Yawˇshuˆ 3 - Akha

Iˇsaˬleˬlaˆ tsawˇ haˬ deuˬ Yawˇdaˬ lawˇ baˬ tsehˆ-euˬ

¹ Yawˇshuˆ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, yawˬ shawˬ yawˬ uˬ shawˬ yaw naꞈ-ehˇ tuˇ-awˇ, Yawˇdaˬ lawˇ baˬ-ahˇ iˇ-euˬ meh. Lawˇ baˬ tsehˆ doˆ-eu gʼaˇ duˬ, aˬ yawꞈ maꞈ kʼoeˇ gaˇ sehˬ gʼawˆ gʼawˆ-awˇ naˬ-euˬ meh.

² Smˬ nah keuˆ laˇ ngeh, aˬ yuiꞈ aˬ tsu deuˬ sehˬ gʼawˆ doe ni iˇ-awˇ,

³ Iˇsaˬleˬlaˆ tsawˇ haˬ deuˬ-ahˇ ehˇ nehˬ-eu, “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-ahˇ piˇ ma deuˬ baꞈ-awˇ doˆ-iˇ-eu naw maꞈ ya mawˇ ngeh, yawˬ ha-euˬ sehˬ gʼawˆ laˆ luiˆ-awˇ caw teh gʼeh-awˬ.

⁴ Jawˇ duˬ heu tsahˇ-ahˇ dzeuˇ laˇ ngeh naw maꞈ maˬ laˇ keuˆ haw-aˬ. Kʼoeˇ miˇ neh, naw maꞈ ya iˇ-eu gaˇ ma aˬ yawꞈ maꞈ mehˬ nehˬ laꞈ tehꞈ-a. Ehˇ kʼawꞈ, Dawˬ ma saˇ jaˇ Bahˬ keuˆ dawˬ peh tehˬ ni maˬ iˇ-ehˇ, kʼoeˇ-euˬ naˇ kʼah paw ngaˬ yaˇ lmˇ kaˬ gaˇ naw maꞈ cah-awˬ.”

⁵ Iˇsaˬleˬlaˆ tsawˇ haˬ deuˬ-ahˇ Yawˇshuˆ ehˇ nehˬ-eu, “Yawˬ haˇ yawˬ ha laˆ muiˬ laˆ shawˇ-eu zahˇ jahˇ-awˬ. Aˬ jeˬ miˇ neh ehˇ naˇ, ni shawˬ nah Sahˬpaˬ Miˬyehˇ naw maꞈ-ahˇ kʼaˆ jeˬ-ehˇ gʼeh-eu jeˬ mˇ mehˬ nehˬ laꞈ tehꞈ-a.”

⁶ Kʼoeˇ naˇ, “Dawˬ ma saˇ jaˇ Bahˬ keuˆ baꞈ-awˇ, Iˇsaˬleˬlaˆ tsawˇ haˬ deuˬ-euˬ mehˬ hu doˆ-iˇ-awˬ” lehˇ, piˇ ma deuˬ-ahˇ Yawˇshuˆ ehˇ nehˬ ngeh, aˬ yawꞈ neh ehˇ-euˬ loꞈ-ehˇ aˬ yawꞈ maꞈ doˆ-iˇ-euˬ meh.

⁷ Yawˇshuˆ-ahˇ Sahˬpaˬ Miˬyehˇ ehˇ nehˬ-eu, “Iˇsaˬleˬlaˆ tsawˇ haˬ dawˬ tawˆ luꞈ, nawˬ-ahˇ huiˬ-eu tsawˇ haˬ tiˬ gʼaˬ loꞈ-ehˇ taˬ huiˬ taˬ mahˇ-awˇ, Moˇseˬ nehˬ-ehˇ ngaˇ jawˇ-euˬ loꞈ-ehˇ nawˬ nehˬ-ehˇ kʼawꞈ ngaˇ jawˇ-eu gaˇ kawˆ aˬ yawꞈ maꞈ ya siˬ duˬ ni, iˬ nah ngaˇ mˇ ma.

⁸ Dawˬ ma saˇ jaˇ Bahˬ keuˆ baꞈ luꞈ-eu piˇ ma deuˬ-ahˇ, ‘Lawˇ baˬ-ahˇ iˇ keuˆ ngeh, lawˇ baˬ lawˇ dzeˇ iˇ cuꞈ-ahˇ iˇ uˇ-awˇ yawꞈ-awˬ’ lehˇ ehˇ nehˬ-awˬ.”

⁹ Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ Yawˇshuˆ ehˇ nehˬ-eu, “Heu gaˇ laˇ-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ naˇ haˬ laˇ-awˬ.

¹⁰ Naw maꞈ mehˬ hu paw le gʼeh leꞈ-eu nehˬ ehˇ, Kaˬnaˬ tsawˇ jeuˬ, Heˇtaˆ tsawˇ jeuˬ, Hiˇbiˇ tsawˇ jeuˬ, Paˬyehˆ tsawˇ jeuˬ, Geuˬgaˬshaˆ tsawˇ jeuˬ, Aˬmawˇliˆ tsawˇ jeuˬ hawˇ-eu, Yeˬbuˇ tsawˇ jeuˬ heu deuˬ-ahˇ, aˬ yawꞈ aˬ diˇ aˬ maˇ teh doˆ gʼeh tehꞈ-a. Miˇ tsaˬ dawˬ tawˆ luꞈ-ahˇ uˆ lahˇ-eu Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ kʼoeˇ,

¹¹ naw maꞈ-euˬ mehˬ shi Yawˇdaˬ lawˇ baˬ tsehˆ doˆ ngeh, dehꞈ luꞈ-eu Miˬyehˇ naw maꞈ nehˬ-ehˇ jawˇ-eu gaˇ kawˆ naw maꞈ ya siˬ tehꞈ-a.

¹² Tsawˇ haˬ tseˇ nyiꞈ gʼaˬ byah ni, Iˇsaˬleˬlaˆ tsawˇ jeuˬ tiˬ jeuˬ-euˬ tsawˇ haˬ tiˬ gʼaˬ nymˬ-mˇ tseˇ doˆ-awˬ.

¹³ Miˇ tsaˬ dawˬ tawˆ luꞈ-ahˇ uˆ lahˇ-eu Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ baꞈ luꞈ-eu piˇ ma deuˬ iˇ cuꞈ-ahˇ aˬ kuiˇ cawˬ puꞈ ngeh, Yawˇdaˬ lawˇ baˬ iˇ cuꞈ yoeˇ-eu naˬ leˇ-awˇ, yoeˇ ka luꞈ-eu iˇ cuꞈ deuˬ tiˬ gaˇ tehꞈ-ehˇ dahˬ goˇ leꞈ tehꞈ-a.”

^14-15 Aˇ yamˬ kʼoeˇ yamˬ-aˬ, cehˇ laˆ luiˆ yamˬ pyeuꞈ-awˇ, Yawˇdaˬ lawˇ baˬ iˇ cuꞈ bi lehˬ lehˬ luꞈ-eu meh. Iˇsaˬleˬlaˆ tsawˇ haˬ deuˬ Yawˇdaˬ lawˇ baˬ tsehˆ-eu lehˇ sehˬ gʼawˆ laˆ luiˆ-awˇ doˆ-iˇ ngeh, piˇ ma deuˬ Dawˬ ma saˇ jaˇ Bahˬ keuˆ baꞈ-awˇ aˬ yawꞈ maꞈ-euˬ mehˬ hu doˆ-iˇ-euˬ meh. Piˇ ma deuˬ lawˇ baˬ-ahˇ aˬ kuiˇ cawˬ puꞈ-eu nehˬ-ehˇ,

¹⁶ iˇ cuꞈ yoeˇ-eu naˬ leˇ-awˇ, Zaˬleˬdaˬ dawˬ peh jaˆ-eu Aˬdaˬ meuˬ-ahˇ keuˆ ni dahˬ goˇ daˆ leꞈ-euˬ meh. Shiˇ-eu iˬ ma laˆ shaˆ paw yoeˇ ka-eu iˇ cuꞈ tsiˇ jaˆ ni tsiˇ leˇ-awˇ, Iˇsaˬleˬlaˆ tsawˇ haˬ deuˬ Yeˬliˇkoˇ meuˬ dawˬ peh lawˇ baˬ tsehˆ doˆ nya-euˬ meh.

¹⁷ Iˇsaˬleˬlaˆ tsawˇ haˬ deuˬ gui coˇ ni gʼeh-eu miˇ tsaˬ-ahˇ nawˬ-awˇ lawˇ baˬ tsehˆ luꞈ ngeh, aˬ yawꞈ maꞈ dawˬ tawˆ luꞈ maˬ tsehˆ doˆ jiˇ kʼoeˇ keuˆ ni, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ baꞈ luꞈ-eu piˇ ma deuˬ gui coˇ ni gʼeh-eu lawˇ baˬ gʼahˇ ceh yawꞈ luꞈ-eu meh.