Yawˇshuˆ 23 - Akha

Yawˇshuˆ dawˬ tsaꞈ tsaꞈ yaꞈ-euˬ

¹ Aˬ yawꞈ maꞈ-euˬ jawˬ jawˬ-ehˇ jawˇ-eu muiˇ-eu deuˬ-ahˇ maˬ ya guˆ ni, Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ gʼawˬ myahˇ ni bi dehꞈ bi jawˇ-euˬ meh. Kʼoeˇ ngeh, Yawˇshuˆ tsawˇ mawˬ mawˬ dui dui le-euˬ meh.

² Iˇsaˬleˬlaˆ tsawˇ haˬ aˬ yuiꞈ aˬ tsu deuˬ, yaˇ kʼaˬ daˇ-eu deuˬ hawˇ-eu, yaw huiˬ yaw mahˇ deuˬ nehˬ-ehˇ tiˬ kawˆ loꞈ-ehˇ, Iˇsaˬleˬlaˆ tsawˇ haˬ dawˬ tawˆ luꞈ-ahˇ aˬ yawꞈ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Nymˬ-mˇ ngaˇ tsawˇ mawˬ mawˬ dui dui le-euˬ ma.

³ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh, naw maꞈ gʼaˇ duˬ aˬ cawˬ tsawˇ jeuˬ heu deuˬ dawˬ tawˆ luꞈ-ahˇ jahˇ nehˬ-euˬ yawˬ jeˬ na luꞈ naw maꞈ ya mawˇ-euˬ meh. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ gʼaˇ duˬ guiˇ deuˆ-euˬ meh.

⁴ Nahˇ ma doˆ kʼehˬ paw Yawˇ daˬ lawˇ baˬ-ahˇ neh, nahˇ ma ga kʼehˬ paw Gʼahˇ ceh-eu iˬ ma laˆ shaˆ-ahˇ keuˆ ni jaˆ luꞈ-eu ngaˬ neh deuˆ gʼaˬ-euˬ tsawˇ jeuˬ deuˬ-euˬ miˇ kʼahˬ maˬ ehˇ, maˬ deuˆ gʼaˬ dah-euˬ tsawˇ jeuˬ deuˬ-euˬ miˇ kʼahˬ maˬ ehˇ, Iˇsaˬleˬlaˆ tsawˇ jeuˬ pyeuꞈ-eu naw maꞈ-ahˇ ngaˇ biꞈ gʼaˬ-euˬ ma.

⁵ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh, tsawˇ jeuˬ kʼoeˇ deuˬ-ahˇ naw maꞈ-euˬ mehˬ shi bi jiˆ pawˇ-awˇ, naw maꞈ le gʼeh leꞈ-eu mehˬ hu, aˬ yawꞈ maꞈ-ahˇ teh doˆ nehˬ tehꞈ-a. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, aˬ yawꞈ maꞈ-euˬ miˇ kʼahˬ naw maꞈ za tehꞈ-a.

⁶ Kʼoeˇ miˇ neh, Moˇseˬ-euˬ Zahˇ dawˬ kʼoꞈ dawˬ sahˬ boꞈ laꞈ kʼoeˇ kʼaˇ boꞈ taˬ-euˬ yawˬ jeˬ na luꞈ-ahˇ, tiˬ pawꞈ-iˬ maˬ byehˇ dzeh ni yaw muiˬ paˬ-ehˇ naˇ haˬ geuꞈ-awˬ.

⁷ Kʼoeˇ tehꞈ-ehˇ maˬ ngeuˇ ni, naw maꞈ nehˬ-ehˇ jawˇ luꞈ-eu aˬ cawˬ tsawˇ jeuˬ heu deuˬ nehˬ-ehˇ cawˬ maˬ cawˬ taꞈ ni jawˇ-awˇ, aˬ yawꞈ maꞈ-euˬ miˬ yehˇ deuˬ-euˬ tsawˇ myahˇ-ahˇ maˬ kuˇ-ehˇ, miˬ yehˇ kʼoeˇ deuˬ-euˬ tsawˇ myahˇ uˬ moˆ saˇ jaˇ maˬ dzaˬ taꞈ-eu uˬ taꞈ, aˬ yawꞈ maꞈ-ahˇ uˬ duˬ maˬ tahˬ ni dehꞈ-awˬ.

⁸ Ehˇ kʼawꞈ, dzeuˇ laˇ ngeh loꞈ-ehˇ Sahˬpaˬ Miˬyehˇ-ahˇ saˇ jaˇ ziꞈ-awˬ.

⁹ Naw maꞈ mehˬ hu paw le luꞈ ngeh, baoˬ huiˬ-awˇ tsawˇ myahˇ doˆ-eu tsawˇ jeuˬ heu deuˬ-ahˇ Sahˬpaˬ Miˬyehˇ teh doˆ nehˬ-awˇ, tsawˇ haˬ tiˬ gʼaˬ-iˬ naw maꞈ-euˬ mehˬ shi maˬ yawꞈ peuˬ ni pyeuꞈ-iˇ tehꞈ-a.

¹⁰ Naw maꞈ tsawˇ haˬ aˬ geu gʼaˬ maˬ kaˬ, aˬ cawˬ tsawˇ haˬ tiˬ heˇ gʼaˬ cehˆ byoˆ ni jahˇ nya tehꞈ-a. Aˬ jeˬ miˇ neh ehˇ naˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, naw maꞈ gʼaˇ duˬ aˬ yawꞈ guiˇ deuˆ luꞈ-eu meh.

¹¹ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ myah luꞈ maˬ ngehˇ ni gaˬ-awˬ.

¹² Naw maꞈ saˇ jaˇ maˬ ziꞈ-ehˇ, naw maꞈ nehˬ-ehˇ jawˇ luꞈ-eu aˬ cawˬ tsawˇ jeuˬ kʼoeˇ deuˬ nehˬ-ehˇ keuˬ leˇ-awˇ, sheuˬ dahˬ dzaˬ taꞈ naˇ,

¹³ naw maꞈ mehˬ hu paw dehꞈ gʼeh leꞈ ngeh, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ tsawˇ jeuˬ kʼoeˇ deuˬ-ahˇ maˬ paˇ teh doˆ nehˬ-eu yaw duˬ baw meh lehˇ naw maꞈ siˬ nya-awˬ. Kʼoeˇ naˆ maˬ tseˇ, tsawˇ jeuˬ kʼoeˇ deuˬ-aˬ, naw maꞈ gʼaˇ duˬ guˆ laˇ paˬ-ehˇ gʼeh-eu lahˇ ju hawˇ-eu duˬ kʼahˬ loꞈ-ehˇ pyeuꞈ-awˇ, naw maꞈ-euˬ daˇ tsuiꞈ-ahˇ diˬ-eu daˇ cuiˇ hawˇ-eu, naw maꞈ-euˬ myaˆ nuiˆ-ahˇ tsawˆ-eu aˬ gah loꞈ-ehˇ pyeuꞈ tehꞈ-a. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ muiˬ dui dui-eu miˇ kʼahˬ-ahˇ naw maꞈ tiˬ gʼaˬ-iˬ maˬ jawˇ nya-ehˇ pyeuꞈ-iˇ ngeh keuˆ ni, kʼoeˇ loꞈ-ehˇ ya daˬ tehꞈ-a.

¹⁴ “Nymˬ-mˇ ngaˇ ziˇ jiˇ le luꞈ miˇ-a. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, aˬ yawꞈ neh saˇ jaˇ dzaˬ taˬ-euˬ yaw muiˬ jeˬ dawˬ tawˆ luꞈ tiˬ jeˬ-iˬ maˬ bi dzeuˇ-iˇ ni biꞈ laꞈ-euˬ gaˇ, naw maꞈ yaw gʼaˬ na luꞈ nui ma laꞈ kʼoeˇ keuˆ ni siˬ luꞈ meh.

¹⁵ Ehˇ kʼawꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ yaw muiˬ jeˬ dawˬ tawˆ luꞈ, naw maꞈ kʼoeˇ taˆ mˇ byah nehˬ-euˬ loꞈ-ehˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ muiˬ dui dui-eu miˇ kʼahˬ heu kʼahˬ laꞈ kʼoeˇ, naw maꞈ luˬ-iˇ seˇ-iˇ jiˇ ngeh keuˆ ni, yaw doeˇ jeˬ dawˬ tawˆ luꞈ naw maꞈ kʼoeˇ taˆ Sahˬpaˬ Miˬyehˇ bi keuˆ le tehꞈ-a.

¹⁶ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ ma saˇ jaˇ laꞈ kʼoeˇ naw maꞈ maˬ ziꞈ-ehˇ, miˬ yehˇ nui deuˬ-ahˇ naw maꞈ caw teh-awˇ uˬ duˬ tahˬ naˇ, aˬ yawꞈ nui ma pehˇ-eu laꞈ kʼoeˇ naw maꞈ-ahˇ kʼehˬ nehˬ kʼaˆ nehˬ laꞈ-awˇ, tiˬ kʼehˇ laˇ kʼehˬ laꞈ kʼoeˇ tehꞈ-ehˇ, aˬ yawꞈ neh biꞈ laꞈ-euˬ muiˬ dui dui-eu miˇ kʼahˬ heu kʼahˬ laꞈ kʼoeˇ naw maꞈ tiˬ gʼaˬ-iˬ maˬ jawˇ-ehˇ piˬ-iˇ byoˆ-iˇ jiˇ tehꞈ-a.”