Yawˇshuˆ 20 - Akha

Buˬ-iˇ law-iˇ-eu meuˬ deuˬ

¹ Kʼoeˇ naˇ, Yawˇshuˆ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ngaˬ neh Moˇseˬ-ahˇ dawˬ biꞈ-awˇ naw maꞈ-ahˇ bi ehˇ nehˬ-euˬ loꞈ-ehˇ, buˬ-iˇ law-iˇ-eu meuˬ deuˬ tseˇ doˆ-awˬ.

³ Tsawˇ haˬ tiˬ gʼaˬ na maˬ yehꞈ maˬ caˇ-ehˇ aˬ cawˬ-ahˇ laˆ sehꞈ naˇ, aˬ yawꞈ-ahˇ laꞈ poˆ poˆ-eu lehˇ shaˇ caw luꞈ-eu tsawˇ haˬ-euˬ laꞈ-ahˇ neh ya buˬ-iˇ-eu gʼaˇ duˬ, kʼoeˇ gaˇ cehˆ leˇ nya meh.

⁴ Meuˬ heu tiˬ meuˬ na-ahˇ aˬ yawꞈ cehˆ leˇ-awˇ, meuˬ meuˬ lahˇ laˇ gʼoˆ-ahˇ jaˆ-eu yaˇ kʼaˬ daˇ-eu jawˇ duˬ-ahˇ iˇ-awˇ, kʼaˇ pyeuꞈ laˇ-euˬ gaˇ kawˆ deuˬ aˬ yuiꞈ aˬ tsu deuˬ-ahˇ ya dzawˇ nehˬ meh. Kʼoeˇ naˇ, aˬ yawꞈ maꞈ aˬ yawꞈ-ahˇ meuˬ-ahˇ bi uˇ leˇ-awˇ, jawˇ duˬ tiˬ tsahˇ biꞈ-awˇ bi jawˇ tehꞈ-a.

⁵ Aˬ yawꞈ-ahˇ laꞈ poˆ poˆ mawꞈ-eu tsawˇ haˬ deuˬ kʼoeˇ gaˇ keuˆ ni teh keuˆ laˇ naˇ, meuˬ-ahˇ jawˇ-eu tsawˇ haˬ deuˬ aˬ yawꞈ-ahˇ kʼoeˇ deuˬ-euˬ laꞈ-ahˇ maˬ ya a nehˬ-a. Aˬ yawꞈ maꞈ aˬ yawꞈ-ahˇ ya haw piˇ nehˬ meh. Aˬ jeˬ miˇ neh ehˇ naˇ, aˬ yawꞈ nui ma pehˇ-eu laꞈ kʼoeˇ tsawˇ haˬ sehꞈ-euˬ maˬ ngeuˇ-a. Maˬ yehꞈ maˬ caˇ-ehˇ laˆ tahˬ-awˇ bi shiˇ-euˬ jeˬ pyeuꞈ-eu meh.

⁶ Aˬ yawꞈ-ahˇ tsawˇ haˬ aˇ maꞈ maꞈ ma mehˬ shi yaˇ kʼaˬ daˇ nehˬ gʼaˬ-awˇ, kʼoeˇ ngeh yamˬ-ahˇ Piˇ ma yaw huiˬ gʼaˬ geuꞈ luꞈ-eu gʼaˬ ziˇ maˬ jiˇ kʼoeˇ keuˆ ni, meuˬ kʼoeˇ meuˬ laꞈ kʼoeˇ aˬ yawꞈ ya jawˇ meh. Kʼoeˇ naˇ, aˬ yawꞈ neh cehˆ doˆ laꞈ-euˬ aˬ yawꞈ-euˬ nymˇ jaˆ-eu meuˬ-ahˇ aˬ yawꞈ ya gʼoꞈ-iˇ tehꞈ-a lehˇ dzawˇ mehˬ nehˬ-awˬ.”

⁷ Kʼoeˇ naˇ, Yawˇdaˬ lawˇ baˬ nahˇ ma ga kʼehˬ paw, Naˬtaˬliˇ miˇ kʼahˬ gawˬ jawˬ gawˬ duˇ paw Gaˬliˬlehˇ gahˬ kaˬ-ahˇ jaˆ-eu Geˬdeˬshaˆ meuˬ, Eˇpaˬleˬ miˇ kʼahˬ gawˬ jawˬ gawˬ duˇ paw jaˆ-eu Sheˬkmˬ meuˬ, Yuˇdaˆ miˇ kʼahˬ gawˬ jawˬ gawˬ duˇ paw jaˆ-eu Heˬbyoˬ meuˬ heu deuˬ aˬ yawꞈ maꞈ tseˇ doˆ-euˬ meh.

⁸ Yawˇdaˬ lawˇ baˬ nahˇ maˬ doˆ kʼehˬ paw baˬ-ahˇ, Yeˬliˇkoˇ meuˬ-euˬ nahˇ maˬ doˆ kʼehˬ paw, bawˇ tsahˬ bawˇ dahˇ deh ga yaw goˇ-ahˇ jaˆ-eu Luˇbeˬ miˇ kʼahˬ Beˬzeˬlaˇ meuˬ, Gaˆ miˇ kʼahˬ Giˇlaˆ gahˬ kaˬ-ahˇ jaˆ-eu Goˬlaˬ meuˬ, heu deuˬ-ahˇ aˬ yawꞈ maꞈ tseˇ doˆ-euˬ meh.

⁹ Meuˬ heu deuˬ-aˬ, Iˇsaˬleˬlaˆ tsawˇ haˬ dawˬ tawˆ luꞈ hawˇ-eu, aˬ yawꞈ maꞈ nehˬ-ehˇ jawˇ luꞈ-eu boeˇ miˬ shiˬ kʼaˬ yawˬ gʼa na luꞈ gʼaˇ duˬ tseˇ doˆ taˬ-euˬ buˬ-iˇ law-iˇ-eu meuˬ deuˬ pyeuꞈ-eu meh. Aˬ cawˬ-ahˇ maˬ yehꞈ maˬ caˇ-ehˇ laˆ sehꞈ-euˬ tsawˇ haˬ aˬ geu gʼaˬ maˬ kaˬ, kʼoeˇ gaˇ cehˆ leˇ-awˇ, aˬ yawꞈ-ahˇ laꞈ poˆ poˆ-eu lehˇ shaˇ caw luꞈ-eu tsawˇ haˬ-euˬ laꞈ-ahˇ neh buˬ-iˇ nya-eu meh. Tsawˇ haˬ aˇ maꞈ maꞈ ma mehˬ shi yaˇ kʼaˬ maˬ daˇ gʼaˬ kʼoeˇ keuˆ ni, aˬ yawꞈ-ahˇ sehꞈ-eu zahˇ maˬ jaˆ-a.