˬ tiˬ gʼaˬ tseˇ doˆ-awˇ,

³ Yawˇdaˬ lawˇ baˬ gʼahˇ ceh piˇ ma deuˬ yawꞈ-euˬ jawˇ duˬ dawˬ peh jaˆ-eu kʼaˬ lo tseˇ nyiꞈ siˬ baꞈ doˆ laꞈ-awˬ lehˇ aˬ yawꞈ maꞈ-ahˇ dawˬ biꞈ-awˬ. Kʼaˬ lo kʼoeˇ deuˬ baꞈ gʼeh-awˇ, nymˇ ciꞈ naw maꞈ sehˬ gʼawˆ gʼawˆ-awˇ naˬ-eu jawˇ duˬ-ahˇ baꞈ taˬ-awˬ lehˇ aˬ yawꞈ maꞈ-ahˇ dawˬ biꞈ nehˬ-awˬ.”

⁴ Kʼoeˇ naˇ, aˬ yawꞈ neh tseˇ doˆ-euˬ tsawˇ haˬ kʼoeˇ tseˇ nyiꞈ gʼaˬ-ahˇ Yawˇshuˆ kuˇ-euˬ meh.

⁵ Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ mehˬ shi Yawˇdaˬ lawˇ baˬ-ahˇ uˇ-iˇ-awˬ. Naw maꞈ aˬ yawꞈ gʼaˬ yawꞈ, Iˇsaˬleˬlaˆ tsawˇ jeuˬ tiˬ jeuˬ-euˬ dah zaˇ, kʼaˬ lo tiˬ siˬ baꞈ pu kʼoeˇ taˆ baꞈ-awˬ.

⁶ Kʼaˬ lo heu deuˬ-aˬ, Sahˬpaˬ Miˬyehˇ neh mˇ-euˬ jeˬ, Iˇsaˬleˬlaˆ tsawˇ haˬ deuˬ-ahˇ bi noeˬ mawˇ tehꞈ-a. Kʼaˬ lo heu deuˬ naw maꞈ gʼaˇ duˬ dawˬ tsuiꞈ aˬ joˆ-ehˇ jaˆ ta lehˇ, aˬ kaˇ naw maꞈ-euˬ zaˬ deuˬ naw maꞈ-ahˇ naˇ haˬ laˇ ngeh, heu loꞈ-ehˇ ehˇ mehˬ nehˬ-awˬ.

⁷ ‘Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ lawˇ baˬ tsehˆ ngeh, Yawˇdaˬ lawˇ baˬ iˇ cuꞈ yoeˇ-eu naˬ leˇ-euˬ meh’ lehˇ ehˇ mehˬ nehˬ-awˬ. Kʼaˬ lo heu deuˬ-aˬ, jawˇ duˬ heu tsahˇ-ahˇ aˬ joˆ-ehˇ pyeuꞈ yaꞈ-euˬ gaˇ kawˆ, Iˇsaˬleˬlaˆ tsawˇ haˬ deuˬ-ahˇ aˬ myah luꞈ bi noeˬ mawˇ tehꞈ-a.”

⁸ Yawˇshuˆ neh dawˬ biꞈ nehˬ-euˬ loꞈ-ehˇ, tsawˇ haˬ kʼoeˇ deuˬ mˇ-euˬ meh. Sahˬpaˬ Miˬyehˇ neh Yawˇshuˆ-ahˇ dawˬ biꞈ nehˬ-euˬ loꞈ-ehˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dah zaˇ, Yawˇdaˬ lawˇ baˬ gʼahˇ ceh jaˆ-eu kʼaˬ lo tseˇ nyiꞈ siˬ aˬ yawꞈ maꞈ baꞈ gʼeh-awˇ, sehˬ gʼawˆ gʼawˆ-awˇ jawˇ naˬ-euˬ jawˇ duˬ-ahˇ baꞈ taˬ-euˬ meh.

⁹ Dawˬ ma saˇ jaˇ Bahˬ keuˆ baꞈ-eu piˇ ma deuˬ yawꞈ-euˬ Yawˇdaˬ lawˇ baˬ gʼahˇ ceh kʼoeˇ tsahˇ-ahˇ kʼawꞈ, kʼaˬ lo tseˇ nyiꞈ siˬ Yawˇshuˆ baꞈ bymˇ-euˬ meh. Kʼaˬ lo kʼoeˇ deuˬ iˬ nah keuˆ ni kʼoeˇ gaˇ jaˆ-eu meh.

¹⁰ Iˇsaˬleˬlaˆ tsawˇ haˬ deuˬ-ahˇ bi mˇ-eu gʼaˇ duˬ Sahˬpaˬ Miˬyehˇ neh Yawˇshuˆ-ahˇ dawˬ kʼaˇ biꞈ nehˬ-euˬ yawˬ jeˬ na luꞈ mˇ gʼaˬ jiˇ ngeh keuˆ ni, piˇ ma deuˬ Yawˇdaˬ lawˇ baˬ gʼahˇ ceh yawꞈ-euˬ meh. Kʼoeˇ loꞈ-ehˇ mˇ-awˬ lehˇ Moˇseˬ neh dawˬ biꞈ taˬ-euˬ jaˆ-eu meh. Iˇsaˬleˬlaˆ tsawˇ haˬ deuˬ Yawˇdaˬ lawˇ baˬ-ahˇ yaw kawˇ-ehˇ tsehˆ doˆ-euˬ meh.

¹¹ Aˬ yawꞈ maꞈ dawˬ tawˆ luꞈ nui baˬ tsehˆ doˆ gʼaˬ jiˇ ngeh, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ baꞈ luꞈ-eu piˇ ma deuˬ aˬ yawꞈ maꞈ-euˬ mehˬ hu le-euˬ meh.

¹² Moˇseˬ neh ehˇ taˬ-euˬ loꞈ-ehˇ, Luˇbeˬ tsawˇ jeuˬ, Gaˆ tsawˇ jeuˬ hawˇ-eu Maˬnaˇseˬ tsawˇ jeuˬ tiˬ paˆ laꞈ kʼoeˇ, guiˇ deuˆ-eu gʼaˇ duˬ lehˬ hmˬ dah aˬ-euˬ tsawˇ haˬ deuˬ, Iˇsaˬleˬlaˆ tsawˇ haˬ nui deuˬ-euˬ mehˬ hu paw le dzeuˇ gʼeh leꞈ-euˬ meh.

¹³ Guiˇ deuˆ-eu gʼaˇ duˇ lehˬ hmˬ dah taˬ-euˬ tsawˇ haˬ oeˬ muiˇ gʼaˬ, Sahˬpaˬ Miˬyehˇ-euˬ mehˬ shi Yeˬliˇkoˇ meuˬ dawˬ peh jaˆ-eu deh ga-ahˇ iˇ tsehˆ gʼeh-euˬ meh.

¹⁴ Yawˇshuˆ huiˬ-eu tsawˇ haˬ tiˬ gʼaˬ pyeuꞈ-eu gaˇ kawˆ Iˇsaˬleˬlaˆ tsawˇ haˬ deuˬ ya siˬ ni, kʼoeˇ ngeh nah Sahˬpaˬ Miˬyehˇ mˇ-euˬ meh. Moˇseˬ-ahˇ aˬ yawꞈ maꞈ taˬ huiˬ taˬ mahˇ-euˬ loꞈ-ehˇ, Yawˇshuˆ-ahˇ kʼawꞈ, ziˇ jiˇ ngeh keuˆ ni taˬ huiˬ taˬ mahˇ-euˬ meh.

¹⁵ Kʼoeˇ naˇ, Yawˇshuˆ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁶ “Dawˬ ma saˇ jaˇ Bahˬ keuˆ baꞈ luꞈ-eu piˇ ma deuˬ-ahˇ Yawˇdaˬ lawˇ baˬ laꞈ kʼoeˇ neh doˆ laˇ-awˬ lehˇ dawˬ biꞈ nehˬ-awˬ.”

¹⁷ Kʼoeˇ ngeh, “Yawˇdaˬ lawˇ baˬ-ahˇ neh doˆ laˇ-awˬ” lehˇ piˇ ma deuˬ-ahˇ Yawˇshuˆ dawˬ biꞈ-euˬ meh.

¹⁸ Piˇ ma deuˬ lawˇ baˬ lawˇ deh-ahˇ doˆ keuˆ laˇ ngeh, lawˇ baˬ iˇ cuꞈ bi lehˬ lehˬ lehˬ-ehˇ paˇ yoeˇ ka gʼeh-euˬ meh.

¹⁹ Ba la yaw beh siˬ tseˇ nyiꞈ nah tiˬ nah-ahˇ, Iˇsaˬleˬlaˆ tsawˇ haˬ deuˬ Yawˇdaˬ lawˇ baˬ tsehˆ doˆ-awˇ, Yeˬliˇkoˇ meuˬ-euˬ nahˇ ma doˆ kʼehˬ paw jaˆ-eu Giˇlaˇgaˬlaˇ-ahˇ sehˬ gʼawˆ gʼawˆ-awˇ naˬ-euˬ meh.

²⁰ Yawˇdaˬ lawˇ baˬ-ahˇ neh baꞈ laꞈ-euˬ kʼaˬ lo tseˇ nyiꞈ siˬ-ahˇ, Yawˇshuˆ kʼoeˇ gaˇ baꞈ bymˇ-euˬ meh.

²¹ Iˇsaˬleˬlaˆ tsawˇ haˬ deuˬ-ahˇ aˬ yawꞈ ehˇ nehˬ-eu, “Kʼaˬ lo heu deuˬ-euˬ dawˬ tsuiꞈ aˬ jeˬ-a lehˇ, aˬ kaˇ naw maꞈ-euˬ zaˬ deuˬ naw maꞈ-ahˇ naˇ haˬ laˇ ngeh,

²² Iˇsaˬleˬlaˆ tsawˇ jeuˬ gui coˇ ni gʼeh-eu miˇ tsaˬ-ahˇ nawˬ-awˇ Yawˇdaˬ lawˇ baˬ tsehˆ doˆ-euˬ gaˇ kawˆ dzawˇ mehˬ nehˬ-awˬ.

²³ Iˬ ma laˆ shaˆ yaw neˇ-ahˇ nga maꞈ gʼaˇ duˬ bi gui-iˇ-euˬ loꞈ-ehˇ, naw maꞈ Yawˇdaˬ lawˇ baˬ tsehˆ doˆ ngeh keuˆ ni, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ gʼaˇ duˬ Yawˇdaˬ lawˇ baˬ bi gui-iˇ-euˬ meh lehˇ aˬ yawꞈ maꞈ-ahˇ dzawˇ mehˬ nehˬ-awˬ.

²⁴ Kʼoeˇ baˬ da neh, Sahˬpaˬ Miˬyehˇ-euˬ baoˬ aˇ naˆ ni huiˬ-eu gaˇ kawˆ, miˇ tsaˬ kʼoeˇ taˆ kʼaˇ jawˇ-eu tsawˇ haˬ yawˬ gʼaˬ na luꞈ ya siˬ-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ mˬ maˬ maˬ byaˆ zaˇ ziˇ taˬ huiˬ taˬ mahˇ tehꞈ-a.”