Yawˇshuˆ 2 - Akha

Yeˬliˇkoˇ meuˬ-ahˇ bi kʼoeˬ sho leˇ-euˬ

¹ Kʼoeˇ ngeh, Kaˬnaˬ miˇ kʼahˬ-ahˇ bi kʼoeˬ sho haw leˇ-awˇ, Yeˬliˇkoˇ meuˬ-ahˇ yaw muiˬ paˬ-ehˇ bi pyehˆ tseˇ haw leˇ-eu gʼaˇ duˬ, Aˬkaˬshaˇ lehˇ kuˇ-eu jawˇ duˬ-ahˇ neh tsawˇ haˬ nyiˬ gʼaˬ Yawˇshuˆ pyehˬ gʼeh-euˬ meh. Meuˬ kʼoeˇ meuˬ-ahˇ aˬ yawꞈ nyaꞈ le keuˆ ngeh, Laˬhaˇ lehˇ myahˇ-euˬ meh maˬ laˇ tiˬ gʼaˬ-euˬ nymˇ-ahˇ yaꞈ-euˬ meh.

² Kʼoeˇ ngeh miˇ, Iˇsaˬleˬlaˆ tsawˇ haˬ deuˬ miˇ kʼahˬ kʼoeˇ kʼahˬ-ahˇ kʼoeˬ sho laˇ-euˬ gaˇ kawˆ, Yeˬliˇkoˇ sahˬ paˬ ya gaˬ-euˬ meh.

³ Kʼoeˇ miˇ neh, Laˬhaˇ-ahˇ aˬ yawꞈ heu loꞈ-ehˇ bi tsaꞈ gaˬ-iˇ-euˬ meh. “Nawˬ-euˬ nymˇ-ahˇ yaꞈ laˇ-euˬ tsawˇ haˬ teu nyiˬ gʼaˬ-aˬ, miˇ kʼahˬ heu kʼahˬ-ahˇ kʼoeˬ sho doe-eu lehˇ laˇ taˬ-euˬ meh. Teu miˇ neh aˬ yawꞈ nyaꞈ-ahˇ sheuˬ doˆ laꞈ-awˬ.”

⁴ Ehˇ kʼawꞈ, zaˬ miˬ zaˬ kʼoeˇ gʼaˬ tsawˇ haˬ kʼoeˇ nyiˬ gʼaˬ-ahˇ sheuˬ zaꞈ taˬ-awˇ ehˇ-eu, “Ngeuˇ meh. Tsawˇ haˬ kʼoeˇ nyiˬ gʼaˬ ngaˇ jawˇ gaˇ laˇ-euˬ meh. Ehˇ kʼawꞈ, aˬ yawꞈ nyaꞈ aˬ geu gaˇ neh laˇ-euˬ gaˇ kawˆ ngaˇ maˬ ya siˬ-aˬ.

⁵ Uˬ ciꞈ ciꞈ le-awˇ, meuˬ meuˬ lahˇ laˇ gʼoˆ piˬ tehˬ-eu aˇ yamˬ keuˆ laˇ ngeh, aˬ yawꞈ nyaꞈ doˆ-iˇ-euˬ meh. Aˬ yawꞈ nyaꞈ aˬ geu paw iˇ-euˬ maˬ siˬ. Ehˇ kʼawꞈ, aˬ yawꞈ nyaꞈ mehˬ nah naw maꞈ yaw kawˇ-ehˇ caw teh naˇ, teh miˇ-eu duˇ.”

⁶ Kʼoeˇ naˇ, Laˬhaˇ-aˬ, kʼoeˬ sho haw laˇ-euˬ tsawˇ haˬ kʼoeˇ nyiˬ gʼaˬ-ahˇ nymˇ mˬ-ahˇ sheuˬ daˆ leꞈ-awˇ, aˬ yawꞈ neh nymˇ mˬ kʼoeˇ taˆ baꞈ taˬ-euˬ dziˬ dziˬ dzahˬ uˬ moˆ bi dzuˇ zaˬ-euˬ meh.

⁷ Sahˬ paˬ-euˬ tsawˇ haˬ kʼoeˇ deuˬ meuˬ-ahˇ neh doˆ-iˇ-awˇ, meuˬ meuˬ lahˇ laˇ gʼoˆ piˬ tehˬ-euˬ meh. Kʼoeˇ naˇ, kʼoeˬ sho haw laˇ-euˬ Iˇsaˬleˬlaˆ tsawˇ haˬ kʼoeˇ nyiˬ gʼaˬ-ahˇ, Yawˇdaˬ lawˇ baˬ lawˇ deh-ahˇ keuˆ ni aˬ yawꞈ maꞈ poˆ keuˆ-iˇ-euˬ meh.

⁸ Kʼoeˬ sho haw laˇ-euˬ tsawˇ haˬ kʼoeˇ nyiˬ gʼaˬ maˬ yuꞈ mi naˆ-ehˇ, nymˇ mˬ-ahˇ Laˬhaˇ le daˆ-awˇ,

⁹ aˬ yawꞈ nyaꞈ-ahˇ heu loꞈ-ehˇ ehˇ nehˬ-euˬ meh. “Miˇ kʼahˬ heu kʼahˬ Sahˬpaˬ Miˬyehˇ neh naw maꞈ-ahˇ biꞈ gʼaˬ-euˬ meh lehˇ ngaˇ siˬ nya ma. Miˇ kʼahˬ heu kʼahˬ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ naw maꞈ-ahˇ guˆ dui dui meh.

¹⁰ Iˇjiˇtuˆ miˇ kʼahˬ laꞈ kʼoeˇ neh naw maꞈ doˆ laˇ luꞈ ngeh, naw maꞈ-euˬ mehˬ shi, Sahˬpaˬ Miˬyehˇ neh iˬ ma laˆ shaˆ yaw neˇ iˇ cuꞈ bi gui-iˇ-euˬ gaˇ kawˆ nga maꞈ ya gaˬ-euˬ ma. Yawˇdaˬ lawˇ baˬ nahˇ ma doˆ kʼehˬ paw jawˇ-eu Aˬmawˇliˆ sahˬ paˬ nyiˬ gʼaˬ pyeuꞈ-eu Siˇhoˬ hawˇ-eu Awˇgaˆ-ahˇ naw maꞈ aˬ joˆ-ehˇ sehꞈ-euˬ gaˇ kawˆ kʼawꞈ, nga maꞈ siˬ nya ma.

¹¹ Gaˇ kawˆ kʼoeˇ ya gaˬ-euˬ nehˬ-ehˇ nga maꞈ guˆ guˆ-ehˇ jawˇ-euˬ ma. Naw maꞈ baˬ da neh nga maꞈ nui ma gʼaˬ baˬ dui dui luꞈ-eu ma. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, mˬ kʼoeˇ taˆ maˬ ehˇ, miˇ tsaˬ kʼoeˇ taˆ maˬ ehˇ, uˆ lahˇ-eu Miˬyehˇ pyeuꞈ-eu meh.

¹² Naw nyaꞈ-ahˇ ngaˇ gʼawˬ shaˬ gaˬ nehˬ-euˬ loꞈ-ehˇ, ngaˬ-eu nymˇ jiˇ-ahˇ naw nyaꞈ gʼawˬ shaˬ gaˬ nehˬ ma lehˇ, aˬ yawꞈ-euˬ mehˬ shi nymˬ-mˇ naw nyaꞈ kamˬ-awˬ. Naw nyaꞈ-ahˇ ngaˇ jah coeˇ ni, saˇ kiˇ tiˬ jeˬ paˬ kʼawꞈ bi jaˆ yaꞈ-awˬ.

¹³ Ngaˬ da, ngaˬ ma, ngaˬ-euˬ aˬ yuiꞈ aˬ nyiˇ deuˬ hawˇ-eu, aˬ yawꞈ maꞈ-euˬ miˬ sawˇ zaˬ dawˬ tawˆ luꞈ-ahˇ ka kʼoꞈ ma lehˇ, naw nyaꞈ ngaˬ-ahˇ saˇ jaˇ dzaˬ taˬ yaꞈ-awˬ. Nga maꞈ-ahˇ taˬ bi sehꞈ nehˬ laꞈ.”

¹⁴ Aˬ yawꞈ nyaꞈ aˬ yawꞈ-ahˇ ehˇ nehˬ-eu, “Nga nyaꞈ neh ehˇ taˬ-euˬ loꞈ-ehˇ nga nyaꞈ maˬ mˇ naˇ, Miˬyehˇ nga nyaꞈ-ahˇ sehꞈ luꞈ-uˇ. Nga nyaꞈ neh mˇ yaꞈ-eu gaˇ kawˆ tsawˇ haˬ tiˬ gʼaˬ-ahˇ-iˬ nawˇ maˬ ehˇ nehˬ ni jawˇ naˇ, miˇ kʼahˬ heu kʼahˬ Sahˬpaˬ Miˬyehˇ nga maꞈ-ahˇ biꞈ laꞈ ngeh, nawˬ-ahˇ yaw muiˬ paˬ-ehˇ haw nehˬ ma.”

¹⁵ Laˬhaˇ-aˬ, meuˬ lahˇ gawˬ taˬ-euˬ gaˇ tsoˆ tawꞈ taˬ-euˬ nymˇ-ahˇ jawˇ-eu meh. Kʼoeˇ miˇ neh, laˇ gʼoˆ gʼoˆ zaˬ-ahˇ neh aˇ caˆ pyehˬ ka-awˇ, tsawˇ haˬ kʼoeˇ nyiˬ gʼaˬ-ahˇ bi zaꞈ ka-iˇ-euˬ meh.

¹⁶ Aˬ yawꞈ nyaꞈ-ahˇ aˬ yawꞈ ehˇ nehˬ-eu, “Gawˬ duˇ jaˆ-eu paw le-awˬ. Maˬ ngeuˇ naˇ, sahˬ paˬ-euˬ tsawˇ haˬ deuˬ naw nyaꞈ-ahˇ mawˇ tehꞈ-a. Aˬ yawꞈ maꞈ maˬ gʼoꞈ doˆ laˇ kʼoeˇ keuˆ ni, smˬ nah keuˆ ni kʼoeˇ gaˇ dzuˇ zaꞈ-awˇ jawˇ-awˬ. Kʼoeˇ naˇ, naw nyaꞈ yawˬ ha gaˇ ma yawˬ ha iˇ-awˬ.”

¹⁷ Aˬ yawꞈ nyaꞈ aˬ yawꞈ-ahˇ ehˇ nehˬ-eu, “Nga nyaꞈ-ahˇ nawˬ neh bi dzaˬ laꞈ-euˬ saˇ jaˇ-ahˇ nga nyaꞈ ziꞈ ma. Nawˇ heu loꞈ-ehˇ jahˇ-awˬ.

¹⁸ Naw maꞈ-euˬ miˇ kʼahˬ-ahˇ nga maꞈ guiˇ deuˆ uˇ laꞈ ngeh, nga nyaꞈ-ahˇ bi zaꞈ ka-iˇ laꞈ-euˬ laˇ gʼoˆ gʼoˆ zaˬ kʼoeˇ gʼoˆ-ahˇ aˇ caˆ caˆ neˇ heu caˆ paꞈ gʼeu taˬ-awˬ. Nawˬ da, nawˬ ma, nawˬ-euˬ aˬ mahˇ aˬ da deuˬ hawˇ-eu, nawˬ da-euˬ miˬ sawˇ zaˬ dawˬ tawˆ luꞈ, nawˬ-euˬ nymˇ laꞈ kʼoeˇ bi jawˇ-awˬ.

¹⁹ Tiˬ gʼaˬ na nymˇ laꞈ nyiˇ doˆ-iˇ-awˇ ya shiˇ naˇ, aˬ yawꞈ-euˬ iˬ baˇ meh. Nga maꞈ-euˬ iˬ baˇ maˬ ngeuˇ. Ehˇ kʼawꞈ, nawˬ nehˬ-ehˇ nymˇ laꞈ kʼoeˇ jawˇ luꞈ-eu tsawˇ haˬ-ahˇ laˆ tahˬ laˆ naˇ naˇ, nga maꞈ-euˬ iˬ baˇ ma.

²⁰ Ehˇ kʼawꞈ, nga nyaꞈ neh mˇ yaꞈ-euˬ gaˇ kawˆ heu tsawˇ haˬ tiˬ gʼaˬ na-ahˇ nawˇ ehˇ nehˬ naˇ, nawˬ neh nga nyaꞈ-ahˇ bi dzaˬ laꞈ-euˬ saˇ jaˇ-ahˇ nga maꞈ maˬ ziꞈ.”

²¹ Aˬ yawꞈ nyaꞈ-euˬ dawˬ-ahˇ aˬ yawꞈ nui ma tsaˬ-awˇ, aˬ yawꞈ nyaꞈ-ahˇ bi doˆ-iˇ-euˬ meh. Aˬ yawꞈ doˆ-iˇ gʼaˬ ngeh, laˆ gʼoˆ gʼoˆ zaˬ kʼoeˇ gʼoˆ-ahˇ aˬ yawꞈ aˇ caˆ caˆ neˇ paꞈ-euˬ meh.

²² Kʼoeˬ sho haw laˇ-euˬ tsawˇ haˬ kʼoeˇ nyiˬ gʼaˬ-aˬ, gawˬ duˇ jaˆ-eu paw le-awˇ dzuˇ zaꞈ-euˬ meh. Sahˬ paˬ-euˬ tsawˇ haˬ deuˬ smˬ nah keuˆ ni aˬ yawꞈ nyaꞈ-ahˇ bawˇ tsahˬ doe ni poˆ-euˬ kʼawꞈ, maˬ poˆ mawˇ nya-ehˇ, Yeˬliˇkoˇ meuˬ-ahˇ gʼoꞈ leˇ-euˬ meh.

²³ Kʼoeˇ ngeh, kʼoeˬ sho haw leˇ-euˬ tsawˇ haˬ kʼoeˇ nyiˬ gʼaˬ gawˬ duˇ-ahˇ neh zaˬ ka le-awˇ, Yawˇdaˬ lawˇ baˬ tsehˆ-awˇ, Yawˇshuˆ jawˇ gaˇ gʼoꞈ-iˇ-euˬ meh. Kʼaˇ pyeuꞈ laˇ-euˬ gaˇ kawˆ dawˬ tawˆ luꞈ, Yawˇshuˆ-ahˇ aˬ yawꞈ nyaꞈ dzawˇ nehˬ-euˬ meh.

²⁴ Aˬ yawꞈ nyaꞈ ehˇ-eu, “Miˇ kʼahˬ kʼoeˇ kʼahˬ kʼahˬ lah ni Sahˬpaˬ Miˬyehˇ aˬ dui-ahˇ biꞈ laꞈ-eu yaw duˬ baw meh. Kʼoeˇ gaˇ jawˇ-eu tsawˇ haˬ dawˬ tawˆ luꞈ aˬ dui-ahˇ guˆ dui dui luꞈ meh.”