Yawˇshuˆ 16 - Akha

Eˇpaˬleˬ tsawˇ jeuˬ hawˇ-eu nahˇ ma ga kʼehˬ paw jawˇ-eu Maˬnaˇseˬ tsawˇ jeuˬ-ahˇ oꞈ-eu miˇ kʼahˬ

¹ Yoˇsehˆ-euˬ zaˬ deuˬ uˆ deuˬ-ahˇ oꞈ-eu miˇ kʼahˬ-euˬ laꞈ oˆ paw miˇ kaˬ-aˬ, Yeˬliˇkoˇ iˇ cuꞈ lawˇ kʼawꞈ nahˇ ma doˆ kʼehˬ paw dzeˇ, Yeˬliˇkoˇ meuˬ dawˬ peh Yawˇdaˬ lawˇ baˬ-ahˇ neh aˇ dahˬ beh-awˇ, bawˇ tsahˬ bawˇ dahˇ nyiˬ tsehˆ-ehˇ iˇ gʼeh-euˬ meh. Kʼoeˇ-aˬ, Yeˬliˇkoˇ meuˬ-ahˇ neh gawˬ jawˬ gawˬ duˇ paw le gʼeh leꞈ-awˇ, Beˬdeˬlaˇ meuˬ-ahˇ keuˆ ni le leꞈ-euˬ meh.

² Beˬdeˬlaˇ meuˬ-ahˇ neh naˇ, Luˇzaˆ meuˬ paw paˇ iˇ gʼeh-awˇ, Aˬciˇ tsawˇ haˬ deuˬ jawˇ-eu Aˬtaˬyoˆaˬdaˬlaˆ meuˬ iˇ dzeuˇ gʼeh-euˬ meh.

³ Kʼoeˇ naˇ, nahˇ ma ga kʼehˬ paw Yaˬpaˬlehˆ tsawˇ haˬ deuˬ jawˇ-eu gahˬ kaˬ iˇ gʼeh-awˇ, Behˬhawˇleuˬ laꞈ oˆ meuˬ-ahˇ iˇ gʼeh-euˬ meh. Kʼoeˇ gaˇ neh naˇ, Geˬzeuˬ meuˬ paw iˇ-awˇ, Gʼahˇ ceh-euˬ iˬ ma laˆ shaˆ-ahˇ iˇ dahˬ-euˬ meh.

⁴ Yoˇsehˆ-euˬ zaˬ deuˬ uˆ deuˬ pyeuꞈ-eu Eˇpaˬleˬ tsawˇ jeuˬ hawˇ-eu, nahˇ ma ga kʼehˬ paw jawˇ-eu Maˬnaˇseˬ tsawˇ jeuˬ, miˇ kʼahˬ heu kʼahˬ za-euˬ meh.

Eˇpaˬleˬ tsawˇ jeuˬ-euˬ miˇ kʼahˬ

⁵ Heu-aˬ, Eˇpaˬleˬ tsawˇ jeuˬ-euˬ miˇ kʼahˬ pyeuꞈ-eu meh. Aˬ yawꞈ maꞈ-euˬ miˇ kaˬ-aˬ, Aˬtaˬyoˆaˬdaˬlaˆ meuˬ-ahˇ neh, nahˇ ma doˆ kʼehˬ paw Behˬhawˇleuˬ laꞈ taˆ meuˬ paw le gʼeh leꞈ-euˬ meh.

⁶ Kʼoeˇ gaˇ neh naˇ, Gʼahˇ ceh-euˬ iˬ ma laˆ shaˆ paw nyiˬ tsehˆ-ehˇ iˇ gʼeh-euˬ meh. Kʼoeˇ naˇ, laꞈ taˆ paw jaˆ-eu Miˇkaˬmeˬdaˆ meuˬ paw le gʼeh-awˇ, nahˇ ma doˆ kʼehˬ paw jaˆ-eu Taˬnaˆshiˇloˬ meuˬ paw paˇ jaw kʼoꞈ leꞈ-awˇ, Yaˬnoˇaˬ meuˬ paw iˇ doˆ gʼeh-euˬ meh.

⁷ Yaˬnoˇaˬ meuˬ-ahˇ neh naˇ, Aˬtaˬyoˆ meuˬ hawˇ-eu Naˬlahˬ meuˬ paw iˇ ka-awˇ, Yeˬliˇkoˇ meuˬ-ahˇ neh Yawˇdaˬ lawˇ baˬ-ahˇ iˇ dahˬ-euˬ meh.

⁸ Miˇ kaˬ kʼoeˇ-aˬ, Taˬpahˇ meuˬ-ahˇ neh nahˇ ma ga kʼehˬ paw jaˆ-eu Kaˬnahˬ lawˇ gawˆ paw iˇ gʼeh-awˇ, Gʼahˇ ceh-euˬ iˬ ma laˆ shaˆ-ahˇ iˇ dahˬ-euˬ meh. Heu-aˬ, Eˇpaˬleˬ tsawˇ jeuˬ-ahˇ biꞈ tsehˆ tsehˆ nehˬ-euˬ miˇ kʼahˬ pyeuꞈ-eu meh.

⁹ Maˬnaˇseˬ tsawˇ jeuˬ-euˬ miˇ kʼahˬ laꞈ kʼoeˇ jaˆ-eu meuˬ yaw nyiˇ deuˬ hawˇ-eu pu tiˬ paˆ na deuˬ kʼawꞈ, aˬ yawꞈ maꞈ-ahˇ biꞈ ahˇ nehˬ-euˬ miˇ neh, miˇ kʼahˬ heu kʼahˬ-ahˇ taꞈ-eu meh.

¹⁰ Ehˇ kʼawꞈ, Geˬzeuˬ meuˬ laꞈ kʼoeˇ jawˇ-eu Kaˬnaˬ tsawˇ haˬ deuˬ-ahˇ aˬ yawꞈ maꞈ maˬ teh doˆ-a. Kʼoeˇ miˇ neh, iˬ nah keuˆ ni Kaˬnaˬ tsawˇ haˬ deuˬ Eˇpaˬleˬ tsawˇ haˬ deuˬ nehˬ-ehˇ jawˇ luꞈ-eu meh. Ehˇ kʼawꞈ, Kaˬnaˬ tsawˇ haˬ kʼoeˇ deuˬ-ahˇ zaˬ kʼaˆ bi geuꞈ-euˬ meh.