Yawˇshuˆ 22 - Akha

Nahˇ ma doˆ kʼehˬ paw baˬ-ahˇ jawˇ-eu Iˇsaˬleˬlaˆ tsawˇ jeuˬ deuˬ-ahˇ Yawˇshuˆ bi gʼoꞈ-iˇ-euˬ

¹ Kʼoeˇ naˇ, Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ haˬ deuˬ-ahˇ Yawˇshuˆ kuˇ uiˬ-euˬ meh.

² Aˬ yawꞈ maꞈ-ahˇ aˬ yawꞈ ehˇ nehˬ-eu, “Sahˬpaˬ Miˬyehˇ-euˬ zaˬ kʼaˆ Moˇseˬ neh kʼaˇ bi mˇ-euˬ yawˬ jeˬ na luꞈ naw maꞈ mˇ gʼaˬ jiˇ-awˇ, ngaˬ neh dawˬ kʼaˇ biꞈ-euˬ jeˬ dawˬ tawˆ luꞈ-ahˇ naw maꞈ naˇ haˬ geuꞈ gʼaˬ-euˬ meh.

³ Aˇ yamˬ heu myah ni gʼeh-eu laꞈ kʼoeˇ, naw maꞈ-euˬ cawˬ Iˇsaˬleˬlaˆ tsawˇ haˬ deuˬ-ahˇ naw maꞈ tiˬ poˆ-iˬ maˬ byehˇ dzeh-aˬ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ-ahˇ naw maꞈ yaw muiˬ paˬ-ehˇ naˇ haˬ geuꞈ-euˬ meh.

⁴ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, naw maꞈ-euˬ cawˬ Iˇsaˬleˬlaˆ tsawˇ haˬ deuˬ-ahˇ, nui saˇ za-eu jeˬ aˬ yawꞈ biꞈ gʼaˬ-euˬ meh. Kʼoeˇ miˇ neh, naw maꞈ geuꞈ ma lehˇ shaˇ-euˬ loꞈ-ehˇ, Sahˬpaˬ Miˬyehˇ-euˬ zaˬ kʼaˆ Moˇseˬ neh naw maꞈ-ahˇ biꞈ gʼaˬ-euˬ miˇ kʼahˬ pyeuꞈ-eu, Yawˇdaˬ lawˇ baˬ-euˬ nahˇ ma doˆ kʼehˬ paw baˬ-ahˇ jaˆ-eu naw maꞈ-euˬ miˇ kʼahˬ-ahˇ gʼoꞈ-iˇ-awˬ.

⁵ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˬ-awˬ. Aˬ yawꞈ-euˬ nui kʼahˇ mˇ-awˬ. Aˬ yawꞈ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ-awˬ. Aˬ yawꞈ-ahˇ saˇ jaˇ ziꞈ-awˬ. Nawˬ-euˬ nui ma saꞈ laˇ dawˬ tawˆ luꞈ aˬ yawꞈ-euˬ gaˇ mˇ-awˬ lehˇ ehˇ-eu Moˇseˬ neh biꞈ taˬ-euˬ zahˇ dawˬ kʼoꞈ dawˬ deuˬ-ahˇ naw maꞈ maˬ ngehˇ ni caw teh-awˬ.”

^6-8 Kʼoeˇ naˇ, aˬ yawꞈ maꞈ-ahˇ Yawˇshuˆ dawˬ ngehˬ gʼeh nehˬ-awˇ, heu loꞈ-ehˇ dawˬ tsaꞈ tsaꞈ nehˬ-awˇ bi gʼoꞈ-iˇ-euˬ meh. “Naw maꞈ-aˬ, smˇ muiˬ muiˬ dui dui-eu laꞈ kʼoeˇ ya gʼoꞈ-iˇ-eu ngaˇ. Jeˬ zaˬ maˬ ehˇ, pyuˇ maˬ ehˇ, shuiˇ maˬ ehˇ, guiˬ shuiˇ maˬ ehˇ, shmˇ maˬ ehˇ, dm gʼaˬ dm lmˇ maˬ ehˇ, gʼawˬ mya ni ya yuˇ kʼoˆ gʼeh-eu ngaˇ. Naw maꞈ-ahˇ muiˇ-eu deuˬ-ahˇ naw maꞈ neh deuˆ za-euˬ heu deuˬ, naw maꞈ-euˬ aˇ jeuˬ aˇ ca aˬ yuiꞈ aˬ nyiˇ deuˬ-ahˇ kʼawꞈ biˇ nehˬ-awˬ.” Kʼoeˇ ngeh, aˬ yawꞈ maꞈ gʼoꞈ-iˇ-euˬ meh. Maˬnaˇseˬ tsawˇ haˬ tiˬ paˆ-ahˇ, Yawˇdaˬ lawˇ baˬ nahˇ ma doˆ kʼehˬ paw Moˇseˬ miˇ kʼahˬ biˇ nehˬ-euˬ meh. Ehˇ kʼawꞈ, Maˬnaˇseˬ tsawˇ haˬ yawˬ deuˬ yawˬ-ahˇ, Iˇsaˬleˬlaˆ tsawˇ jeuˬ nui deuˬ nehˬ-ehˇ tiˬ kawˆ loꞈ-ehˇ, Yawˇdaˬ lawˇ baˬ nahˇ ma ga kʼehˬ paw Yawˇshuˆ miˇ kʼahˬ biˇ nehˬ-euˬ meh.

⁹ Kʼoeˇ naˇ, Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ heu deuˬ, aˬ yawꞈ maꞈ-euˬ miˇ kʼahˬ paw gʼoꞈ-iˇ-euˬ meh. Iˇsaˬleˬlaˆ tsawˇ jeuˬ nui deuˬ-ahˇ, Kaˬnaˬ miˇ kʼahˬ Shiˇloˬ meuˬ-ahˇ bi jawˇ yaꞈ-awˇ, Sahˬpaˬ Miˬyehˇ neh Moˇseˬ-ahˇ gʼoe-awˇ aˬ yawꞈ maꞈ-ahˇ biꞈ taˬ-euˬ loꞈ-ehˇ, aˬ yawꞈ maꞈ neh za-euˬ miˇ kʼahˬ pyeuꞈ-eu Giˇlaˆ miˇ kʼahˬ-ahˇ aˬ yawꞈ maꞈ gʼoꞈ-iˇ-euˬ meh.

Yawˇdaˬ lawˇ baˬ lawˇ dzeˇ jaˆ-eu lawˇ duˬ

¹⁰ Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ deuˬ, yawˇ daˬ lawˇ baˬ nahˇ ma ga kʼehˬ paw jaˆ-eu Geˬliˇlawˆ meuˬ-ahˇ oe keuˆ ngeh, lawˇ baˬ lawˇ deh-ahˇ huiˬ dui dui-eu lawˇ duˬ tiˬ hmˬ gawˬ-euˬ meh.

¹¹ “Haw sheˇ. Luˇbeˬ tsawˇ jeuˬ, Gaˆ tsawˇ jeuˬ hawˇ-eu nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ deuˬ, Yawˇdaˬ lawˇ baˬ heu paw baˬ-ahˇ, aˬ dui jawˇ-eu paw jaˆ-eu Geˬliˇlawˆ meuˬ-ahˇ, huiˬ dui dui-eu lawˇ duˬ tiˬ hmˬ gawˬ taˬ-euˬ ngaˇ” lehˇ ehˇ gaˇ, Iˇsaˬleˬlaˆ tsawˇ haˬ deuˬ ya gaˬ-euˬ meh.

¹² Kʼoeˇ loꞈ-ehˇ ehˇ gaˇ Iˇsaˬleˬlaˆ tsawˇ haˬ deuˬ ya gaˬ ngeh, nahˇ ma doˆ kʼehˬ paw baˬ-ahˇ jawˇ-eu Iˇsaˬleˬlaˆ tsawˇ jeuˬ kʼoeˇ deuˬ-ahˇ guiˇ deuˆ-iˇ-eu lehˇ, tsawˇ haˬ aˇ maꞈ dawˬ tawˆ luꞈ Shiˇloˬ-ahˇ laˇ uiˬ jiˇ-euˬ meh.

¹³ Kʼoeˇ naˇ, Iˇsaˬleˬlaˆ tsawˇ haˬ deuˬ piˇ ma Eˇlaˬzaˬ-euˬ aˬ li Piˇnaˬhaˇ-ahˇ, Giˇlaˆ miˇ kʼahˬ-ahˇ jawˇ-eu Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ jawˇ gaˇ bi iˇ-euˬ meh.

¹⁴ Nahˇ ma ga kʼehˬ paw jawˇ-eu Iˇsaˬleˬlaˆ tsawˇ jeuˬ aˬ yawꞈ jeuˬ yawꞈ tsawˇ haˬ tiˬ gʼaˬ tseˇ doˆ-awˇ, aˬ yuiꞈ aˬ tsu tseˇ gʼaˬ-ahˇ Piˇnaˬhaˇ nehˬ-ehˇ bi iˇ-euˬ meh. Tsawˇ haˬ kʼoeˇ tseˇ gʼaˬ, aˬ yawꞈ gʼaˬ yawꞈ Iˇsaˬleˬlaˆ tsawˇ jeuˬ tiˬ jeuˬ-euˬ aˬ yuiꞈ aˬ tsu pyeuꞈ-eu meh.

¹⁵ Giˇlaˆ miˇ kʼahˬ-ahˇ jawˇ-eu Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ jawˇ gaˇ aˬ yawꞈ maꞈ oe-euˬ meh.

¹⁶ Sahˬpaˬ Miˬyehˇ-euˬ tsawˇ haˬ aˇ maꞈ aˇ muˇ dawˬ tawˆ luꞈ-euˬ dah zaˇ, aˬ yawꞈ maꞈ heu loꞈ-ehˇ ehˇ-eu meh. “Aˬ jeˬ miˇ neh Iˇsaˬleˬlaˆ-euˬ Miˬyehˇ mehˬ shi heu loꞈ-ehˇ gʼeh-eu maˬ muiˬ maˬ jaˬ-eu jeˬ naw maꞈ mˇ yaꞈ teˬ. Naw maꞈ yawˬ ha gʼaˇ duˬ lawˇ duˬ heu hmˬ gawˬ-euˬ laꞈ kʼoeˇ, Sahˬpaˬ Miˬyehˇ-ahˇ puiˬ-euˬ meh. Aˬ yawꞈ-euˬ mehˬ nah naw maꞈ maˬ caw teh-a.

¹⁷ Peˬoˇ lehˇ kuˇ-eu jawˇ duˬ-ahˇ, aˬ dui-euˬ iˬ baˇ baˬ da neh aˬ yawꞈ-euˬ tsawˇ haˬ deuˬ kʼoeˇ taˆ luˬ-iˇ seˇ-iˇ-eu jeˬ Sahˬpaˬ Miˬyehˇ bi keuˆ le-euˬ gaˇ kawˆ shaˇ noeˬ haw sheˇ. Kʼoeˇ baˬ da neh iˬ nah keuˆ ni aˬ dui maꞈ ya daˬ luꞈ-eu maˬ ngeuˇ-a loˇ. Iˬ baˇ kʼoeˇ maˬ gʼaˬ-a siˬ loˇ.

¹⁸ Naw maꞈ Sahˬpaˬ Miˬyehˇ mehˬ nah maˬ caw teh ni byehˇ-eu lehˇ gʼeh te loˇ. Iˬ nah naw maꞈ Sahˬpaˬ Miˬyehˇ-ahˇ puiˬ te lehˇ ngeuˇ naˇ, ni shawˬ nah Iˇsaˬleˬlaˆ tsawˇ haˬ dawˬ tawˆ luꞈ-ahˇ Sahˬpaˬ Miˬyehˇ nui ma pehˇ tehꞈ-a.

¹⁹ Naw maꞈ-euˬ miˇ kʼahˬ maˬ muiˬ maˬ shawˇ-eu miˇ neh, uˬ duˬ tahˬ kʼaˇ maˬ za naˇ, Sahˬpaˬ Miˬyehˇ-euˬ Sehˬ gʼawˆ jaˆ-eu aˬ yawꞈ-euˬ miˇ kʼahˬ-ahˇ laˇ-awˇ, nga maꞈ-ahˇ miˇ tsaˬ shaˇ laˇ-awˬ. Ehˇ kʼawꞈ, Sahˬpaˬ Miˬyehˇ-ahˇ puiˬ-eu maˬ ehˇ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-euˬ lawˇ duˬ uˬ taꞈ-ehˇ, lawˇ duˬ nui hmˬ gawˬ-eu laꞈ kʼoeˇ, nga maꞈ-ahˇ Sahˬpaˬ Miˬyehˇ-ahˇ puiˬ-eu tsawˇ haˬ bi pyeuꞈ-iˇ ni mˇ-eu maˬ ehˇ, taˬ gʼeh nehˬ laꞈ.

²⁰ Ya laˆ luˬ ya laˆ seˇ jiˇ meh lehˇ ehˇ taˬ-euˬ myawˬ deuˬ-ahˇ taꞈ leˇ-awˇ, Aˬkaˬ neh mˇ-euˬ iˬ baˇ-ahˇ shaˇ noeˬ haw sheˇ. Kʼoeˇ baˬ da neh, Iˇsaˬleˬlaˆ tsawˇ haˬ aˇ maꞈ dawˬ tawˆ luꞈ kʼehˬ-eu kʼaˆ-eu jeˬ-ahˇ ya daˬ-euˬ meh. Aˬ kaˬ-euˬ iˬ baˇ baˬ da neh, aˬ yawꞈ tiˬ gʼaˬ tehꞈ-ehˇ ya shiˇ-euˬ maˬ ngeuˇ-a.”

²¹ Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ deuˬ, nahˇ ma ga kʼehˬ paw baˬ-ahˇ jawˇ-eu Iˇsaˬleˬlaˆ tsawˇ jeuˬ deuˬ-ahˇ, heu loꞈ-ehˇ ehˇ kʼoꞈ nehˬ-euˬ meh.

²² “Baoˬ huiˬ dui dui-eu gʼaˬ-aˬ Miˬyehˇ meh. Aˬ yawꞈ-aˬ, Sahˬpaˬ Miˬyehˇ pyeuꞈ-eu meh. Baoˬ huiˬ dui dui-eu gʼaˬ-aˬ Miˬyehˇ meh. Aˬ yawꞈ-aˬ, Sahˬpaˬ Miˬyehˇ pyeuꞈ-eu meh. Nga maꞈ aˬ jeˬ baˬ da neh heu loꞈ-ehˇ jahˇ-eu aˬ yawꞈ siˬ nya meh. Naw maꞈ-ahˇ kʼawꞈ gaˇ kawˆ heu bi siˬ mawꞈ-eu ma. Nga maꞈ Sahˬpaˬ Miˬyehˇ-ahˇ maˬ jah ni puiˬ-euˬ jeˬ ngeuˇ naˇ, nga maꞈ-ahˇ taˬ paˇ bi dehꞈ laꞈ.

²³ Sahˬpaˬ Miˬyehˇ-euˬ ehˇ dawˬ maˬ naˇ haˬ ni, miˬ dzaˬ dzah puiˆ-awˇ lawˇ-eu jeˬ maˬ ehˇ, dzaˬ la gʼo cehˇ lawˇ-eu jeˬ maˬ ehˇ, cawˬ cawˬ taꞈ-eu lawˇ-eu jeˬ maˬ ehˇ, nga maꞈ lawˇ-eu lehˇ yawˬ ha-euˬ gʼaˇ duˬ lawˇ duˬ tsoˆ-euˬ jeˬ ngeuˇ naˇ, nga maꞈ-ahˇ Sahˬpaˬ Miˬyehˇ kʼehˬ nehˬ kʼaˆ nehˬ laꞈ luꞈ-uˇ,

²⁴ Kʼoeˇ loꞈ-ehˇ maˬ ngeuˇ. Aˬ kaˇ, naw maꞈ-euˬ zaˬ deuˬ uˆ deuˬ nga maꞈ-euˬ zaˬ deuˬ uˆ deuˬ-ahˇ, ‘Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ aˬ jeˬ taꞈ te’ lehˇ ehˇ laˇ gaˇ guˆ-eu miˇ neh, nga maꞈ heu loꞈ-ehˇ mˇ-euˬ ma.

²⁵ Luˇbeˬ tsawˇ jeuˬ hawˇ-eu Gaˆ tsawˇ jeuˬ pyeuꞈ-eu naw maꞈ deuˬ hawˇ-eu nga maꞈ-euˬ yaw kaˬ-ahˇ, Yawˇdaˬ lawˇ baˬ neh aˬ yawꞈ miˇ kaˬ biˇ paˆ taˬ-euˬ meh. ‘Naw maꞈ Sahˬpaˬ Miˬyehˇ-ahˇ maˬ taꞈ-a’ lehˇ naw maꞈ-euˬ zaˬ deuˬ uˆ deuˬ nga maꞈ-euˬ zaˬ deuˬ uˆ deuˬ-ahˇ ehˇ-awˇ, Sahˬpaˬ Miˬyehˇ-ahˇ uˬ duˬ maˬ bi tahˬ gaˇ guˆ-eu miˇ neh, nga maꞈ heu loꞈ-ehˇ mˇ-euˬ ma.

²⁶ Kʼoeˇ miˇ neh, lawˇ-eu shehˇ-eu jeˬ mˇ-eu gʼaˇ duˬ nga maꞈ lawˇ duˬ gawˬ-euˬ maˬ ngeuˇ.

²⁷ Ehˇ kʼawꞈ, miˬ dzaˬ dzah puiˆ-awˇ lawˇ-eu jeˬ hawˇ-eu cawˬ cawˬ taꞈ-eu lawˇ-eu jeˬ lawˇ-eu laꞈ kʼoeˇ, Sahˬpaˬ Miˬyehˇ-euˬ muiˬ-eu shawˇ-eu Sehˬ gʼawˆ mehˬ shi aˬ dui aˬ yawꞈ-ahˇ uˬ duˬ tahˬ-euˬ gaˇ kawˆ, naw maꞈ-euˬ tsawˇ haˬ hawˇ-eu nga maꞈ-euˬ tsawˇ haˬ gʼaˇ duˬ maˬ ehˇ, aˬ kaˇ aˬ dui-euˬ zaˬ deuˬ uˆ deuˬ gʼaˇ duˬ maˬ ehˇ, saˇ kiˇ bi pyeuꞈ-eu gʼaˇ duˬ, heu loꞈ-ehˇ mˇ-euˬ ma. Nga maꞈ-euˬ zaˬ deuˬ uˆ deuˬ Sahˬpaˬ Miˬyehˇ-ahˇ maˬ taꞈ-a lehˇ naw maꞈ-euˬ zaˬ deuˬ uˆ deuˬ maˬ ya ehˇ ni, nga maꞈ heu loꞈ-ehˇ mˇ-euˬ ma.

²⁸ Nga maꞈ heu loꞈ-ehˇ noeˬ-eu ma. Aˬ kaˇ, nga maꞈ-ahˇ maˬ ehˇ, nga maꞈ-euˬ zaˬ deuˬ uˆ deuˬ-ahˇ maˬ ehˇ, kʼoeˇ loꞈ-ehˇ ehˇ laˇ naˇ, nga maꞈ-euˬ zaˬ deuˬ uˆ deuˬ heu loꞈ-ehˇ ehˇ kʼoꞈ nehˬ nya tehꞈ-a. ‘Haw yawˬ. Sahˬpaˬ Miˬyehˇ-euˬ lawˇ duˬ-ahˇ duˇ-eu lawˇ duˬ tiˬ hmˬ nga maꞈ-euˬ aˬ poeˬ aˬ bawˇ deuˬ neh gawˬ taˬ yaꞈ-euˬ meh. Kʼoeˇ-aˬ, lawˇ-eu shehˇ-eu gʼaˇ duˬ maˬ ngeuˇ-ehˇ, nga maꞈ tsawˇ jeuˬ hawˇ-eu naw maꞈ tsawˇ jeuˬ yaw kaˬ-ahˇ saˇ kiˇ bi pyeuꞈ-eu gʼaˇ duˬ meh’ lehˇ ehˇ kʼoꞈ nehˬ nya tehꞈ-a.

²⁹ Aˬ diˇ aˬ maˇ, miˬ dzaˬ dzah puiˆ-awˇ lawˇ-euˬ jeˬ hawˇ-eu, dzaˬ la gʼo cehˇ lawˇ-eu jeˬ lawˇ-eu gʼaˇ duˬ lawˇ duˬ tsoˆ-eu laꞈ kʼoeˇ, Sahˬpaˬ Miˬyehˇ-ahˇ puiˬ-awˇ, aˬ yawꞈ-euˬ mehˬ nah maˬ caw teh ni byehˇ-eu lehˇ gʼeh-eu maˬ ngeuˇ. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-euˬ lawˇ duˬ pyeuꞈ-eu aˬ yawꞈ jawˇ-eu Sehˬ gʼawˆ mehˬ shi jaˆ-eu lawˇ duˬ kʼoeˇ hmˬ uˬ taꞈ-ehˇ, lawˇ duˬ yawˬ hmˬ yawˬ nga maꞈ maˬ gawˬ.”

³⁰ Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ kʼoeˇ deuˬ ehˇ-eu dawˬ-ahˇ, piˇ ma Piˇnaˬhaˇ hawˇ-eu aˬ yawꞈ nehˬ-ehˇ oe-euˬ nahˇ ma ga kʼehˬ paw jawˇ-eu Iˇsaˬleˬlaˆ tsawˇ jeuˬ deuˬ kʼoeˇ taˆ aˬ yuiꞈ geuꞈ luꞈ-eu, Iˇsaˬleˬlaˆ tsawˇ haˬ aˇ maꞈ aˇ muˇ-euˬ aˬ yuiꞈ aˬ tsu kʼoeˇ tseˇ gʼaˬ ya gaˬ ngeh, nui kʼahˇ shiˇ-euˬ meh.

³¹ Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ haˬ deuˬ-ahˇ piˇ ma Eˇlaˬzaˬ-euˬ aˬ li Piˇnaˬhaˇ ehˇ nehˬ-eu, “Sahˬpaˬ Miˬyehˇ aˬ dui nehˬ-ehˇ jawˇ luꞈ-eu iˬ nah nga maꞈ siˬ duˬ-eu ma. Aˬ jeˬ miˇ neh ehˇ naˇ, naw maꞈ Sahˬpaˬ Miˬyehˇ-ahˇ puiˬ-eu ma ngeuˇ law hawˇ ngaˬ. Sahˬpaˬ Miˬyehˇ-euˬ kʼehˬ-eu kʼaˆ-eu jeˬ laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ naw maꞈ iˬ nah ka kʼoꞈ-euˬ meh.”

³² Kʼoeˇ naˇ, Piˇnaˬhaˇ hawˇ-eu aˬ yuiꞈ aˬ tsu kʼoeˇ deuˬ, Luˇbeˬ tsawˇ jeuˬ hawˇ-eu Gaˆ tsawˇ jeuˬ jawˇ-eu Giˇlaˆ miˇ kʼahˬ-ahˇ neh, Iˇsaˬleˬlaˆ tsawˇ jeuˬ deuˬ jawˇ-eu Kaˬnaˬ miˇ kʼahˬ-ahˇ gʼoꞈ leˇ-awˇ, gaˇ kawˆ kʼoeˇ paˇ dzawˇ poˆ nehˬ leˇ-euˬ meh.

³³ Iˇsaˬleˬlaˆ tsawˇ haˬ deuˬ kʼawꞈ nui kʼahˇ shiˇ-awˇ, Miˬyehˇ-ahˇ ja ceuˬ-eu meh. Luˇbeˬ tsawˇ jeuˬ hawˇ-eu Gaˆ tsawˇ jeuˬ jawˇ-eu miˇ kʼahˬ-ahˇ guiˇ deuˆ-iˇ-awˇ, laˆ luˬ laˆ seˇ nehˬ-iˇ-eu gaˇ kawˆ maˬ paˇ ja ni pyeuꞈ-iˇ-euˬ meh.

³⁴ “Sahˬpaˬ Miˬyehˇ-aˬ Miˬyehˇ pyeuꞈ-eu gaˇ kawˆ, lawˇ duˬ heu hmˬ saˇ kiˇ pyeuꞈ-eu meh” lehˇ Luˇbeˬ tsawˇ jeuˬ hawˇ-eu Gaˆ tsawˇ jeuˬ ehˇ-awˇ, lawˇ duˬ kʼoeˇ hmˬ-ahˇ “Saˇ kiˇ” lehˇ myahˇ nehˬ-euˬ meh.