Yawˇshuˆ 13 - Akha

Za paˬ-ehˇ jaˆ-eu miˇ kʼahˬ

¹ Yawˇshuˆ tsawˇ mawˬ mawˬ dui dui le-euˬ meh. Sahˬpaˬ Miˬyehˇ aˬ yawꞈ-ahˇ ehˇ nehˬ-eu, “Nawˇ tsawˇ mawˬ mawˬ dui dui le-euˬ meh. Ehˇ kʼawꞈ, za paˬ-ehˇ gʼeh-eu miˇ kʼahˬ gʼawˬ mya ni jaˆ-a siˬ.

² Za paˬ-ehˇ gʼeh-eu miˇ kʼahˬ kʼoeˇ-aˬ, Piˇliˇtiˆ miˇ kʼahˬ, Geˬshuˇlaˆ miˇ kʼahˬ hawˇ-eu,

³ laꞈ oˆ paw pyawˬ-ahˇ jaˆ ka gʼeh-euˬ Aˬbymˬ miˇ kʼahˬ kʼahˬ lah ni meh. (Iˇjiˇtuˆ miˇ kaˬ-ahˇ jaˆ-eu Shiˇhoˬ lawˇ gawˆ-ahˇ neh, laꞈ taˆ paw Eˇkaˬloˬ miˇ kaˬ-ahˇ keuˆ ni, Kaˬnaˬ tsawˇ haˬ deuˬ-euˬ jawˇ duˬ meh. Piˇliˇtiˆ sahˬ paˬ deuˬ-aˬ, Gaˬzaˬ meuˬ, Aˬshaˬdoˇ meuˬ, Aˬshaˇgaˬloˇ meuˬ, Gaˬdaˇ meuˬ, Eˇkaˬloˬ meuˬ heu deuˬ-ahˇ jawˇ-euˬ meh.)

⁴ Kaˬnaˬ miˇ kʼahˬ kʼahˬ lah ni hawˇ-eu, Aˬmawˇliˆ miˇ kaˬ Aˬpyehˇ meuˬ-ahˇ keuˆ ni jaˆ-eu (Siˇdoˬ tsawˇ jeuˬ-ahˇ taꞈ-eu) Meˬlahˬ miˇ kʼahˬ maˬ ehˇ,

⁵ Geˬbaˬlaˆ tsawˇ jeuˬ-euˬ miˇ kʼahˬ maˬ ehˇ, Heˬlaˬmoˬ gawˬ jawˬ-euˬ laꞈ oˆ jaˆ-eu Baˬlaˇgaˆ-ahˇ neh Haˬmaˆ gʼaˬ lahˇ-ahˇ keuˆ ni, nahˇ ma doˆ kʼehˬ paw jaˆ-eu Leˬbaˬnoˬ miˇ kʼahˬ kʼahˬ lah ni maˬ ehˇ, za paˬ-ehˇ jaˆ-eu meh.

⁶ Miˇ kʼahˬ heu laꞈ kʼoeˇ, Leˬbaˬnoˬ gawˬ jawˬ deuˬ hawˇ-eu Miˇsaˬleˬpawˇmeˬ meuˬ yaw kaˬ-ahˇ jaˆ-eu gawˬ jawˬ gawˬ duˇ doe ni jawˇ-eu Siˇdoˬ tsawˇ haˬ deuˬ-euˬ miˇ kʼahˬ dawˬ tawˆ luꞈ ahˇ leˇ taˬ-euˬ meh. Iˇsaˬleˬlaˆ tsawˇ jeuˬ le gʼeh leꞈ-eu nehˬ-ehˇ, tsawˇ jeuˬ kʼoeˇ deuˬ-ahˇ ngaˇ teh doˆ ma. Ngaˬ neh nawˬ-ahˇ dawˬ biꞈ taˬ-euˬ loꞈ-ehˇ, Iˇsaˬleˬlaˆ tsawˇ jeuˬ deuˬ-ahˇ nawˇ miˇ kʼahˬ ya biꞈ nehˬ meh.

⁷ Nymˬ-mˇ poˆ jawˇ-aˬ, Iˇsaˬleˬlaˆ tsawˇ jeuˬ gʼoeˬ jeuˬ hawˇ-eu Maˬnaˇseˬ tsawˇ jeuˬ tiˬ paˆ-ahˇ miˇ kʼahˬ heu biˇ nehˬ-awˇ, bi geuꞈ tsehˆ tsehˆ-awˬ.”

Yawˇdaˬ lawˇ baˬ nahˇ ma doˆ kʼehˬ paw miˇ kʼahˬ biˇ-euˬ

⁸ Luˇbeˬ tsawˇ jeuˬ, Gaˆ tsawˇ jeuˬ hawˇ-eu Maˬnaˇseˬ tsawˇ jeuˬ tiˬ paˆ-aˬ, Sahˬpaˬ Miˬyehˇ-euˬ zaˬ kʼaˆ Moˇseˬ neh aˬ yawꞈ maꞈ-ahˇ biꞈ-euˬ Yawˇdaˬ lawˇ baˬ nahˇ ma doˆ kʼehˬ paw jaˆ-eu miˇ kʼahˬ za-euˬ meh.

⁹ Aˬnoˬ deh kʼawꞈ-euˬ uˬ gʼmˬ-ahˇ jaˆ-eu Aˬyawˬ meuˬ-ahˇ neh, deh kʼawꞈ kʼoeˇ kʼawꞈ-euˬ gʼahˇ ceh jaˆ-eu meuˬ hawˇ-eu, Meˬdeˬbaˬ meuˬ-ahˇ neh Diˇboˬ meuˬ-ahˇ keuˆ ni, yaw goˇ-ahˇ jaˆ-eu deh saˇ kʼoeˇ deuˬ dawˬ tawˆ luꞈ meh.

¹⁰ Miˇ kʼahˬ kʼoeˇ kʼahˬ-aˬ, Aˬmoˬ meuˬ-euˬ miˇ kaˬ-ahˇ keuˆ ni jaˆ-awˇ, Heˬshaˬboˬ meuˬ-ahˇ jawˇ-awˇ uˆ lahˇ-euˬ Aˬmawˇliˆ tsawˇ jeuˬ sahˬ paˬ Siˇhoˬ-euˬ meuˬ dawˬ tawˆ luꞈ ahˇ-eu meh.

¹¹ Giˇlaˆ meuˬ maˬ ehˇ, Geˬshuˇlaˆ hawˇ-eu Mawˇkah gahˬ kaˬ maˬ ehˇ, Heˬlaˬmoˬ gawˬ jawˬ jawˬ lah ni maˬ ehˇ, Saˬleˬkaˬ-ahˇ keuˆ ni ahˇ-eu Baˬshaˬ gahˬ kaˬ dawˬ tawˆ luꞈ maˬ ehˇ, miˇ kʼahˬ kʼoeˇ kʼahˬ laꞈ kʼoeˇ jaˆ-eu meh.

¹² Leˬpeˬ tsawˇ jeuˬ laꞈ kʼoeˇ dzeˇ yaꞈ-euˬ gʼaˬ pyeuꞈ-awˇ, Aˬshaˇtaˬyoˇ meuˬ hawˇ-eu Eˬdiˇliˇ meuˬ-ahˇ jawˇ-awˇ uˆ lahˇ-euˬ gʼaˬ pyeuꞈ-eu Awˇgaˆ-euˬ miˇ kʼahˬ dawˬ tawˆ luꞈ kʼawꞈ, kʼoeˇ gaˇ ahˇ leˇ-euˬ meh. Tsawˇ haˬ kʼoeˇ deuˬ-ahˇ Moˇseˬ deuˆ gʼaˬ-awˇ teh doˆ nehˬ-euˬ meh.

¹³ Ehˇ kʼawꞈ, Geˬshuˇlaˆ tsawˇ jeuˬ hawˇ-eu Mawˇkah tsawˇ jeuˬ-ahˇ Iˇsaˬleˬlaˆ tsawˇ haˬ deuˬ maˬ teh doˆ-a. Aˬ yawꞈ maꞈ iˬ nah keuˆ ni Iˇsaˬleˬlaˆ miˇ kʼahˬ laꞈ kʼoeˇ jawˇ luꞈ-eu meh.

¹⁴ Leˬbiˇ tsawˇ jeuˬ-ahˇ Moˇseˬ miˇ kʼahˬ maˬ biˇ nehˬ-a. Moˇseˬ-ahˇ Sahˬpaˬ Miˬyehˇ ehˇ nehˬ taˬ-euˬ loꞈ-ehˇ, lawˇ duˬ kʼoeˇ taˆ dzah puiˆ-awˇ Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˇ nehˬ-eu jeˬ laꞈ kʼoeˇ, aˬ yawꞈ maꞈ-ahˇ oꞈ-eu shaˬ bymˇ jaˆ-eu meh.

Luˇbeˬ tsawˇ jeuˬ-ahˇ oꞈ-eu miˇ kʼahˬ

¹⁵ Luˇbeˬ tsawˇ jeuˬ-ahˇ Moˇseˬ miˇ kʼahˬ biˇ nehˬ-awˇ, biꞈ tsehˆ tsehˆ nehˬ-euˬ meh.

¹⁶ Aˬ yawꞈ maꞈ-euˬ miˇ kʼahˬ-aˬ, Aˬnoˬ deh kʼawꞈ uˬ gʼmˬ-ahˇ jaˆ-eu Aˬyawˬ meuˬ-ahˇ neh, deh kʼawꞈ kʼoeˇ kʼawꞈ-euˬ gʼahˇ ceh jaˆ-eu meuˬ hawˇ-eu, Meˬdiˇbaˬ meuˬ jawˬ lawˬ jawˇ lawˇ-ehˇ, yaw goˇ-ahˇ jaˆ-eu deh saˇ dawˬ tawˆ luꞈ meh.

¹⁷ Heˬshaˬboˬ meuˬ hawˇ-eu deh saˇ kʼoeˇ tsahˇ-ahˇ kʼaˇ jaˆ-eu meuˬ deuˬ pyeuꞈ-eu Diˇboˬ meuˬ, Baˬmo baˬlaˇ meuˬ, Behˬbaˬlaˇmyoˬ meuˬ,

¹⁸ Yaˬhaˇ meuˬ, Geˬdiˇmoˇ meuˬ, Meˬpaˇ meuˬ,

¹⁹ Kiˇlaˬdeˬ meuˬ, Siˇbaˬmaˬ meuˬ, deh kʼawꞈ-ahˇ gawˬ duˇ uˬ du jaˆ-eu Zeˬyehˇshaˬhaˬ meuˬ,

²⁰ Behˬpyawˇ meuˬ, Piˇsaˬgaˬ gawˬ jawˬ baˬ gʼa deuˬ hawˇ-eu, Behˬjaˬshiˇmoˇ meuˬ heu deuˬ kʼawꞈ, miˇ kʼahˬ kʼoeˇ kʼahˬ laꞈ kʼoeˇ ahˇ-eu meh.

²¹ Deh ga yaw goˇ-ahˇ kʼaˇ jaˆ-eu meuˬ dawˬ tawˆ luꞈ hawˇ-eu, Heˬshaˬboˬ meuˬ-ahˇ jawˇ-awˇ uˆ lahˇ-euˬ Aˬmawˇliˆ tsawˇ jeuˬ sahˬ paˬ Siˇhoˬ-euˬ miˇ kʼahˬ kʼahˬ lah ni kʼawꞈ, kʼoeˇ gaˇ ahˇ-eu meh. Siˇhoˬ-ahˇ maˬ ehˇ, Miˇdiˬyaˬ tsawˇ jeuˬ sahˬ paˬ deuˬ pyeuꞈ-eu Eˇbiˇ, Leˬkmˬ, Zuˇlaˆ, Huˇyaˆ hawˇ-eu Leˇbaˬ-ahˇ maˬ ehˇ, Moˇseˬ deuˆ gʼaˬ-euˬ meh. Aˬ yawꞈ maꞈ dawˬ tawˆ luꞈ, sahˬ paˬ Siˇhoˬ-euˬ miˇ kʼahˬ-ahˇ caw uˆ lahˇ-euˬ sahˬ paˬ deuˬ pyeuꞈ-eu meh.

²² Iˇsaˬleˬlaˆ tsawˇ jeuˬ neh sehꞈ-euˬ deuˬ laꞈ kʼoeˇ, Beˬyoˇ-euˬ aˬ li ja maw nya-eu Baˬlamˬ gʼaˬ kʼawꞈ ahˇ leˇ-euˬ meh.

²³ Luˇbeˬ tsawˇ jeuˬ-euˬ nahˇ ma doˆ kʼehˬ paw miˇ kaˬ-aˬ, Yawˇdaˬ lawˇ baˬ pyeuꞈ-eu meh. Heu-aˬ, Luˇbeˬ tsawˇ jeuˬ-ahˇ biꞈ tsehˆ tsehˆ-euˬ meuˬ deuˬ hawˇ-eu pu deuˬ meh.

Gaˆ tsawˇ jeuˬ-ahˇ oꞈ-eu miˇ kʼahˬ

²⁴ Gaˆ tsawˇ jeuˬ-ahˇ Moˇseˬ miˇ kʼahˬ biˇ nehˬ-awˇ, biꞈ tsehˆ tsehˆ nehˬ-euˬ meh.

²⁵ Aˬ yawꞈ maꞈ-euˬ miˇ kʼahˬ laꞈ kʼoeˇ, Yaˬzeuˬ meuˬ, Giˇlaˆ miˇ kʼahˬ-ahˇ jaˆ-eu meuˬ dawˬ tawˆ luꞈ hawˇ-eu, Laˬbah meuˬ-euˬ nahˇ ma doˆ kʼehˬ paw Aˬyawˬ meuˬ-ahˇ keuˆ ni jaˆ-eu Aˬmoˬ miˇ kʼahˬ tiˬ paˆ ahˇ leˇ-euˬ meh.

²⁶ Aˬ yawꞈ maꞈ-euˬ miˇ kʼahˬ-aˬ, Heˬshaˬboˬ meuˬ-ahˇ neh, Laˬmaˆmiˇzaˬpeˬ meuˬ hawˇ-eu Beˬtoˇneˬ meuˬ-ahˇ keuˆ ni maˬ ehˇ, Maˬhaˬneˬ meuˬ-ahˇ neh Lawˇdeˬbaˬ meuˬ-ahˇ keuˆ ni maˬ ehˇ, jeˇ-eu meh.

²⁷ Yawˇdaˬ deh kʼawꞈ-ahˇ jaˆ-eu Behˬhaˬlamˬ meuˬ, Behˬnymˇlaˬ meuˬ, Suˇkoˆ meuˬ, Saˬpoˬ meuˬ heu deuˬ hawˇ-eu, Heˬshaˬboˬ sahˬ paˬ Siˇhoˬ-euˬ miˇ kʼahˬ kʼaˇ dzeˇ-eu deuˬ kʼawꞈ, aˬ yawꞈ maꞈ-euˬ miˇ kʼahˬ laꞈ kʼoeˇ ahˇ-eu meh. Aˬ yawꞈ maꞈ-euˬ miˇ kʼahˬ nahˇ ma ga kʼehˬ paw miˇ kaˬ-aˬ, Yawˇdaˬ lawˇ baˬ caw caw-ehˇ, laꞈ taˆ paw jaˆ-eu Gaˬliˬlehˇ lah-ahˇ keuˆ ni meh.

²⁸ Heu-aˬ, Gaˆ tsawˇ jeuˬ-ahˇ biꞈ tsehˆ tsehˆ nehˬ-euˬ meuˬ deuˬ hawˇ-eu pu deuˬ meh.

Nahˇ ma doˆ kʼehˬ paw jawˇ-eu Maˬnaˇseˬ tsawˇ jeuˬ-ahˇ oꞈ-eu miˇ kʼahˬ

²⁹ Maˬnaˇseˬ tsawˇ jeuˬ tiˬ paˆ-ahˇ Moˇseˬ miˇ kʼahˬ biˇ nehˬ-awˇ, biꞈ tsehˆ tsehˆ nehˬ-euˬ meh.

³⁰ Aˬ yawꞈ maꞈ-euˬ miˇ kʼahˬ-aˬ, Maˬhaˬneˬ-ahˇ neh aˇ dahˬ beh-awˇ, Baˬshaˬ sahˬ paˬ Awˇgaˆ-euˬ miˇ kʼahˬ pyeuꞈ-eu Baˬshaˬ miˇ kʼahˬ kʼahˬ lah ni maˬ ehˇ, Baˬshaˬ miˇ kʼahˬ laꞈ kʼoeˇ jaˆ-eu Yaˬiˇlaˆ-euˬ pu koꞈ tseˇ pu maˬ ehˇ, ahˇ leˇ taˬ-euˬ meh.

³¹ Miˇ kʼahˬ kʼoeˇ kʼahˬ laꞈ kʼoeˇ, Giˇlaˆ miˇ kʼahˬ tiˬ paˆ paˆ maˬ ehˇ, Aˬshaˇtaˬyoˇ meuˬ hawˇ-eu Eˬdiˇliˇ meuˬ maˬ ehˇ, Awˇgaˆ-euˬ miˇ kʼahˬ pyeuꞈ-eu Baˬshaˬ miˇ kʼahˬ laꞈ kʼoeˇ jaˆ-eu meuˬ meuˬ ma deuˬ maˬ ehˇ, ahˇ leˇ taˬ-euˬ meh. Miˇ kʼahˬ heu deuˬ dawˬ tawˆ luꞈ, Maˬnaˇseˬ-euˬ aˬ li Maˬkiˬlaˇ-euˬ zaˬ deuˬ uˆ deuˬ tiˬ paˆ-ahˇ biꞈ nehˬ-euˬ meh.

³² Heu-aˬ, Mawˇbaˆ deh ga-ahˇ Moˇseˬ jawˇ luꞈ ngeh, Yeˬliˇkoˇ meuˬ hawˇ-eu Yawˇdaˬ lawˇ baˬ-euˬ nahˇ ma doˆ kʼehˬ paw jaˆ-eu miˇ kʼahˬ-ahˇ aˬ joˆ-ehˇ biˇ-euˬ gaˇ kawˆ pyeuꞈ-eu meh.

³³ Ehˇ kʼawꞈ, Leˬbiˇ tsawˇ jeuˬ-ahˇ Moˇseˬ miˇ kʼahˬ maˬ biˇ nehˬ-a. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˇ nehˬ-eu jeˬ laꞈ kʼoeˇ, aˬ yawꞈ maꞈ-ahˇ oꞈ-eu shaˬ bymˇ jaˆ meh lehˇ, aˬ yawꞈ maꞈ-ahˇ Moˇseˬ ehˇ nehˬ-euˬ meh.